"إلا أن يشاء الله"

الجزء الرابع عشر

✒..
وصلت رويدا للحوش وخشتله..
كانت تبان ع وجهها ملامح الكآبه والحزن..
ركبت الدروج..بعدين مشت للباب الدخلاني..
حولت كندرتها..ودفت الباب وخشت..
قابلتها امها طالعه من الكوجينه بصفرة الغدي..
جميله:جيتي في وقتك..هي اغسلي ايديك وتعالي..
رويدا هزت راسها وقالت:باهي..
ومشت ورا امها  لين وصلت الدار..
وين خشت شافت دعاء تنوض من الفراش بالسيف تبان تعبانه ووجهها شاحب..
رويدا:دعاء خيره وجهك هكي؟!
تنهدت دعاء وقعدت ساكته..
جميله بضيق:ماتحمتلش الحجامه..
رويدا وهي تحول في وشاحها:لهالدرجه واعره؟!
دعاء:مانعرفش شن صارلي حسيت روحي انهرت في مرة..
رويدا حطت شنطتها وهي تشوف لأختها وتقول:تس تس تس..
مروة؛مازال بتمشي تاني؟
شبحتلها امها..
دعاء:لالالا ساد اللي صارلي اليوم..
تنهدت جميله وقعدت ساكته..
⚘وتغدوا غداهم..
بعدين رويدا ناضت بدلت وتوضت وصلت ومشت تغسل الماعين..مجرد صكرت ع روحها باب الكوجينه قعدت تبكي بصمت..
امين من بعد هداكا اليوم معاش جي بكل ولاعاد كلمها ع النت..
واخته بدت تجبد في روحها منها وتتجنب تكلمها..
ورويدا هني خلاص فهمت ان قصتها هي وامين انتهت وان اللي في بالها كان صح وكأن أمين يدور في سبله بش ينهي موضوعه معاها..
الخيبه اللي حاسه بيها رويدا مضاعفه..كانت تحساب روحها اختارت صح..وان أمين هو الراجل المناسب اللي مفروض ترتبط بيه وتكمل معاه حياتها..
لكن ربي ماأرادش..ومشيئته كانت عكس كل أمنيات رويدا..
والخيره فيما اختاره الله...🌷
🌸اما مروة فكانت متحشمه تفتح موضوع الشيخ مع امها وبتشجيع من دعاء ووفاق كلمتها..
"بيخطبك؟!"
مروة بشي من الربكه:ايه ماما قال يبي ناخدله موعد مع بابا بش يجي يكلمه..
جميله:وعلاش مايبعتش ماليه؟
مروة بربكه:مش عارفه الحق..
دعاء:بالك يبي يتفاهم مع بابا بعدين يبعت اهله..
جميله وهي تفكر:مرات..باهي تو نكلمه المهم عطيني اسمه بالكامل وفي شن يقري فيك..
مروة:احمم..اسمه يوسف الشيخ ..
وقعدت مروة تجاوب ع سؤال امها..
ع خشة رويدا اللي لما سمعت مروة شن تقول استغربت..
وسألتهم..ودعاء ووفاق جاوبوها وفرحت هلبه لاختها..
دعاء..
كل وحده فينا كانت تبي التانيه تفلح في اللي مافلحتش فيه هي..في الفترة الاخيره كنت حاسه ان حكاية امين ورويدا تمت خلاص..وتأكدت بعد مارويدا حكتلي كل شي..كانت تحكي بقهرة تشبه قهايري اني هلبه لدرجة اني دمعت وهي تحكي..
وقعدت نفكر بعدين حيي كان ماحظ خواتي زي حظي!!
وطول جي في بالي التصفيح اللي بحثث وقريت عنه وطلع يدير في كورات للبنت..
يايعرقل زواجها..ويخليها ديما متعثرة في حياتها..
او لو كانت تزوجت ماتعيش مرتاحه..
وممكن يدير مشاكل حتى في الأنجاب..
وممكن يدفع البنت لأرتكاب ذنوب وفواحش..
وهلبه هلبه كوارث عرفت ان التصفيح يديرهم..
لا والكارثه الاكبر لما بيجوا يفكوه للبنت يوم عرسها يفكوه "بخيط النيره" اللي هو اصلا سحر..يعني فك سحر بسحر!
ربي يهدينا ويخلصنا من هالعادات الجاهليه اللي دمرت حياة ومستقبل هلبه بنات...
