احب اقول الاول ان البارت اللي جاي هيوضح كل حاجه وهتفهموا اكتر .. علشان انا عارفه انكوا مكتئبين من الاحداث 😆♥️
بالمناسبه انتو شانين هجوم شرس على حمزه وروفيدا ومش طايقنهم اه بس دول اكتر اتنين محدش يتوقعهم صدقوني ... وبجد بتلذذ وانا بكتب فقرتهم 😂
احب افهمكم حاجه
دلوقتي انتوا منتقدين تصرف دارين وشايفين انها هبله علشان محكتش حاجه عن روفيدا !!
انا عموماً بكتب بواقعيه جداً يعني بتخيل المشهد والمشاعر علشان اقدر اطلع سلوك منطقي للشخصيات
دلوقتي دارين موقفها من البدايه انها كانت رافضه تيجي القصروبعدين جت مضطره بسبب والدتها وبعدين في ظل المها اللي محاوطها بتواجدها في مكان هي شايفه ان اهله كانوا السبب في موت والدها .. الا ان طرقها تلاقت مع ادهم واللي هو شخص عملي ومسؤول وواقعي ده غير انه معقد ومجروح قبل كده وبيكره الحب وبيكره حياته ذات نفسها
كل شخص شاف في التاني شيئ مختلف وبدأو يحبوا بعض وفي ظل ما ادهم راح اعترفلها بحبه بطريقه غير مباشره " لما رسملها لوحه"
الا انه واجه رفض دارين الغير مبرر بعدها " اللي بسبب والدتها "
فحاول يلم كبريائه وغروره ويبعد خوفاً من انه يسقط في علاقه تجرحه تاني ... وده قرار منطقي مش معقوله شخص عاقل هيرمي نفسه عليها وهو لسه يادوب عارفها من كام يوم + انه قوبل بالرفض منها
ودارين قررت تركز في مستقبلها ... وبعدين اتحطت في موقف انها تبقى شاهد عام على مؤامره بين اتنين في وجهة نظرها هما قريبين من غسان ... ياسر ابن عمه وروفيدا اللي على حد علمها هي فرد من العائله كمان
فبالتالي الموقف صعب ومحتاج تفكير علشان تتصرف بذكاء ومحتاجه اولاً دليل قوي علشان غسان يصدقها وهي بتتهم افراد عائلته بحاجه مُشينه زي كده .. فقررت تروح لادهم لانه اقرب شخص لها وتفهمه اللي بيحصل خصوصاً انه هو اللي ماسك شغل ابوه ثانياً
ادهم مقبلش يسمع وغسان مسنحتش الفرصه ...وبعدين فجأه اتصال "من سكرتيره غسان زي ما بتدعي " انها عندها معلومات عن روفيدا اللي هيا اساس المشكله
اكيد هتروح علشان تلاقي دليل يكشف كل ده وترتاح بس فجأه الموضوع يتقلب وتبقى هي الضحيه وتصحى تلاقي الكل موجه اصابع الاتهام عليها
مش معقول هتسيب صدمة انهم بيتهموها بشرفها وتروح تقول اصل روفيدا بتلعب من ورا غسان ، مش منطقي وهي اساساً مش معاها دليل يثبت ولازم كشخص عاقل تفكر هتقول ايه
صح حمزه حكى لها ان دي مؤامره واداها امل بس وبعدين راح رميها بصدمة ان في علاقه حصلت بينهم وانه جوا لعبة روفيدا
فهي في حالة صدمه ورعب ومازاد الوضع سوء هو تواجد ادهم اولاً وامها ثانياً
ادهم مظلوم صح ، حمزه انتهازي واناني " ومننكرش انه ذكي " صح ، روفيدا الانتقام عميها ، وامآل الحب عميها ونهاد وامها عاوزين الحرق اشطا 😂🤷🏻♀️
اجمدو كده امال علشان اللي جاي احلى 😂💜
" بالمناسبه انا بفرح جداً بتعليقتكم وبتفهمني انتوا شايفين اللي بيحصل ازاي فمتحرمونيش منها " ♥️
الى اللقاء فيما هو قادم ♥️
