اليوم السابع 7/7/2019
من الصبح
الساعة 9:30 ص كان كريم تحت بيت سمر
كريم : صباح الخير يا حبيبتي ، ايه ده مريم اختك ايه الي جابها ، هو انا رايحين دريم بارك ؟
سمر : صباح النور ، بس بقي مرديتش تسيبني اروح لوحدي
كريم بخوف شويه : ازيك يا مريم عامله ايه ؟
( اصلها كانت شخصيتها قويه حبتين )
مريم : كويسه ، يلا ولا هنفضل واقفين كتير ؟
كريم : اه اه طبعا يلا ، سيف زمانه مستني
و لما وصلوا ماما فتحتلهم و دخل بالترتيب كريم , نور , سمر و في الاخر مريم
و لما شفنا بعض قلت
انا بتريق : ايه ده هما نقلوا مكتب العميد في اوضتي ولا ايه !!
مريم مستغربه : هو انت سيف صاحبه ؟؟
سمر : ايه يا جماعه انتو تعرفوا بعض ولا ايه ؟
مريم : اعرفه ! ، الا اعرفه
انا بهزر : هو انتي كل ما تشوفي وشي تزعقي ليه مش فاهم انا ؟ ، هو انت كده علي طول ولا دي حاله ؟
مريم متعصبه : قصدك ايه يعني انا مجنونه ؟؟
انا بتريق : لا العفو
نور : ما تروقوا كده يا جماعه هطيروا الاصطباحه الي واحد عاملها
كريم بصوت واطي : بس بس يخرب بيتك اصطباحه ايه هتفضحنا اسكت خالص ( بعدين يكمل بصوت عادي ) انا بقول خلينا في الي احنا جايين علشانه
مريم بعصبيه و بتبصلي : اه ياريت علشان نخلص انا حاسه اني داخله مجله مش اوضه بني ادم ، صور و ورق متعلقين في كل حته .
انا : حاضر يا ستي هنخلص ، بصو يا جماعه ركزوا معايا في الرسم المعماري للمستشفي علشان تفهموا بالظبط هنعمل ايه
و بدات اشرحلهم الخطة الي حضرتها طول اليومين الي فاتو الخطة كان هدفها اننا نوصل لموبايل باسم و ناخد منه صور او فيديوهات اي حاجه تبقي دليل ننشرها علي النت بحيث نرجع الكلام في حادثه تحرش البنت بتاعه الجامعة و حادثه التحرش بسمر و ساعتها شكري المعداوي مش هيعرف يساعد ابنه لان الموضوع هيبقي قضية راي عام .
الخطة كانت علي مرحلتين ، اول مرحلة هو اني هدي سمر فلاشه هتوصلها باي جهاز متصول بشبكة المستشفي لمده دقيقة بالظبط ، بعد الدقيقة دي هبقي قادر اتحكم في كاميرات المراقبة الي في المستشفي كلها ، و ده الجزء السهل
اما المرحلة الثانية ، انا و نور و كريم هنخش المستشفي في الوقت الي هتكون فيه مريم تعبانه جدا و طبعا هتروح لاختها سمر في الطوارئ و لان دي اخت الدكتوره سمر فاكيد كلهم هيبقو مشغولين معاها خاصه ان مريم بتمثل حلو ، هنخش وسط الزحمة علي الطوارئ عادي و هنطلع من الباب الخلفي للطوارئ ، الباب ده ياخدك علي طول علي المعامل و هناك في سلم صغير بيطلع علي الدور الثاني للمستشفي الدور الي فيه اوضه العمليات و دي بتتكون من 3 اماكن ، اول مكان هو غرفه الجراحة دي الي بتتعمل فيها العملية نفسها و تاني مكان هو مكاتب للدكاتره يقعدوا فيها وقت التحضير للعملية و اخر مكان هو lockers و هنا بيبقي متخصص لكل دكتور خزنه خاصه به بيشيل فيها حاجته كلها وقت العملية علشان التعقيم ، ( بقف و ببص في عيونهم كلهم ) هنا بقي الفكرة احنا هناخد جدول العمليات الي هتتعمل خلال الاسبوع كله و نختار وقت عملية يكون موجود فيها دكتور باسم و بكده يكون سايب موبايله في الخزنه بتاعته ، هنخش احنا نفتح الخزنه و ناخد نسخه من كل الملفات الي عنده و نرجع كل حاجه ذي ما كانت . في اسأله ؟
أنت تقرأ
٣٠ يوم حياة (مكتملة)
Aventuraرواية باللهجة العاميه المصرية تدور أحداثها حول مهندس محترف في الهاكر و نظم الحماية و يكتشف انه مريض و باقي في حياته ٣٠ يوم فقط (مكتملة)