بعد ما سد الخط هشام مباشرة اجه عمر لغرفته :
عمر : ها هشام ؟
هشام : عمر هسه شفت فيديو متظاهرين ديطالبون الكوادر الطبية انو يروحون لساحة التحرير حتى يداوون المصابين يعني يشكلون مفارز طبية لان اكو جرحى ميلحكون يوصلون للمستشفى كلش دمي فاير عليهم وقررت اروح هناك
عمر : اجي وياك اني بس الدوام شلون ؟
هشام : مثل ما المستشفى تريد ؟ العراق هم يريد
والتحرير محتاجتنه اذا اني وانت منوكف وياهم منو يوكف لازم نسووي شي
خلي نروح لساحة التحرير وره الدوام !
عمر : هاي هيه وياك اني على الموت شتكول نبلغ باقي الاطباء الي يكدر يساعدنه او يقدم شي حتى نصير مجموعه شتكول؟
هشام : مو مشكله عمر هالموضوع راح اعوفه عليك اليوم اني راح اروح هناك واشوف الوضع شنو واتفق وياهم
عمر : تمام يله انت ارتاح واني ارجع يم المرضى
هشام : اوك عمر
وبعد كل الي صار ويا هاجر وبعد ما عصبت امها عليها راح الاب لغرفة هاجر حتى يراضيها بعد ما ضربتها امها
ابو هاجر : هاجر بابا حبيبي لتضوجين من ماما لان ولله لو ما تحبج وتخاف عليج ما تتصرف هيج وياج
واحنه حذرناج وتناقشنه واول مره تسويها وتكسرين كلمتنه وتروحين الي سويتي غلط
هاجر ضلت تبجي بعد هالكلام :
ابو هاجر : لا تبجين كافي امشي نزلي نتعشه سويه واعتذري من ماما
هاجر: بابا لخاطري خلوني اروح لله يخليك ولله من رحت اليوم ماصار شي كلها دتروح ليش اني ماروح
معقوله رند وباقي الطلاب اهلهم ميخافون عليهم وانتم بس الي تخافون عليه ؟
ابو هاجر : خلص لكيت حل مناسب يرضيج ويرضينه نروح اني وياج كل يوم كم ساعه ونرجع
ها شتكولين ؟
هاجر : اموت عليك لله لا يحرمني منك هسه ارتاحيت نفسياً
ابو هاجر : يله لعد خلي ننزل ناكل مو متنه من الجوع من وره حضرتج زعلانة
نزلت هاجر وتريد تعتذر من امها :
هاجر : ماما اني اسفة بعد ماعيد هذا التصرف
ام هاجر : اتمنى ما تمشين وره كلام صديقاتج مرة ثانية
هاجر : اني وبابا حنروح لساحة للتحرير وبعد ماروح وحدي
ام هاجر : صدُك علي راح تروح انت وهاجر ؟
ابو هاجر : اي نروح كم ساعه ونرجع اني وعدت هاجر
ام هاجر : ودوامج هاجر ؟
هاجر : على طاري الدوام اليوم بالمظاهرات كالو مانداوم بعد وكل الطلاب قررو يروحون لساحة التحرير
