سلام أحبتي راني رجعتلكم مع الجزء الثاني من عيون الجليد .جزء أكثر حماس من الأول.إنشاء الله نكون عند حسن ظنكم 😊✌.
_____________●_________________●________
فيرا تحكي:
فقت..نفتح فعينيا و نرجع نغلق..رميت يدي قدامي..مكاشو..عقدت حواجبي..ستندت بيديا عالسرير..تقعدت..نرجع فشعري لتالي..تنهدتوقت ستوعبت الامر..راح..كيف عادتو طبعا..يقرب و يرجع يبعد..نزلت مسرير..دخلت ديراكت لدوش..عملت دوش..ريقلت اموري و خرجت..قربت لخزانة..جبدت لي جا على يدي..سروال و تيشرت..نشفت شعري و شديتو لفوق..اول ما قربت باش نخرج وقفني صوت تيليفوني..رجعت بالزربة ليه..قلبي دق و عينيا لمعو وقت شفت اسمو..رفدت..نسمع فيه يحكي..
هشام: بونجور
انا: بونجور
هشام: نضتي ولا مزال ؟
انا: سي نضت..و ملقيتكش..وين رحت ؟
هشام: كان عندي شغل..
انا: مممم
هشام: فيرا..عندنا خدمة
انا: خدمة !!
هشام: راح نجوز عليك نديك معايا
انا: تحكي منيتك ؟
هشام: ممم
انا: واش من خدمة ؟ فهمني
هشام: كي نجي نحكو
انا: نستنى فيك
قطع عليا..نزلت التيليفون من يدي..نشوف معاه..عاقدة حواجبي..مستغربة..تي من وقتاه هو يديني معاه لخدماتو ؟..هو كون يصيب يخرجني كامل من جماعتو واش تبدل دك ؟..واش لي صرا باش قرر يديني معاه..عضيت شفتي..حطيت التيليفون من يدي..دك يجي و نفهم كلش من عندو..
رجعت قربت للمرايا..عاودت سڨمت شعري..عملت مكياج خفيف..و رجعت للخزانة..جبدت كاسكات نواغ و صاكي..لبست باسكاتي..رفدت تيليفوني و نوادري و نزلت بالزربة..ستغربت وقت وصلت لتحت و مسمعتش صوتها..دخلت للكوزينة..عقدت حواجبي و انا نشوف فلفطور عالطايل و هي مكاش..قربت ليه..وقفت عند الطابلة..لفتت انتباهي الورقة لي محطوطة تحت الكاس..رفدتها نقرا فيها.."محبيتش نفيق..هاهو لفطور قدامك..رحت نشري شوية حاجات ناقصين الدار"..تبسمت..جبدت الكرسي قعدت..كليت حتى شبعت..حبست على صوت تيليفوني..رفدت التيليفون حطيتو بين ودني و كتفي..ناكل و نسمع فيه..
هشام: اخرجي لبرا ىاني قريب نوصل
حكيت و فمي معمر ماكلة..مفقتش لروحي..
انا: ممممم داكوغ
هشام: متهدريش و نتي تاكلي ###
تبسمت..رفدت كاس الماء شربت منو..مسحت يديا بالزربة و شديت التيليفون..
انا: واش دخلك ؟
هشام: واش دخلني ؟
هشام: هادي اومبعد نتفاهمو عليها..اخرجي دك
غلقت عليه..رفدت روحي وقفت..حطيت تيليفوني داخل صاكي..درت الكاسكات و نوادري و خرجت..خرجت ملجنينة..وقفت على طرف الطريق نستنى فيه..هبلني اخرجي اخرجي و فلخر مزال موصل حتى..
على تلفيتي طاحت عينيا على طونوبيلتو..عينيا وساعو..فاش قاعد يدير هادا هنا..رجعت تلفت للجيهة الثانية..لازم يروح من هنا قبل ما يجي هشام والله يقتلو و يقتلني معاه..زربت بخطواتي جيهتي..وقفت عند طونوبيلتو..بلعت ريقي بالسيف..نشوف فيه راقد لداخل..مفهمتش واش راهو يدير هنا و علاه راقد هنا..رجعت طلعت راصي لطريق..نتأكد انو مكاشو..و رجعت نزلت بعينيا للبلار..رفدت يدي دقيتلو عليه..فتح عينيه شوية..رفد يدو يحك فعينيه..تلفت جيهتي..عينيه وساعو..تنفظ مبلاصتو..فتح التاقة..يحك فعينيه..يشوف معايا بعينين حمورا ناعسين..
انا: مهدي واش راك دير هنا !!!
عدا يدو على وجهو بالزربة..شاف معايا يحكي..
مهدي: جيت لبارح فليل باش نسقسي عليك..محسيتش لروحي كيفاه داتني عيني هنا
انا: جيت حتى لهنا باش تسقسي عليااا !!
سكت شوية..يشوف فيا..عيني فعينو..نظرة غريبة..غريييبة اول مرة نشوفها..نظرة لوم..غضب..حزن..مفهمتش.. مفهمتش كيفاه نفسرها..عينيه مرمشهمهم حتى..نظرتو خلاتني لا اراديا نرجع بخطوة لتالي..خطوة عملتها من التوتر..من الخوف..من الاحساس السلبي لي سيطر عليا فثواني من نظراتو..حسيو فاق على روحو وقت رمش عينيه عملي براصي ايه يحكي..
