أحببت طريدتي قبل التعديل (مكتملة)

الفصل الثالث عشر

( مدينه السحر 🌹)

فى الفندق بشره الشيخ

تفيق من نومها تشعر بالتعب الشديد فبالكاد استطاعت ان تنام بضع ساعات قليله لتاخذ حماما و تبدء فى تصفيف شعرها و الذى قد ياخذ منها ساعات لتجد من يطرق الباب
تتجه بسرعه نحوه غير عابئه بتصفيفها لشعرها الذى يتعبها كثيرا لتجده امامها بوسامته الصارمه و القاتله و بدلته السوداء الانيقه و رائحه عطره التى ملئت الغرفه بسرعه رهيبه
ينظر لها فارس بابتسامه ساحره و يردد: صباح الخير
ياسمين بحرج و قد انتبهت لحالتها الغير مرتبه:صباح النور
فارس: واضح ان لسه قدامك كتير
ياسمين:المييتنج لسه الساعه 9 و دلوقتى 8 و ربع يعنى لسه بدرى
فارس:اممم يعنى مش حنفطر قبل المييتنج؟
ياسمين: اتفضل حضرتك افطر و انا ححصلك
فارس باصرار: حستناكى بره، حاولى تنجزى
ياسمين بطاعه:حاضر

تياس ياسمين من محاوله انهاء تصفيف شعرها لتظفر فى ضيق و هى تجمعه فى كومه غير مرتبه: اوووف بقى ده انا طلعلى عضلات من كتر التسريح
تخرج لتجد فارس ينتظرها امام غرفتها ليصطحبها للمطعم الملحق بالفندق حيث يجلس اخوته ليتناولا الافطار فيقوما بالانضمام لهما
چنى بدلال ماكر:ممكن اعرف يا فارس باشا جدول اعمالك انهارده ايه؟
فارس ضاحكا:اسالى ياسمين يا غلباويه
ياسمين مبتسمه من تدليله لاخته الصغرى: فى مييتنج الساعه 9 و بالليل عاملين للضيوف Welcome party فى النايت كلب بتاع الفندق مع عشا و حيكون الساعه 10مساءا
چنى بخبث: و باقى اليوم؟
ياسمين:باقى اليوم العملا حيخرجو فى سفارى مع مرشدين سياحيين
چنى:يعنى حتكونو معاهم؟
ياسمين بابتسام:معنديش معلومات بخصوص الموضوع ده
تنظر چنى لفارس بفضول و تساؤل:حتروحو؟
فارس و هو يحتضن كتف اخته:لا..... حفسح القمر ده عشان واضح كده انها عايزانى افسحها
چنى بسعاده: اه جدا جدا
فارس بحب:من عيونى
ينحنى فارس بالقرب من چنى ليهمس فى اذنها برقه
فارس:و حعملك مفاجأه كمان بس بشرط
چنى بهمس:شرط ايه؟
فارس بهمس:تقنعى ياسمين انها تقضى معانا اليوم لانى متاكد انها مش حتوافق
چنى بسخافه مقلده اخاها:من عيونى

