عدنية جنوبية& دحباشي شمالي

البارت الثالث.. جزئية1

مصطفى: أنت صلي على النبي وأهدأ.. لا تتسرعش الله يحفظك.

عبدالرحمن: اللهم صلي وسلم وبارك عليه.. خير؟

مصطفى: خير خير.. ماتقلقش!.. ريناد أنتي تعرفيهم صح؟.. كيف الناس؟

ريناد باستغراب: ماقولكش بصراحة!.. أعرف البنت درست معي بالجامعة ومحترمة جدا بس ماعرفهمش كلهم.

مصطفى: وأنت يا عبدالرحمن أكيد تعرفهم بالشغل وشركتهم كيف؟

عبدالرحمن بضيق: أيوه سمعتهم فل.. ومعروفين.. وكنت موافق عليهم بس الوضع تغير.

مصطفى: لا ياولدي ماتغيرتش حاجة.. ودا راجعلك ياريناد.. هل أنتي موافقة على ابنهم الكبير على سنة الله ورسوله؟

عبدالرحمن: كملت!!.. هودا الحل حقهم!!.. هيا مافيش معانا بنات ومابنصاهرهمش.

مصطفى: أنت اسكت يا عبدالرحمن.. أصه!.. ها يا ريناد فكري..استخيري وردي خبر.. معك تلات أيام.. ومحد بيغصبك ولا تضغطي على نفسك بأي حاجة.. اعتبري أنهم متقدمين من جيز الأولين.. يعني لو ماحسيتيش براحة أرفضي!

خرجت بدون ما أطلع حرف وعبدالرحمن كان يقولي متل ماقلي أبي.. استخير وعلى أساسه أرفض أو أقبل

لو جينا للصدق مستحيل مافكرش باللي حصل.. رندة تقولي ارفضي ومالك منهم.. مشتاق ماتكلم معي بس متل يلي يتمنى أوافق.. أني تفكيري وتفكير مشتاق واحد وطباعنا كتير متشابهة.. فلو أجينا نفكر من ناحية التهنئة حق الخطوبة كانت اسم عائلتين وماذكروش أشخاص.. يعني ماذكروش اسم العريس بالمرة.. والتبريكات من المهنئين قد وصلت حتى لعند مشتاق أخي.. يعني أكيد عبدالرحمن اللي هو الواجهة والمعروف قد جواله بيقرح تبريكات.. فلو أني رفضت أكيد الخبر بينتشر.. صح العائلتين بتتضرر بس ضررنا وضرر عبدالرحمن أكبر.. شركة عبدالرحمن مش بديك الكبر يلي ممكن تنافس شركاتهم بس هي في مرحلة نمو وسمعتها زي الفل وتكبر بطريقة سريعة بصراحة.. وبرضو لما تكون شركة جديدة مش متل يلي قدله سنين ويتوارثوها أجيال.. وبكدا أني مابقدرش أجازف عشان أخي.. وكمان أشتي أثبت لنفسي أنه مش الذكور بس يلي ممكن يتخدوا قرارات لمصلحة الجميع.. وأنهم حق مهمات صعبة.. ومش هم بس يلي يدقوا صدورهم مرجلة.. أني أنثى وبفعل أحسن منهم.. مادامني على الطريق الصح والله أختارلي ياتو.. بدق صدري ومالو؟!.. مع أن الموضوع صعب

استخرت تالت ليلة بعد مافكرت بالموضوع من كل النواحي.. وكان يدخل عبدالرحمن لعندي الصباح قبل مايروح الشغل.. سألته قلتله وبالنسبة لدراستي؟.. وردلي خبر الليل وقال "الأب نفسه وعدنا أنك بتكملي وبتشتغلي وبتسوي يلي نفسك فيه وأزيد حسب أنك بنته".. ريحني بكلامه.. حسيت أن الله يسرهالي من كل النواحي وماعد باقي لي أي عدر.. استخرت.. ارتحت رااااحة فضيييعة.. راحة ماتنوصفش الحمدلله.. كلمت أمي تقول لأبي أني موافقة.. وبسم الله توكلت على الله.

