الخيبوعة

الجزء الخامس عشر

هز التيليفون و صونا ليها وشحال وهو كيتسنا تجاوبو
ونهيلة فيقها صونيت من نعاس تخلعات ترددات واش تجاوب ولالا وقررات تجاوب
نهيلة:الو شنو بغيتي معيط ليا في هاد الوقت شنو كاين
عادل:الو نهيلة فينك
نهيلة:انا فدارنا ومن الاحسن كل واحد يشد طريقو صافي نسا شي وحدة سميتها نهيلة
عادل:انا عارف راسي تعصبت عليك وقلقتك وماتحكمتش فراسي ولكن هاد قرار مكيهمكش غير نت بوحدك حتا أنا كيهمني
نهيلة:رأيك نت مكيهمنيش وحتى دابا سالينا الله يعاونك اسيدي بعد مني قطعات عليه
عادل:ولكن .. طن طن الوووو عض على شنايفو وعاود صونا وجوبات
عادل:اخر مرة تقطعي قبل مانكمل هدرتي ديما كنقول ليك فاش نكون دوي معاك تسوقيني
نهيلة:هدرة سلات اعادل صافي طلقني ومنك لمشاكلك انا اااش دخلني كاع لحياتك لي فيا كفيني
عادل:شوفي لهدرة ماشي فتيليفون غدا اندوز نهزك من دار نمشيو كافي ونتفاهمو على خطرنا
نهيلة:راااك غير كاضياع الوقت انا خديت قراري ومغاديش نتراجع عليه ودابا نخليك باغا نعس تصبح على خير قطعات عليه وتعصب گلاس شد راسو كيفكر شويا ناد خرج زربان قرر يمشي عندها
نهيلة متاكية وساهية كتفكر فلاحطات لي دوزات معاهم توحشات الولاد بزاااف ماحسات حتى نزلات دمعة سخونة من عينيها شويا صونا تيليفون لقاتو هو لي كيصوني وجوبات
نهيلة : واش مكتعياش شنو بغيتي راه قلت ليك سالينا
عادل:نهيلة خرجي عندي انا حدا دار ندوي معاك كنتسناك
نهيلة:لا منقدرش نخرج عندك
عادل:يلا مخرجتيش غادي نهرس لباب وندخل لموووك ختاري من أحسن ليك خررررجي انهيلة
نهيلة:مااااا تغوااااتش كلنا كنعرفو نغوتو ونهللو شكون يصحاب ليك راسك تغوت عليا
عادل:واخا هاني مكنغواتش يلاه خرجي
نهيلة:منقدرش جيرااان غايشوفوني حشومة
عادل:دااااباا وااااش عمرك ماغادي تبادلي تبقاي تفكري فناس واااشكون داها فيك بنادم كعما عارفك فين صادة ديها فراسك
نهيلة:ماغادييييش نخرج ليل هادا فهمها ابنادم غير سير بحالك
عادل:وااااخا انا نواريك قطع وكيعيط نهيييييييلة واااا مرااااتي نهيييييلة نزززززلي
نهيلة:ناااري كيغوااات فزانقة غادي يشوهني واااش تسطا هادا مشات حلات لباب وجراتو لداخل وسدات لباب
نهيلة : واش نتا حمق باغي دير لينا الشوهة قدام الجيران
عادل : علاش حتا ندير ليك الشوهة راني راجلك في لوراق ولا نسيتي
حليمة:اااش واقع هنا وشكون كان كيعيط عليك فهاد وقت اااه ولدي عادل نت هنا مشا سلم عليها
عادل:سمحو ليا برزتكم فهاد ليل ولكن كان ضروري نهدر مع نهيلة ماقدرتش نصبر تال صباح
حليمة:واخا اولدي ماشي مشكل ندخل نخليكم تهدرو على خاطركم رجعات لبيتها
عادل:عنداك هاااد راااس قاصح(ضربها فراسها)
نهيلة:دابا فاش باغي دوي معايا سربي باغية نعس
عادل:على قرار لي خديتي بوحداك وبلا شواري
نهيلة:انا ماخديت هاد قرار حتى حسيت براسي تدليت بزاف شوف ليك شي خدمة خرا انا جهدي تسالا عييت منك والإحتقار ديالك
عادل:سمحي ليا على هدرة لي گلت كنت معصب وماعرفتش اش كانگول عدريني عفاك
نهيلة:بالعكس غضب كيفضح حقيقة البشر وشنو مخبي فقلبو انا بنسبة ليك نتيقام ياك ولكن فعلا لي مدارش قيمة راسو عمار بنادم يديرها ليه ودابا راسي ضرني مافيا لي بقا يدي ويجيب معاك فالهدرة لي عندي راه گلتو ليك طلاقينا خوت نتفارقو خوت
عادل:انا دابا نخليك ترتاحي وغدا نتلقاو ونهدرو مزيان ونحلو مشكيلنا صافي
نهيلة:(حلات الباب)وخرج وسدات الباب ومشات بيتها وتلاحت فالفرااااش وخشات وجاها فالمخدة وكتبكي اااه هي ولات كتبغيه بزاف وتعلقات بيه ..
عادل غادي فالطوموبيل راجع لفيلا وهو كيسرجع ذكراياتو مع نهيلة نهار جات شركة اول مرة ونهار گالسو فجردة وكيخويو قلبهم على بعضيتهم ونهار قرب يبوسها و نضرات عينيها ودخلو الولاد ونهار دخل لبيتها لقاها كدور بشعرها وشدها فاش شافها داخت و تفكر نهر صرفقها وهزات هداية بلاما تغوات ولا دافع على راسها تفكر فرحت ولادو نهار كاتلعب معاهم فجردة وبدا كيبتاسم وقف طوموبيل بجهد ورجع راسو لور فوق كرسي زاعما نكون كنبغيها لالا مستحيل واقيلة غير بقات فيا عاود ديمارا ومشا رجع عادل لفيلا و خبراتو امينة بلي الولاد مبغاوش يتعشاو وكيبكيو قالو ليك بغاو نهيلة ومشاو لبيتهم ونعسو بلا ميراجعو دروسهم مقلقين بزاف
عادل:واقيلا الواليدة قصحت معاها شويا مكانش عليا نعملها بديك الطريقة غلطت في حقها
امينة:ماشي غير نت اولدي حتى انا الله يسمح ليا منها بقيت هازا عليها شوكتي و زيد راه انا لي ظلمتها مسكينة و عطيتها العنوان وطلبت منها تدي هود وهداية يشوفو ماماهم والغراض ديالي نواد صداع بيناتكم سمح ليا بزاف أولدي تنادم معايا الحال وضميري كيأنبني البنت تعاملات معانا مزيان وحنا لا ...يتبع