⚘⚘⚘⚘
وحكت جميله لراجلها ع يوسف..
ومحمد عجبه الموضوع عاد استاد في الدين ويحاضر في الجامعه شن يبي اكثر من هكي؟..
وبلغ جميله تقول لمروة  تعطيه موعد نهاية الأسبوع..
🌻🌻🌻🌻
اليوم التالي..
الساعه 11:00صباحا..
بعد ماطلعت من اخر امتحان داراته..
قعدت تمشي وادور عليه..لعند ماوصلت لمكتبه لقاته مصكر..
مروة بضيق:تس افف..ماجاش شكله..
ضمت شواربها لداخل بضيق بعدين لفت بتمشي..
وقفت في مكانها وشهقت بخلعه..
هو ضحك وقال بدون مايشوفلها:اسف خوفتك..
هي حطت يدها ع قلبها وشدت ضحكتها وقالت:ولايهمك.
يوسف:مانقدرش مانجيش حتى لو ماعندي شي نجي بس نسمع اجابة طلبي..
ابتسمت وهي منزله عيونها وقالت:بابا قالك تفضل يوم الخميس..
ابتسم وقال:امم..انجم..
قامت عيونها وشبحتله وهي مبتسمه..
يوسف:خلاص لينا لقاء مع الوالد يوم الخميس..
مروة هزت راسها وهي مبتسمه بخجل بعدين مشت من حداه..
هو ضحك..ومشي للباب فتح المكتب وخش...
⚘⚘⚘⚘
ومرت الأيام..
وجي يوم الخميس..
ومع العصر..
كانوا البنات واقفات فوق بعض يشوفوا من فتحه الباب..
بوهم فتح باب الحوش البراني وطلع.
ولحظات وخش هو ويوسف..
دعاء:الله اكبر!
رويدا:عطيك الهني فرخه مرة شن هدا!!؟
وفاق:احلا من الصور..
ضحكت مروة وهي تقول:وتلوموني فيه!..
ع خشة جميله وهي مبتسمه وفيدها بوكس شكلاطه راقي جدا قالت:ماشاء الله تبارك الله..زي الغزال..
ضحكوا البنات..
ومروة فرحانه بطير..
.........
في الحوش اللي في جنبهم..
شرقيه وهي واقفه حدا باب المربوعه:هدا منو ماشاء الله!؟
علاء:حتى اني عجبني قال محمد جاي بيكلمه ع بنته مروة..
شرقيه بصدمه:مروة!!؟
علاء:ايه مروة مش صغيره البنت كبرت خلاص..
وشرقيه تفكر في كلامه وهي مصدومه..حتى مروة كبرت وبدوا يخطبوا فيها!!
⚘⚘⚘⚘
وبعد ساعتين ونص..
سقد محمد الشيخ يوسف..
وخش وهو فرحان لمرته..
محمد:اما راجل..بسم الله ماشاء الله..اسلوب وعلم واحترام..
جميله بإبتسامه:حتى هو شيخ..باهي قولي ع شن اتفقتوا؟
محمد:قالي كان هي موافقه بنجيب العيله..
جميله:يعني هو قالك يبي العرس قريب..
محمد:لالا العرس لابعد عام ان شاء الله لين يكمل شقته وتوا خطوبه بس..
جميله هزت راسها وهي تفكر ..
..........
مروة:باهي يعني حتى عام باهي..
جميله:نوتوا فيهم ارواحنا ع مهلنا..
دعاء بضحكه:ماما اصبري ماتخططيش لين يتم كل شي...
وفاق بضحكه:ايه..
جميله:تفائلوا خير يامشومات بعون الله كله يتم ع خير بعون الله...
رويدا من قلبها:ياارب وتفرح وحده فينا..
شبحتلها جميله وابتسمت بألم..
دعاء..
ماما تعرف بقصة رويدا مع امين ووجعتها رويدا هلبه بعد عرفت انها خابت معاها ماصابتش..وحسيتها حتى في موضوع مروة توا حاطه يدها ع قلبها..
مسكينه ماما..
⚘⚘⚘⚘⚘
وفي عطلة نص السنه..
حددوا موعد يجوا فيه اهل يوسف لحوش اهل مروة..
وجي هداكا اليوم..
اللي حضرت فيه جميله شرقيه وعزوزتها هالمرة جت معاها...