الراوي..

دخل للبيت بنص الليل تعبان من الطريق.. كانوا أهل البيت جالسين منتظرين له يوصل من ساعة..

مرتضى: السلام عليكم.

مراد بسخرية: وعليكم السلام ورحمة الله وبركاته.. الحمدلله على السلامة!!

مرتضى باستغراب: تسلم!.. خير ماهو الموضوع؟

إقبال: سير غرفتك ارتاح.. شنتحاكى الصبح.

مراد: لا الآن.. ويفكر للصبح.. مانشتيش نعلق الجماعة أكثر.

سوسن بنفسه: نعلقهم؟.. قصدك نودفبهم!

مرتضى: طيب ماهو الموضوع ذي جبتوني له من صنعاء ؟

مراد ببرود: خطبنالك.

مرتضى: مه!!!..(بعدم تصديق) والله!.. ماتيه المرة لحالها!!.. قدبه تطورات لهنااااك!!.. قد خطبتم ماعديش عنخطبلك!!.. ابسروا وعوا وتوعوعوا ماحد حانبي هانا.. قد معاكم إثنين غيري بلا شغل ولا مشغلة.. زوجوهم إن شاءالله من أربع.. أما أنا ولا عد أسمع أحد يتكلم على زواجتي.. مكنتوها اتصالات جي هيا جي هيا.. وآخرتها خطبنالك.. ياسعم جهال عنلعب!

مراد بغضب بارد: أولًا يا أستاذ مرتضى يا محترررم.. أنت ماتتكلمش مع أصحابك بالشارع ولا مع ناس أصغر منك.. كبرنا وشيبنا وإحنا نعلمك الأدب.. ثانيًا أنت مطالب من رب العالمين ترضينا أنا وأمك ولو على شق نفسك.. بس شكلنا ملسنا عليك وماعد عرفناش نربي.. ثالثًا أنا ماخيرتوكش أنا طرحتولك خبر.. لأنك مانتش بنت من سب نقولك موافق ولا لا.. بس وفوق آذا كله استخير.. لأننا قد استخرنا أنا وأمك قبلك وارتحنا.. وأسمع مثلما وافقه علبك البنت شتوافق.. وإذا سمعتو منك غير الأيوة شحولك لمجلس تأديبي بحق قلة أدبك معانا.. ولو خرجه مني كلمة ما شتنعدش يا أستاذ مرتضى.

طلع الأب لغرفته بعد ما استفزه مرتضى بالكلام.. مرتضى بصياح: قدهي مسخرة.. عتحولوني لمجلس تأديبي عسب ماقبلت اتزوج ذي خطبتوها مدري من أي مزبلة؟!.. هيا ماهوو؟.. عدشي معاكم خبر؟.. أين ابسرتيها يا حجة.. عجبتش في حفلة أو أيش؟.. أو قد سارت تعمل عمل لوما سرتم تخطبوها بدون ماتحاكوني؟!

سوسن: مرتضى!.. احترررررم نفسك!.. لم لسانك وسكتّ!

مرتضى بغرابة: أنتي؟.. سبرت!!.. قد نطقت ذي ماينطقش وعادكم بتشكوا أنها ماسوت عمل!.. تيه قديه واضحة حتى للعمسان.

سوسن: مرتضى!!.. وافق بأدبك وأني من عندي لا توافقش.. أصلا واحد مثلك ما يستحقييييييش.

-----------–-----------------------------------------------

مرتضى(بنفسه)

ماهي تيه الغاغة!!.. قد عيحولوني لمجلس على شانها.. من أين حلقين عليا ذين المشاكل كلهن؟.. يشتوني أوافق؟.. سابر عتوافق من تيه العين قبل تيه وليش لا؟!.. بس أنا عدوريهم كيف ماينبوني وكيف العناد يصبروا بس!