اسكريبت
ليلة العيد
........
(يا ليلة العيد آنستينا ... وجددتي الأمل فينا
هلالك هل لعنينا ... فرحنا له وغنينا
وقلنا السعد حيجينا ... على قدومك يا ليلة العيد)
بدأت أسمع الأغنية و انا بحضر بيجامة العيد عشان أخيرا خلصت الشقة و بدأت ادندن مع ام كلثوم و انا مش حاسة بحاجة لحد ما لقيت أيده بتحاوط وسطي فأبتسمت بهدوء علي العادة دي و انا بقوله:مش هتبطل تعمل كدة غير لما يحصلي حاجة
لقيته لف وشي ليه و باس راسي وهو بيقول: انتي عارفة اني بحبك و مقدرش اعيش من غيرك و من غير الكتكوت الصغنن اللي جوه ده
لقيته بدأ يحرك أيده علي بطني بهدوء: ها يا استاذ مازن مش ناوي تنزل ولا القعدة جوه حلوة و عجباك و انا هنا حتي الحضن بقا صعب عشان حضرتك مشرف جوه
بدأت اضحك عليه :للدرجة دي غيران
لقيته بص في عيني وهو بيقول:انا بغير عليكي من نفسي يا ماستي و بعدين يلا وريني هتلبسي ايه
لقيت نفسي بعيط انا أصلا ماسكة نفسي بالعافية من الصبح و بدأت أتكلم وهو خلاص تكة و هيعيط معايا:انا مش عندي بيجامة داخلة فيا عشان خاطر الأستاذ اللي جوه ده كل هدومي بقت ضيقة
لقيته أرتاح بعد ما كان وشه هينفجر :حرام عليكي وقعتي قلبي طب يلا البسي هننزل نشتري حاجة حلوة و سيبك من البيجامة دلوقتي
بدأت اعترض كالعادة:لا انا لسة عاوزة اخد دوش
لقيته خرج وهو بيقفل الباب : عشر دقايق و تكوني تحت في العربية
ابستمت بهدوء بس افتكرت انه قال عشر دقايق:
ياربي بارد هلحق البس في عشر دقايق هو انا قادرة اتحرك أصلا
و بدأت البس فعلاً و نزلت ركبت جنبه لقيته بص في ساعته:العشر دقايق بقت نص ساعة ماشاءالله
ضحكت وانا بشاور علي يطني : انت عارف بقا
ابستم بهدوء و بدأ يسوق وهو بيقولي: النهاردة هتمشي معايا من غير ولا سوال
ابتسمت بهدوء و بصيت قدامي و فضلت باصة في الشباك لحد ما لقيته وقف قدام مول كبير و نزل و خدني من أيدي و طلعنا الدور التاني و دخلنا محل بيبيع ملابس بيتي و بدأ يدور في البيجامات علي حاجة تنفع معايا وهو محتاس و انا واقفة بضحك عليه هو طلب اني اسكت و انا نفذت طلبه لقيته بصلي بزهق: هو الحمل أثر علي لسانك كمان ولا ايه؟
ماسة : انت قولت من غير ولا سوال
اعترض:بس في مساعدة عادي
ابتسمت بهدوء و انا بقرب منه لقيته اتخض و رجع لورا: اعقلي يا مجنونة احنا في محل هنتقفش
ابتسمت ليه بهدوء بعد ما خدت اللي عاوزاه من الاستناد اللي وراه وانا بقوله تعالا حاسب
لقيته استغرب :ليه واخدة اتنين منها
بصيت ليه :من غير اعتراض
و بدأت اضحك و انا ماشية قدامه و فعلا حاسب و مشينا بس طلع بينا علي مطعم و هو عارف اني بحب اكله و طلب كل حاجة انا بحبها و رجع بينا علي البيت و طلعنا الشقة وانا حاسة بتعب خفيف بس محبتش ازعله و ابتسمت في وشه بهدوء وانا بمد ايدي ليه بالبيجامة:يلا خد دوش و البسها
لقيته فتح بوقه :انا هلبس دي انا علي آخر الزمن هلبس أرنب
ابتسمت بهدوء :لو ملبستش الأرنب انا هعيط
لقيته خده بعصبية:هاتي هااااتي هلبسه يختي يكش ترتاحي
و دخل فعلا يلبسه و انا دخلت غيرت و لبست الأرنب و بدأت أجهز الأكل علي السفرة لحد ما يخرج
بعد عشر دقايق سمعت صوته بيقولي : الله تصدقي الأرنب مريح ده غير أني بقيت أرنوبها رسمي
لفيت ليه و انا بضحك بالعافية:بس تصدق و يا ميزو هياكل منك حتة
قرب مني وهو بيقول:مش بحب اسم ميزو ده
