"إلا أن يشاء الله"

الجزء الثاني

✒..
وجهه ولى اسود وهو يقرا فالكلام..
وهي انخطف لونها تشبحله وخلاص مستسلمه استسلام تام..
نزل المذكرة وبسرعه عطاها زوز كفوف..وقعد يخبط فيها بالمذكرة وهو يقول بصوت عالي غاضب:يامسخه..ياحيوانه..ياكلبه..ياكلبه..
وهو يخبط فيها بقوة جهده..
سمعوا دعاء وامها وخواتها الدوشه جوهم يجروا وصلوا الدار وهما مخلوعين..
جميله بصدمه:شن في علاش تضرب فيها يامحمد!!
محمد وهو يخبط في رويدا:تبي توطيلي راسي الكلبه الوسخه..من هو هدا ياحقيره منو..
دعاء..
عليك ليله..قداش خفنا وقتها ننضربوا معاها..وخفنا ع مستقبلنا اللي مرات بسبب غلطتها يضيع..
اني وقتها مش عارفه هو شاف بالزبط..يعني شافها تكلم فيه..ولاتبعتله في رساله مش عارفه..غبارة لو يعرف انه ولد عمي ياما يصير بعدين..
جميله وهي ترعش:شن دارت قولي بس..
وخر عنها وهو داهش وعطي المذكرة لجميله وقال:اقري وشوفي وساخة بنتك..
خدت جميله المذكرة وقعدت تقرا وانصدمت فالكلام اللي قراته فنصت في رويدا وقالت:من هو هدا يامسخه تكلمييي..
ورويدا منزله راسها لوطا وهي وترعش ومابتش تتكلم..
دعاء..
مابكتش بكل..ترعش وخلاص واني بنبكي من الخوف هدا وشاف المذكره دار هكي مال كان شاف التليفون شن يدير..
واللي خفت منه صار ..
محمد:جيبي تليفونك جاي ياكلبه جيبي..
هي طلعاته من تحت المخده وعطتهوله..
خداه بعنف وقعد يفتح فيه ويفتش..ولأن رويدا كانت ديما خايفه بوها يفتش تليفونها كانت تمسح في كل شي..مكالمات ورسايل واساسا مش مسجلاته بإسمه..
دعاء..
وقتها خفت ابراهيم ولد عمي يتصل..
انسحبت من حداهم بدون مايحسوا بيا ومشيت بعتت رساله لإبراهيم خبرته اللي صار بإختصار..
ووليت حداهم..
لقت بوها حاط التليفون على وذنه ويقول:تو نعرفه من هو ولد الكلب اللي تكلم فيه..
مروة في نفسها"خوك الكبير يابابا كلب!" وشدت ضحكتها..
شبحت دعاء لمروة زبطت علاش تضحك..شدت ضحكتها حتى هي.
دعاء..
مروة اختي سفتوله ديما هكي فالمواقف اللي ماينفعش فيها الضحك تضحك..احني ليلتها مرات يدمر مستقبلنا وهي تضحك!
محمد قعد يراجي يرد عليه صاحب الرقم فجأه انفتح الخط وجهه تغير وقال:نسرين!..
رويدا شبحتله بصدمه..
محمد بشي من الربكه:كيف حالكم انتم؟.......لالا غير جيت بنتصل بسواق باصها وشورني ضربت ع رقمك بالغلط......باهي..سلمي على بوك ..تصبحي على خير....
وصكر..
ويطلعله قداش قعد من الرصيد ويفتح عيونه على وسعهم...
محمد بصدمه:منين جوك الفلوس!!..
رويدا قعدت تشبحله وهي ترعش ووجهها لونه ولى ازرق..
جاها طول وعطاها كف وقعد يضرب فيها بجنون..
وهي بدت تعيط..
جميله بدموع وهي ميته خوف:حي علينا ياعارنا محمد ليل راهو والناس تسمع فينا!!..
محمد وخر عنها وقال:من باب الدار ماتطلعيش والقرايه هادي تنسيها مرة وحده..وسخه زيك تقعد فالحوش لين يجيها راجل يتلفها من قدام وجهي..
ومشي بيطلع وحني طول وسعناله من الخوف.
جميله شبحت لرويدا بحقد ودفلت عليها وقالت:ضايعه وسخه..
ومشت طلعت من حداهم حتى هي..
اما حني قعدنا واقفين نشبحولها..
دعاء..
اختي الباردة هادي فوق انها مانزلتلهاش دمعه برغم طريحة نباش القبور اللي كلتها.. اول حاجه قالتها بعد قعدنا براوحنا..
رويدا:مستغربه كيف نسرين اللي ردت!!؟.
دعاء برفعة حاجب:وانتي هدا همك ياأنانيه..
رويدا بإنزعاج:بالله فوتيني مش ناقصه خليقتك..
دعاء بغضب:والله لو بطلني بابا من القرايه لما نكرهك في عيشتك ياضايعه..
ومشيت وخليتهم..
رويدا بسخريه:ريت المؤدبه المحترمه اللي تتكلم دارتها قبلي العلاقه...
وفاق:وانتي ضروري اديري زيها!؟
رويدا رفعت حواجبها وقالت:ماناقصني كان انتي يافرحه..
قلبت وفاق عيونها ومشت طلعت..
