الثمن

عمر ثاني ||

وانتَ عرس الليل والقدّاح
يا هلبت تجي ونرتاح .

صافنه هي تباوع عليه وتفرك بيده
"عفتج سنين واني مو بوعيي هسه رجع عقلي غصب عنج ترجعين "
تهجمت ملامحها وصارت عصبيه
"هاي شبيك احنه مو جهال كتلك افكر "

باوع الها
"تفكرين لو باجر يجي يخطبج واني صافن خلي احد يجي وشوفي اذا محطيت رجلي بي!"

ضحكت اني بصوت ناصي
عود بابا رجال مثقف وهاي الفاظه شلون هذوله العالم يحجون يله معذورين اهم شي واحد يعبر عن مشاعره
قاطعتني امي من صفنتي
" لعد شتريد انتظرك عمر ثاني "

سكت هو محجه بس يخزر بيها
"اسكتي وتجفي شري ،نسرين  -ام مريم -لاتخبليني "
تاففت وهي تدخل وتسد الباب وراه
اني شردت سويت روحي مو يمها

باوعتلي وراحت لغرفتها
صعدت الغرفته
اوووف بلكت يرجعون سوه
اي شكو بيها بس بعديش بعد ماخلصت كليه وراح اتخرج وهمه منفصلين
ربتني هي بس اني اريدها تعيش حياتها تكون تحت رعايه رجال يحميها
يساعدها بحياتها حتى وان كان مو بابا
اسمح الها لان خطيه

كملت دراستي ونمت

كعدت الصبح لبست تنوره قصيره
وقميص شتوي مقفل ونص بوت وجنطه
ولفيت شعري
خليت مكياج خفيف وحمره ماروني لان تقفيله القميص ماروني
ونزلت اتمشه صدك عجبني شكلي حسيت لازم اتغيير ارجع اهتم بنفسي مثل الاول
كاعده اشرب نسكافيه منتظره امي تكمل
حتى نطلع لدوام
اقرا واشرب نسكافيه
نزل اسلام من الدرج باوعت برود
لابس زي عسكري وكعد على الكرسي مقابيلي

"شكد شفت صلفات بس مثلج مشفت كم مره كتلج لاتخلين حمره طوخ "
عفت الكوب ورديتله جواب
"اكولك انتِ شنو يخصك بيه ؟ ابويه لو اخويه  احط حمره وبكيفي "
نفض روحه وهو يرفع حاجبه
"مدام طلعه من بيت فلازم وراج حسيب ورقيب "

تاففت
"اوف يهل البيت الي شايف روحك بي ، بس العتب مو عليك العتب على امي الي معشيتني بمذله "
ضرب الميز كمزت
"انجبي ولاتقوليني اشياء مكايلها محجيت على القندره البيت كتلج احنه عوائل وناس تعرفنه  بلا حجي زايد امسحيها "

باوعتله برود
"لو تموت مامسحها"
التفت على غرفه امي
"يمه شصار عاد والله تاخرت وختنكت حيل "
اخذت جنطتي وعديت من يمه
"هين يمريم  "
حجاها بتهديد

مجنت اعرف هذا تهديده ممكن يخلي ياخذ نظره سيئه عني او يخلي شخص ثاني
جان ممكن يتفهم عمري
بس الظاهر اني من اشوي شي بسيط ينكلب كارثه
يجي يوم هذني السوالف
ادفع ضريبتهن ؟ لو الله يبعدني

رحت للكليه
لكيت نور واكفه بعيد
اشرت الها هلو من بعيد
التفت عني بجهه
كلت يجوز مشافتني
تقربت داوصل يمها عافتني وراحت