خُلِقت بين الفحول فاصبحت منهُم

البارت 22

الكاتبه : آيه محمد
العنوان : خُلقت بين الفحول فاصبحت منهُم

------
---------

محمد : ( اجوني حرس الملهى رادوا يفتشوني قبل لا افوت اول واحد مد ايده جريت ايده لويتها هي گبل طلعت ) لمي چلابچ مو انه اللي اعتدي على مره

ام فرح : اعصابك عيني هاي روتين وهم متعودين عليه كل شخص يفوت للملهى يتفتش خاف شايل سلاح او شي لحد يتقربله بعد شوكت ما يريد يجي يجي بدون تفتيش هذا النسيب

محمد : ( من گالت النسيب عرفت شتقصد من فعلتها تريدني اخذ بتها وهذا عشم ابليس بالجنه فتت لگيتها محضرتلي گعده مال شرب والملهى فارغ بس انه وحراسها وهيَ وبتها ) خير ام فرح طلبتيني شرايده ؟

ام فرح : هذا السؤال اللي چنت منتظرته من زمان شرايده شوف محمد انت من دخلت للملهى وانت خارط مشطي كلش واني هاي الفبركه ( الملعوب ) اللي سويته آگدر بطگة اصبع الغي وترجع المي المجاريها بس اني الي يمك طلب

محمد : اي بله غرديلي شناويه تسوين آكثر من هيچ

ام فرح : مو اني الاسوي انت تريد الدعوه الغيها گدامك حل واحد وهو تتزوج بنتي فرح

محمد : ( ضحكت بصوت عالي على طلبها بحيث ظلت صافنه على ردة فعلي ) لچ بابا انت تعرفين منو انه لو لا

ام فرح : لا بله عرفني بيك

محمد : خايبه انه يحلفون بشرف خواتنه بالسلف وتردين آخذلي وحده بت ليل ممخليه روحها بنفس واحد تخسين انت وعشره مثلچ بنيتي واذا شايفه الدعوه ايد توجع اللي فانه آگطعها الايد وما اخلي احد يلزمها

ام فرح : يعني عيني عينك تحچي هالحچي گدامي وتحط بشرف بنتي بعد ؟

محمد : شحط بشرف بنتچ ابويه انت ترى احنه متواعدين بملهى ممتواعدين بجامع لو مرقد مقدس هاي وحده وشغله ثانيه ترى بنتچ قدمت بلاغ ضدي انهُ اني معتدي عليها ومتاكد لو آخذ بنتچ للتقرير الطبي راح تطلع مره مو بنت بيوت لان لتقدم هيچ بلاغ متوقعه كلشي من الشرطه وانه ادري وانت تدرين انه ما لامس بنتچ لعد منو لامسها ؟ على العموم اعلى ما بخيلچ اركبي واذا ايدچ ما لاحت خلي تلوح رجليچ

ام فرح : آخر كلام عندك ومابي رجعه

محمد : آخر كلام عندي وهسه انه رايح لان اصلاً وجودي بهذا المكان غلط بحقي كلش

ام فرح : بسيطه يصير خير وهذا راسك اذا ما كسرته ما اتسمه ام فرح

محمد : ( درت وجهي وطلعت ركبت سيارتي واتوجهت للناصريه دخلت للمحافظه واجاني اتصال من مكتبنه على اساس اكو امانه لازم اسلمها الابن عمي علي من مدينة المنصوريه رحت بطريقي الها وگفت بمكان چوله ( فارغ ) چانت الدنيا ظهر هستوه بادي وحاره محد طالع من بيته نزلت من سيارتي اتصل على الرقم اللي اتصل عليه ماكو رد الجهاز مغلق او خارج نطاق التغطيه گلت خلي اتصل بعلي واساله لان طولت وگفتي واذا واحد طلع ولگاني واگف يخلون بالسالفه انه وانه مناقصتني طلايب اتصلت على علي ) الو ها علي شلونك خوي اگلك علي هذا واحد من مكتبكم خابرني گال روح للمنصوريه اكو ملفات مدري شني امانه تعود الك وانه صارلي فوگ النص ساعه واگف لا الامانه ولا الولد الخابرني ( بعدني ممكمل كلامي ورصدت ( شفت ) 3 سيارات سود مضلله متوجهات عليه گبل واحد منهم طلع راسه من الجامه وگام يرمي انه گبل ختلت وره السياره وطلعت سلاحي انطيت العنوان العلي وسديت الخط )