مروة:تعرفي لو بطلني نقتلك مش نكرهك في عيشتك نقتلك..
ولحقتهم حتى هي..
رويدا عكرشت وجهها وقالت:ان شاء الله ما وليتوا..ساوت شعرها وتنهدت بضيق وقالت..كيف بنرقد الليله من غير مانسمع صوته..!
🌻🌻🌻
وهديكا الليله رقدوا البنات حدا امهم وخلو رويدا بروحها. رقدت هي في سابع حلمه..
لكن دعاء ومروة مارقدوا الا بالسيف من كثر ماشاغلتهم حكاية قرايتهم لو بوهم وقفها بسبب عملة رويدا..
وعدت هالليله وطل صبح اليوم التاني..
الزوز كانوا فايقات في فراشاتهم يراجو في حكم بوهم..
اما وفاق لانها اصغرهم وحطت في بالها ان بوها مش حيجي جيهتها..ناضت بكري توتي فروحها للمدرسه..
دعاء:بنموت يامروة..
مروة:حتى اني..
ع خشة امهم للدار..
جميله:هي نوضي انتي وياها وتوا رواحكم..
الزوز فنصوا فيها وهما مش فاهمين لشن يوتي ارواحهم..
جميله بنفاد صبر:تي هيا انتي وياها تحركوا بوكم قال هديكا بس تقعمز..ولفت ومشت طلعت..
مروة لوحت بطانيتها بعيد وناضت وهي تضحك وطلعت جري للحمام..
ودعاء قعدت راقده في مكانها وهي تضحك بعدين تنهدت براحه..
دعاء..
وتيت روحي ويدوب فطرت وركبنا معاه اني ومؤيد اللي مايندري على شي لأنه يرقد بكري..المهم حطه في مدرسته
وبدي فيا اني تحقيق..
محمد:بنت انتي قولي الحق اختك في من تكلم؟
دعاء وهي تجاوب بثقة مصطنعه:وين نندري عليها الفرخه هادي اصلا اني وياها ديما عراكات ونقعد بالاسابيع مانكلمش فيها..
محمد سكت وهو يفكر فعلا دعاء ورويدا قليل النادر يتفقوا لكن مستحيل ماتعرفش اختها شن ادير..بس هو مشاها وقال..دعاء انتي الكبيره وبنأمنك من اليوم وبرا غادي اي وحده في خواتك دير غلط تجي تقوليلي ومانيش مسامحك دنيا وآخره لو تخوني هالأمانه يادعاء..
دعاء بضيق:إن شاء الله
دعاء...
يومها قلت في نفسي ربي يهديك يابابا علاش تحمل فيا فوق طاقتي بس..هادي مصيبة انك تجي اكبر واحد..مافيهاش ميزة بكل..
🗝حط دعاء فالكليه ومشي..
وهي مشت طول للقسم كالعاده...
لقت اماني وسكينه وريم..
صبحت عليهم وقعمزت معاهم..
دعاء:سونا كلمتي امال امس..
سكينه بحزن:ايه حالها حال العدو..الله لاتربحه..
دعاء بدموع وعصبيه:ربي ياخد فيه الحق..
فات من حداهم رشاد وقال..
"السلام عليكم"..
ردوا عليه ودعاء قعدت معاه بعيونها ووجها لونه زي حبات الرمان..
وسكينه مركزه معاها..
دعاء..
لما سمعت صوته موجه كلام ليا اني..هو صح مش ليا مباشرة بس لمجمع اني ضمنه..لاول مرة قلبي يدق بقوة هكي مش عارفه شن صارلي لحظتها قعدت نشبحله وخلاص ونسيت البنات حداي..
🗝استاقظت على صوت ريم وهي تقول..
ريم:الامتحانات النصفيه قريب تبدا..
اماني:من توا بنبدوا نقروا بالماده فوقت الفراغ..
دعاء:ايه زي نظام السمستر اللي فات..
سكينه:عاد انتي 7مواد..
دعاء بإبتسامه:ربي يعيني..
سكينه ابتسمت وقالت:آمين..
اماني:فرخه ايات مش جايه اليوم؟.
خبطت دعاء بيدها ع جبهتها وقالت:ايه نسيت بعتتلي رساله الصبح وقالت مش جايه ماعندهاش من يجيبها..
ريم:باهي هيا نوضوا ناكلوا حاجه جايه من غير فطور..
ناضو البنات وهما يقولوا..تمام..هي..
ومشوا مع بعض للكافتيريا..
وهما ماشيين خطم من حداهم رشاد وقال لدعاء
"لوسمحتي شويه"..
وسعتله وهو مشي..ودعاء قريب ادوخ وسكينه بس المركزة عليها..
⚘⚘⚘⚘⚘
الساعه 11:00صباحا..
في محل التحف المنزليه والديكورات الكلاسكيه اللي يملكوه عيلة جمال..
كان جمال موجود ومعاه عمه امحمد..
جمال:50 الف عاطيك 50الف ياعمي من اسبوع وقبلها 100 وين تمشي بيهم..
امحمد:المشروع اللي نخشه يخسر..
جمال:معاش تخش مشاريع..
امحمد:قصدك ماتبيش تعطي!
