الثمن

ضيوف||

من يغفه البرد بالليل
ويطيح الدفو اعله  الناس
خل عينك على الشباچ من تغفه
انه كل الهوى البردان بالشرفه
انه كل رجفه الحيطان والغرفه

دك الباب ودخل
بلعت ريكي وهو يفتح الضوه
"ادري بيج منايمه "
عدلت كعدتي جنت بعدني بملابسي مال الطلعه مامبدله
"اي منايمه بس متضايقه "
هز راسه وبقه يفتر فوك راسي
"شنو الي مضايقج ؟ اكدر اعرف"
باوعت لسكف الغرفه
شكلك  يااسلام ؟ شاكه بنفسي مو بنيه ؟ لو من نخطفت واني الخوف ماكل كلبي ؟ لو ردت لدكتوره ودمرت نفسيتي ؟ لو شنو منهم

"ضغط بالدراسه عندي تدري مرحلتي صعبه وهيج امور وامي تلح"
ضحك باستهزاء
اسلام " بس هيج؟؟"
هزيت راسي وادري ممصدكني ومتنطلي عليه جذبتي مبين من ملامحي مبين من ذبولي
اسلام" اذا بيج شي او احد مضايقج محتاجه شي كوليلي  تمام؟"
هزيت راسي اله
"تمام متقصر"

مشه كم خطوه ورجعلي
"شنو رايكم نتعشه بره اني ضايج والجو مشحون خلونه نغير جو "
ابتسمت
"روحوا انتو اني هنا بالبيت"
هز راسه
ونزل

بعد ربع ساعه
صعدتلي خالتي
"كومي مريومه اسلام عازمنه على عشه "
هزيت راسي
"لاخاله مابيه حيل "
جرتني من ايدي
"اي ولج دكومي وهم لاتشيلين بخاطرج على امج ترا هيه من خوفها عليج"
ابتسمت
"لا اني مزعلانه من امي ابد بس تعبانه"
رفضت رفض قاطع وجرتني من ايدي
واني ماكدر ارفضلها طلب
حطيت مكياج خفيف ردت اغير من نفسيتي شويه
ولبست ستره سمائي وبنطرون اسود
وعفت شعري مفتوح
نزلت جانوا كلهم متحضرين
امي جانت تباوع عليه واني احاول اشغل نفسي لا مو لان زعلانه منها ..
بس محبيت ارجع افتح الموضوع

دزلي قيس مسج حسيتهم كلهم انتبهوا عليه
حطيته بجنطتي التليفون بدون ماجاوب
صعدنه بسياره اسلام وخالتي واني وامي
رجع وصلني مسج مره ثانيه
قريته جانوا اثنينهم من قيس
"هلو مريم مكدرت اتصل بيج خاف احد يمج اريد اتصل بيج اذا اكو مجال"
المسج الثاني
"من تقرين المسج ردي عليه "

جاوبته
"اني طالعه هسه من ارجع اتصل بيك "
بعد دقايق رجع دزلي مسج
"تمام بويه منتظرج"

دخلنه المطعم وطلبنه اكل وجانت الاجواء حيل حلوه
وخالتي وامي متونسات واسلام نزل اركيله وكعد يشرب
واني اتصفن وحدي
بس مانكر استمتعت حيل وغيرت جو

وراها رجعنه لبيتنه

مرت يومين وصادف يوم جمعه
جنت كاعده بصاله اباوع تلفزيون وخالتي يمي وامي بغرفتها
سمعتها تخابر
وره دقايق طلعت من غرفتها
"بيت ابو قيس راح يجونه "
حجت وهيه تفتح عيونها
حسيتها متوتره
خالتي "اي واذا اجوي هلا بيهم بس شنو سبب جيتهم ؟"
كعدت امي على التخم
امي "والله ماعرف بس كال جايين نشوفكم "
خالتي هزت راسها
"اي شكو بيها قابل نطردهم "
امي طبكت حواجبها
"لا مو هيج بس خاف اياد ميقبل "
باوعتلي وهيه تكول اياد
تاففت خالتي وحجت
"ادري خطار وجاينه نطرده حتى حضرة اياد يقبل وميقبل اشو هو من يوم العزيمه لليوم محجه ولاخابر ولا حتى اتصل بنته "
ضجت من حجت على بابا بس من جهه ثانيه هو صح متصل بعد بيه ابد
باوعتلي امي وهيه تسالني
"صدك ماتصل ولا حجه وياج ؟"
هزيت راسي
"ابد ماتصل الظاهر الشي الي جان يتصل بيه علموده انكطع الامل منه هل رجع هملني مثل قبل "
خالتي باوعت بوجه امي
امي " لا امي لاتكولين هيج اكيد مشغول "
هزيت راسي بدون ماحجي