راح ابوهاجر حتى يرجع هاجر ورند من ساحة التحرير لان الوقت كُلش تأخر، لما وصل ابو هاجر شاف العوائل كاعدين يقرون قرآن
جان صوت القرآن بهذي اللحظة اقوة من صوت الحزن،
راح ابو هاجر للمفرزة وشاف رند وهاجر وعمر وهشام وباقي الاطباء ديقرون قرآن ودموعهم تنزل
ابو هاجر : السلام عليكم شباب شلونكم
هاجر بس شافت ابوها ركضت وحضنتة وضلت تبجي
هاجر: بابا شفت شنو صار !! بابا كُلهم ماتوا
ابو هاجر: اهدأي حبيبتي مابيدنه شي عليهم الله كاتب هالشي ومانكدر نعترض على حكم الله ، الله يرحمهم ويصبر اهلهم
وانتم ماقصرتوا وسويتو العليكم
رند: الي صار اليوم مراح ينسي عمو صارت التحرير ساحة دم
بس جثث وريحة الموت بكل مكان
هشام : شلونك عمو
ابوهاجر: گلبي محترك على الشهداء وعليكم وعلى الوطن
عمر:كل يوم موت كل يوم شهيد عمو تعبنة صح ماراح نتراجع وراح نبقة هنا بس خايف يفشل كُلشي دنسوي
ابو هاجر: لا عمر مراح يفشل صدكني من داشوفكم كل يوم شلون دتعبون ودتخدمون وطنكم بأخلاص صار عندي يقين بهاي المظاهرة كل الدول مستنكرة الي صار اليوم ودتوجه اللوم على الحكومة وهذا الشي اكيد بي فائدة كبيرة راح تلاحظوها بالايام الجاية
ترة الجايّ صعب لازم تتحملون وتتكاتفون
هشام: لو اعرف موتي بهالمكان مراح اعوفة عمو وراح ابقة حتى لو الكل تراجعو
عمر: اني صح خايف من فشل المظاهرة بس اني موقصدي اعوف ساحة التحرير
ابو هشام : حقك عمر تخاف وحقك هشام متكدر تعوف ساحة التحرير بس تأكدو انو ضريبة التغيير هي الدم يعني راح يستشهدون بعد هوااي شباب ممكن نقدم مليون شهيد حتى نغير الوضع ، هذا التغير مراح يجي بالسهل راح تضحون بنفسكم وبأصدقائكم حتى تغيرون وضع هذا البلد لذلك الايام الجاية راح تصير صعبة وتتلف الاعصاب فلازم تتحملون الديصير وتتقبلوه وتسندون بعضكم
هاجر: مداكدر انسه منظر الامهات ، داحس كُلشي اسود
ماتحمل اشوف احد يتأذه وماكدر اخفف عنه ألمة ولازم ابقى قوية ومابجي!؟ من اشوف الموت دياخذ شبابنة الي جانوا البارحة ديضحكون ويانة واليوم همة جوة التراب!؟ يارب ارحمنة مدنتحمل اكثر
ابو هاجر: اذاً بعد لا تجين هنا هاجر وابقي بالبيت وتابعي اخبارساحة التحرير من الانترنت
هاجر: مستحيل مااكدر اعوفهم !
ابو هاجر : لعد كومي واوكفي على حيلج وصيري قوية وساعدي الكل وهذي الدموع خليها بداخلج لان مراح ترجع الي راح بالعكس!؟،
كُلكم كوموا وعيشو الواقع الديصير لان حزنكم مراح يغير شي دموعكم مراح تغير شي انتم اطباء ! لازم كلبكم يكون قوي حتى تسندون الضعفاء !الي صار صعب ! ومقهورين حقكم!؟ بس مو من حقكم تكعدون وتبجون وتزيدون الوضع صعوبة اكثر!؟
الفاسدين من راح يشوفكم بهذي الحال يعتبرون نفسهم انتصرو وراح يفضون هذي المظاهرة بالاجبار كومو واوكفوا ويا اخوتكم الباقين وساندوهم !
