هاجر : لازم توكفو عند حدة بابا خايفة يرجع يتعرضلهم ترة وائل مريض نفسي ميهمة اي احد غير نفسة
ابو هاجر : شوفي لو عدهم حق جان اخوية خابر بس لحد الان ماكو ردة فعل على السويتي بوائل وماتوقع بعد يتجرأ يسوي هيج حركات
هاجر : ماعندي ثقة بي لان الي يواجه ابناء بلدة بالسلاح بسبب سوء فهم لا تترجة منة خير ، تدري يكول على مظاهراتنة مهزلة وراح تنتهي
ابو هاجر : للأسف هو وابوه ميفكرون بغيرهم وميهمهم وضع البلد ولا يهمهم الناس شلون تعيش بهذا الزمن الصعب ، حقوق مسلوبة، جوع ، فُقر ، يتم ، هذي الامور مايفكرون بيها لان انعدمت عدهم الانسانية
هاجر: بديت اشكّ بوطنية عمي ويمكن هو فرحان على القتل الي ديصير بالمظاهرة ومساند قوات الشغب لان دينظر لقضيتنة مهزلة
ابو هاجر : الفلوس والمناصب تعمي عيون ضعفاء النفوس واخوية ضميرة ميت تجاه مطالب الناس وحقوقهم وضعف كدام المنصب ومو من مصلحتة يوگف ويا المتظاهرين
هاجر : فضّل مصلحتة على حقوق الناس ، شلون يكدر ينام مرتاح
ابو هاجر : السلطة موتت احساسة بأبناء شعبة
هاجر : الحمدالله انو انت ماتشبة
ابو هاجر : عمري مافضلت اموري الشخصية على غيري من جنت صغير اما حسن عاش عمرة كلة مصلحتة فوق كُل شيئ وللاسف والدي الله يرحمة ماجان يمنعة من اي شي ومدللـة بطريقة خلت حسن كُلشي يريدة يحصل علية مهما جان الثمن وبدون تعب وهسة حسن ديعامل وائل بنفس الطريقة وميحاسب ابنة نهائياً ومتاكد لو عرف بالي سواه وائل راح يوكف ويا وائل ضدج وضد الدنيا كلها
هاجر: الله موجود ، يجي يوم لكل الظالمين ويدفعون الثمن
ابو هاجر: خطورة الوضع دتزيد وانتبهت بالاخبار البنات من ديروحون لساحة التظاهرديغطون وجوهم حتى لا تنحفظ وجوهم فـ منا ورايح تغطين وجهج حتى رند بلغيها بهذا الشي صح كُلشي بيد الله بس لازم تاخذون حذركم
هاجر : حتى البارحة رائد بساحة التحرير كال بعد من تجون غطوا وجوهكم
ابو هاجر : رغم خطورة الوضع بس اني دااسمحلج تروحين لساحة التحرير ومافضلتج على العراق كلت خلي تروح وتأدي واجبها وتكون من ثوار العراق ودااتحمل مسؤلية كبيرة لان اني مسؤل عنج فـ اتمنى تديرين بالج على نفسج لان حياتج هي حياتي وحياة رونق
هاجر: شكراً بابا على كُلشي اعرف ديضل بالك علية بس انت كلتها ! ماافضلتج على العراق واني هم ماافضلت ولا راح افضل روحي على العراق وميهمني الموت شي واحد يهمني ميروح تعبي وتعب المتظاهرين بكل انحاء العراق وابد لتخاف علية اني دايرة بالي على نفسي
