٣٠ يوم حياة (مكتملة)

الفصل الأول (أحداث اليوم الاول)

(ملحوظة هذه الأحداث و الشخصيات هي من وحي الخيال و أي تشابه بينها و بين الواقع فهي مجرد صدفه غير مقصودة ، مع تقدير المؤلف لكل الفئات المختلفة )

اليوم الاول 1/7/2019

انا سيف مهندس برمجيات عندي 24 سنه اتخرجت من الكلية بتقدير امتياز و كنت علي بعد خطوات و اتعين معيد .

مقدرش اوصف فرحتي يومها كانت عامله ازاي بس ( ضحكت ضحكه هادية فيها الم )

اليوم ده لما كانت قاعد علي النيل و صوت الموج هادي كانت حوالي الساعه 9:30م ، يومها كنت سهران مع اصحابي بنحتفل بالتخرج بتاعي في الحقيقة مليش اصحاب كتير بس هما اتنين صحابي من ايام المدرسة .

اعرفكم بيهم ،كريم دكتور او يعني باعتبار ما سيكون .. اي نعم بقالو 9 سنين في الكليه طب بس مصيره يتخرج و يبقي دكتور ، كريم اشطر دكتور قابلته في حياتي بس هو عنده مشكله مع الامتحانات ، اخر امتحان دخله من التوتر نسي حتي الاساله الي مذاكرها ، بس ذكي و يعتمد عليه .

انما التاني اسمه نور .. نور خريج كليه تجارة بس شغال علي توك توك.. قدم في شركات كتير بس كل مره مكانش بيتقبل حتي من قبل الانترفيو لانهم كانوا عايزين حد معاه خبره 100 سنه و ال cv بتاعه فيه كورسات من المريخ بشرط تكون معتمدة من مجلس جامعات الفضاء الدولي .. و المره الوحيدة الي اتقبل فيها قبلوه علشان كانو فاكرين نور ده بنت ، و لما شافوه يوم الانترفيو قالوله هنبقي نتصل بيك و من ساعتها وهو شغال اي حاجه و مؤخرا شغال علي توك توك ، نور هو صاحبك الي ديما في ضهرك الي لو قلتله يلا ننط في النار مش هيقلك لا ، عنده فورمه حلوه يهد جبل بس مندفع و جسمه بيتعامل قبل عقله .

كريم : بص يا سيف احنا عاملينلك الاحتفال ده علشان انت هتبقي معيد المهم متبقاش تتكبر علينا بعد كده .

نور : انت متعرفش الاحتفال ده احنا كلفنا فيه ازاي ع فكره ، قوله يا كريم .

انا : انت هتقسم عليا يا اخويا انت وهو ، كلفت في ايه ؟ ده الكانز انا الي عازمكم عليه

نور : و الدرا المشوي !! ، انت بتاكل و تنسي خلي بالك .

انا بتريق : لا كده عندك حق تكاليف فعلا .

كريم : خلاص بقي يا جدعان بعيدا عن الهزار انا فرحانلك اوي يا سيف انت تستاهل اكتر من كده .

انا : عقبالكم يا جماعه لما كل واحد فيكم يحقق حلمه و وعد مني احتفل بيكم بجد و تكاليف بجد مش درا مشوي يا بتاع الدرا انت .

نور : ياعم انت بنهزر معاك الله ، مبروك ياعم ..طيب بقلك ايه هم مش محتاجين اي حد يشتغل معيد تاني ؟

انا : يابني انت عبيط؟ هل انت عبيط ؟ ، مش محتاجين معيد عنده خبره في التعامل مع التكاتك لا .

(بصيت في الساعة ) طيب انا لازم امشي الساعه عشره و انا معايا مقابلة مع عميد الكليه بكرا ، يلا سلام .

سبتهم و مشيت و انا كل الي بفكر فيه هلبس ايه بكرا وانا رايح للمقابلة و فجاه الدنيا ضلمت و فوقت ع صوت زحمه و ناس بتقول اسعاف اسعاف ، و رحت المستشفي

الدكتور : حمدالله ع السلامه حاسس بايه ؟

انا : شويه دوخه و زغلله كده .. هو ايه الي حصل ؟

الدكتور : الناس بيقولوا انك عديت الطريق و انت مش مركز فجات عربيه خبطتك ، بس جات سليمة كدمات بسيطة .

انا : طيب امتي اقدر امشي ؟

الدكتور : انا كنت هكتبلك علي خروج بس لما قلتلي موضوع الدوخه و الزغلله ده قلقني خليك لحد بكرا و نعمل شويه فحوصات نتاكد انك تمام بعدين تخرج .

ساعتها مكانتش بفكر غير في المقابلة وحلمي الي باقيله عليه خطوه ، فقررت اتصرف و بعد ساعه

انا بقول للمرضه : لو سمحتي انا بقيت كويس خلاص ممكن اخرج بقي !

الممرضه : حاضر هقول للدكتور يكتبلك ع خروج .

بعدها خرجت كانت حوالي 12:30 ص .

يتبع ..