_خدي يا ستي العدية بتاعتك أهي زي كل سنة
_كل سنة وانت عيدي و عديتي يا زياد
_يا قلب زياد السنه الجاية هتكوني في بيتي وهيكون معانا مازن كمان
_فاكر يا زياد اول عيد جيت فيه هنا وكانت اول مرة تشوفني ومع ذلك جيت و ادتني جنية و قولتلي عقبال كل عيد كان ساعتها عندي 6سنين وانت كان عندك 10سنين فاكر
_طبعا فاكر كونا لسة جين العمارة قبل العيد بكام يوم بس يوم العيد الصبح اول ما شوفتك حسيت أنك مسئولة مني واني لازم اديكي العدية بتاعتك و يومها مكنش معايا غير 2جنيه و اديتك منهم جنيه و خليت معايا جنيه انتي اه طلعتي عيني عشان تاخدي الجنيه بس الحمدلله خدتي الجنيه و قبلتي تنزلي معايا نصرف الجنيه
_يومها جبت بيه شيبسي و كيكة بس مش عارفة ازي يومها الجنيه جاب الاتنين مع بعض
_ما انا دفعت الجنيه التاني ليكي و مردتش اقولك انهم ب 2جنيه و روحتي مبسوطة و جينا قعدنا في نفس المكان بالتحديد علي الدرجة التالتة و كلتي الشيبسي و الكيكة و فضلنا نرغي و قعدتي تعيطي من صحابك اللي خرجوا و سبوكي لوحدك عشان خلصتي فلوسك
_يومها قولت انك انت كمان ده اول عيد ليك هنا و مش عندك صحاب قولتلك خلاص تعالا نبقا صحاب
_وابوكي جه و قفشني و انا قاعد معاكي يومها خدك من علي السلم و دخلك الشقة و رجع قعد جنبي هنا و قالي انت مين قولتله انا زياد الساكن الجديد و اتعرفت علي مها بنت حضرتك من شوية ضحك كدة و قالي انا بحب مها بنتي اووي و لما شوفتها قعدة معاك علي السلم زعلت اوووي منها و منك عشان كدة غلط حتي لو كنتو صغيرين من شب علي شئ شاب عليه بس انت شكلك متربي وعشان كدة معنديش مانع انك تيجي تقعد معاها عندنا و بلاش قعدة السلم دي
_جيت عندنا تاني يوم و معاك تليفون بيغني و نضارة و بتقولي جاهزة يا ميمو
و بابا قرب مني و قالي روحي معاه و اداني فلوس يمكن كان عارف ان صحابي مش بيحبو يلعبوا معايا عشان كدة مكنش عنده مانع انك تقرب مني وقرب منك انت كمان و قالك حاجة
_قالي خلي بالك منها اوعي حد يقرب منها او يزعلها يومها حسيت إني راجل و اني يعتمد عليا و طول اليوم خايف عليكي كأنك قطعة مني و رجعنا و يارتنا ما رجعنا رجعت علي اكتر يوم حسيت فيه اني صغير طفل ضهره اتكسر سنده و عكازه خلاص اتكسرو منه رجعت لقيت ماما بتصوت و مامتك قعدة جنبها و باباكي بيتكلم مع حد بيطلب منه يخلص ورق جريت علي أمي حضنتي جامد و قالتلي ان ابويا مات انتِ خوفتي من المنظر و استخبيتي في حضن مامتك و جه عمي قرب مني و شدني من حضن ماما و قالي الصبح قولتلك خالي بالك من مها و رجعتها زي ما هي و عشان كدة بابا قبل ما يموت قالي قول لـ زياد يخلي باله من مامته هو عارف أنك راجل و قدها و تقدر تحمي ماما من أي حاجة في الدنيا .في وقتها استسلمت لكلام والدك و فعلا حسيت بنشوة الرجولة و خدت ماما في حضني و بقيت بطبطب عليها كأنها هي اللي بنتي مش انا اللي أبنها و خلص العزا و جيتي انتِ و قعدتي معايا علي السلم و قولتيلي
_لو عاوز تشاركني في بابا انا معنديش مانع المهم أنك متكونش زعلان يا زياد .فاكرة قولتلك كدة عشان حسيت انك زعلان يمكن يومها مكنتش عارفة معني انك تفقد والدك وانت في السن ده بس حبيت افرحك
_فضلنا نتقابل هنا يوم ورا يوم و سنة ورا سنة دخلت كلية الهندسة و اتخرجت و اليوم اللي مسكت فيه الشهادة قررت اني اجي و اخطبك و خصوصا انك من يوم ما دخلتي ثانوي و انتي بتتكثفي حتي تبصي في وشي و معملتك معايا بقت بحدود كنت فرحان أنك كبيرتي و بقيتي تعرفي الصح من الغلط و كنت فرحان بيكي لما دخلتي هندسة برضو عشان تكوني تحت عيني حتي لو سنة واحدة بس اعرف الكلية كلها انك تبعي
_لما كبرت بابا قعد يتكلم معايا و قالي كدة بقا غلط و ان احنا كبرنا علي قعدة السلم و انه حرام قبل ما يكون غلط يومها قررت احتفظ بيك في قلبي ما انا كنت بحبك بس مكنش ينفع اقولك لاني مكنتش اعرف انت بتحبني ولا لا و بعدت عنك و مع ذالك كنت بتجيب اي حاجة بحبها وانت راجع و بتسيبها علي الباب و تدخل شقتك و كنت بتبعت العدية مع ماما و متستغربش كانت بتقولي انها منك و انا كمان كنت بشوفك وانت طالع و اجي اقف ورا الباب لحد ما تسيب الحاجة و تدخل
_يعني كنتي عارفة أني انا اللي بجيب الحاجة
_اه كنت عارفة
_يا جباروتك يا مها و سيبتيني عمال اقول هي بتاخد الحاجة من غير ما تعرف مين اللي جابها؟
_مها انتي بتعملي ايه عندك
_بابا ابدا كان زياد بيديني العدية
_هو انا مش قولت بلاش قعدة السلم
_يا عمي والله العظيم مراتي و كاتب كتابي و الفرح الاسبوع الجاي
_وانا قولتلك دي بنتي ولحد الاسبوع الجاي ملكش حق عليها يلا يا مها علي جوه و سيبي زياد عاوزه في كلمتين
_تحت امرك يا عمي
_قعدنا القعدة دي قبلك كدة و انا عارف انك كنت قد ثقتي فيك وانك هتفضل قدها طول العمر و هتحافظ عليها
_متقلقش يا عمي مها في عيني
......
_شايف بابا زعلان ازي
_عمي عاوز يقتلني عشان بتجوزك
_بيحبني اوووي و انا كمان بحبه
_نعم يختي بتحبي مين
_في ايه يا زياد ده بابا
_ولو حتي لو كان ابويا انا شخصياً مها مش هتحب و لا بتحب حد غير زياد كفاية علي عمي كدة بقا و بعدين هو مكنش عاوزني اشاركه فيكي وانتِ في بيته و انتِ خلاص بقيتي في بيتي يبقا هو مش هيشاركني فيكي وانتِ في بيتي
_زياد بلاش تتدخل في مقارنة مع بابا
_خلاص حبيني انا اكتر و بعدين ايه القمر ده الفستان هياكل منك حتة
_بجد شكله حلو؟
_عشان انتِ اللي لابسه بس مش اكتر يا ام مازن
_زياد!
_قلب زياد من جوووه
_بحبك
_وانا كمان
#مها محمود بكر