ينتهوا من تناول الافطار ليتجه فارس و ياسمين لاستقبال الوفد الفرنسى و يبدء الاجتماع و تقوم ياسمين بالترجمه من و الى الفرنسيه بحرفيه شديده فيعجب فارس بمهارتها
~~~~~~~~~~~~~
فى شركات شاهين
جمعه يتحدث على الهاتف:وصلو امتى؟
رجل المراقبه:الفجر
جمعه:و انتو اغبيا يعنى، ليه منفذتوش؟
رجل المراقبه:اتفاجئنا انه مسافر بالعربيه، بس هو كده سهل علينا المهمه
جمعه:ازاى؟
رجل المراقبه:التنفيذ حيكون وهو راجع
جمعه:ماشى حصبر و اهو فات الكتير ما بقى الا القليل،بس تفهم رجالتك عشان عارفهم اغبيه.... انا مش عايز دم مفهوم؟
رجل المراقبه:طبعا يا جمعه بيه
جمعه:يتربى و بس و اوعى البنت اللى معاه حد يلمسها
رجل المراقبه:اوامرك كلها حتتنفذ بالحرف
ينظر جمعه لمروان عم فارس ليردد الاخير بحنق:يعنى ايه مش عايز دم؟ ده مكانش اتفاقنا
جمعه:ولا كان اتفاقنا انى اودى نفسى فى داهيه عشانك و فى الاول و الاخر فارس صاحبى و انا بس باخد حق كرامتى
مروان بضيق:امال انا كنت بساعدك ليه؟
جمعه:انا قلت اللى عندى و لو عايز اكتر من كده اتصرف انت لكن بعيد عنى عشان انا كده فى وش المدفع
~~~~~~~~~~~~~~
فى الفندق بشرم الشيخ
ينتهى الاجتماع و تصعد ياسمين لغرفتها دون التحدث لفارس فيقوم بالاتصال على اخته الصغرى ليخبرها بان تذهب لها
تتجه چنى لغرفه ياسمين و تطرق الباب لتفتح لها الاخيره و هى تعلو على وجهها ابتسامه رقيقه
ياسمين: تعالى يا انسه چنى
چنى: لا لا انسه ايه.... انتى تقوليلى يا چوچو
ياسمين:ماشى يا چوچو
چنى:و انتى بقى دلعك ايه؟
ياسمين:ياسو او سو اللى يعجبك فيهم
چنى: سو احلى، المهم يلا قومى جهزى نفسك انتى جايه معانا
ياسمين:على فين؟
چنى:بصى انا معرفش هو فارس بيقول عامل مفاجأه و ده مفاجأته من العيار التقيل يعنى مش بعيد يكون حياخدنا جزر الباهامز و لا المالديف
ياسمين بابتسامه:ياااه للدرجه دى؟
چنى:اه طبعا، يلا بقى عشان منتاخرش عليه انتى اكيد عارفه انه مش بيحب التاخير
ياسمين برفض:معلش يا چوچو انا مش حقدر اجى معاكم،محتاجه ارتاح لانى منمتش كويس و لسه بالليل عندى شغل
چنى:فى حد ييجى شرم و ينام، نامى لما نرجع القاهره، انا اول ما باجى هنا بفضل صاحيه لحد اما ارجع، و اكيد انتى مش حيهون عليكى تسبينى لوحدى
ياسمين:انتى مع اخواتك
چنى:اه اخواتى الرجاله، يعنى انا بنوته لوحدى مع اتنين رجاله صدقينى دى اصعب حاجه ممكن تمر بيها البنت
تضحك ياسمين على خفه ظل چنى و تردد بضحك:انتى مشكله
چنى:طيب ايه يلا بقى
ياسمين بخضوع:حاضر يا ستى عشان خاطرك انتى بس
~~~~~~~~~~~~
فى منزل السيد غزال
فى تلك الاثناء تحاول نرمين الاتصال بياسمين مرارا و تكرارا و لكن دون جدوى فقد اغلقته الاخيره اثناء اجتماعها و نسيت ان تعاود فتحه
نرمين:مقفول، مش عارفه اعمل ايه؟
شيرين:ابعتى لها رساله فهميها كل حاجه و ابعتى اللينكات بتاعه البوست و هى اول ما تفتحه حتفهم
نرمين بسخافه:ده ايه النباهه اللى نزلت عليكى فجأه دى، اول مره احس انك خايفه على ياسمين بجد
~~~~~~~~~~~~~~~~
فى الشركه العالميه
يرى ياسين الخبر فيصيح بعصبيه:ازاى كده و ياسمين ازاى تقبل بكده؟
ساندى:و انت ايه اللى مضايقك، اظن المفروض تكون قلقان عليها مش مضايق منها
ياسين:اقلق على ايه؟ ده تصوير قديم.... انا مضايف انها سيباه يحضنها بالشكل ده و مقلتلناش ان ده حصل
ساندى بغيره:وده اسميه ايه بقى يا استاذ ياسين؟
ياسين بعصبيه:جرى ايه يا ساندى لو واحده من البنات كنت حبقى مضايق برده
يجلس فى غضب ليردد فى نفسه:انا كده عرفت كان مالها؟ اكيد الحاله اللى كانت فيها بسبب اللى حصل
ليظن ياسين ان تعبها و بقائها فى غرفتها كان سببه نفسيتها المتعبه من ذلك الحادث ليكمل بحنق
ياسين:و اللى مش بنى ادم جاى و هو عارف كويس اللى حصل لها يزعق فيها عشان غابت من الشغل
ساندى بفضول: بس مش غريبه يا ياسين ان فارس باشا ينزل لها بنفسه، دى تانى مره يعرض حياته للخطر عشان خاطرها
ياسين:قصدك على ايه؟
ساندى:مش انت حكيت لى لما كان فى شباب بيعاكسوها و هو اتخانق معاهم و ضربوه و المره دى نزل لها فى الاسانسير
ياسين بضيق:ايوه برده بتحاولى توصلى لايه بكلامك ده؟
ساندى بخوف مصطنع: ولا حاجه بدل ما تتعصب عليا
~~~~~~~~~~~
عوده للفندق بشرم الشيخ