لبست مروة فستان حلو..
ورفعت شعرها ذيل حصان..وحطت ميكاب بسيط..
وطلعت جميله جدا...هي اساسا اجمل خواتها وشن مادير يطلع عليها..
المهم..
جو اهل يوسف..
امه وخالته ووحده من خواته..
وطبعا ماخشوش فاضيين وجابوا مايليق بيهم..
كانوا امه وخواته مختمرات لكن خالته لا..
استقبلتهم جميله وحماتها وعزوزتها وقعمزوهم في الصاله..
:انتي ام مروة؟.
جميله بإبتسامه:وانتي ام الشيخ يوسف..
:ايه اني مامته وهادي اختو..اسمي صفيه وبنتي اسمها عفراء..وهادي اختي نسمه..
شرقيه"خيرها تدوي زي التوانسه؟!"
الحاجه حواء:هو الكبير ولاالصغير..
صفيه"ام يوسف":لايوسف ولدي تبرك الله عليه هو الصغير وعندي غيرو 3شباب وبنتين..
وجميله تسمع فيها كيف تتكلم وهي مستغربه..
الحاجه حواء:توانسه انتم؟
خالته نسمه:ايه حني توانسه لكن يوسف وخواتو ليبين باباهم ليبي..
رفعت حواء حاجبها ومش عاجبها..
اما شرقيه شدت ضحكتها بالسيف..
وجميله بدت تتوتر..وقلبها اللي ماكانش مرتاح انقبض..
وقعدوا يهدرزوا ع يوسف وشن عنده وشن يدير..
والبنات يخشوا بالضيافه ويطلعوا لين جي وقت خشة مروة..
وخشت مروة..
لما شافوها اهل يوسف عجبتهم هلبه بالذات امه لدرجة انها خلت مروة تقعمز حداها وقعدت تعددلها في مزايا يوسف..
مروة لما سمعت لهجتهم عرفت علاش يوسف مرات تطلع منه كلمات باللهجه التونسيه..وهالشي ماخوفهاش لانها تعرف انه ليبي ابا عن جد..بس اول مرة تعرف ان امه تونسيه..
المهم..
مشت الزيارة ع خير حاليا وخدوا ارقام بعض..
والحاجه حواء وشرقيه بعد روحوا الناس روحوا طول بدون مايعلقوا بكلمه وهالشي خوف جميله هلبه..
.......
واقفه ع طنجرة العشي واطيب وتقول:ماضنيش يرضوا العيله يابنتي..
دعاء:مادامه ليبي ماعندهمش حق يرفضوا..
مؤيد:شن تقولي انتي امه تونسيه..والتوانسه مش ساهلين واختك نيه ماتعشيش معاهم..
جميله:حتى اني فكرت هكي..
دعاء بضيق:شكله حماسك خف ياماما..
تنهدت جميله بضيق وقعدت ساكته وهي تحرك في الطنجره..
مؤيد:انهوا الموضوع هدا افضل..
ومشي طلع من حداهم..
ودعاء سرحت في الفراغ وعيونها تعبوا دموع..
...........
"لالا سلم ولدي ردهم مالكش بيهم لزوم"
شرقيه:عندها الحق امي يامحمد..وباين عليهم مش ساهلين احرف من اهل الراجل اللي كان خاطب دعاء..ومروة مش زي خواتها طيبه ومغلوبه ع امرها والله لما ياكلوها من غير ملح..
محمد بضيق:علاش ماقالش هو من البدايه مش عارف..
حواء:يحسابه عادي شوره..ولايحساب بناتك حاصلين في رقبتك تعطيهم للي يجي..
ومحمد يسمع فيهم وهو معصب ع الآخر...
........
"انسيه الموضوع هدا وقوليلها تنساه"
جميله وهي اطلع في البطانيه:حتى اني هكي قلت لروحي تي هما ليبين وان شاء الله نسلكوا معاهم..
محمد رقد ع السرير وقال:ساد اللي صار لدعاء..
غطاته جميله وهي تقول بحزن:الله غالب..
محمد:اطفي الضي..
جميله:حاضر..
🥀هدا كله..
والمسكينه مروة ماتندري ع شي..
راقده وهي تتفرج ع صفحة الراجل الوحيد اللي لفت انتباه قلبها وتمناته ولما قربت الامنيه تصير حقيقه تلمسها بيدها تحولت لسراب..
