عشق تحت الوصايه 2

حلقه((12))

الجزء الثاني
عشق_تحت_الوصايه
حلقه( 12 )
بقلم/ إيمووو

وإذا سألتني عن الأمان اقول: هو تلك اللحظات التي قضيتها برفقه من أتوكأ علي همس يديه..

كانت الساعه السادسه صباحا عندما سمعت (زهره ) رنين هاتف زوجها (مسعد) علي الطاوله الصغيره في غرفه نومهم ، كانت تقرأ روايه علي ضوء خافت بجوار زوجها المستغرق في النوم بعمق بعد ان قضي يومين متواصلين من العمل دون راحه .. وضعت زهره الروايه بجانبها وذهبت الي الهاتف مسرعه وبحرص كي لا يستيقظ زوجها لتجد رساله علي الواتساب من رقم مجهول يتحدث باللغه المصريه والتي جن جنونها حين قرأت محتواها واشتعلت النيران بصدرها فذهبت الي زوجها توقظه بغضب وبيدها الهاتف ..

-  مسعد .. اصحي يا مسعد دلوقتي حالا 

استيقظ مسعد منزعجا وهو ينظر اليها بضيق :" يا فتاح يا عليم يا رزاق يا كريم .. يا بنتي مش قلت لك عايز انام تعبااان "

اردفت زهره بغضب :" ما هو انا كنت هخليك تنام بس لقيت رساله مهمه علي الواتس فقلت اما اشوف مين بقي اللي بيبعتلك رساله زي دي والساعه 6 الصبح "

امسك مسعد الهاتف بضيق وقال :" وانتي ايه اللي خلاكي تفتحي الواتس بتاعي .. وبعدين هيكون مين !! .. واحده بتحبني مثلا !! "

وضعت يدها في وسطها وهي تقول بعصبيه :" ايوووه طبعا .. وليه لأ!!؟ "

قال لها في غيظ :" عشان انا مستحيل اعرف واحده بتصحي الساعه 6 الصبح اساسا "

قالت هي الاخري في ضيق متهكمه :" طب ما تشوف الاول الرساله وبعدين ابقي دافع عن نفسك مش هنختلف علي المواعيد "

نظر الي شاشه موبايله :" هيكوون مين يعني انتي بتكبري مواضيع علي الفاض...... "

بتر كلامه حين قرأ الرساله وبلع ريقه في توتر وقال ضاحكا في تهكم حين راي الشرر يتطاااير من اعين زوجته :" ايييييييه يااا جدعااااان .. هو اللي بنعمله في الناس هيطلع علينا ولا ايييييه !!!!!"

زهره بعصبيه :" انا دلوقتي عايزه اعرف مين دي يا مسعد .. ويعني ايه حبك القديم هه .. انت بتخوني يا مسعد !! "

مسعد مفكرا وهو مازال يضحك :" الست بتقول حبي القديم .. يعني انتي الحب الجديد و مبخونكيش اهوه !! .. متبقيش قفوشه بقه "

وقبل ان ترد وجد رساله اخري فألتقطت منه زوجته الهاتف مسرعه وهي تقرأ الرساله وقالت :" بتقولك هي نازله في فندق **** وسايبالك رساله هناك في الاستعلامات علي الساعه 4 العصر تكون في انتظارها متتأخرش "

اخذ مسعد يضحك اكثر :" وربنا ما اعرف حاجه .. ومش رايح لحد عشان اثبتلك اني فعلا معرفش حد لا قديم ولا جديد غيرك وهقضي اليوم كله نوم "

ليرتفع نبره صوتها بحده :" نــــــعم!!!؟  .. مش رايح ده ايه دا انا رجلي علي رجلك نروح نشوف مين دي !!"