رواية صدمة
بقلم رهف عصام
الجزء ٤٠ و الاخير🔥
البارت الاول#..
عند رزان،،
كانت قاعدة بتتظبط و دقت لرغد و طلبت منها بعد تتجهز تجيها ف بيتها عشان يمشو بعربيتها(رغد عندها عربية بس رزان لا)
بعد م انتهت رزان بقت بتتصور و نزلت كم صورة ف الانستا...اما بجاي وصلت رغد بيت رزان..
كان مصعب قاعد برا جمب مسطبة البيت..
مصعب قلع عيونو لما شاف رغد
رغد بعد م نزلت من العربية انتبهت لمصعب
مصعب:-مشنو لكن السماحه دي كلها
رغد كانت لابسة فستان باكمام لونو كبدي مايل للاحمر و بلمع من فوق..و الكعب عاالي لونو احمر..و لافة الطرحة لونا فضي..و شنطة يد صغيرة خاتة فيا تلفونا و فضية برضو..اول م سمعت مصعب خدودا حمرت
مصعب:-واااه بقى فيا خجل كمان
رغد:-ابدا م خجلانة اصلا عارفة روحي سمحة م قلت شي جديد
مصعب:-اسكتي ساي م بتشوفي روحك لما ترجعي من الجامعه و تجي لرزان بكون شكلك عامل كيف
رغد:-انسانا من د كلو خلاص المهم اني الليلة سمحه..استاذن طالعة لاختك قالت دايراني عشان نطلع الصالة بعربيتي
مصعب:-وليه يعني انا م قاعد ولا في شنو
رغد:-بري كنت عايزة اسالها بس قفلت الخط..هو انت ماشي يعني؟
مصعب:-اي ماشي ليه م امشي بدور اشوف تعابير وش سماح لما تعرف انو اختها هي رزان
رغد:-ايوااا..طب خلاص يعني انا اتخارج ولا شنو
مصعب:-لا م عايز امشي بعربيتي شايفاها وسخانة كيف خليني اسوقكم بعربيتك
رغد:-لالا عربيتي مف زول بسوقها غيري
مصعب:-لازم اسوق انا خايف تعملي بينا حادث ولا حاجه
رغد:-انن انن ظريف..انا بسوق لي سنة من غير رخصة و م قبضوني
مصعب:-في حالة قبضوك هسه و انتي م معاك رخصة احسن انا اسوق عشان م نتاخر
رغد:-طيب خلاص هاك المفاتيح بس انتبه العربية دي م يجيها ولا خدش حذرتك
مصعب:-ظط اا ظولة نادي رزان و انا المسافة دي بتجهز
رغد:-طيب
طلع مصعب غرفتو و اتظبط و بجاي رغد مشت لرزان..برضو قعدو يتصورو ...رزان جربت تدق لمريم عشان تذكرها بانو تجي الصالة بس م ردت... دقت تاني قفلت الخط...دقت تالت لقتو مغلق...استغربت بس م اشتغلت بالموضوع شديد و قالت احتمال مريم قعد تتجهز..
فعلا كانت مريم بتتجهز بس م لعرس سماح،،للخطة الحتسويها،،كانت لابسة فستان لونو موف طويل باكمام..و كعب لونو موف غامق شوية..و خاتا الطرحة ف كتفها لونا برضو اغمق من لون الفستان..و كاوية شعرها باختصار تقول هي الماشة تعرس...اجرت ترحال و ركبت و اتحركت على الصالة...
و بهنا برضو مصعب و رزان و رغد ركبو العربية و اتحركو على الصالة...رزان قعدت قدام و رغد قعدت ورا و بقت تعاين لمصعب..كان لابس بدلة لونها كحلي غاامققق و اسبورت ابيض بأزرق..و عاد يالريحة السممحههه طاااقَّه معطرة عربيتها كلها...كانت بتعاين ليو الوقت كلو و هي مبتسمة و هو لاحظ ليا بالمراية و بقى بتبسم معاها
مصعب:-انبرشتي ولا شنو
فجاة رغد وعت على روحها و رزان فكت الضحكة
رزان:-انبراش لكن
رغد:-كنت سرحانه انت كمان
مصعب:-سرحانه فيني و انتي بتتبسمي
رغد:-بسرح ف الحته الدايراها و م كنت بفكر فيك اساسا افصلا
مصعب:-خلاص اهدي
رزان:-عاد لكن ريحة العطر خرافية جبتو متين
مصعب:-جابو لي عوض هدية
رغد بورا:-الله يديني عوض ف حياتي
رزان:-الله يديني عوض ف حياتي تربيع
