الثمن

تهديد ||

غيّمت والليل چلچل
والخواطر سيّرت ويّه الغروب
وگوطر ابروحي الحنين .

فتحت الشباك  بسرعه ردت اشوف منو جاي !!
او يمكن دورت عليه
لكن صوت الشباك من فتحته جان عالي مديت راسي شويه بترقب مردت احد يشوفني

رفعت راسي واني اشوفه مخنزر ومبين اعصاب
خزرني وهو يباوع لفوك عليه تحديداً
اجتي عيني بعينه وللمره الثانيه

سديت الشباك بسرعه والبرده وكعدت اكل بظافيري
اوي واذا شافني شكو مهتمه

سمعت اصوات السيارات راحت
نزلت جوه القلق واضح على البيت كوله
امي الدمعه بعينها
وخالتي كاعده تسبح بلكت الله يفرجها علينه وتبين الحقيقه
كعدت يم امي
"يوم لاتخافين مو انتي لمسويتها قابل شنو يعني لهل الدرجه ماكو قانون"

وكعت دموعها
"لج يمه يحجون بااسمي يعني حتى اني مراقبيني وهذوله حادين سنونهم علينه يوميه جايين "

شويه وجان راح ياذن المغرب
"ياامي توكلي على الله اقري قران حتى تهدين "
هزت براسها وكامت تتوضه
واني كذلك توضيت وصليت
كعدت على السجاده ادعي وغمضت عيوني
شفت هذا الولد الطويل وياه مره اكبر من خالتي تسولف ويه خالتي
ولقطه ثانيه اسلام عصبي ويضرب بواحد
تعوذت من الشيطان
وكمت سويت عشاء لان محد اله واهس ياكل
حطيت الاكل وبدينه شويه نسولف افتح مواضيع ويه امي
وخالتي تحاول تهون الوضع

سمعنه الباب اندك
صارت بينه خوفه
كل ماتندك الباب

لبست خالتي شالها وطلعت تفتح
سمعتها تكول
"ابو مريم تفضل"
دخل بابا باوعتله جان لبس بلوز ابو الركبه لون بيجي وبنطرون وفوكاهن كوت
هذا بابا صاك ! بعده شباب
رحت سلمت عليه وكعدنه اني وياه بالاستقبال
ظل يسالني عن الدوام
بس عيونه على الباب
"امج نايمه مو؟"
ابتسمت عرفت صار ساعه يلوب على شنو
"لا كاعده !"
محجه شي بقه يسولف هم واني اجاوبه
"روحي صيحها "
حجاها بسرعه ويلزم تليفونها عود هو مامهتم

طلعت من الاستقبال
لكيت امي تباوع على وجهه بالمرايه

"ماما بابا يريد يحجي وياج؟"
ابتسمت شويه
"اي هسه اجي بس البس حجاب"

دخلت لبابا
"تكول ماجي "
فزع من مكانه
"ليش متجي؟"
ضحكت واني اغمزله
"لا راح تجي هسه !!"
كعد بمكانه  وبقه يكلب بتليفون
دخلت امي بيدها صينيه
لابسه روب اسود فوك تراكسودها وحجاب
قدمتله
"اهلا ابو مريم اعذرني مادريت بيك جاي"
صفنت بوجهه وهي تدري بي جاي
امي تبيع ثكل
"لاعادي اني اجيت اشوف بنتي واروح "
قدمت امي كوب النسكافيه اله وبعدين اليه
الصفه المشتركه بيني وبين بابا هي النسكافيه والكهوه كلش احبها

" شصار على موضوع محمد اسماعيل "
استغربت لان بابا يعرف
بس اعتقد امي مبلغته
"جاوبته ماما رفعو دعوه وحققو وياي لان اني اخر وحده جان متصل بيها واليوم اهله اجوي لبيتنه يهددون "
بابا فتح عيونه
"وشنو نسرين اني اخر من يعلم اخر مره حجينه كلتي انخطف الرجادل وهسه طلعو محققيين وسجون ومراكز وتهديد وشوكت جنتي ناويه تحجين من يسوون شي الج لو لمريم يومين اراسلج واتساب واتصل كل ظني خجلتي من الموضوع الي كتلج فكري بي بس صدمتيني حيل"
وكفت امي من مكانها
ودموعها بعينها اني احس جمدت من الخوف
الصوت العالي يخوفني
"هاي هسه حاي تحسبني ؟ هاي السنين الي راحت وين جنت ؟ ميحقلك تحاسبني ابد "
فتح عيونه واحس وجهه يريد يطك من العصبيه
"صح عفتكم ادري محاجه كل ساعه عايده الموضوع وتدرين كلش زين شصار وقررنه نرجع لبعض وبصوره رسميه تالي هسه تذكرتي عايفكم سنين الظاهر اني مالي وجود من الاساس وكل الي ابني ميفيد، تصبحون على خير "