٣٠ يوم حياة (مكتملة)

الفصل الرابع(أحداث اليوم الرابع)

اليوم الرابع 4/7/2019

لما صحيت من النوم مكنتش فاكر انا نمت ازاي ، الي فاكره اني كنت قاعد علي السرير بعد ما كريم كلمني و بفكر في الي بيحصلي و بس .

و لما صحيت لقيت أصوات كتير في الصاله عيال بتجري و ناس بتتكلم و هنا يجي وقت المفاجات العائلية الجميلة خالتي و عيالها ، يعني مفيش نوم ، مفيش حاجه هتفضل يلا ماهي كملت .

لا ولسه المفاجأة الكبيرة هنخدها من امي دلوقتي

ماما : البشمهندس بتاعنا صحي ، صحي النوم يا بني الساعة 12 . قوم سلم علي خالتك و بنتها

انا : ماما انا هطلع اسلم عليهم بس الله يخليكي انا مش فايق لجو بنتها ده

ماما : يا بني البنت حلوه و بتحبك ، خليني افرح بيك

انا : لا يا ماما مش وقته دلوقتي لسه انا قدامي مستقبل ( ضحكت في نفسي وانا بقول مستقبل هو الشهر الي فاضلي ده يعتبر مستقبل!! )

ماما : طيب خلاص خلاص بس قوم

انا لما خرجت الصاله : ايه ده صاله بيتنا دي ولا ملعب خماسي ايه العيال دي كلها

خالتي : ازيك يا سيف مبروك يا بشمهندس ، ده سالي اول ما عرفت قالت لازم نيجي نباركلك

انا : الله يبارك فيكي يا خالتو و تعيشي يا سالي ربنا يخليكي

سالي : ايه يا سيف مش بتسال خوليص ينفع كيدا ؟

انا : يا بنتي بتتكلمي كده ليه ! ، ايه يا خالتو انتي كنتي بترضعيها مايه نار ولا ايه ؟

سالي : عاجبك كيدا يا خالتوش اهو ابنك بيتريق عليا ، طبعا مهو بقي معيد و هيتنك علينا

انا : خالتوش !! لا كده الموضوع بقي اوفر ، عالجوها يا جماعة عالجوها

الجرس بيرن ، تبقي مصيبه لو عمتي كمان جات كده انا هسبلهم البيت و امشي بس الحمدالله طلع كريم و نور

انا : ايه هو النهارده في يوم الزيارات الرسمي ! ايه الي جابك يابني انت و هو ؟

كريم : عايزك ياعم في مشكلة

انا : طيب تعالو عندي جوا الصاله مش فاضيه

لما دخلنا الاوضه كنت ناسي الاشعات بتاعتي علي المكتب

انا : ايه في ايه ؟

نور : في عيل مع خطيبه كريم في الشغل بيضايقها

انا لكريم : ايه الكلام ده ؟ انت امتي خطبت ؟

كريم : مش خطيبتي بالظبط يعني

انا : مقلتش قبل كده يعني انك مصاحب حتي !!

كريم : ايه يا سيف هو تحقيق هنسيب المشكلة و نمسك في قلتلي و قلتلك !

انا : عندك حق اسمها ايه خطيبتك وشغاله فين ؟

كريم : اسمها سمر شغاله دكتوره في المستشفي النيل الخاص