الثمن

سجن //

صفنتك ما تجيب عيونهم يمك
روحلهُم لا تبقى اعله هلبت ربك يردهم.

"ولج يمه شبيج "
باست راسي
"ماكو شي لاتخافون بس لازم ابقه اليوم علمود الكفاله "
تقرب اسلام
"اني اكفلج خاله شهل الحجي واحمد هنا "
احمد هم مقبل
"احنه ندفعها وراح اخذ رقم الضابط حتى اي شيء يصير يبلغونه واحنه نجي "
صدك دخل اسلام لضابط التحقيق حتى يكفل ماما ونكدر نطلعها اليوم

هذا الولد التفت لمكانه مالكيته بعد
تنهدت بداخلي
"اوف خفه وراحه "
طلعنه من المركز
صعدنه بسياره اسلام
ورحنه للبيت

جنت هلكانه تعب رغم مسويت شيء بس احس الخوفه اخذت حيلي
كمت صليت ودعيت الله تفرج وكون ميصير شي على امي

نمت حتى بدون ماتغده من الخوفه الي صارت بيه

كعدت العصر
لكيت خالتي ام احمد وزينب واسماء جوه 
سلمت عليهم
ورحت سويت ضيافه وكعدت خالتي ام احمد تستفسر عن الموضوع وامي حجت الها

جان الوقت مغرب لذلك بقوا على العشه يمنه
امي ضغطها مرتفع واني وخالتي بقينه

مريم " خاله شنسوي اكل "
التفت اليه وهي تصلي
"يمه ندز من بره ساعه ويجيبهن اسلام"
دخلت الها للغرفه
"لاخاله عليمن هسه اسوي برياني ودجاج شوي وزلايط طرشي مو اله ندز من بره "
ابتسمت
"ولج يمه مابينه حيل نسوي !"
كعدت يمها
"دخليني اسوي لعد بس تكومين بالمجمده "
ضحكت هي
"اوكي حبيبتي براحتج "
دخلت للمطبخ سلكت دجاجتين ونكعت تمن
عشر دقايق وفارن الدجاجات ماريدهن يستون زايد
حضرت الصلصه مالتهن
غمستهن على السريع وحطيتهن بالفرن لان جان حامي
دخلن اسماء وزينب للمطبخ

اسماء " ها مريوم نساعدج"
باوعت الهن كاشخات مو مال بهذله
"لا شعندي بعدين تدمر ملابسكم اني بس كم شغله اسويها "
زينب "خلي نسوي زلاطه ونحضر لج الماعين وانتي اهجمي "
بلشنه نشتغل
واني سويت التمن اصفر والحشو كملته بااقل من عشر دقايق
اسماء " ولج مريم عبالي انتي عوبه "
ضحكت
"ليش ولج ؟"
جاوبتني
"يعني ماعبالي تعرفين تطبخين "

مريم "لا ولج اعرف اطبخ بس مالي واهس"

دخلت خالتي  للمطبخ حاجتني
"مريومه طلعي باميه  خلي اسوي مركه بسرعه لان ابو احمد هم يجي "
رحت طلعت باميه من المجمده
قطعت خالتي الحم

دخل اسلام للمطبخ
"ها يمه شجيب اكل "
خالتي جاوبته
"مريومه طبخت  ميحتاج "
باوع بطرف عينه
"خوش لعد اني راح اجيب عصاير واجي "
جاوبته خالتي
"روح يمه لاتتاخر خاف نحتاجك"

بقينه نشتغل وراها انطيت سفره لسامر
"افرشها بسرعه "
فرش السفره وبلشنه ننقل الاكل من المطبخ للاستقبال
اني واسماء وزينب ننقل الماعين وسامر يرتبهم