الثمن

اعتبار//

اسفه على التاخير الي ديصير
بس جد عندي ظروف تحكمني
اذا تملون من الانتظار خلوها تكمل واقروها والله احب انزل اول بااول
بس ارجع واكول ظروف

يرخصوك من تقترب
لاتخلي ناصي يلوحك
مرات من تبتعد تحفظ كرامه روحك .....

مشينه بالممر الي بي عمو ابو قيس
دخلنه لكينه يمه مريه جبيره وولد اثنين والثالث قيس
لزمت ايد امي حيل
حجت امي
"السلام عليكم "
جاوبها كلهم والولد طلعوا من الغرفه
قيس عدل كعدة والده
"اهلا عيني ام مريم تفضلي"
شال جهاز الاوكسجين من خشم ابوه الي ابتسم
"اهلا وسهلا ست نسرين شنو هل الزياره الحلوه"
ابتسمت امي وهي تكعد واني واكفه بصفها
"اهلا بيك والحمدلله على سلامتك متشوف شر "
جاوبها وهو يركز بنقطه معينه
"الله يسلمج ، هاي الحلوه اكيد مريم "
ابتسمت له
"شلونك عمو "
ضحك وهو يباوع بوجهي
"اني زين اذا انتي زينه ،ايدج شلون صارت "
حسيت غصه تربعت بحلكي
هو بسببه صار كل هذا وتعرفت من خلاله
على وليد وقيس وبشير وهيثم
فاجاتني امي وهي تسترسل حديثها
"اعرف مو وقتها بس اعتقد هذا اخر لقاء بينه ابو قيس الي صار مو قليل  لذلك اريد الغي عقد الشراكه بيني وبينك واعتقد وصلك الي صار وشلون اني فتريت بالمراكز علمود ابري نفسي من ولدك وكرايبك "
قاطعت امي المره الكاعده
كانت متكبره وتباوع بتعالي
"اعتقد حقنه كلبنا مفجوع على ابونا  واعتقد الوقت مو مناسب "
ابو قيس وجه كلامه المره الي جانت تحجي
"ام قيس خلي الست تكمل كلامها "
امي كملت كلامها
"حقج مشفتي بعينج ثلاث ايام بنيه شابه مفجوعه عليها ماعرف الله وين حاطها ليش شنو ذنبها ؟ لان مجرد شكو بيه اني الي خطفته ترا مو منطق "
سحبتني امي
"ايدها المكسوره جسمها مشوهه من الضرب والشخوط ليش ؟ شنو ذنبها اني خليت الامر وره ابوها بس اني عتبي عليك ياابو قيس الفلوس مو كولشي بهايه الدنيا والفصل جان فقط رد اعتبار النه "
رغم امي الحجته جان شي مو سهل بس نست اهم نقطه والاصعب نزلت دموعي واني مدنكه
شنو مصيري ياربي شنو هل القوه العندي متحمله الوضع وساكته
"ام مريم احنه اهل واصدقاء من سنين وبينه مشروع اني مصمم اكمله ومستحيل ماطيب خاطرج وخاطر مريم "
كعد على حيله
وحجه وياي
"تقربي بابا مريم "
باوعت الامي هزت براسها عود روحيله
باس راسي
"اني اسف باباتي واعتذر عن الي صارلج احنه منسكت لا على الحق النه ولا على علينه "
مسحت دموعي وشهكتي كوه احجي
الي صار مو قليل
لا ابد مو قليل
"عمو الاعتذار ميسوي شيء "
هز راسه وعرفت هو واصله الموضوع كله
"اي يابويه صح ميطيب خاطر ولا يصلح المكسور "
التفت لامي
"احنه اهل واني اترجاج تقبلين العزيمه انتو والاهل ببيتنه عزيمه صلح اخذي موافقه الاخ ابو مريم وخلونه نبدي صفحه جديده "
امي ابتسمت وارتبكت بنفس الوقت
"ان شاء الله ابو قيس ارجعلكم خبر "
ابتسمت اني لعمو
وطلعنه من الغرفه بعد ما سلمنه عليهم
لحكتنه ام قيس الجانت كاعده
"عيني ام مريم اعتذر على كلامي احنه هم مفجوعين "
هزت امي راسها
"لاتهتمين واعتذارج مقبول "
طلعنه من المستشفى
ورجعنه لبيتنا