I Found My Prince Charming [Season-1]

Ep-52(Final Part)

Unicode Version

မျက်စိရှေ့တွင်ရှိနေသော နေဗီပြာရောင်Slim suitကို ဝတ်ဆင်ထားပါသည့်ရှိုင်းထက်ယံဟာ အလွန်တရာကြည့်ကောင်းနေသည်ဖြစ်ရာ ဟန်မင်းစေရာအဖို့တော့ သတို့သားထက်ပို၍ခန့်ညားနေမည်ကိုပင် စိုးရိမ်စရာရှိနေသည်။

ဟန်မင်းစေရာကတော့ ခဲရောင်ဖျော့ဖျော့ကို ရွေးချယ်ဝတ်ဆင်ထားခြင်းဖြစ်ပြီး နှစ်ဦးသား၏ကာလာအနေအထားမှာလည်း လိုက်ဖက်ညီလှသည်။

ရှိုင်းထက်ယံSuitဝတ်ထားသည်ကိုပင် ချစ်စရာကောင်းသည်ဟုမြင်နေမိသော ဟန်မင်းစေရာကလည်း တကယ်ကိုအကူအညီမဲ့နေရရှာလေပြီ။

နက်ခ်တိုင်တစ်ခုနှင့် မှန်ရှေ့တွင်အလုပ်ရှုပ်နေသောရှိုင်းထက်ယံကို ငေးကြည့်နေရင်း စိတ်ထဲမှလည်း မည်းမှောင်သောအကြံအစည်တို့ကို အကောင်အထည်ဖော်ရန်စိတ်ကူးနေမိသည်။

ဟန်မင်းစေရာ၏အကြံအစည်ကို မရိပ်မိသော ရှိုင်းထက်ယံကတော့ သူ၏နက်ခ်တိုင်ကို သေသပ်စွာပြုပြင်ပြီးသည်ကို ကျေနပ်စွာပြုံးနေလေသည်။

ဟန်မင်းစေရာက မှန်ရှေ့ရှိရှိုင်းထက်ယံ၏အနားသို့ တဖြည်းဖြည်းတိုးကပ်သွားကာ မှန်ရှေ့ကိုမျက်နှာမူထားသူကို အနောက်ကသိုင်းဖက်ကာ ပခုံးပေါ်တွင်မေးတင်ထားလိုက်သည်။

"မသိလို့မေးပါဦးမယ်။ ကျွန်တော့်အခန်းထဲကို ဘယ်လိုရောက်နေတာလဲ"

ဟန်မင်းစေရာ၏ ထူးထူးဆန်းဆန်းမေးခွန်းကြောင့် ရှိုင်းထက်ယံမှာ နားမလည်နိုင်ဖြစ်သွားရပြီး မှန်ထဲမှတစ်ဆင့် သူ့မျက်နှာကိုလှမ်းကြည့်၍မေးရသည်။

"ဘာတွေပြောနေတာလဲ"

"ဘယ်ဘုံကဆင်းလာတာလဲ"

ထိုစကားကိုကြားသောအခါ ရှိုင်းထက်ယံမှာနောက်ပြောင်နေသော ဟန်မင်းစေရာ၏ရည်ရွယ်ချက်ကို နားလည်သွားလေပြီ။ ထို့ကြောင့် အနောက်တွင်ရှိသောဟန်မင်းစေရာကို တံတောင်ဖြင့်တွန်းလိုက်ရင်း အံကြိတ်သံဖြင့်​သတိပေးလိုက်သည်။

"ကိုယ့်အသက်ကိုလည်းသတိရဦး။ အရင်ကတောင်ပြောင်ချော်ချော်မလုပ်တဲ့လူက အခုမှဘာထဖောက်နေတာတုန်း"