التمو شباب التحرير يم المفرزة وجايبين السماعات لرائد حتى يحجي والكل يسمعوه
رائد : شبابنة الاحرار اليوم اريد احجي وياكم بموضوع مهم واريد تركزون وياي حتى نعـــالـــج هذي المشكلة قبل لا تكبر اكثر ،البارحة اكيد اغلبيتكم شهدوا موقف رخيص ودنيء صار بساحة التحريرحتى يسيؤن لمظاهرتنة طبعا كل شخص يتصرف برخص هنا ميمثلنة واحنة اسود التحرير نستنكر هذا الموقف البشع
واحب اوجه هالكلام لضعاف النفوس الي ميكدرون يواجهونة بجرأة
ومن كد ما مخوفتهم مظاهرتنة ديحاولون ينهوها من خلال تسقيط سمعة المتظاهرين ترة متكدرولنة احنة هنا زلــمّ مايهمنة الموت دمنة مقدمي للعراق يعني مانخاف من اي شي وماعدنة واحد يتحرش بشرفة وعرضة ترة البنات الديجون هنا بالساحة عرضنة وشرفنة ومانقبل احد يسيء لشرف بناتنة الطاهرات والكلام الي دينتشر على الكروبات والبيجات كلة كذب وافتراء لان حكومتنة من تاكدت ميهمنة الموت قرروا يستخدمون الاساليب الرخيصة حتى يشوهون سمعة الثوار فـــ ياشبابنة وبناتنة كلكم مسؤلين عن تطهير ساحة التحرير من كل مندس رخيص وميمثلنة اي فعل غير اخلاقي والحمدالله احنة اسود الرافدين معروفين بشهامتنة واخلاقنة وغيرتنة فــ لتسمحون لأي نموذج تعبان يأثر علينة والي يخالف مبادئنة ويتصرف بطريقة رخيصة ينطرد من ساحات الاعتصام وينفضح كدام العالم كلها حتى يكون عبرة لكل مندس خسيس وقد اُعذر من انذر ترة هنا گاع طاهرة هنا دم الشهداء هنا دموع امهاتنة هنا حقوق وامنيات دتنتظر النصر لازم نكون ايد وحدة حتى ننصر الشهداء هذي الگاع شريفة لاتسمحون للأنجاس يدخلوها هذي ساحة الاحرار
طبعاً بعد كلام رائد ارتفعت الاصوات وزادت الهتافات ،وضلوا اسودنة ايد وحدة بكُلشي رغم كلُ االظلم الي يتعرضون الة ورغم الموت وكل الاساليب الرخيصة الي اتبعتها الحكومة والجهات الفاسدة في سبيل تنهي هذي المظاهرة لكن الشباب الاحرار ثابتين على موقفهم ومستنكرين كل الافعال الدنيئة ومُصرّين ياخذون حقهم المسلوب كل هذي السنين والي قوّة موقف هذي الثورة مشاركة طلابنة الشرفاء الي كدرو يوصلون صورة الظلم الحقيقة الي عايشهة المواطن العراقي الى العالم الخارجي واستمرت هتافات الاحرار في ساحات الاعتصام :
لاسياسة ولا احزاب بس هي صحوة طلاب
لاسياسة ولا احزاب بس هي صحوة طلاب
فوك صوتك ياوطن ما يعلى صوت
ومتخوفنة المنايا كلمن بيومة يمــموت
وبعد مانسكت عليهم موعوايدنة السكوت
.
.
.
.
.
اما هاجر لّمت البنات :
هاجر : شوفو بنات احنة مسؤلين عن ديمومة هذي المظاهرة
اي وحدة منكم تشوف بنية تتصرف بطريقة غير لائقة او تجي هنا بلبس مُلفت للنظر حتى تسيء النة لازم تطردها لان هذي قضية حساسة جداً ترة الحكومة دتنتظر زلّة علينة حتى يقمعون المظاهرة هنا ساحة اعتصام الي تريد تجي هنا لازم تحترم المكان اني مااريد اشكك بوطنية اي بنية هنا واظلمها من لبسها فرجاءا الكل تلتزم حتى متكون سبب في تشوية سمعتنة وأن جان هذا التصرف غير متعمد
يعني من نجي هنا لازم نحترم المكان ويكون لبسنة محتشم وميثير الجدل وماتوقع وحدة بيكم تحب تظهر بطريقة غير لائقة بعيون الكل
احنة هنا دنطالب بحقوقنة دندافع عن حقوق المظلومين دننصر الشهداء مالة داعي نتزين بطريقة تشوه مطالبنة هنا مو مول ولا جامعة ولا حفلة حتى نكشخ ، احنة البنات العراقيات مثال للعفة والشرف لازم العالم كلة يشوفنة بالطريقة الصح ومداكول هالكلام حتى تلبسون الحجاب اوتگلبون ستايلكم كل الاريدة يكون اللبس محتشم ومستور لاتسمحون للفاسدين يستغلون سمعتنة حتى يسقطون مظاهرتنة اني وانتم دنتعب وعايفين اهلنة وكُلشي حتى نأدي واجبنة ويا عراقننة وشعبنة المظلوم احنة شرارة الثورة خلي هالشي ابالكم
احنة جيل التغير والتاريخ راح يذكر جهودنة فـ لازم نأدي واجبنة بأحسن صورة احنة امل العراق
