الثمن

بيت //

موانه التكسره حچايه الناس مطر  حتى من اطيح 
انحط على الراس

"اخطبها "
ضرب وليد بريك بقوه وضحك
التفت لهيثم
وليد "شنو صاير حلال المشاكل ؟"
تنهد هيثم وجاوبه من وره خشمه
"مو حلال المشاكل بس احنه عدنه اخوات ومنقبلها على عرضنه شلون نقبلها على البنيه انته جاي تشوف بعينك حالتها مرتين رادت تموت روحها "

ضحك وليد بااستهزاء
"لعد شكو ورطتونه بيها ليش خطفتوها من البدايه "
جاوبه هيثم
"تدري كلش زين اني تورطت ويه بشير وفهمني الموضوع غلط "
حجه وليد وهو يحط الجكاره بحلكه
"محد يحل الموضوع راح نوديها لبيتها واحنه نرجع لبيتنه"
صاح قيس بصوت عالي
"اي هي مكوده ونشمر البنيه مندري شبيها مابيها وليد هو يتصرف هيثم بعدين نتناقش وقت متاخر خلونه نوديها عدو ليلتكم هاي "

مشينه بسياره بس هذا كل ساع يخزر بيها خبلني اني بس مدنكه راسي بس مادري عيني تجي بعينه
وكفنه كدام الباب ودموعي كامت تصب
نزلو من السياره
قيس حجه وياي
"ادخلي بنتي  بلغي اهلج "
اني مو كلي بلغي اهلج احس ضربني طلقه
مشيت كم خطوه بس روحي ميته
شكول لامي اذا سالتني ؟
اضم الموضوع واعوفها على قيس هو يحلها ؟
خاف يغدرون بيه
رجعت لقيس جان واكف مصدوم
"الله يخليك لاتغدر بيه اني راح انتظرك انته تحلها "
دموعي تصب وهو يباوع بصدمه
حسيت عيونه دمعن
لزم شاربه
" شاربي مو عليه اذا مارفعت راسج مو احنه النكسربنات الناس "
حسيت شويه هديت

دكيت الباب بس اديه ترجف
دكيته اكثر من مره
سمعت صوت اسلام اي يمكن هو
فتح الباب وبقه صافن عليه
صاح بصوت وضحكته ماليه وجهه
"ولج مريم يمه اجت مريم "
حضني بقوه
"ولج وين جنتي كلبنه نار فوتي من جابج شصار احجي "
تقرب قيس من عنده
"اسمح النه نكعد ونسولف والتريدو احنه جاهزين "
التفت اليه اسلام
"هاي شنو الي جاي يصير "
هزيت راسي
"مادري "

طلعت امي بالحديقه وخالتي كوه تمشي
وبابا جان هم موجود مبينين منايمين وكلوبهم مشتعله
ركضت لامي ابوس بيدها واحضنها وهي بس حاضنتني وتبجي
وهي تعيط
"ولج يمه كلج دم يمه احجي متعوره ؟ بيج شي" تهز بيه بخفه نزلت دموعي
"لايمه بس وكعت محد اذاني "
بوست وجهي
"اكيد يمه "
هزيت راسي

ابويه هم لازم ايدي ويبوس بيه
وخالتي تهلهل
"واهليه لاهل لبيت لرجعتج يمريم "
تصيح بالبيت  وتبوس براسي

التفت على بابا بس صوتي كوه يطلع
"بابا قيس بالباب اكو موضوع لازم تحجون بي واسمعهم للاخير "
ادري غير اب ميتقبل حتى وان صار الخطف غير متعمد بس بابا عايش بالخارج ومطلع على العالم من غير زاويه حسيته راح يتفهم بس مو بسهوله

دخلو لغرفه الاستقبال واني وامي وخالتي دخلنه جوه
امي بعدها حاضنتني
"احجيلي يمه اذوج ؟"
صفنت بعينه وردت احجي كلشي بس خفت الخوف سيطر عليه
يمكن لو كايله جان اختصرت طريق طويل
"لايمه محد اذاني وهمه ماخطفوني ابن عمتهم خطفني لان اسلام تعارك وياه الصبح من رحت للامتحان وقيس ابد مقبل عليه وتعاركو وياه وطردو  ذوله مالهم ذنب وبس عرفو بالموضوع رجعوني للبيت "
امي لطمت على صدرها
" الله لايوفقه هذا الكلب واذا تعارك ويه اسلام  يكوم يخطف بنات العالم"
هزيت راسي
واسمع العياط الي صار بالاستقبال