جمال:من الاخير ايه مش ماكينة فلوس اني ياعمي والرزق اللي تحت يدي مش ليا بروحي مشاركيني فيه اربعه ورثه..
امحمد:معناها بتخلي عمك يمد يده للبراني؟!
جمال:قتلك قبل تعال اخدم معاي..
امحمد ناض وقال:لابارك الله فيك..مانبي منك شي ربي مايحوجني لأمثالك..
ومشي...
جمال بإنزعاج؛بالله فوت عمي..ع الصبح جاي يكسرلي فالراس..
رن تليفونه..
قامه من ع الطاوله وناض وهو يقول:مسعود طالع اني..
العامل:تمام كون هاني..
ومشي جمال طلع من المحل..
⚘⚘⚘⚘⚘
حضرت دعاء محاضراتها هي والبنات والاخيره طلعهم الأستاد منها قبل يتم الوقت بنص ساعه قعدوا مع بعض يهدرزوا..
دعاء:وهدا اللي صار..
سكينه:ووك عليا! 74..
اماني؛باهي اللي عمك كان حاضر..
دعاء :ايه الحمد لله..
ريم:وكان شفتيه انتي بالك رايك يتغير..
دعاء:لالالا اني من الاول مش مرتاحه للموضوع ولما ماتمش تريحت..
ع خطمة رشاد ومعاه واحد يهدرزوا..
وجه دعاء تلون وسكينه شافتها..
ناضت وقالت:ترا تعالي شويه دعاء..
اماني:بنبدوا بجو الأسرار..
سكينه بضحكه؛سكري فمك انتي..شبحت لدعاء وقالت..هيا نوضي..
ناضت دعاء وهي تضحك وجت لسكينه..
خدتها من يدها وتباعدوا شويه..
بعدين وقفوا..
سكينه:دودي نسألك سؤال وتجاوبيني بصراحه..
دعاء:اسألي..
سكينه:امم..انتي معجبه برشاد؟
ضحكت دعاء وغيرت عيونها عنها..
سكينه بضحكه:غير قولي..
دعاء شبحتلها وقالت بإبتسامه خجل:هيك شي..
سكينه ابتسمت بأسف وقالت:اممم..
دعاء ضيقت عيونها وقالت؛في حاجه؟
سكينه تنهدت وقالت:تعرفي ان عندي اخت كانت تقرا هني ولا؟
دعاء:ايه..
سكينه بإبتسامه؛زمان كنت نجي معاها هلبه للجامعه رشاد كان في دفعتها..اول مرة شفته فيها طحت فيه..
دعاء انصدمت..
سكينه بضحكه؛والله حبيته وحب مش طبيعي كان نقولك كان نلقى نبوس خطاوي رجليه من كتر ماحبيته..حاولت نلفت انتباهه ماقدرتش خشمه في السمي مايشوف في حد..
المهم بعد وقت عرفت انه خاطب..
دعاء بصدمه اكبر:خاطب!!
سكينه؛اممم..وخطيبته بنيه جباليه تقرا فالطب قالوا كان يبيها من زمان وخطبها..حتى يوم مشروع تخرجه جت حضرت هي واهلها..تنهدت بحزن وقالت..ياما صار فيا لما عرفت تعبت هلبه هلبه..واختي اللي ماكانتش تعرف قالتلي ياريتك قلتيلي من البدايه راهو قتلك انه مش فاضي..وياريتني قتلها..ابتسمت وكملت تقول..توا اني الحق مانحس اتجاهه بولا حاجه معاش زي زمان يعني..واني بالصدفه لاحظتك فحبيت ننقدك قبل يصير فيك زي ماصار فيا..
دعاء..
وقتها قلبي حسيته انحرق..وجعني هلبه هلبه..كان خاطري نشوف خطيبته ونشوف شكلها..
وفي نفس الوقت قعدت نقول لنفسي معقوله اني نتوهم لهالدرجه!!..
ممكن نظراته وحركاته كانت عاديه جدا غير اني من كثر ماعاجبني كنت نتخيل فيها حركات لفت نظر..
سكينه؛بالله ماتزعلي مني والله لو مانعزك مانحكيلك يادعاء..
دعاء بإبتسامه:عارفه ياسوني وبجد حبيبتي مشكورة هلبه هلبه اللي وقظتيني..
ابتسمت سكينه وقالت؛تسلمي دودي..هي تعالي نولوا للبنات..
ومشوا دعاء وسكينه للبنات..
ومن بعيد كان رشاد واقف مع صاحبه ويشبحلها..
صاحبه انتبهله التفت وشاف لمن يشبح بعدين رجع شافله وقال:شن قصتك معاها البنت هادي ملاحظك ليا فترة مركز عليها..
رشاد تنهد وقال:مش عارف..الحق هكي جاذبتني هلبه فيها حاجه حلوة ملفته مخليتني نركز عليها وين نشوفها..
صاحبه"أمين" بصدمه:كيف !!! وفدوى؟!
رشاد شبحله وقال:فدوى المده الاخيره متغيره هلبه ياأمين بدت تسكر في راسها وتعاند..
امين:حتى انت خانقها ياصاحبي غيرتك بكل راهو..
رشاد:من حقي كان ماغرتش على عرضي على من بنغير؟!
امين:ياودي نحس فيك ادورلها فالسبل..
