رواية صدمة
بقلم رهف عصام
الجزء ٣٨#...
بعد م مريم سمعت القصة كلها من رزان..
مريم:-انا هسي حساعدكم كيف م فاهمة
رزان:-لو متذكرة ممكن تدينا معلومات عن الشارع اللقيتيني فيهو او تتذكري كنت انا لابسة شنو وقت الحادثة......يعني حاجات مف زول بكون بعرفا غير اللي بالجد لقاني مرمية ف الشارع الوقت داك
مريم بابتسامة عريضة:-طبعا اكيد...هل دي حاجات بتتنسي يعني
رغد:-ممتااززز حتجي معانا بكرة للصالة الحيعملو فيا عرس سماح و توريها كل الحاجات البتثبت انو رزان هي اختها
مصعب:-بليز يعني و كدا حتكوني خدمتينا خدمة كبيرة
مريم:-لو الشي د بسعدك.....اكيد حعملو من غير تردد
رغد فجاة:-قصدك شنو
مريم:- ولا شي
مصعب:-مريم عايز اتكلم معاك...برانا لو سمحتي
مريم:-مم اكيد ليه لا...
مصعب:-طيب استاذن
مشو مصعب و مريم لغرفة يتكلمو فيها براهم
مروة:-سبحان الله يدوب فهمت ليه لقيت اسامي اهل سماح مشرطة و مجدوعة من فوق شباك بيتكم
رزان:-شنو متين شفتيا و من ياتو شباك؟
مروة:-الليلة و انا جاية بيتك شفتها من فوق الشباك المقبل على العمارة اليمينكم
رزان:-د شباك اوضة امي و ابوي!و الورقة دي شنو يربي
مروة:-بتكون بعد اقتنعت انو انتي خلاص عرفتي اهلك الحقيقيين و حتمشي تسكني معاهم و كدا شرطت الورقة دي يعني بجوز تكون خاتاها معاها سنين و خايفة تعرفي مين اهلك
رزان:-لا دقيقة وحدة صحيح هي اتبنتني بس هي م كانت عارفة اهلي الحقيقيين
مروة:-م عارفة يبت د احتمال بس لا اكتر انا بحب ادقق ف المواضيع عشان كد
رغد:-زولتي زط..اقسم بالله رزان دي غبية اي شي بكون قداما لكن م بتفهمو...حتى الواحد لما يحاول يأشر ليا بشي ف م بتفهمو
رزان:-هويها خلاص معقولة لسه معلقة ف الموضوع د..و بعدين وين مريم و مصعب ليه اتاخرو ف الكلام
مروة:-الله اعلم
رغد جاها فضول كبير تعرف بتكلمو عن شنو...بس م عندها حجة مقنعة تخليها تمشي تشوف الحاصل شنو و تخلي رزان و مروة هنا..اتوقعت يكون بعترف ليا انه لسه بيحبها و هي كمان تعترف ليو..ساعتها هي رابطها بمصعب حينتهي..خافت شديد و ف نص سرحانها سمعت مصعب و هو طالع من الاوضة الكان فيا مع مريم...ساكت ولا قال اي شي طلع و لحقوهو رغد و رزان و مروة بعد ودعو مريم..
ف نص الطريق كانو رزان و مروة بتكلمو اما مصعب كان ساااكت لممن رغد اتحيرت زاتو...اتلفت مصعب فجاة لرغد و اداها ابتسامة كد بينت وجناتو و رجع تاني
رغد ف سرها:-(د مالو يربي خوفني)
بعد م وصلو شارع الظلط مروة ركبت ليا اي ركشة و رغد تمت مشي مع رزان و مصعب لحد م وصلت لعربيتا و اتحركت على بيتها هي زاتا..
دخلو رزان و مصعب البيت و لقو هاجر صاحية
مصعب:-امي خير في حاجة؟المصحيك شنو؟
هاجر:-مف شي بس شالتني نومة قبيل عشان كدا هسي صاحية و م قادرة انوم...بس انتو كنتو وين؟
رزان:-مشيت لمريم ي امي خليت ليك ورقة م قريتيا؟
هاجر:-شنو؟!!!ماشة ليها ليه؟!يا مصعب انت مش قلت لي انكم م قاعدين تتلاقو؟
مصعب:-اي ي امي م قاعدين نتلاقى..رزان مشت ليها عشان موضوع كدا و انا مشيت عشان انهي معاها مسالة قديمة..و انتهت..استاذن..
