ماذنبي انـا

11

#منقولة
#قصص_من_عالمي
#وما_ذنبي_انا
الحلقه 11
قعمز سيف ويشبح لفرح يستني فيها تفيق.وكان متوتر وخايف عليها..

بعدين فتح البلكونة متاع الدار وطلع ايشم في هواء...فرح فتحت عيونها واول ماناضت قعمزت وهي مخلوعة وقعدت تشبح في الدار( في خاطرها شن جابني اهني) ناضت من ع السرير وكانت في شيشة امية جنب السرير صبت منها وشربت.

سيف سمعها خش: صحة صحة

فرح: سلمك.... وطبست راسها وهي منحرجة: أني اسفة سيف علي صار..

سيف: ولايهمك..تعالي قعمزي تعالي.. قعمزت فرح جنب سيف ع الكنبة..

سيف: شن نطلبو العشي ؟

فرح: اني مش جعانة ياسيف... لو انت تبي اطلب ليك..

سيف: حتاكلي معايا غصبن عنك..عارفك أكيدة ماكليتي شي من الصبح.

فرح: والله ماعندي نية.

سيف: تو أني راجلك ومن حقي عليك تسمعي كلامي... والا حتشوفي العين الحمرا هههههههه

فرح: ههههههههه حاضر

وطلبو العشي... شويا وجابوه.وتعشو فرح وسيف... وكانت فرح متوترة والافكار تلعب في راسها.

سيف: الحمد لله هيا نوضي غيري دبشك جبت معاي شنطة فيها بيجاما ليا وليك  وشوية دبش .

فرح زادت توترت: اوكي ..وخدت الشنطة طلعت منها البيجاما وخشت للحمام بتبدل واستغربت لماشافتها كانت بيجاما عادية يعني مش مناسبة ليوم زي هاذا...وزادت استغربت علاش سيف ماجاب معاه روب من الاوراب اللي شرتهم فرح. لبست وطلعت.

وكان حتي سيف غير دبشه ولبس بيجامته وكان فاتح التلفزيون ويتفرج.

طلعت فرح وهي شادة الفيلو..ناض سيف خداه منها: هاتيه تو نلمه علي بعضه لين غدوة نردوه لصاحب المحل.وقعد يرتب فيه ويساوي..

فرح مش عارفة شن ادير..تقعمز او ترقد مش فاهمة شي..سيف كمل لف الفيلو وقعمز ع الكنبة: تعالي فروحة تفرجي معايا جايبين فيلم قراصنة الكاريبي لجوني ديب ايهبل..

فرح ضحكت: هاذي اول مرة تقولي فروحة وجت قعمزت في جنبه..

سيف: باه وانتي امتي بتقوليلي اوسيفة ^_^

فرح: اوسيفة ^_^

سيف: هههههههههه طالعة تهبل منك...قعمزي خلي نطفي الضي يكون الجو أحلي..

فرح خافت: لا لا لا خليه الضي

سيف: باه براحتك نخلوه الضي...حيييه انسيت نتصل بامي وانطمنها انك فقتي..

فرح: ياحشمتي معاها ومع الناس اللي كانو في الحفلة...شن بيقولو عليا توا..

سيف: معليش كل العرايس يصيرلهم هكي من التوتر..وكلم سيف امه وطمنها علي فرح...