مسكينات يابنات جميله..
مسكينه يارويدا اللي عرفتي بس من الفيس ان امين سافر لأمريكا وين ماطلعتله البعثه ولما جيتي بعتيله رساله..رد عليك رد..كسرك كسر...حظرها...
من صدمتها هديكا الليله غمت روحها بالبطانيه وقعدت تبكي بالصوت..
وخواتها اللي خافوا لما سمعوا صوتها سألوها خيرها..
وهي تقول"خلوني في حالي خلوني"..
سكتوا عنها لكن قعدوا يسمعوا في صوت شهقاتها وقلوبهم تتقطع..
ودعاء قلبها زاد وجعه وهي تفكر في ردة فعل مروة لما تعرف ان خيبتها جت مبكره...ونالت نصيبها من كسرة القلب..
⚘معليشي يابنات جميله..كله خير...خير بإذن الله⚘
⚘⚘⚘⚘⚘⚘
"وكان ياماما شن فيها!!؟"
جميله بضيق:يابنتي حاجه زي هادي العيله مايبوهاش..
مروة بصدمه ودموعها يصبوا:علاش يعني فهموني..رشقت وقالت..قصدي شن فيها!؟ مش مسلمين هما مش زينا قصدي هو ليبي..ياماما...بلعت ريقها وقالت...ماقالش بيه ربي هدا..
جميله نزلوا دموعها وهي تقول:الله غالب بنتي نصيبك مش فيه..
مروة وهي مصدومه شبحت لخواتها وقالت:باهي مش هدا حرام!؟ مش الرسول قال..اذا اتاكم من ترضون دينه و خلقه فزوجوه..لاقال اصله ولافصله..تي المشكله انه ليبي زينا زينه..راجل شيخ طالب علم انه وخواته ملتزمات هما لابسين خمارات وحني مش لابسينهم..علاش هكي مش فاه...
دعاء بخوف:مروة!..
جميله بخلعه:مروة ماما..
مروة حطت يدها خشمها وهي تبكي لقاته ينزف..
رويدا ببكي:مروة!..
وفاق وهي ترعش:تعالي هني مروة قعمزي..جيبولي قطنه جيبوا..
جميله وهي تبكي:علاش هكي ياربي بس شن دايرة تحتك اني..
دعاء وهي تبكي؛استغفري ربي ماما قولي استغفر الله..
جميله غمضت عيونها بشده وهي تستغفر..
ع جية رويدا بالقطن..
اسعفت وفاق اختها وهي ادمع بحزن..
ومروة تبكي بالعبرة..
وهما يحاولوا يهدوها..
بعد وقت..
رقدت مروة بالنوم...وخواتها قعدوا حداها..
اما جميله مسكينه مشت قعمزت في تركينه فالحوش وقعدت تبكي ع حظ بناتها لين طاب مافي خاطرها..
بعدين ناضت للحمام توضت..وطلعت خدت ملايتها وصلت ودعت لبناتها في السجود من وسط قلبها..وكلها رجاء ان ربي يستجيب دعواتها..
⚘⚘⚘⚘⚘⚘
وبعد مرور يوم..
اتصلت جميله بصفيه وبلغتها ان مافيش نصيب..
وصفيه كانت حاسة من البدايه..
ولما روح ولدها راجاته لين تغدا بعدين خبراته..
يوسف بصدمه:معقوله!!قصدك يام ردوني ع خاطر انتي تونسيه!؟
صفيه بألم:كنت خايفه من الحاجه هادي من زمان ياولدي..هدا وهما عرفوا اني تونسيه بس..مال كان عرفوا الباقي شن قالوا!!؟
يوسف بغضب وعيونها معبيات دموع:ماعندي شي نتحشم منه عشت عمري كله رافع راسي...وحنموت وراسي مرفوع بيك يام..وناض من حداها..
مشي لداره طول بدل وخدي تليفونه ومفاتيحه وطلع...
...........
شرقيه:تي باهي اللي رديتوهم ياوخيي..
حواء:كان تعرف اللي عرفناه يامحمد!
محمد بتوتر:شنو عرفتوا؟
شرقيه:ياسيدي علاء خوك عند صاحبه يعرف العيله..
