رغم الخفايا

الحلقة الثانية

#رغم_الخفايا
.
.
.
الحلقة الثانيه

طلعت من الدار >> شن فيه كنكم ؟؟

عادل بحت فيا وخش لدار خبط الباب

ناصر ببرود يشرب فشاهي >> عادل متعارك مع زهرة

انا >> يعني بنقعدو ديما في عياطهم

ناصر حط الكبايه فالحوض >> افطنيلها تو تلقيها فالعشيه جايتنا

انا >> فال الله ولا فالك ماعنديش نيه نشوف وجها بكل

انفتح الباب وطلع عادل

انا >> اس را يفش غله فينا

ناصر يضحك >> خوافه 😂

انا >> انننن

خش علي >> وصال حليب وشاهي

انا >> بسم الله غير نخش نغسل ونصلي تقول مكتوب علي جبهتي خدامه
علي>> صبح يا فتاح
انا >> حول من قدامي

بديت في روتين كل يوم ، ضمي اغسلي طيبي و هكذا ... التمينا عالغدا ودزيت المحمد وسميه فوق و فالعشية طلع كل حد لشغله كلمت سميره اخت سميه قتلها تنزل حمودي وتنزل

نزلت و قعدنا نهدرزو مع بعضنا دق الباب

انا >> لو نقعدو سنة علي مستحيل يطلع يفتح

صبيت فتحت الباب و جمطت مكاني 🙂 لقيت زهرة و امها اللي هي مرات عمي جايين 🙂

زهرة >> اهلين كيف حالك وينك لكي زمان مختفيه

انا >> قاعده لاهيه في طلباتهم ما غباكي 🙂

سلمت عليها هي وامها و خشينا

انا >> وين البنات كنهن ما جن 😒
زهرة >> يقرن امتحانات قريب

في عقلي نقول جايه انتي وامك تقيدن فالاحوال

انا >> هذي سميره اخت سمية 

سلمن عليها وقعمزن وبدا القطاف من زهرة وامها
كنكم ما غيرتو الصالون ، و كنك ما انخطبتي لعند توا ، وكنه عمي ما دورتولش علي وليه وكنكم وعليش وليش وانا راسي صدّع من الاسآله

خشيت للمطبخ بنتفادى الكلام معاهن ب اي طريقه و لحقتني سميرة

سميره >> شد حويييييييلك هذي بتقعد مرات خوك ؟؟ يعني صبيتك 😭 يناعليييي

انا >> مش غير شد حويلي قريب انريش شعري من قطافهن تعبت ، طلعي الفناجين خلينا نديرو شاهي شكلهن مطولات

خشت سميره اطلع في كبايات الشاهي من الدولاب لي جوا علي خشت زهرة

زهرة >> هذي سميرة اخت سميه ديما تنزللكم ؟

انا نبرم فالمطبخ نوتي ونرد عليها مانبيش نبحت في وجها>> البنت امس كيف جت سميه متعبها الحمل وجايه تساعد فيها