ارتسمت على وجه رشاد ملامح الانزعاج وقال:باهي خلاص صكر ع الموضوع وخل نمشوا نقعمزوا في القاعه لين تبدا المحاضرة.."دراسات عليا"..
امين شبحله شويه بعدين قال:باهي امشي..
مشي رشاد وهو مشي معاه..
⚘⚘⚘⚘⚘⚘
ندير في كل شي يبيه بش نرضيه بس نحس فيه متغير يامنال معاش زي قبل..
منال:بالك في شي مضايقه بالك صايرتله مشاكل في الحوش..
فدوى بدموع:مشاكل شني بس..لأمس مكلمه عمتي وخواته جوهم حلو..
منال تنهدت وقالت:انتي غير تحمليه هالفتره لو حستي الوضع زاد عن حده صارحيه باللي تحسي بيه يافدوى..
مسحت فدوى دموعها وقالت:وهدا اللي بيصير..رشفت وقالتلها..شن جوك انتي وجمال؟
منال ابتسمت وقالت:تمام..
ضحكت فدوى وقالت:ضحكتيني يومها شن درتيله لما جاك..
منال:وخيتي عندي الحق الدنيا كلها قريب ياكلوه بعيونهم..
فدوى:هادي ضريبة الارتباط براجل جميل..
منال بضحكه:والله من توا نخمم كيف بندير معاه بعد الزواج ربي يصبرني..
فدوى بضحكه:بروزيه وتفرجي عليه وخلاص..
منال بضحكه:شكلي بنديرها حق..هههههه..
⚘⚘⚘⚘⚘⚘
مقعمز في المصرف لاهي بتليفونه..
شويه جاته وحده وقفت عليه وقالت:لوسمحت ممكن نقعمز..
هو يدوب شبحلها بعدين شبح ع جنب وهز راسه ورجع شاف لتليفونه...
قعمزت جنبه وقالت:انت من عملاء المصرف هدا.
هو هز راسه بإيجاب بدون يشوفلها..
هي قالت بضحكه:شكله ماعندكش خلوق للهدرزة..
هو نزل تليفونه وتأفف..بعدين مرر نظره ع المكان وناض وقف ومشي بيقعمز في مكان تاني..
البنت:ماحاسب فروحه..لكن عطيه دعوة طرف اغبر...
وجمال وهو ماشي انخبط في واحد بالغلط..
جمال:اسف اسف جدا..
محمد وهو حاط التليفون ع ودنه:انا اللي سامحني ماكنتش مركز...
ابتسم جمال ومشي..
ومحمد كمل طريقه وهو يتكلم:ايه قولي شن تبوا توا سحبت فلوس من المصرف..
جميله:باهي صكر خل ندير دورة ع كل شي ونعاودلك..
محمد:باهي بسرعه خفي روحك..
وصكر وطلع من المصرف..
⚘⚘⚘⚘⚘
قعدت دعاء في الواجهه بروحها بعد روحوا صاحباتها واقفه برا تراجي في بوها..
وهي واقفه..
طلع رشاد كان لابس نظارات..شبحلها شويه بعدين كمل طريقه...
هي شافاته وحاولت تتجاهل ماقدرتش قعدت معاه بعيونها لين شافاته راكب سيارته الكيا اخر موديل..
وتحرك بيها وهو يشوفلها وهي ماتندريش عليه..
ابتسم ابتسامه خفيفه ومشي..
دعاء..
مش عارفه خيرني فجاة حسيت روحي بديت نحس اتجاهه احساس قوي بالذات بعد عرفت انه خاطب..ايه والله مانيش فاهمه شن معناه هدا...مشاعري بدت تتحرك اتجاهه بقوة وماقدرتش نوقفها...وياريتني قدرت عليها وقتها
🗝شويه وصل بوها مشت ركبت السيارة وروحت..
كالعاده جعانه بتموت...
شافت السياره معبيه بضاعه من اللتالي ولاحظت حافظه كبده الدجاج وشكارة تبان معبيه لحم بقر..
فرحت هلبه...
بعد ماقطعوا مسافه استغرقت 20دقيقه وصلوا للحوش..
بعد خشوا قعدت تنزل فالبضاعه مع بوها وجت امها حتى هي تنزل معاهم..
واخر شي نزله صندوق دجاج مجمد وقال..ديرلونا اليوم العشي دجاج فالكوشه..
دعاء..
قداش كانت الحاجات هادي تفرح فيها وتنسيني فهمي..
حني ناس ع قد الحال مش واخدين ناكلوا الحاجات هادي ديما...ولما تجينا الفرصه نفرحوا بيها..
برغم ان في ناس من اقاربنا كانوا يهزوا علينا وين يعرفوا اننا ناكلوا في دجاج مستورد ولحم بقر مستورد وكبدة دجاج..
يعني مثلا عمتي شرقيه مرة طبت علينا وحني نتعشوا فدجاج فالكوشه..عزمناها قالت
" لالا مانكلش في المستورد"
ومرة مرت عمي هديكا ام ابراهيم عاد هما ربي عاطيهم ويسكنوا في ارقى الاحياء..
المهم كنا نهدرزوا ع الماكله وامي قالت كبدة الدجاج بنتها مش عاديه..
