٣٠ يوم حياة (مكتملة)

الفصل الثالث (أحداث اليوم الثالت)

اليوم الثالث 3/7/2019

صحيت علي صوت موبايلي بيرن كانت الساعه 10 ص ، رقم غريب معرفهوش

مجهول : الو .. بشمهندس سيف ؟

انا بصوت نايم : ايوا مين ؟

مجهول : انا دكتور حسن الي كنت معاك امبارح في المستشفي ، الاشعات و التحاليل بتاعه حضرتك طلعت تقدر تيجي تستملها .

انا بصوت فيه شويه قلق : طيب ايه خير ؟

دكتور حسن : خير ان شاء الله تعالي و نتكلم

انا : طيب انا هلبس وهاجي لحضرتك ..سلام

مكنتش حابب اروح المستشفي تاني ده انا ما صدقت خرجت بس للاسف مضطر اروح .

رغم ان قلبي مكانش مرتاح و كنت خايف بس مفكرتش اخد اي حد معايا وقتها مكنتش عايز اقلقهم .

و قبل ما اخرج من البيت للمستشفي موبايلي رن تاني و بردو رقم غريب ، مكنتش هرد مش عايز اتاخر علي دكتور حسن ، بس دي مكالمه سريعة مش هضر .

المجهول : الو صباح الخير بمشهندس سيف

(دي مريم سكرتيره العميد عرفتها من صوتها ) انا : صباح النور .. مين ؟

مريم : انا مريم من مكتب العميد بكلم حضرتك بخصوص حفله التخرج .

انا بتقل : مريم !! .. اه اه استاذه مريم اتفضلي

مريم : حضرتك الحفلة اتحدد معادها هتبقي اخر الشهر ده يوم 30/7، مفروض تبقي جاهز قبل بفتره علشان انا مش بحب المفاجات ، الترتيبات لازم تمشي كلها مظبوط .

انا : الله ما تهدي في ايه هو انتي كل ما تكلميني تزعقي كده ، اعتبريني جاهز من بكرا ..سلام

قلت في بالي حلوه بس لسانها عايز يتقص منه مترين .. المهم نزلت علشان اروح المستشفي

ولما وصلت هناك بسال علي دكتور حسن قالولي هتلاقيه في الطوارئ رحتله و لسه هنده عليه ،

دخل حد بيزعق و هدومه كلها دم و بيقول : الحقونا في حادثه جايه و فيها حوالي 20 واحد .

لقيتهم كلهم بيجروا ع باب الاستقبال علشان يدخلو الحالات دي ، انا اتمسمرت في مكاني من الصدمه ، ارضيه الطوارئ كان كلها دم و شكل الناس مش قادر انساه ، الناس فيهم الي بيصرخ و فيهم الي مش حاسس بحاجه ، بعدين دخلت بنت متشاله مع نقاله و ابوها كان معاها ، معرفتش اميز لون شعرها من كتر الدم الي كان علي وشها و راسها ، ده تقريبا اكتر وقت مرعب انا عشته في حياتي بعدها جه حد خرجني برا و قالي اني لازم استنا شويه لحد ما يخلصوا الحادثة بعدين يرجعولي .

فضلت مستني وسط صرخات من المصابين و من اهالي المصابين و بعد اربع ساعات خرج دكتور حسن

دكتور حسن : بشمهندس سيف ازيك ؟