#منقولة
#قصص_من_عالمي
#وما_ذنبي_انا
#حلقة1
خيرية: انتي يابنت نوضي الساعة 7 يذوبك تلحقي تحوسي ع الحوش بعدين بيجوني الجارات..
ناضت فرح مخلوعة: حاضر حاضر اهو نضت..
خيرية: نوضي هيا قدامي.
ناضت فرح تجري غيرت دبشها وصلت وربطت شعرها كالعادة بشاربة وطلعت..
هيثم: انتي يافرخة فرح هيا وقت ع الجامعة حطيلي الفطور..
حنين: تو نحطهولك اني ومعاش تقوللها فرخة شن دارتلك..
هيثم: سكري فمك أنتي
خيرية: حنين سكري فمك ع قولة خوك وبري وتي روحك عشان يرفعكم وليد معاه ..
حنين: بابا امتي مروح ؟
خيرية: قال الاسبوع الجاي بعد يكمل اجتماعه..
حنين: استاحشته الحق...وتت فرح الفطور لصغار عمها وامشو كل واحد لحاله..وبدت في الحوش تقليب وتنفيض..
خيرية: اني بنمشي نتكا شوية ضمي من غير دوشة سامعة والا لا..
( فرح بطلة القصة 18 سنة...يتيمة وعايشة عند عمها.. توفي بوها وامها و خوها في حادث سيارة لما كان عمرها 16...امها مش ليبية وكانت بنت وحيدة لاهلها..وبوها عنده اخ واحد اللي هو صالح)
قعدت فرح تضم وتغسل وطبعا تحاول مااديريش صوت والا بتطلعلها هذيك الغولة توريها...
كملت فرح من الحوسة تقريبا مع الساعة 12 وقعمزت شويا بترتاح..
خيرية وهي تتكسل: شن كملتي؟
فرح: اي يامرت عمي كملت..
خيرية: باه نوصي طلعي خضرة وديرلينا محشي خاطري فيه اليوم..
فرح( ياهمي اني ذوبت مافيش راحة بكل): حاضر
وناضت فرح زي الفالحة حطت الغدي ع النار وبدت في المحشي.. علي خشت وليد من برا: انتي يافرح وينك؟
فرح: نعم اهو جاية.
وليد: امشي حوسي ع المربوعة وبخريها بيجوني صحابي واعبي بيهم ع الغدي..
فرح تنهدت: حاضر...وامشت تجري هوت المربوعة وحطت بخور فيها وطلعت تكمل في عقاب المحشي...وطلعت مفروم بدير امبطن وتغسل في الخضرة عشان السلاطة( عشان وليد بيجوه صحابه طبعا)
ومع الساعة 1 ونص كان المحشي ع النار..وبدت في المبطن...روحت حنين من المدرسة وخشت لفرح في المطبخ: هاتي فرح نساعدك حتي في السلاطة..
فرح: ياريت والله..شن اخبار المدرسة حنين؟
حنين: الحمد لله ماشية...كله بفضلك انتي عشان ديما اتقري فيا...^_^
( نعرفكم بعيلة صالح اللي هو عم فرح...صالح الاب وخيرية الام...الابناء حنين وتقرا أول ثانوي...هيثم سنة ثالثة طب..ووليد متخرج ويشتغل...طبعا كلهم كانو بعاملو في فرح زي الشغالة بأستثناء عمها وحنين... بس المشكلة عمها رجل أعمال وديما مسافر)