مهدي: لمهم اومبعد نحكو لازم نروح دك
انا: ب باي
تبسملي بالسيف..تلفت لطريق و ديمارا..طار بالطونوبيل..تنهدت..خذيت نفس طويل نهدي فروحي..نبعد فهاد الافكار السلبية من راصي..رجعت تلفت لطريق..الدم جمد فعروقي وقت طاحت عيني فعينو..مڨاري بعيد شوية..يشوف فيا..قلبي دق بالقاوي..شبيني مشفتوش..وقتاه وصل..خرج يدو مالتاقة..عملي بزوج صبعتيه ارواحي..بلعت ريقي بالسيف..رجليا رعشو..تنهدت نهدي فروحي..كبست على صاكي بيديا..قربت ليه..الخطوة نعمل فيها بالسيف..قلبي نحس في راح يخرج مبلاصتو..كل خطوة نقرب بيها ملامحو يوضاحو اكثر فيعينيا..و عينيه لڨري لي مركزين معايا يبانولي اكثر و يزيدو على لي بيا..فتحت الباب قدامو..ركبت..تلفت ليا..هزني و حطني..لسقت فالباب من مورايا لا إراديا تبسمتلو التبهديل قحرلي.
هشام يحكي..
هشام: واش كان يدير هاداك ال#### هنااا
صوتو خرج هادي..اما باين عليه الزعاف..
انا: هو..هو غير جا يسقسيني ادا شفت الكارت ميموار
طلع حواجبو بعدم تصديق..عضيت شفتي لا اراديا..
هشام: صااار
هزيتلو براصي ايه بالزربة..ڨحرلي..هبطت راصي..و تلفت نجري..مقدرتش حتى نعاود نشوف معاه..سمعتو وقت تنفس بالقاوي..ديمارا.. يحكي فرد وقت..
هشام: مراحش نحكي دك..نكملو شغلنا و نتفاهمو
رجعت تلفت ليه..نشوف معاه..يسوق و مركز معا الطريق..
انا: تفكرت..واش من خدمة هادي ؟؟
هشام: راح نحبسو سفينة فلبحر
عينيا وساعو..رمشت عينيا شحال من مرة نحاول نستوعب لي قاعد يقول فيه..بلعت ريقي..رجعت تلفت للجيهة الثانية بلا ما نزيد حتى حرف..صدمني..معلاباليش واش سر هاد التغيير..متوقعتهاش منو..ملقيتش واش نقول..و معرفتش واش لازم نحس بالضبط..كيما معرفتش كيفاه وصلنا..فقت وقت شد فران..تلفتت نشوف معا لبلاصة..فالميناء..رجعت تلفت جيهتو..
انا: هنا ؟
هشام: مممم انزلي
رجعت تلفت للباب..فتحتها و خرجت..خذيت نفس طوييل وقت ضربتني نسمة لبحر لوجهي..غمضت عينيا..نشم فهاد الريحة..اكثر ريحة نعشقها..فثواني هديت..رتحت و كامل الافكار لي كانو يدورو فراصو زالو..حسيت روحي كسبت روح جديدة فهادوك الثواني لقليلة..ابتسامة ترسمت على وجهي..تلفت ليه بالزربة وقت سمعت صوتو مورايا..حاط يديه فلجياب..ابتسامة صغيرة مرسومة على وجهو..
هشام: تحبي لبحر ؟
هزيتلو براصي ايه نحكي..
انا: اكثر بلاصة نموت فيها..كل واحد عندو ريحة تعجبو بزاف..و بالنسبة ليا ريحة لبحر هي الريحة ترد فيا الروح
تبسم..قرب ليا..وقف قدامي قد قد حتى مولاتش مسافة بيناتنا..غمض عينيه..خذا نفس طويل..قلبي دق بالقاوي..للحظات حسيتو كأنو قاعد يشم فريحتي..تبسمت تلقائيا..جبد روحي شوية عليا..ضحك..عقدت حواجبي..طلعت راصي ليه نسأل فيه..
انا: علاه راك تضحك
هشام: والو..خلينا نطلعو
هزيتلو براصي ايه..عارفة مراحش يحكي..سبقني بخطوات..لحقتو..نمشي موراه..طلع لليخت..وقفت عند الحافة..شفت معا رجليا و رجعت شفت معاه..
انا: هشااام
تلفتت ليا..يسأل فيا بعينيه..شفت فالارض و رجعت شفت معاه..تبسمتلو بتبهليل..ضحك على جنب..رجع قلب ليا..مدلي يدو..تبسمتلو..شديت فيه..طلعني ليه..لف يدو على خصري..لسقني فيه اكثر..شديت بيدي الثانية فكتفو..طلعني ليه..سوطيت لليخت..هبطني بلعقل للارض..هبط راصو يشوف معايا..ضحكت يحكي..
هشام: فرخة
قلبت عينيا منو..جبدت روحي..حطيت يدي على خصري..
انا: متزيدش تقوول فرخة
قبب ما يرجع يحكي..جبدت روحي عليه..عطيتو بالظهر..نسمع فيه يضحك..قربت لطرف اليخت..وقفت تكيت بيديا عليه..نشوف معا لبحر..نسمع فيه يحكي..
هشام: خليك لتم..شوية و نروحو
تلفت ليه..لقيتو لحق يدخل لداخل..بزاف رجال طلعو لليخت..تتهدت و رجعت تلفت للبحر..من زمان مجيتش هنا..من زمااان ما شفتش هاد المنظر..خذيت نفس طويل..فلحظات قلبي دق بالقاوي..بالزربة تلفت يمين و يسار..منعرف علاه احساس غريب تملكني..كأنو واحد يراقب فيا..غمضت عينيا و رجعت فتحتهم..تنهدت..نقنع فروحي اني قاعدة نتخيل..رجعت تلفت للبحر..حطيت يدي على قلبي..ندعي تجوز هاد الخدمة على خير..مع انو قلبي قاعد يعصر عليا..و مشي مطمني على لي راه جاي..اما ندعي فداخلي انها تجوز بلا مشاكل
_________________________________________
بنات تاقيولي مصممات كتب و شكرا