دارت روحها منقرفه وقالت..
"مرة وحده ذقتها دفتلها تقول زقرلوا"
قصدي مش عارفه هي واكله زقرلوا من قبل بش تقول هكي!!
المهم عندهم انهم يحسسونا اننا اقل منهم..
حتى حناي لاننا نعيدوا بالأسباني الطابق اللي يجيبه بوي ترده تقول ماناكلاش العفن اني..
كسر خواطر وخلاص..لين بدينا نتحاشوا في اجتماعات العيله بش مايهزوش علينا ويحسسونا بالنقص...
وماتقولوش معقوله في هكي!! لا والله في واحرف من هكي ياما مدسوس واكيد تعرفوا ناس عايشين فهالوضع ويمكن اسوأ...
🗝في هلبه يادعاء..وياما مدسوس ع قولتك..
بس الناس اللي تهزا وتتكبر تنسى ان الرزق بيد ربي وان الدنيا ادور..مرات الأيه تنعكس والأماكن تتبدل
والله كل يوم هو في شأن..
المهم..خشت دعاء داخل..
وصلت فالدار لقت رويدا تتفرج ع الاوراق المتساقطه عادي جدا ولاكأنها دايره شي..
مابتش تكلمها حتى الكلام..حدها صكرت الدار بش تبدل حوايجها
وبرا..
خشت جميله ع دار البنات اللي كانوا يقروا فيها وقالت:وفاق..
وفاق قامت راسها وضحكت بدهشه بعدين ناضت وخدت الشنطه من يد امها وهي تتفحص فيه..لقت فوسطها تزدان كبير قعدت مرسومه ع وجهها ابتسامة فرح عريضه..
امها طلعت من حداهم...
ومروة قالت:هي اضربي هي شنطة اكبر منك وتهبل خدهالك..
ضحكت وفاق وقعمزت وبدت تنزل في كتابتها وكراساتها للشنطه التانيه..
طلعت دعاء من الدار بتخش الحمام جاها مؤيد.
مؤيد:دعاء انتي خطك مليح اني مداير كارتوني وراسم فيه ونبيك تكتبيلي عليه..
دعاء وهي تشمر في اكمام التوته:حاضر..بعد نتغدا جيبهولي...
وخشت للحمام..
وخوها مشي لداره..
⚘⚘⚘⚘⚘
ومرت الأيام..
وقاعده رويدا معاقبه ماتطلعش من الحوش بكل..
برغم انها كانت شاطره فقرايتها بس همها الوحيد وقتها هو رهيما اللي قعدت اسبوع ماتواصلتش معاه..
فهالوقت كانت جميله تحاول في محمد يردها للقرايه لكن يحطها تحت المراقبه يكلم اي حد ثقه يعرفه ويعرف شن يقوله بدون مايشوه بنته ويخليه يراقب تحركاتها.
ومحمد قاعد يقلب فالفكره فراسه..
جي يوم الجمعه..
الصبح الساعه 10..
مقعمزات البنات يفطروا مع امهم فالدار ومعاهم عمر خوهم..
وفالكوجينه مؤيد يفطر مع بوه...وكان الفطور عصيده..
جميله ناضت وهي تقول:الحمد لله..هي بسرعه نوضوا وتوا رواحكم معاش في وقت..
ومشت طلعت..
تنطرت رويدا ومشت طلعت تجري للحمام..
مروة:طبعا بتشوف حبيب القلب..
وفاق بإزدراء:شلتوت..
ضحكوا خواتها...
بعدين قالت دعاء:والله ماخاطري فيها المشيه..
مروة :حتى اني..حني مانطلعوش بكل وكان طلعنا يالحياش عمامك وعماتك ولاخالتك..
دعاء:وفوقها شرقيه ماشيه حتى هي ربي يصبرنا وخلاص..
مروة:عليها وعلى مرت عمك وبناتها وحناك والعيله كلها..
ضحكوا وفاق ودعاء وقالوا:آمين..
🌻من غير نيه وتوا رواحهم دعاء ومروة ووفاق عكس رويدا اللي طرحت بالجني كله زي مانقولوا..
ولما جي وقت المشيه..كانت دايره روحها عاقله قدام بوها..
ركبوا البنات وامهم وعمر في حجرها وقعد مؤيد فالحوش لأن مافيش مكان فالسياره..
فتحلهم باب الكونشيلو وقعد واقف حداه وين جت السيارة طالعه..
جميله:سخن غداك فالكوشه قبل تاكله..
مؤيد هز راسه بإيجاب..
محمد:راك تغفل ع الحوش دير دورة عليه ع الميه والغاز..
ومؤيد يهز فراسه وخلاص..
طلعت السياره..
وهو صكر الباب وولى خش داخل وصكر الباب..
⚘⚘⚘⚘
قطعوا مسافه طويله ومحمد يهدرز مع جميله فستين موضوع..والبنات روسهم انتفخوا..
لعند ماخشوا الحي اللي سكن فيه عمهم الكبير جديد..
دعاء..
عمي الكبير ضابط كبير في الامن الداخلي وفلوس وعز الله اعلم شن مصدره..
بدل 4حياش لتوا كل 5سنين في حوش..
وكلهم فلل وكل وحده احلى من التانيه..