ضحكت عليه وانا بحط راسي علي كتفه :خلاص اقولك يا أرنوبي
لقيته عدل نفسه و مسك راسي : لا لا ميزو ارحم اقولك قوليلي يا مازن اسمي جمال
ضحكت عليه :بدلعك يا بيبي
سابني و قام : انا جعان يا ماسة و البتاعة دي مش عارف اتحرك بيها
قومت وراه وانا ببتسم:طب اقعد كل بعد كدة روح غيرها
و بدأنا ناكل وانا خلاص مبقتش قادرة استحمل الوجع و بدأ صوتي يعلي لقيت مازن ساب الأكل و قرب مني :مالك يا ماسة انتي كويسة
بدأت اصوت في وشه :بولد بولد يا غبي
لقيته اتلغبط و مبقاش عارف يعمل ايه: المستشفي بسرعة بس هات شنطة البيبي الأول
مازن: حاضر حاضر
جاب الشطنة و جه يقرب مني عشان ينزلني تحت بس انا كنت خلاص مش قادرة: مش قادرة انزل علي رجلي
مازن مكنش قدامه غير انه يشلني لحد العربية و فعلا عمل كدة و طول الطريق عمال يقول يارب يارب وصلنا المستشفى و نزل وهو بيزعق : عاوز كرسي مراتي بتولد
بس محدش جاب حاجة والناس كلها باصة عليه مستغربة انه لابس كدة لحد ما هو خد باله انه نزل بالارنب راح فتح باب العربية و نزلني منه وانا بعيط و شالني و هنا الناس صدقت و بدات تساعده لحد ما دخلني اوضة العمليات واخر كلمة سمعتها منه وهي بيقرب مني:أرنوبك مستنيكي تقومي بالسلامة
مش عارفه فوقت أمتا بس اول حاجة شوفتها كانت عيونه وهو ماسك ايدي و بيقولي: حمدالله علي السلامة ليكمل بهمس يا قلب أرنوبك
ضحكت بتعب: الأرنب الصغير فين
لقيت ماما بتقرب مني وهي شايلة إياد في أيدها : اهو يا ستي و الاستاذ مازن مش راضي يجي جنبه غير لما تفوقي
بصيت ليه بلوم: ليه يا مازن
ابتسم بهدوء: مقدرش اشيل قطعة منك لأول مرة وانتي مش معايا
ضحكت في هدوء وانا ببص في عيون إياد :الله شبهك يا مازن نسخة منك
مازن :بس مش معاه ارنوب
ضحكت عليه وانا بقوله:بصراحة شكلك مسخرة ازي نسيت انك لابس أرنب و الناس صعب تصدقك
لقيته قرب مني:اعمل فيكي ايه انتي السبب انا ابويا و اني جم و شافوني بالارنب كانوا عاوزين يعملوا عليا ملوخية
ضحكت :صح هما فين
مازن بهدوء:راحوا يجيبوا حاجة
: بس احنا جينا أهو
بصيت وانا مستغربة مين ده اللي معاهم
مازن:مين معاك يا بابا
بص عمي بهدوء ل مازن : ده مصوراتي احنا زمان كنا اي لحظة حلوة لازم نصورها و طبعاً مفيش احسن من ولادة حفيدي
ابتسمت بهدوء وانا شايفة أهلي و كل اللي بيحبوني عايشين معايا اسعد لحظات في حياتي قطع تفكري صوت مازن : اضحكي يا ماسة
بصيت للكاميرا وانا بضحك و بالرغم من تعبي إلا أن دي كانت احسن صورة عندي
........
لقيت ايده صغيرة بتسحب مني الصورة وهي بتجري بصيت عليها انا عارفه كويس هي مين مفيش غيرها نيران حبيبت جدها خدت الصورة و هتروح تحكي ليه كل حاجة دلوقتي و فعلاً لقيت مازن جايبها و جاي: انتي بتخلي البنت تشوفني وانا لابس أرنب يا ماسة
ضحكت عليه: يعني هي اول مرة تشوفها ولا تسمع حكايتها بس هي كل مرة تعمل نفسها اول مرة تسمعها
لقيته ساب ايد نيران وهي بتضحك وقرب مني : تعرفي يا ماستي انا لسة فاكر اليوم ده كويس أصل أرنوبك مش بينسي خصوصاً لو حاجة تخصك واه صح انتي نسيتي تقولي للبنت انا هنا بصيت ليكي وهو بيلقط الصورة و قولتلك ايه؟
ابتسم بهدوء كالعادة:قولتلي أرنوبك بيحبك يا ماسة
ابستم وهو خارج: و هيفضل يحبك لحد اخر عمره
........
عارفة انها مش حلوة بس بأذن الله هيكون رجوع حلو
#بقلم
#مها_محمود_بكر
