خُلِقت بين الفحول فاصبحت منهُم

البارت 13

الكاتبه : آيه محمد
العنوان : خُلقت بين الفحول فاصبحت منهم

-----
---------

البارت 13

زينب : هسه عوفچ من الحلم بعدين نسولف بي وافسره الچ احچيلي شسالفة رُگبتچ؟

زمزم : والله يا خيه ما ادري شسولفلچ بس آمانة الله عليچ الحچي اللي راح احچي بيني وبينچ تعرفين انه ما عندي اخت وما فاتحه گلبي الاحد ومن اجيت الهذا البيت ما ارتاحيت وما انفتحت بس يمچ

زينب : يا خيه شجاچ وداعة ابويه ونظر عيني سرچ ببير واعتبريني اخيتچ انه هم اتعرفين صح عندي اخت بس علاقتي بيها مو قويه يعني انه وياها نختلف ما احسنها مثل طينتي

زمزم : ( بديت احچي الزينب عن علي من الجامعه اللحد جيتي للسلف ) وهذا السبب اللي خله رگبتي مزوهره يختي ( احچي ومختنگه لان كل كلمه احچيها توضح الفرق بين علي من چنت بجامعتي وبين جيتنه للسلف )

زينب : الله يساعد گلبچ خيه كل هذا شايلته بگلبچ وما تحچين بس خيه انت المفروض ما تكرهين علي صح تصرفه غلط بس لابد اكو سبب خلاه يسوي هيچ انت المفروض تواجهينه وتحاچي عن سبب فعله

زمزم : اخاف اخلي عيني بعينه تگلي واجهي لچ انه حچيت وياه كلمتين شگ الدشداشه انوب اواجها غير يدفني انت شمالچ خيه طگ براسچ فيوز وانه ما ادري

زينب : ديلا كاتلچ الخوف صيري مثلي اخوچ من تخطى حدوده وياي عرفت شلون اردنه ( حسيت على الچفصه اللي چفصتها وردت اتلافه الموضوع لكن وين زمزم كميله الثانيه ما تفوتها فايته ولا اكله بايته)

زمزم : ( جابت طاري اخويه واعرف تقصد علي لان شفت نظرات الخوف اليوم بعيونه من ايدها انشگت) لا تمتمتين ولا تغيرين الموضوع اخوتي ورابيه وياهم انه واعرف البيهم من عيونهم اذا انت غيرتي الموضوع فنظرات اخويه شيغيرها

زينب : ( خجلت من كلامها ما انكر هو الرجال فاضحنه بس مو هيچ من دهر فرك) هسه عوفچ مني انه واخوچ ما نرهم سولفيلي اليوم ترحين بـ 11 ونص لو تعلسين الزلمه

زمزم : خايفه والله خايفه لا اعلسه انوب يسويها المخبل ويصعد الغرفتي وانه منا بنت بغداد باللسان عمتچ سعيده انوب تلگي علي طالع من غرفتي هله هله عيد وجابه العباس الها فراح انزل واشوف شيصير والله كريم قابل شيسوي آكثر من هيچ

( باثناء ما نسولف طلعتلنه خاله سلمى وبدت الحفله الموسيقيه تهلهل من اللسانها)

سلمى : الساعه 7 وراح يجون الولد من المعمل لگمة اكل ماكو والبيت متروس نسوان تگومن تتلحلحن ( تتحركن) لو شلون

زينب : يعني شلون انتو مخلفين بنگلادش بالبيت كنسي مسحي طبخي انوب بليتوا هاي المگروده هم زمزم من هسه اگلچ انت مستقبلچ اندفن اول ما فتي القصر ال عزام دامچ بالبدايه خيه افلتي (اشردي) بريشاتچ