بعد مرور يومين
اجتمعت العائله حول المائده تتناول الطعام ، ولكنها لم تكن اجواء عائليه هادئه بقدر ما كانت اجواء متوتره مشحونه
قطع الصمت ماجد وهو يقول
- شغلوا التلفزيون ، اما نشوف حاجه نسمعها
اومأت سهير وقامت فتحته واعطت جهاز التحكم لماجد ليقلب على قنوات اخباريه ثم قال
- مبقناش نعرف ايه المصايب اللي بتحصل في العالم ،من كتر ماهي بقت موجوده في حياتنا
انهى كلامه بنظره جانبيه نحو دارين التي تركت المعلقه من يديها وتنهدت بلامبالاه ، بينما نظرت امينه نحو ابنتها ورمشت بعينيها لتهدئها
قاطع شرودهم صوت التلفاز وهو يقول
- ننقل لكم اهم اخبار رجال الاعمال ، غسان شاهين يفتتح فرع جديد من شركته في روسيا كما ان نجاح اخر مشروع له جعلهم يطلقون عليه رجل الاعمال والمستثمر الاول في مجاله، وهذه هي عادة ال شاهين في السنوات الاخيره نجاحات تتلو الاخرى
نظرت سهير وقالت شاهقه
- مش دول اللي جوزك مات في مصنعهم
ثم قالت بنظرات ذات معنى
- اووووه هي دي اللي بيسموها حياه مش الفقر اللي احنا عايشين فيه
ابتلعت امينه غصه مريره وهي تنظر نحو التلفاز ليقول ماجد بضيق
- ويارتنا خدنا حاجه لما رفعنا القضيه اياها من ٥ سنين ، رغم كل الفلوس اللي عندهم رفضوا يعوضونا عن موت هشام
نظرت له امينه وقالت باستغراب شديد
- يعوضونا ؟
ثم تابعت بحزن
- هو في حاجه ممكن تعوضنا عن موت هشام ؟،، في حاجه ممكن تعوض مكانه وتنسينا اللي حصل ؟
امسكت دارين يد والدتها المرتجفه وقالت بحزن
- ماما اهدي
هزت امينه رأسها بأسى ثم قامت وتوجهت الى غرفتها ، بينما نظرت دارين لعمها وزوجته بقرف وقامت هي الاخرى
تنهدت نهاد وقالت بحنق
- اووووف ،،، الواحد مبقاش عارف ياكل بهدوء
ثم رمت الملعقه من يديها وقامت تتوجه نحو غرفتها بينما نظرت سُهير نحو زوجها وقالت بتفكير
- مانرفع القضيه تاني مش يمكن نحصلنا كام الف علشان يكتموا على الموضوع ويلمو الفضايح ؟
نظر ماجد لسُهير بضيق ثم قام هو الاخر وهو يتمتم بقلة صبر
- لا حول ولا قوة الا بالله
تأففت سهير ثم امسكت بشريحة خيار ووضعتها في فمها وهي تقول رافعه حاجبيها
- خليكوا كده ، عيله فقريه
**************
بعد منتصف الليل
كانت نهاد جالسه تتابع التلفاز بملل بينما تجلس دارين في الجهه الاخرى تقلب في احد الصحف
بينما كانت امينه تجوب الغرفه ذهاباً واياباً بتوتر وهي تقول بقلق واضح
- يمان لسه مارجعش الساعه بقد ١٢ ونص ، هيكون راح فين ده كله