بس هالمرة حاسه السكنه خير من الاولات بهلبه قعدنا طول الطريق فاتحين افامنا في القصور اللي على يمينا ويسارنا اول مرة نشوف شي زي هدا فطرابلس..
لعند ماوصلنا قدام حوش عمي..
اللي عيب هلبه ينقال عنه حوش ياناس وشويه عليه كلمة فيلا..قصر..قصر..
بعد نزلنا قعدت ندور بعيوني فالشارع والسيارات اللي فيه بعدين شبحت لسيارتنا....اووووف...شن هدا....هادو ناس وحني شبه ناس...وقتها هكي فكرت..
🗝رنوا الانترفون ردت عليهم مرت عمها وانفتح الباب وخشوا...
دعاء..
العيله كلها كانت غادي..
النساوين والبنات لبس وطرحات وذهب وحني لبسنا متاع العيد اللي فات شافوه علينا..
سلمنا وقعمزنا وقعدنا نسألوا على احوال بعض واني عيوني تراقب فيهم وفي لبس وايديهم ورقابهم..
مرت عمي "ليلى":شن حال اهلك ياجميله..
جميله:الحمد لله كلهم كويسين..
ليلى:باهي كويس..شبحت لرويدا وقالت..رويدا خيرك معاش تجينا مع بوك لما يجي هني..
شبحنالها حني...
رويدا:ماهو اشتركت في باص معاش يروح بيا هو..
ليلى:باهي طيب فيكم..
جميله شبحت لعمر وتجاهلت تلقيحها..
شرقيه:الا على سيرة الباص ليا فتره معاش شفته يجيكم..
كلهم خشوا في بعضهم..
وتنط مروة تقول: وانتي كيف تشوفي فيه باصها وهو يجيها من السبعه انتي تمشي المدرسه الساعه تمانيه..
شرقيه وجهها ولى الوان..
بنت ليلى" ازدهار": ههههههه شكلك تراقبي فيهم من روشن المربوعه..
كلهم ضحكوا...
دعاء..
ازدهار عكس امها واختها الكبيره امل نوع ما متواضعه برغم ان عندها فالخبث لكن صريحه وتعطي فالسنون..
عجبتني كيف احرجت شرقيه وعجبتني مروة اكثر..
شرقيه:مطول لسانك يافرخه مروة..
مروة:مش اني بس حتى ازدهار..
ليلى:واي واي واي شن هدا...
جميله:مروة اسكتي..
ازدهار بضحكه:لاعندها الحق حتى اني لساني طويل..
رويدا :نمشي كل يوم عمتي..
شرقيه وهي رافعة حاجبها وتحاول تكتم عصبيتها:اممم..
بعدين غيروا الموضوع وتكلموا في مواضيع تانيه..ولازم مرة مرة تلقح جميله ومرة شرقيه..
وشويه وخشت امل وكمل فريقهم...
وعاد امل الخشم فوق وبالسيف تهدرز على دعاء وخواتها..وضاربتها مع عمتها شرقيه صحبه
دعاء..
هي نفسها بنت عمي اللي قلت عليها قبل المتزوجه بعلاقه طبعا هي جميله جدا وشايفه رويحتها كانت هي وشرقيه مايتحابوش بس بعد تزوجت صاحبها اللي من عيله كبيره هلبه وواصله لقت معاها مصالحها وولوا صاحبات..
اني نتجنب فيها لانها فتانه  يعني كان قعمزت حدانا تقعد تقصقص علينا وتجبد منا فالدوة وتمشي تعاودها وفوقها بهارات..وياما تسببتلنا في مشاكل تجنبناها..
عكس ازدهار
ايه وع فكرة امل مواليد 86..وازدهار 89 السنين الاخيره في كلية الطب..خاشه قبل عمرها بعامين
بعد العصر...
مقعمزات في الجنان البنات وازدهار
ازدهار:مواضيع كلها فيشنق زيك يايجيني كبير هلبه يامش متعلم ياعطالي بطالي اهله يصرفوا عليه..
دعاء:نصيب راهو امتى ربي يقدر لنصيبك حيجيك..
ازدهار:صح..بعدين قالت..اااخ بس لو حولنا هني من 5سنين راني اصطدت ولدنا جيرانا..طرف مطرف زي مهند اللي فالعشق الممنوع ويخي هو احلى ودكتور عيون قالوا..
رويدا بضحكه:وعلاش تقولي كان سكنتوا هني قبل 5سنين؟.
ازدهار بضيق مصطنع:ماهو طلع خاطب من سنتين..
دعاء:قصدكم تواصلوا في الجيران!!..
ازدهار بضحكه:لالالا زي هادوا زي اللي قبلهم اني مرة شفته صدفه طالع من الكليه ولحقته..
ضحكوا البنات...
ازدهار بضحكه:انصدمت لما عرفت انه ولد جيراننا بيناتنا زوز فلل..
دعاء:هههههههه..
ازدهار:جمعت عنه معلومات وعرفت انه خاطب..
دعاء:يللا كلها نصيبات ربي يبعتلك اللي احلى وخير منه..
ازهار بضحكه:نقولوا ان شاء الله..
ع خشة ابراهيم للحوش..لما شافهم جاهم طول وقال:السلام عليكم..
