رغم الخفايا

الحلقة السابعة عشر

#رغم_الخفايا 
.
.
الحلقة السابعة عشر
.
خديجه >> توا بنفهم فهمني
ناصر >> تي شن نفهمك بس ؟
خديجه >> ليا نص ساعه نرن نلاقى فيك مشغول
ناصر >> باهي ؟ 🤔 نحكي مع واحد من الشباب وين الموضوع ؟
خديجه >> تحكو نص ساعه وين الموضوع المهم ؟
ناصر >> نحكو علي بضاعة جايه اليومين الجايات
خديجه >> نص ساعه ؟
ناصر >> شن رايك ندزلك رقمه ترني عليه ؟
خديجه >> لابلا دزة الرقم
ناصر >> يعني انا نكذب ؟
خديجه >> ما قلتش هكي ، خليني نصكر عشان ما تكبرش القصة اكثر
ناصر >> ياريت

//
//

ثاني يوم كنا انا وعزام قالبين وجوهنا علي بعضنا 🙄

خشيت للمطبخ درت فطور وكان عزام قاعد فالحوش ما مشش للشغل ، نسمع فيه يحكي عالتلفون مع صاحبه

عزام >> مريض والله نايض راسي مصدع
صافي >> طلعنا من قصة مراتك و اديرلي في طروح مريض توا
عزام >> خرفي تو انا قتلك داوم بدالي ولا قتلك حاجه ؟ 🙄
صافي >> طروح 😒طير

صكر عزام من صافي طلعت انا من المطبخ

انا >> كنك مريض 😒
عزام >> ولا حاجه
انا >> كيف هذي ؟
عزام سكت
انا >> كنك قلنا🙄
عزام >> راسي مصدع ماتزيديش تصدعيه بنخش نرقد 🙄

خش عزام للدار و صكرها و كان يزن يعيط ، غيرتله دبشه وفطرته و حطيته فالمشاي وحطيتله عالرسوم
خشيت علي عزام لقيته راقد

انا >> عزام عزام
عزام مغمض عيونه>> شن فيه ؟
انا >> صبي خوذ بنادول و اشرب ميه
فتح عيونه بشويه وبحت فيا | اتكا عالسرير و خذا من يدي البنادول
انا >> نطفيلك الضي بترد ترقد ؟
عزام >> اه

طلعت و طفيت له الضي و سيبته يرقد

//
//

مرو كم يوم علينا هاديات
تصالحت مع عزام بعد يومين تطنيش علي بعضنا 😂🤭
وناصر و خديجه كانو كل يوووم يتناقرو و كل يوم عركة علي سبب شكل في يوم كلمني ناصر

انا >> الو
ناصر >> اسمعي انا بعت الحوش اللي كنت نبني فيه
انا >> ناصررررر كنك ؟؟؟؟؟
ناصر >> تعبت ازح من البني مزال مشوار طويل بعتها وبنزيد علي حقها ونشري واتي ، وبعدها بنطلع العرس دغري
انا >> ليش مستعجل
ناصر >> خديجه الشهر الجاي تكمل فاينل و بعدها بنكمل وقتي كله نبني ؟ والمشاكل بينا كثرن وكله من تطويلة الخطبه
انا >> اول ما تشري شقة احكي مع خوتك عشان نحددو العرس
ناصر>> خلاص تمام ، انا الاسبوع الجاي حانبيع بضاعة و بحقها نزيد علي عندي و تمشي | بس مش حاندير عرس راه
انا >> شن القرارات المفاجآه هذينا
ناصر >> معش عندي قرش والله كله بنحطه فالشقة والاثاث و الباقي سياق و قصة
انا >> خلاص انت بس كمل موضوع الشقة وما تضغطش علي روحك
ناصر >> خلاص تمام