قالك امه مطلقه طلقها راجلها وخلاها هي والصغار ومعاش دورهم بكل..بش تصرف عليهم قعدت تخدم في الحياش وولادها الكبار قعدوا يبيعوا الدخان..وحالتهم بالويل عايشين في عقاب تريله في********...
وقعدوا هكي لين توفى بوهم وجوهم خوتهم من بوهم قالوا عطوهم حصتهم من الورث وصية بوهم ..الولاد الكبار خدوا الفلوس وهاجروا..
اما فلوس الباقي امهم هي واختها فتحوا بيهم مزين وقعدوا تخدم فيه لين كبر ولدها ودار مشروع تاني متاع ملابس وقعد هو اللي يصرف عليهم والمزين قعد لأختها..
محمد:فوقها امه مطلقه وخدمت في حياش الناس!!
حواء:ريت بالله..
ع خشة مؤيد:بوي..الشيخ يوسف جي..
كلهم انصدموا...
محمد:وين جي!؟.
مؤيد:للحوش يابوي وين بيجي...هي تعالى..
..........
في دار البنات..
كانت مروة مقعمزة ومربعه ايديها وتومي وهي في قمة القلق والتوتر...وخواتها في نفس حالتها..
اما جميله كانت مقعمزة في الكوجينه وحالها من حالهم..
.....
في المربوعه..
يوسف:ماننكرش ومش حننكر وماعندي شي نتحشم منه ياعمي..انت برا اسأل عني عن اخلاقي اعرف سمعتي وسمعة امي بين الناس ياعمي..ياعمي محمد في دينا الحنيف المسلم لايعيبه اصله ولاظروفه الاجتماعيه..المسلم المهم فيه اخلاقه ودينه واني ولله الحمد غني بديني واخلاقي..اقسم بالمولى انك مش حتندم لحظه اللي عطيتني بنتك...
محمد وهو عاقد حواجبه:معليشي ياولدي اعذرني في امور تانيه تحكمنا في المجتمع هدا مانقدروش نتغاضوا عنها..ع الأقل في عيلتي اني حاجات زي هادي مانتغاضوش عنها..ممكن غير يعطيك..لكن اني لا..
يوسف:ياعمي...
قاطعه محمد وقال:ماتعبش روحك ياولدي خلاص قراري مش حنغيره..
شبحله يوسف بأسف..
بعدين ناض ووقف وهو يقول بنبرة مخنوقه:نصيب مافيش..الحمد لله على كل حال..سامحني خديت من وقتك..السلام عليكم..
ومشي محمد طلع من باب المربوعه البراني وطلع بروحه من الحوش من غير مايسقده محمد..
اللي خش داخل طول وجي لجميله وقال ويحرك في ايديه عكس بعض يمين ويسار:خلاص الموضوع نهيناه مرة وحده ..
جميله بحزن:الله غالب..
محمد مشي طلع من حداها..
وهي ناضت بالسيف ومشت لمروة بتقوللها..
دعاء..
مروة يومها صارت فيها حاله بكت وانفها رعف مرة تانيه منظرها كان يقطع القلب مروة اختي زي النسمه صعب عليها اللي مرت بيه وجعتني مروة اكثر ماوجعتني روحي..وحتى يوسف مسكين وجعني...
⚘⚘⚘⚘⚘
وعدت الأيام..
وخش الفصل الدارسي الربيعي..
دعاء فالهالفصل قررت توقف قيدها خلاص معاش عندها رغبه للقراية انعدمت نهائيا ومافيش من ناقشها في قرارها لابوها ولاامها ولاخواتها..
لكن آيات صديقتها حاولت تخليها تعدل عن قرارها لكن بلافايده دارت مافي راسها..وقعمزت في الحوش..
اما رويدا فصبت اهتمامها كله في القرايه وبس وتجاهلت كل شي ماعداها..
ومروة مسكينه كانت تحاول تتعايش مع جرحها الجديد..
لمحت يوسف كذا مرة في الكليه وكانت تهرب كل ماتشوفه..
اما هو فكان يدور فيها دواره للأسف قلبه حبها ماقدرش يمنعه..وقعد يجدد في جرحه كل مايدورها ويلقاها وهي مش حاسه بيه..
ومر هدا الفصل بسرعه هديكا السنه..
مافيه شي جد في حياتهم كلها قاعده زي ماهي...
وجي رمضان..
دعاء..