ردوا عليه السلام ورويدا تسرقله فالنظر وحتى هو نفس الشي..
ابراهيم بإبتسامه:شن جو بنات عمي..
كلهم ردوا عليه ماعدا دعاء وهو بروحه ماكانش يبي يشبحلها..
هدرزوا شويه...بعدين كلهم ناضوا خشوا داخل..
⚘⚘⚘⚘⚘
مصراته...
في احد الشاليهات...
كانوا خوات جمال ورجالتهم مقعمزين برا يشربوا في قهوة وياكلوا في حلو ووجدي راجل الاء ومعاه نادر راجل عطاء يوتوا فالشواء..
اما راجل رجاء كان واقف بعيد يهدرز بالتليفون..
وراجل نجلاء الكبيره يدهور بعيونه فالنساوين.
وجمال اللي كان مقعمز..على اعصابه..
عطاء:تبي نادر؟.
نادر شبحلها لقاها توريله فالنسكافيه..هز راسه بآيجاب..
منصور "راجل نجلاء":سمنت يانادر ماشاء الله شكلها عطاء مش مقصرة...
جمال"اهو بيبدا"..
نادر:قول ماشاء الله ..
منصور:عليك انت لكن عليها هي لا مسكينه شكلك متعبها نفسيا..
عطاء:لالا الحمد لله نادر مافيش منه يدور غير فراحتي اني اللي مروجمه بس..
نجلاء:خلي الناس فحالها ..
منصور:قولي لاختك تعطيك طريقة الرجيم..
نجلاء انحرجت وخواتها شدوا ضحكتهم...
وجدي بهمس:قريب نمشي نحط السيخ فبطنه..هدا علاش ملبس الاء ملايه سودا قدامه..
نادر بهمس:شكلي حتى اني بنلبس عطاء وحده زيها..
ع جية مروان راجل رجاء وهو يقول بإستعجال:اعذروني ياجماعه مضطر نمشي العمل نادوني..
رجاء اضايقت..
صابرين:هالعمل اللي مش مهنيكم بكل..
مروان بضحكه:الله غالب ياعمتي هادي خدمتنا..
منصور:الشرطه في خدمة الشعب حتى هي..
ضحك مروان..
جاه جمال وقال:تو نروح برجاء..
شد مروان يده وجبده شويه على تركينه وقال:عندي قضيه في الخمس بنبات غادي روح بيها معاكم..
جمال هز راسه وقال:خلاص كون هاني..
صافح مروان جمال وقال:بارك الله فيك.. طلق يده وقال وهو ماشي..السلام عليكم..
جمال:وعليكم السلام..في أمان الله..
وولالهم..
شبح لرجاء لقاها تشبحله...دارلها حركه بخشمه..
هي ضحكت ضحكة خفيفه..وهو قعمز حدا امه..
صابرين بهمس:بيبات برا ولا؟
جمال وهو يمرر فنظره ع البحر:ايه..بعدين ناض وقال..خل نمشي نجيب الصغار خلاص الدنيا بظلم..
منصور :ماشي معاك..
وناض لحقه..
ونجلاء تشبحله بحده عارفاته علاش ماشي للشط بش يملي عيونه...
🥀ربي يكون في عون كل مراة واخده راجل نسونجي ولابخيل🥀
⚘⚘⚘⚘⚘⚘
بعد العشي..
روح محمد بعيلته من حوش خوه..
روحوا وهما مازال هايمين فالعالم اللي كانوا فيه..
ولما وصلوا لعالمهم تلقائيا حسوا بشعور ضيق غير عادي..
دعاء..
اكبر فتنه فالدنيا المال ومافي حد معصوم من هالفتنه الا من رحم ربي..
وفالحقيقه مافي حد مايتمناش يعيش مرفه ومرتاح وماناقصه شي..
لكن هادي كلها مقسومات من الله..واني تعلمت نرضى بقسمه بش يرضيني توا ولابعدين..
⚘⚘⚘⚘
مطرحات فالدار ويهدرزوا..
رويدا؛اه غير امتى ناخد ابراهيم ونعيش غادي بس..
مروة:ع اساس بياخدك هو..
رويدا رفعت حاجبها وقالت:شن قصدك!!
مروة:قصدي رهومتك هدا متاع بنات ويكلم معاك 1000 غيرك..
رويدا:عادي المهم فالأخير بياخد بنت عمه المتربيه قدامه..
دعاء:طيح سعدك..
رويدا:سعدك انتي يامعقده..وبعدين تعالي هني خيره قالب وجهه عليك..اتصل بيك ولا وهزبتيه..
دعاء :ومسحت بيه الوطا..
مروه:ههههه..يستاهل..
رويدا بغيظ:حقيرات حسودات..
مروة ودعاء:طييح ساااعدك..
رويدا غصب عنها غلبتها الضحكه..
شويه سكتوا بعدين قالت دعاء..
دعاء:صخفتني ازدهار..
رويدا:مايصحفك غالي سيورها اطيح طيحة اختها الله اعلم نصيبها وين توا..
مروة بضحكه :زعمه نصيبي اني وين توا..
رويدا:فواحد من الجوامع..
مروة بإبتسامه:الله ياااريت..
دعاء بضحكه:ووفاق زعمها نصيبها وين..
