الثمن

خذلان//

يكول ايهاب المالكي
من شفت الحلم ينوخذ مو على الوان
بعد بطلت اضم احلام ورديه

مرات يومين ايام على يوم الكعده التي انتهت بفصل مادي حلاً للاشكال وطبعاً جان اكو طرف ثالث من طرف عمامي هو الي راح يستلم المبلغ وطبعاً بابا قرر من يجي المبلغ منتحفظ بي  كله اكيد نتبرع بجزء منه كدفع بلاء عنه كلنا

وباجر هو يوم خطبه ساره وعقد قرانها
جنت كاعده يم امي
"يمه باجر اروح لخطبه ساره موافقه مو"
هزت راسها
"اي تروحين واروح وياج والله الهبطه مال خطفتج بيه لحد الان بعد ماكو طلعه وحدج"
ضحكت واني اباوع الها
"يمممه لا تحبكينها تره همه شارعين بعيدين عن بيتنه وبعدين شلبس ماريد اطلع شي قليل"
باوعت بوجهي وهي عابسه  تنزل درجات الطلاب على الحاسبه
"مريم كومي عني افتحي كنتورج وشوفي شبي من بلاوي لاتحلمين تشترين "
ابتسمت واني اباوع عليها دغيتها بجتفه
"يمه اني محد يقدر مشاعري اني مخطوفه ونفسيتي تعبانه كلش حتى مجاي انام زين تستكثرين عليه فستان "
باوعت عليه وعيونها مدمعه
"ولج يروحلج فدوه الفستان كم بنيه عندي بدنيا لاتزعلين حبيبتي "
اني اجذب عليها وهي مصدكه صدك حسيت بروحي حقيره
وضميري هنا انبني حسيت ماريد اضغط عليها ودنيا مغرب
"لايمه اشاقه وياج عندي فستان البسه بس ايدي شلون البس منها "
ضحكتوهي تباوع لايدي
شوفي فستان ردانه عريضه لو مابي ردن هي حفله بس بنات مو "
هزيت راسي الها
" اي بس بنات"
صعدت فوك طلعت فساتيني كلهن لان امي بكل سفره تاخذلي فد واحد او اثنين
اختاريت واحد عدل لون اسود وبي فتحه جانبيه
وردان مابي بس حمالات عاديه وطلعت فوكاه ستره سوده اطلع بيها من البيت حتى ميطلع شي مني
عرفت الحفله راح تكون فخمه حيل لان بقاعه فلازم البس شي مرتب بس ايدي جانت مانعتني
وحذاء كعب اسود
فتحت شعري وكعدت على جربايتي. اكرز حب اريد احد يسحبلي شعري اني ايدي مكسوره
وبعد حوالي نص ساعه
اخذت كاويه الشعر ونزلت لخالتي
جانت لابسه مناظرها الطبيه وكاعده تتفرج على التلفزيون
كعدت يمها
"خاله سويلي شعري "
ضحكت وهي تلزم بالكاويه تكلب بيها يمنه ويسره
"ياخاله واني وين اعرف "
حسيت روحي فقدت الامل شلون بيه لازم تسوي
"خاله ترا بسيطه تعلمي بخصله بسيطه واني اكلج صح لو خطا "
باوعت شويه على الكاويه شكلتها بالكهرباء
وبدت خالتي تحط الخصله بكاويه
"خاله اسحبي الكاويه"
اني كلت هل الكلمتين وهي سحبتها بكل قوتها حسيت راسي نزرف خطيه هي من عطيتي كمزت
"يايمه  انتلتي "حاجتني
فركت مكان الهلسه
"لاخاله بس سحبتيها حيل مو هيج على كيفج شويه شويه وتنزلين بيها "
رجعت تسحبلي شعري بس اهون من قبل
وجانت مرات تعبر خصله ومرات متسويها عدل
اذا جان شعري يخلص بساعه او نص ساعه خالتي سوتهن ساعتين ونص
لميت شعري واني احس راسي يوجعني من التهلس
خالتي جانت ابد مورحيمه

كملت مكياجي البسيط ولبست الفستان فوكاه ستره علمود انزعها هناك
وفتحت شعري وتربت نفسي حيل واني اروح لبيت ساره
صعدت بسياره بصف ماما
باوعت بالمرايه
كان مكياجي عباره ان ايلاينر ورموش  بسيطه حيل وحمره بالون الاحمر