حبيت بدوي

البارت الرابع

شوق: الريم، طرشيلي محادثتج ويا مكتوم، نسيت عنه أنا

الريم: أنا الصراحه ما رمّسته ولا أبا ارمّسه

شوق: جوفي إذا ما رمّستيه، سوالفج ويا الشباب الكل بيدري بها

الريم: عن الغلط خلي سوالفج حقج

شوق: وبسوي أي شي يثبت ان كلامي صح

الريم: أنا واثقه أني ما سويت شي

وطرشت شوق للريم صور مع شباب، الريم تدري أنها مفبركه وبعد تدري أن سمعتها ومستقبلها بيتدمرون إذا انتشرت الصور

شوق: طرشيلي المحادثه بسرعة ولا بفضحج

الريم: شو بتستفيدين يوم جي تسوين بي

شوق: انتي هنيه تنفذين ما تسألين

الريم خافت ترمّس مكتوم ويغلط عليها أو ترمّس أهلها وما يصدقونها، سمعت صوت جوري وهي تنادي أخوانها عشان يلتمون بالصاله بس طنشتها..

دخلت جوري عند أختها.. جافت لونها منخطف وتفكيرها بعيد، مسكت جتفها ويلست صوبها

جوري: شفيج، شو الي مكدر خاطرج

الريم بضيق: أفكر في ربيعتي أبوها توفى اليوم

جوري بحنان: الله يرحمه.. تعالي ويايه اخواني تحت يتريونّا

الريم: زين، شوي ويايّه

وطلعت جوري وخلتها في خوفها من ردة فعل أهلها والناس، هي واثقه أنها ما سوت شيء بس شو تفيد الثقه وما في شيء يثبت العكس، تذكرت أن أخونها يتريونها، راحت تلبس لها مخور أحمر وفيه شغل بالذهبي وشيلة بيت بيضه، تعطرت وتعدلت ونزلت لهم..

جوري: دام ان كملت يلستنا الحين بقول

وكملت: قبل شهور أجهضت للأسف وو..

راشد: ووو شوو؟!

جوري طلعت من وراها فحص حمل وقالت: أنا حامل.. وضحكت

قاموا يباركون لها كلهم وهم فرحانين أما الريم كانت في عالم ثاني

حمدان: فلاح يدري؟!

جوري: لا

حمدان: أنا بخبره.. وضحك

جوري تعرف اخوها بيتمصخر على فلاح: أيييه لا تتمصخر عليه بصفعك

حمدان لبسها وأتصل: الوووه يالي ما تستحي

فلاح: لحظه أخوي (يكلم الي فالمكتب).. الناس يسلمون اول بس لييش شو مسوي أنا؟

حمدان: ولك عين تسأل بعد!!

فلاح: أنا هب فاضي الحين رمسنّي بعدين

حمدان: ليش أختي داخله البيت زعلانه؟؟ (جوري قامت لحمدان وقرصته)

فلاح: هاه؟!