اليوم الي بعده (الجمعه)
قام على اتصال من الدوام، مستدعينه عشان يكون من الوفد الي بيروح السعوديه، يعني بيسافر.. حس انها فرصه انه يرفه عن نفسه ويقلل الم خيانتها، قام وسبح علطول ونزل لأمه وابوه سلم عليهم وراح يصلي الظهر، رد من الصلاه وهو خلاص معزم يخبر اهله ان سفرته بعد كم يوم
فلاح: السلام عليكم
ام فلاح: وعليكم السلام والرحمه
حب راسها ويلس بهدوء يفكر بالي بيقوله، شوي ولا يقاطع هدوئه امه: فلاح
فلاح: لبيه
ام فلاح: لبيت حايه (سكتت شوي تفكر بالي تقوله)
فلاح: آمريني امايه
ام فلاح بهدوء وتراقب نظرات فلاح: متى بترجع جوري؟
فلاح تضايق: ماله داعي اتييبين طاريها امايه، طلقتها وخلاص مالها رجعه
ام فلاح: حالك هذا موليّه (ابداً) هب عايبني وان شاء الله انا بدور لك حرمة
فلاح بضيق اكثر: اماااييييه ما أبا اعرس، العرس عفته وعفت الحريم بكبرهن خلاص ما اريد اعرس
ام فلاح وهي متضايقه على حال ولدها: يابويه بييب لك شيخة الحريم الي تربي عيالك جيّه (ليش) ما تبا؟
فلاح ما قال لأهله ان جوري خاينتنه مثل ماهو يتحسب، لأنها فالنهايه ام عياله وسمعتها عند اهله لازم تكون زينه: امايه اسمعينيّه، ما اريد غيرها، راحت؟ الله يوفقها لكن انا اخذ غيرها؟ لا السموحه
ام فلاح بيأس: لا حول ولا قوة الا بالله.. الله يوفقك وين ما كنت ومع منو ما كان
فلاح حب راسها: آمين، امايه
ام فلاح: هلا ابويه
فلاح: آمايه الدوام مستدعيني يبوني اروح السعوديه ان شاء الله بعد كم يوم
ام فلاح: بحفظ الله، تباني اجهز شنطتك؟ (حقيبتك)
فلاح: لالا امايه ما أبا اتعبج ويايّه
ام فلاح: مافيها تعب ان شاء الله ما عليك بجهزها
فلاح نش: لا امايه انا الحين بروح اجهزها
ام فلاح وهي تنغزه بالرمسه: لو عندك حرمه جان سوت لك شنطتك
فلاح وهو فاهمنها: الله يغنيني عن كل الحريم .. (و راح)
...........
بعد الصلاه طلع هو وذياب يتمشون على الكورنيش وعقبها كل واحد فيهم رد بيته، رد جان يجوفهم كلهم يالسين يتغدون
مكتوم: السلام عليكم
الجميع: وعليكم السلام
مكتوم يبوس راس امه وابوه: شحالكم عساكم طيبين
أنت تقرأ
حبيت بدوي
Romanceحبيت بدوي، رواية إماراتيه تدور أغلب أحداثها بأرض الإمارات للكاتبتين الجوهي والنبض 17-7-2020 .! ما بنحرق يلااا اقروا🏃🏻♀️ !. (مكتمله 31-1-2021)
