ماذنبي انـا

6

#منقولة
#صفحة_قصص_من_عالمي
#وما_ذنبي_انا
الحلقه6
سيف: فرح فرح خيرك شن فيك ؟ ورفعها دخلها داخل للصالون... حطها ع الكنبة وانتبه لدبشها امزق وجسمها كله كدمات..

انخلع وارتبك ( شكله اللي خايف منه صار)... ركب يجري لداره جاب مفتاح السيارة ورفع فرح في غمره وطلع بيها يجري وهي كانت ترتعش وتنتفض زي المروحة وكانت شبه غايبة عن الوعي..حطها في السيارة من ورا وطلع بالسيارة زي الصاروخ.

قعد سيف يخبط ع الدومان وحامق( تي والله لما نوريك يامنير الكلب.. لما نشرب من دمك ياعديم الرجولة ياواطي).

وصل سيف للمستشفي نزل فرح ودخلوها منه لغرفة الطوارئ..وقعد سيف برا يدور زي المهبول...مش قادر يصدق او يتخيل اللي صار لفرح وبينه وبين نفسه متأمل انه كذب وانه ممكن غالط..

بعد ربع ساعة طلع الدكتور: انت شن تقربلها ياأخ؟

سيف: أ أ....اني صديق لعائلتها.

الدكتور: كيف يعني مافهمتش وشن علاقتك بيها انت تجيبها ووين أهلها؟

سيف: البنت هاذي يتيمة ماعندها حد...وعايشة معانا في الحوش

الدكتور: باه ومن فيكم دار فيها هكي..

سيف قلبه قعد يدق وخايف من اللي حيقوله الدكتور: علاش هيا شن فيها؟

الدكتور: واضح حالة إغتصاب..

سيف سمع هالكلمة حس بالدنيا ظلام وقعد منصدم وخلاص...

الدكتور: ضروري نقدم بلاغ للشرطة

سيف: لا يادكتور انت عارف المواضيع زي هاذي فيها تشهدير وحرام سمعة البنت..

الدكتور: لا مانقدرش هاذا واجبي المهني.... وبعدين من قال مش انت مداير فيها هكي..

سيف حمق: تي انت شن تقول يادكتور شن تشبح فيا حيوان قدامك..

الدكتور: مافيش داعي للتوتر....بعد تجي الشرطة حتستجوب الضحية وهي حتقول الحق..

سيف: باهي غير المهم قولي هيا كيف حالها توا.

الدكتور: جسديا مافيها شي معقد ممكن نزيف بسيط بس...أما نفسيا منهارة هلبا واضطرينا نعطوها مهدي..

سيف حس روحه مخنوق واجعته فرح ع الاخر: اوكي مشكور يادكتور

الدكتور كلم الامن متاع المستشفي وجو قبضو علي سيف وتحفظو عليه.

سيف: تي اللي ادير فيه خطأ يادكتور أني مالياش علاقة..

الدكتور: هاذي اجراءات ضروري نديرها...ولو برئ ماتخافش..

رفعو سيف وحطوه في  زي الدار وسكرو عليه.. وسيف كان يفكر في فرح طول الوقت..
~~~~~~~~~~~~~~~~~

واتصل الدكتور بالشرطة عشان يجو يحررو محضر بالواقعة..

جي الشرطي وخش للدار اللي فيها فرح وكانت واعية بس مرتخية من المهدي...وخش معاه سيف..