رغماً عني

7 part

كان خطأً بسيط فتراكمت عليهَ ندوب الأخطاء الكبيره

بقلمي

#رغمأ عني 

حفصه الهاشمي

 ملاحظه // بنات من جانت نور تعرف عن عمامها بثالث بارت جان بعد عدها عم بس متوفي من زمان من هوه وشاب اسمه راضي متوفي قبل ما يجون همه على الدنيا اصلاً بس ماعرف ليش ما طلع بسبب النت او خطأ من الواتباد 

ــــــــــــــــــــــــــــ

ياسه ..........

قبل اسبوع تقريباً جان مهاب اخويه عنده شغل خارج المحافظه وهاللمره تأخر هوايه غير عن عادته لان هوه ما يتأخر بس 

يوم يومين ويرجع يكول ما اكدر على بعادكم هوه بالرغم من قساوته ولسانه المتبري منه بس حنون وحباب وما يقبل على الغلط ابد

بيوم جنت راجعه من الدوام اني اروح مشي و ارجع مشي ومرات اخواني يوصلوني لو بهاء لو مهاب 

وعلاء خطيه مبتلي بمصيبته العلكتها امي بركبته لا ليله ليل ولا نهاره نهار ولا عايش مثل البشر الله يعينه 

خابرت على بهاء ميجاوب عرفته ويه اصدقائه بالشغل لان هوه يكولي من ما اجاوب عليج يعني يم اصدقائي لو عندي احد يمي

رجعت مشي وحدي وهيه الكليه قريبه علينه على بعد ربع ساعه  وصلت للبيت طاكه بيه النار من وره الحر 

ونار العراق على حرها نكول الشمس كاعده ويانه وتمشي بصفنه مو كأنو على بعد سنوات 

فتت للبيت اول ما فتت توجهت للاستقبال الخارجي هذا احنه مخلي بس للخطار للزلم يعني ودائمأ مشغلين بي السبلت لو المبردات علي

ويكونن باررد واني متعوده كل ما ارجع افوت انتعش بي واروح بعدين اسبح واغير ملابسي 

فتحت الباب واني افتح الدنابيس من شالي واحجي واندب على هالحر بصوت متعوب 

// اويليي والله مو كاعدين بالدنيا كاعدين بجهنم على هالسميطيه ربي اذا حر الفانيه على كولة مهاب هيج لعد نار جهنم شلون ابعدها عنا يا رب 

سمعت صوت شخص غريب يردلي بصوت رجولي بس هادئ 

// اني سامع حور العين بالجنه بس ما اعتقد حوريات الارض يفوتون بالجنه صعبه صعبه جان فاتو كل الشباب لجهنم وهمه مغمضين عيونهم

رفعت راسي بصدمه من كلام هذا الشخص الغريب 

كاعد بزاوية الاستقبال الي مسويها احنه كعدة ناس غربيه  ومقابيله  نفاظة الجكاير وبأيده الي حاطها على فخذه جكاره وديدخن بيها و

الدخان محاوطه من كل مكان ركزت بملامحه داشوفه هذا منو 

شاب لا والله يطلع بوسط الثلاثينات بس شكله مرتب  شعره بالمقدمه غازي الشيب بكم شعره منهم لابس زي جندي ماعرف ضابط والله ماعرف هوه اني اصلاً اخاف منهم واخواني يضحكون عليه