الثمن

تحضيرات/

ومشيتي وگلتي كلشي يموت
بَـس غَلطــانه
ماتدرين الذَنب تأثيره ما ينشـال
من يمــوت شيطانه.

حسين علي المطوري

ثاني يوم هو بدايه جديده
جنت متحمسه حيل كعدت الصبح لكيت بابا يشرب جاي وخالتي تتريك
صبحت عليهم
"بابا شهادتي مجبتها من الجامعه طلعو من زمان "
هز راسه
"اليوم معندي مجال والله روحي انتي جيبيها وشوفي ساره اني هم تذكرتها كلت شعجب لحد
هسه مطلعوا "

التفت على امي
"انتي ماتكدرين وخالتي تعبت وعدها دوام راح نروح اني وساره نشتري فستان وحذاء واكسسورات "
امي "لامريم انتي ذوقج مدري شلونه خاف تجيبين هاي السوالف مال نازك وناعم ويضيع الاول والتالي "
بابا يضحك
تنرفزت اني
"يايمه غير خطوبتي وذوقي بس ممكن يعني اذا معجبج نبدله هاي اذا لكيت شي يعجبني "
هزت راسها مامقتنعه
"خوش منين تشترين ؟"
هزيت راسي "والله مادري بس اكيد اشوف المنصور اول بعدين نفتر "
اتصلت بساره طبعاً كعدتها من النوم لان ساره من النوع اليسهر
اجتي بسيارتهم بعد ساعه
بدلت واخذت فلوس وغراضي وطلعت
امي صاحت وراي
"مريم لاتروحين تاخذي من المحل الي اشترت منه ساره شو فاله مو حلو"
التفت عليها
"صدك جذب يايمه هاي عود انتي المثقفه "
مقبلت "هسه دروحي شوفي لون يلوك عليج احمر لو ماروني لو ابيض فهمتي ؟ لاتتاخرين "
بستها وطلعت
رحنه اني وساره للكليه
اخذت نتيجتي طبعاً الاستاذ رزلنه لان متاخرين على النتائج
اني طلعت ناجحه جيد جداً وساره بواحد رافعها قرار
طلعت تباوع على النتيجه مقابله
مريم " احمدي ربج واشكري نجحتي هو انتي شداومتي "
باوعتلي صفح
"اهو يلا خلي نحتفل مدام نجحنه"
مشينه بسرعه" قصدج امشي نشوفلي فستان اتجفن بي ولج امي كالت لاتتاخرن"
رحنه للمنصور ومن محل لمحل وبقينه كومه نفتر
لحد مالكيت فستان
جان فستان اوف وايت جان بسيط كله تول وبي نفشه بسيطه وعليه كرستال ناعم ذهبي من جوه وردانه تنزل على الجتفين وصدره شويه مفتوح
   حيل عجبني
اما الحذاء جان بالتاكيد كعب لونه ذهبي   بي سير ينلف على الرجل
كملت الغراض والاكسسورات ورجعنه للبيت
لكيت امي نار مشتعله
"ليش تاخرتي هلكد هو هيج من ١١ الصبح لل٦ العصر صدك تحجين "
كعدت وحطيت البدله على التخم
"يمه شبيج غير كوه لكيت فستان يعجبني وبعدين اني رحت للكليه واستلمت النتيجه بدال متسالين شطلعتي تكليلي هيج "
دخل بابا " نفسي اطب لهذا البيت ومالكه اصواتكم طالعه "
ركضت حضنت بابا
"بابا باركلي طلعت ناجحه بتقدير جيد جداً "
امي ابتسمت
"لعد شو ماكلتي مطلعه جيد جداً "
التفت عليها " هو انتي انطيتي مجال اول مادخلت استلمتني رزايل "
باسني ابويه من راسي
"عفيه بنتي السبعه صارت فرحتين يارب بيوم خطوبتج ويوم نجاحج ان شاء الله التخرج قريب اريدج تبيضين وجهي "
بسته من خده وكعدت
امي" كومي بلا شوفينه ششتريتي "
هزيت راسي
"لا بيوم الحفله تشوفي لان ادري هسه تطلعين بي الف عيب "
ردت عليه وهيه مفتحه عيونها
"يا ولج تعاي اشوفه "
بابا يباوع يضحك
"نسرين عوفيها براحتها خليها تدلل اميرتي مدام كالت يوم العقد خلص وارثه العناد وراثه"
ضحكت واني اباوع لامي الي فتحت عيونها حيل
"ياااا اياد شتقصد "
دخل الغرفه وسد الباب " لالا ماقصد اله كل خير"
هيه عوجت حلكها صعدت لغرفتي حطيت الفستان بالكنتور بدلت ملابسي
تنهدت واني اكعد على جربايتي اتصلت بيه ساره
" خو ماروايتهم الفستان ؟؟"
رديت "لاطبعاً امي اطلعه من عيني "
ساره "ولو مو وقته بس متحسين شويه امج متغيره "
صفنت شويه ردت اكول لا بس هيه فعلاً متغيره
مريم "اي متغيره نفسيتها تعبانه من العمليه والمرض "
ساره "الله يشافيها ويخليها كدام عيونج ومو مثلي بس بالاسم ام حتى ماشوفها "
مريم "ساره انتي مو صغيره  لاتحقدين على امج هيه انسانه عمليه ترا حتى امي تجي ايام ماشوفها "
ساره "تدرين طلعت وطبيت محد يدري بيه ؟ تدرين بس فيفي تسال عليه ولكيتها متصله بيه هسه حتى اذا ادكلي درب واموت  هم محد يدري "
مريم "دنجبي ساره انتي متربايه وبنت خير واني وياج وحده تكمل الثانيه ابد لاتفكرين هيج الفارغ الي بحياتج لاتحاولين تملينه بشي غلط ترا الغلط يجر غلط حاولي تستغلين وقتج تعلمي الطبخ انتي بيضه متعرفين اطكين "
ردت عليه " اي والله صح اني حيل ماذيتني هاي الشغله  من باجر ابدي اتعلم لان اليوم مابيه حيل تعبتيني خلي اروح انخمد "
ضحكت عليها وسديته