طلع مصعب فوق طوالي اما رزان دخلت مع امها اوضتها عشان تتناقش معاها ف موضوع
هاجر:-خير ي بتي عايزاني في شنو
رزان:-جاوبيني بصرراحه..كنتي عارفة من زمان انو امي هي سمية؟
هاجر اتوترت بس م بينت:-ك.كيف يعني..لا ابدا..عرفت لما انتي عرفتي
رزان:-م تكككذذذذبي ي امي عليك الله
هاجر:-دي الحقيقة ياخ
رزان:-طب احلفي لي هسي!
هاجر اترددت و سكتت
رزان:-ليه خفتي يلا احلفي
هاجر:-طيب خلاص اي كنت عارفاها سمية من زمن طويل بس م كنت عارفة انو هي زاتا ام سماح
رزان:-انتي لاقيتيها قبل كدا ف خطوبة البت الاسمها مروة!يا امي ياخ م تكذبي والله م ازعل منك بس وريني الحقيقة
هاجر بعد نزلت منها كم دمعة حكت لرزان القصة الحصلت قبل كدا ف السوق..لما رزان لاقت سمية و جات هاجر شالتا منها..و بعداك ف خطوبة مروة عرفت انو سمية هي زاتا ام سماح..
رزان:-امي دا غلط والله العظيم
هاجر:-اعمل شنو بس اتعلقت بيك شديد..و بقيت بعتبرك قطعة مني و م بقدر اخليك تمشي مني بالسهولة دي
رزان:-بس انتي كدا حرمتي امي الحقيقية من شوفتي. يعني انتي حرمتيها من بنتها و ولدك حرمها من ولدها..
قاطعتها هاجر:-تفي من خشمك يا رزان..انا م عملت كدا قاصدة والله بس انا م قدرت استغني عنك بالسهولة دي..بس هسي انا بوعدك خلاص انك حتمشي تسكني مع امك الحقيقية و حتعيشي معاها طول حياتك..بوعدك انو م حتحصل اي مشكلة تاني..و كل الحاصل دا حيتحل..بس سامحيني..
رزان:- لا م تقولي الكلام د انا م زعلانة منك..انا بس زعلانة على امي لانه اتحرمت مني كل السنين دي..بس انا م بعتبرك مذنبة نهائي لانو انتي ربيتيني احسن تربية و حميتيني من اي شي سيء ف الحياة دي..و علمتيني الصح و الغلط و اللي انا عليهو هسه كلو بفضلك انتي..لو م اتبنيتوني اساسا كان ممكن هسي يجي ود حرام يخطفني ولا يتاجرو باعضائي الكلام د كلو ممكن يحصل..يعني انتي ليك فضل كبير علي و انا ممنونة ليك شديد
هاجر:-ممنونة شنو انا امك..و حتى لو عشتي مع امك الحقيقية اتذكري انو انا لسه حفضل بمثابة امك..
رزان:-بحبك
هاجر:-بحبك اكتر..يلا امسحي كل الدموع دي نسيتي انو عرس اختك بكرة..لازم تكوني متظببطة و صحي وين هديتها م جبتي ليا هدية؟
رزان:-استني ي امي جايبة ليا هدية م حصل حلمت بيا ف حياتا كلها اصبري و شوفي بس
هاجر:-سمح لبكرة يلا نومي هسه اكيد تعبانة
رزان:-اي بس اتاكد ازا اي شي جاهز لبكرة
شوية كدا و دخل مصعب لامو..
رزان:-مالك؟
مصعب:-كنتو بتتكلمو ف شنو
رزان:-م بخصك
هاجر:-ما شي مهم
مصعب:-م ميت اعرف الموضوع شنو اصلا جاي اتكلم مع امي يلا انقلعي
رزان:-تتقلع روحك اصلا طالعة قبل م تتكلم..