رويدا:وفاق فرخه قاعده وبالعلامه من اول ماحطت راسها ع المخده رقدت..
ضحكوا خواتها..
رويدا:الحمد لله اني عارفاته وين..
دعاء: والله مانك عارفه حاجه انتي بالذات حتاخدي واحد حتى فالخيال ماخطرلكش..
رويدا:شن سيبتي الهندسه وخشيتي ع التنجيم!
دعاء:احساس احساس اني احساسي مايخيبش.
مروة :واحساسك هدا ماقالكش زعما وين نصيبك توا وشن يدير...
دعاء خطر على بالها رشاد..ابتسمت والتفتت لخواتها وبدت تحكيلهم..
⚘⚘⚘⚘⚘
"لا والله حبي بجد اليوم تعبان وبنرقد"
منال بضحكه:خلاص عمري نوم العوافي..
جمال بصوت ناعس:غدوة من الصبح كلميني..
منال:هههههههه..تنوض على صوتي..
جمال صكر عيونه خلاص النوم غلبه قاللها بنفس نبرة الصوت:وهو في احلى من هكي صبح..
وطاح منه التليفون..
منال:ههههههه..باهي حبيبي خلاص نخليك ترقد..باي..
استغربت انه عطل فالرد..
منال بضحكه:ياروحي رقد..وصكرت هيا..
ودارت منبه بش تنوض تكلمه وحطت التليفون حداها..
وبعدها حضنت مخدتها ورقدت..
⚘⚘⚘⚘⚘
وفات يوم وجي اللي بعده..
الصبح..
محمد:بري قوليلها..
جميله؛باهي..
مشي محمد للمربوعه..
وجميله مشت بسرعه للدار..
خشت لقت دعاء ومروة ووفاق لابسات..
ورويدا حاطه ع راسها المخده وراقده..
جميله:نوضوها هادي بوها قال بيرفعها معاكم..
نطت رويدا وقعمزت وهي تقول؛قولي والله!
جميله فنصت فيها وقالت:اسمعي بابنت ردي بالك مرة تانيه ذبح طول..
هزت راسها بإيجاب وهي تقيم فشعرها فوق..
جميله مشت طلعت..
ورويدا ناضت تجري للحمام..
دعاء بضيق:ياريته طول مدة العقاب..
مروة:ياريته حولها من المدرسه مرة وحده صاحباتها غادي هما اللي خربوها..
تنهدت دعاء وهي مضايقه...
🌻وطلع بيهم بوهم دعاء ورويدا ومؤيد اللي ماشيه عليه ان رويدا غايبه بسبب الصيانه في مدرستهم..
حطها بوها ونزلت تجري طول للمدرسه..
وقلوب محمد ودعاء مش مطمنه..
بعد ماقطع مسافه حط مؤيد...
وبعده بمسافه كذلك حط دعاء فالجامعه..
......
في القسم..
خشت دعاء لقت البنات كلهم جايات والمفاجأة هي جية امال..
دعاء:اموله!
وضموا بعض بقوة..
دعاء؛ربي يعوضك خير امولتي..
امال بصوت يدوب طالع:آمين..
بعدوا عن بعض وامال تمسح فدموعها..
سكينه صفقت بإيديها وقالت:هيا اليوم قلنا بنمشوا نفطروا فاالملعب اللي ورا العلوم فطره مليحه..
دعاء بضحكه:الله جووو..
ايات جتها حضنت ذراع دعاء وقالت:هيا بنا..
ضحكوا البنات ومشوا مع بعض..ورا بعض..
ايات ودعاء..سكينه وامال..اماني وريم..
وهما طالعات كان جاي رشاد ومعاه وحده..
سكينه شبحت لدعاء اللي كانت قدامها..
ودعاء يدوب لمحاته..اما هو غير عيونه عنها لما جو عليها خاف يفضحوه قدام خطيبته..
دعاء..
وقتها ماقدرتش نركز عليها هلبه كنت نبي نشوفها وكان خاطري نولي ونشوفها وقلبي والعه فيه النار..
🗝عند رشاد وفدوى..
رشاد:معاش اديريها الحركه هادي وتجي من غير ماتقولي..شن قصدك بيها الحركه هادي قصدك بطبي عليا مثلا..
فدوى ودموعها فعيونها؛لاوالله ماقصدي قلت نديرلك مفاجأة وخلاص..
رشاد:ايه صدقتك..فوتيه على غيري الجو هدا..
فدوى سكتوا ودموعها طاحوا وقعدت تمسح فيهم..
رشاد وجعاته هدا روحه وقال :خلاص معاش تبكي تعالي ناخدوا فطور ونمشوا للملعب..
ابتسمت ومسحت دموعها وقالت:ايه زي زمان..
ابتسم مجامله وقعد ساكت..
ولفوا هما الزوز ومشوا بيطلعوا...
⚘⚘⚘⚘⚘
في مدرسه رويدا..
مقعمزه هي وصاحبتها في المقعد..
رويدا:ضروري نبي تليفون وشفره ضروري آمنه..
آمنه ابتسمت برفعة حاجب وقالت؛تمام تو ندبرلك..
رويدا باستها وقالت؛ محلاك..
ضحكت امنه..
ع خشة الأبله عليهم...وهما ناضوا وقفولها....

...يتبع...