عمي ياسر ده عندو ولدو ف قطر شغال اسمو علاء و عندو بتو برلومه اسمها نسرين و عندو تاني تؤام بت و ولد قدر وعد اختي ممتحنين يعني، اسمهم نادر و نادين.
جو كلهم طبعا و جو قعدو معانا من الساعه 1 ضهر فطرو و اتونسنا معاهم و كده و عمي قال انو علاء ف الشهر ده ح يجي السودان و كده و بنفكر نعمل ليو حفلة عشان ليو تلاته سنين م جا السودان، ابوي قال ليو طوالي م عندك اي مشكله بنجهز معاك اي شي بس يجي هو، و بقو يتكلمو ف موضوع امتحان الشهاده بتاع ناس وعد و التؤام ده و اتفقو انو يجيبو ليهم استاذ يقريهم ف بيتنا يركز ليهم المواد الاساسيه طبعا التلاته شايلين علمي، وعد و نادين شايلين احياء و نادر شايل هندسيه،.
خلاص ابوي ضرب للاستاذ و اتفقو انو كل اتنين و اربع و خميس ح يجو التؤام يقعدو معانا عشان الاستاذ ح يجيهم هنا.
ناس عمي جو غيرو لينا الجو و ضحكونا و اتونسو معاي لحدي المغرب قعدو معانا ❤ و مشو بعديها.
انا م اتفاهمت مع زول مشيت طوالي فوق رقدت ف السرير😪، و فتحت تلفوني اتكلمت مع صحباتي شوي و نمت و صحيت مخلوعه عاينت للساعه لقيتها عشره قمت صليت العشا و رقدت رجعت نمت طوالي😂😂.
صحيت الصباح مشيت الجامعه طبعا مرت الايام و عمار بقيت مع قاعده اشوفو كلو كلو و خلاص الامتحانات الفاينل بتاعتنا قربت تجي،😢 و بقيت من بيت زينب ل بيتنا بس شغالين قرايه و جري😪 و ب جاي اهلي مشغولين مع وعد لانو امتحانتها برضو قربت و التيمان كل اتنين و اربع و خميس بجو يقروهم هنا.
ابوي قال لي ي بتي الليله الجمعه ارتاحي شوي شنو الجري ده قلت ليو ابوي والله امتحاناتي الاتنين و خايفه😢 قال لي انا عارفك شاطره و ح تعدي السنه دي ب تفوق❤ م تخافي بس و الليله اقعدي م تمشي مكان لانو بعد المغرب ح نمشي ناس عمك قالو علاء جا من السفر و عاملين ليو حفلة، و م تقولي لي م ماشه عشان ح ازعل قلت ليو حاضر قال لي يلا امشي جهزي حاجاتك لانو ح نطلع المغرب طوالي طلعت فوق خشيت استحميت و اكلت لي سندويش و مشيت ل وعد قلت ليها اها نلبس شنو قالت لي انا لابسه فستان اسود، انتي برضو البسي فستانك الزي بتاعي ده الجابتو لينا ولاء من السعوديه قلت ليها كويس مشيت لبستو، طبعا هو منفوش شوي كده لونو اسود و فيو لمعه و م طويل شديد و بعد الركبه ب شوي و فيو اكمام لكن شفافه و فكيت شعري اصلا كان مكوي، و عملت ميكب خفيف و عملت لي وعد و ابوي قال لينا يلا ي عروسات خلاص كفايه اطلعو😂😂😂😂 طلعنا و مشينا كلنا ناس عمي و لمن وصلنا
يتبع....
