خُلِقت بين الفحول فاصبحت منهُم

البارت 4

بارت 4
الكاتبه : آيه محمد
العنوان : خُلقت بين الفحول فـ اصبحت منهم

--------
--

وصلنه للبيت و ع طول الطريق چان لا هوَ يحچي ولا اني احچي بس سالني سؤال واحد گال شنو السبب اللي خلاچ تطلعين بليل گالتله جوعانه واستحي اطلب منهم اكل طلعت گلت بلكت اشوف اخويه محمد يشتريلي شي گاللها فوتي جوه واني جايچ اجيبلچ شي وياي تاكلي تگول اني ع گد مجوعانه وهم احب سالفة واحد يشتريلي من بره تگول گمزت من مكاني وطبگت ايديه اثنينهم وخليتهم جوه حنچي وگتله گول والعباس راح تشتريلي هو صفن ع حركتي وعيونه شلون اللي يلمعن ع ذبلن گاللها يلعن ابليسچ على هاي الحركه فوتي جوه لا نصير سالفه بحلگ السلف تگول صدگ دخلت جوه وهو راح صاحتني حبوبتي گالت حبوبه تعالي يمي خل احبنچ ( ابوسنچ ) باستني حبوبتي وگالت ولچ حبوبه تدرين انت جماره لو لا گلتلها بيبي شنو جماره گالت حبوبه يعني بيضه انت هسه انه حبيتچ بخدچ وصار اثر تگول ع الساعه 11 ونص بليل فات علي وبيده علاگه چبيره متروسه حلويات اللي عجبني بالموضوع فات للبيت وباس حبوبتي من راسها وايدها يعني اكو معرفه بينهم بس شنو ما ادري گالتله بيبي ولك حبوبه انت شجايب وياك هذا الخير كله وانت تاكل هذني شمالك عود انت رجال شطولك شكبرك گاللها حبوبه هاي الجهال البيت خطيه يگعدون بليل يدورون اكل واذا ما يلگون يطلعون برا للچول ( گيعان ما بيها بناء) والچلاب تطاردهم اني هنا فتحت عيوني على وسعهن واحس روحي صرت دوش من الفشله وبگلبي گلت والله يا عليوي هاي هجمتك المرتده تحتاج عليها تصفيق ورفع قبعه وانحناء هم چان يگللها حبوبه اريد واحد يسويلي استكان چاي اذا ما بيها زحمه گالتله ولك حبوبه هاي الجماره اللي يمي هسه تگوملك صدوك گمت وحسيت واحد وراي بالمطبخ

نرجع بالاحداث
مرت ٦ سنوات على الحادثه اللي صارت ببغداد الحادثه اللي خلت امي تجي للناصريه بين الشيوخ والعشائر امي مثلي چانت وحيدة آهلها على ٥ شباب ماكو اي معرفه بين ابويه وامي ولا صلة قرابه وماكو اي تواصل بين بيت جدي اهل امي وابويه الا بالقليل النادر بالمناسبات وتروح بس امي وابويه ما يروح وياها يوصلها ويرجع من جنت صغيره چانت اكو مشاكل بينهم وما افهم شنو المشاكل چانوت يگلولي بنت المعيدي من اروحلهم شلون ابويه يشتغل ببساتين وزراعه وشيوخ وهم من بغداد وكلما افتح الموضوع ويه امي امي ما تحچيلي السبب الساعه ٧ الصبح
- يله يمه گومي گعدي اخوتچ ابوچ راح يجي هسه جايب وياه خبز وگيمر بين ما تگعديهم مكمله الچاي اني يلا جمارتنه استعجلي
- اي يمه گايمه ( جُماره چانت عندي جَده يحچون بجمالها صاحبة عيون شلون الغزال على گد ما كبار وبيهن لون اخضر على اصفر نعناع ومخلي بشيش عسل وچانت معانيها طفوليه حيل برائه بعيونها يگلولي انتِ نسخه عنها)
- گمت گعدت اخوتي طبعاً اني عندي ٤ اخوان علي وهذا عمره ٢٦ سنه وهذا النسخه الثانيه عن جدي بصرامته وجديته الثاني محمد عمره ٢٣ سنه وهذا الانتيم مالتي اني وياه رويسيه شخصيته كانما عايش افلام هنديه حب وشقه وضحك والثالث اسمه اسامه عمره ١٩ سنه وهذا اصلا ما يدري بالدنيا رشت لو طشت والرابع اسمه سامي وهذا آخر العنقود والمدلل اما آني فأسمي " زمزم " وسبب هالاسم لان امي اول ما جابولها مي زمزم من الحج طلگت بيه ومشت بعد زمزم

- علاوي يلا گوم حيجي ابويه هم يالا ترحون للشطره علمود البساتين والحصاد امي تگول خلي يستعجل
- زمازم حبيبي گاعد والله ومحظر نفسي ونازل وراچ بس البس ساعتي وجاي
- محمد اسامه سامي يلا گوموا ابويه راح يجي امي تگول هم يالا تگعدون فتت على غرفتهم دخيل الله يمكن صاير انفجار نووي هاي من غير ريحة الجگاير اللي طاشه بالغرفه والله لو ابويه يصعد ويشوفها الا يسويهم نفاضات وبالشبشب على راسهم محمد تنبل مال نوم ميگعد گوه عاد اجيت اتقربت عليه صحت ( لبيك اللهم لبيك لبيك لا شريك لك لبيك ابويه صعد وراح ينتفنه اني وياك من الفراش قم وللحمام سر ) خطيه هو گمز وطفر من فراشه واني ركضت بره
محمد : زمازم بسيطه اردها الچ والله اردها بس كون اتمكن منچ وما تنهزمين يم ابوچ ام نص نصيص ( لان قصيره يگول هيچ)
زمزم : ديلا هسه انزل واجيك اني اگلك اخذ بثارك
نزلت لگيت امي محظره كلشي واخوتي داير مداير الصينيه والجو بارد چانت احلى گعداتنه الصبح من كلنه نتعارك على الصوبه وچان ابويه يگللهم خلي اخيتكم تدفه انتو زلم عيب عليكم ما تتحملون برد جبت قوري الچاي وچان يفوت ابويه
- ام علاوي جبتلچ الگيمر مثل ما ردتي وجبتلچ ويا حليب صح متحبين حليب الهوش بس زين عليچ بغداديه ومتتحملين
- ابو علي عيب منا ولدك بعدك على سوالفك