ماذنبي انـا

7

الحلقه7
وصل سيف  ومعاه فرح....فرح كانت خايفة ومتوترة...سيف لاحظ ارتباك فرح..

سيف: ماتخافيش فرح امي طيبة هلبا وأكيد حتحبيها وتحبك...

فرح: ان شاء الله

خشو للحوش...زكية اول ماشافت فرح عجبتها وناضت وقفت وتلقتها بأبتسامة: هلا يابنيتي أنستينا..

فرح: اهلا بيك ياخالتي.

زكية: ياوخيتي سلمها محلاها...تعالي قعمزي يافرح

سيف: شنو يام شكلي بنغار فرح خدت الدلع كله

زكية شدتله خدوده: انت عارف روحك قداش غالي عليا من دون خوتك يااشتيويه..^_^ بلاش دلع زايد..

سيف: هههههههههه ربي يخليك ليا يارب

زكية: خلي نمشي نصبلكم الغدي أكيد جعانين..

فرح: خلي انجي نساعدك ياخالتي..

سيف: وأني خلي نمشي ناخد دوش سريع..

امشت فرح مع زكية وكان عاجبها حوشهم كبير وواسع وجنانه ماشاء الله بس استغربت كيف ماعندهمش عاملات بالرغم من أن واضح ان حالتهم مرتاحة..

زكية: تقري انتي يافرح ؟

فرح: لا قريت ثانية  ثانوي وسيبت..

زكية: حرام خسارة علاش سيبتي؟

فرح: الله غالب ظروف..

زكية: عندك حق حكالي سيف علي ظروفك وربي يكون في عونك..

فرح( حي شن حكالها سيف زعما قالها علي صارلي..لا لا أكيد لا والا ماكانتش وافقت اني نعيش معاها)

زكية: هاك فروحة ديري السلاطة

فرح: حاضر

ووتو زكية وفرح الصفرة علي طلعت سيف من الحمام ينشف في راسه..

زكية: هيا اوسيفة تعال

فرشو البخشة وحطو صفرة الغدي وقعمزت فرح بجنب زكية ومقابلهم سيف..

فرح كانت تاكل ومتحشمة منهم...سيف: فرح كولي خيرك تنبشي تنبيش؟

زكية: خلي البنت براحتها ياولد ماضايقهاش

سيف: لا هكي هلبا عاد شن هالعز هاذا كله اللي محصلاته فرح.ادافعي عليها

زكية: هههههههههههه يامغيار

سيف: لا والله انبصر..اصلا فرح زي اوخيتي ومانغارش منها..

فرح كانت مبتسمة وخلاص وحاسة روحها مرتاحة هلبا لزكية...وحاسة بالأمان مع سيف وأمه..

كملو غدي وضمت فرح الصفرة وغسلت الماعين بعد ماحلفت لزكية ماتمسهم  واستأذنت  عشان تركب ترتاح في دارها اللي هيا دار سيف سابقا....ركبت وانطرحت ع السرير قعدت سارحة شويا وبعدين غمضت عيونها ورقدت..

قعد سيف وأمه امقعمزين تحت ويهدرزو..
زكية: مسكينة هالبنت الحزن باين في عيونها..

سيف: اي تمرمدت هلبا في حياتها..