نم بين حنايا قلبي

١٤

نون وقفت و كانت مستغربه ف ماهر و ف كلامو حاولت تتكلم بس ماهر بقا بصرخ ..

_قلتا ليكي انا غلطان و م راجل اي عشان عملتا كده فيكي بس عايزاني اعمل شنو؟!..وريني اعمل شنو!!( قعد ف الارض و خته يدو ف راسو .. نون اول مره تشوفو كده ٫ قعدت جمبو و بقت تبكي من غير تحس و هو اول م شافها بتبكي بده يستوعب انو دي نون ..)

  ماهر مهما كان ضعيف و مهما عصفت بيهو الحياه بتفضل نون هيا الفاصل بينو و بين نهايتو ..

  بقا بمسح ف دموعها و يدو بترجف و بتكلم بصوت واطى ..

_نون م تبكي💔م تحرقى لي روحى اكتر م هيا محروقه .. انا بستحمل اي شى ف الدنيا الا دموعك ي نون ..

  نون بعد سمعت كلاموو ده بقت تبكي زياده !..

=م قادره استحمل اشوفك كده ٫ ماهر وريني مالك ؟!..عمرك م كنتا كده ي ماهر ف شنو؟!..

  ماهر مسكه من يدها و دخلا جوه الصاله ..

  قعد جمبها و طلع تلفونو وراها الرسايل البتجيهو طول الفتره الفاتت ..

  الرسايل كانت غامضه بجد .. و نون عشان مسكينه صدقت انو ده السبب و هو من جوه بتقطع عشان مستقل ثقتو فيها و م قادر يقول ليها السبب الحقيقى للبحصل !..

  ابو ماهر اتوتر شدييد بعد مكالمتو مع ماهر و بده يتذكر تفاصيل حياتو الوصلتو ل هنا ..

  هو و ماهر و ام ماهر كانو عايشين ف الامارات ..

  كان بنزل السودان من فتره ل فتره ..
  و ف فتره كده اتعرف ع وحده ف السودان ..

  ابو ماهر كان فاقد الحب ف حياتو ..
  كان محتاج يحس نفسو راجل و لقا الحاجات دي ف وحده اسمها رانيا .. 

   قدر يلعب ع مخها بأسم الحب و اتزوجا زواج عرفى من غير زول يعرف ..

  أجر ليها بيت و بقا كل م يجي السودان ينزل عندها و بعدها بفتره رانيا حملت و جابت ليهو ولد ..

  حسه بخوف انو ممكن يتكشف ف يوم بس خوفو كان بختفى لمن يتذكر انو مستحيل ماهر و امو ينزلو السودان ..

وفضل مستمر معاها  بعدها ب 4 سنين رانيا حملت تاني بي بت و طلبت من ابو ماهر يعترف ب الزواج ده و هنا هو ظهر ع حقيقتو و قطع التواصل معاها نهائ !...

  ف يوم جات مكالمه ل أم ماهر و كانت الصدمه بعد ردت ..

_كان صوت مره بتبكي و بتتكلم .. انا عملتا شنو عشان يحصل فيني كده؟!..راجلك خلانى ف نص الطريق بعد جبته منو ولديين .. ولدين م عندهم ذنب بكل البحصل ده ليه يعمل كده فيني و ف عيالو ليه؟!..
  زوجك متزوجنى زواج عرفى و بعد جبتا ليهو ولد و بت سابنى ..

  ف اللحظه دي ام ماهر م قدرت تستحمل الصدمه .. و اصلا كان عندها ضغط و قعت طوالى ..

  ف البدايه حصلت معاها مضاعفات و أتشلت و م كان بتقدر تتكلم ..