رمضان هديكا السنه جت في آخره حرب لكن ماكانش قريبه علينا...كانت قريبه ع حوازة جدي من امي..
اللي جو نزحوا عندها قبل العيد..
جدي وحناي وخالاتي وخوالي المتزوجين...
قمنا بواجبهم ع اكمل وجه..وهما ساعدونا في كل شي في المصروف والخدمه فالحوش...
لين جي العيد كانوا ناويين بعده يطلعوا لحوش بالإيجار حصلوه  قريب علينا..
تالت يوم العيد تقريبا طلعوله..
🗝وقعدوا اهل دعاء يمشوا عليهم ويجوا..
فهالوقت كانت ريمه مرت خالهم مركزة عليهم اكثر وعرفتهم عن قرب اكثر واكثر وزادو عجبوها...
في دار المعيشه في الحوش اللي قاعدين فيه اهل جميله..
ريمه:لتوا ماقدرنا نقنعوه بوحده..وسبحانك ياربي حاسه نصيبه فبناتك..
جميله ضحكت وقالت:هو مواليد كم ؟
ريمه:84..واسماه عبدالله..مستقر في قبرص لكن يسافر ع خاطر عمله واجد..
جميله:والله ماني عارفه شن نقولك..انتي يعني من تبي فيهم؟
ريمه:الحق ياربي عاجبتني رويدا واجد نحسها قويه وقد روحها وفالحه..
جميله:رويدا مازاللها عام وشويه وتتخرج..
ريمه:وهو ماعنداش مشكله يخطب تو وبعد تكمل يتزوجوا..
جميله بضحكه:غير يشوفها قبل..
ريمه:وهضا اللي بنحكيلك عنه..انا بناخد صورة لرويدا بالحجاب طبعا نبعتهله يشوفها..
جميله:معقوله بصورة!؟
ريمه:هضا مادايرين معاه ياخيتي لانه مايبيش يجي لليبيا فهالفتره..وبعدين انتي مفروض ماتخافي ياجميله..راني مرات خوك..
⚘جميله ترددت هلبه لكن خواتها اقنعوها وتوكلت ع الله وقبلت..
وريمه ماكذبتش خبر في نفس اليوم بعتت الصورة لخوها..
اتصل بيها فيديو..
عبدالله بضحكه:انتم  امتى تملوا قولولي..
ريمه:والله ياعبدو مانا مالين لين تزوج..
عبدالله خدي نفس عميق وقال:باهي يستر الله يصير خير..
ريمه بضحكه فرح:الحمد لله ياربي اول مرة ماتصكرهاش طول..
ضحك عبدالله وحرك راسه يمين ويسار..
ريمه:سمحه البنيه ولا عجباتك قول الحق..
عبدالله بضحكه:اها ماشي حالها.
ريمه:ماشي حالها عينك..
عبدالله:هههههههههه..
⚘⚘⚘⚘⚘
وتمر الأيام..
وتنتهي حرب المطار..
وولوا اهل جميله لحوازتهم اللي ماضررتش نهائيا من الحرب..
خلال هالفترة جميله ماتكلمتش مع رويدا ع موضوع خو ريمه قبل تتصرف في حكاية التصفيح..
⚘⚘⚘
ناهد:شيخ ماشاء الله عليه هو كانك ماتعرفيش شرقيه توا تفك فالتصفيح ع يده..دارلها مية رقيه وزيت مرقي وقاللها كيف تستعملهم وطلب منها تلزم سورة البقره..
جميله:باهي قولي لعلاء يكلمه ياوخيتي..
ناهد:ان شاء الله ان شاء الله..
⚘⚘⚘⚘⚘⚘⚘⚘⚘
"وهادي شيشة الميه وشيشة الزيت يستعملوهم كيف مافهمتك ياعلاء"
علاء:بارك الله فيك ياشيخ إلياس..
الياس بإبتسامه؛وفيك بارك الله...خلينا نشوفوك في غير المصالح..
ضحك علاء وقال:إن شاء الله..هي السلام عليكم.
الياس:وعليكم السلام..
ومشي ركب سيارته...
وعلاء حتى هو بعد ركب الشيش للسيارة..
ركب...
وتحركوا مع بعض..بعدين كل واحد مشي في جهة..
⚘⚘⚘⚘
وبدوا البنات بالخطه العلاجيه..
وكل وحده فيهم تتمنى اللي تبيه يصير..
دعاء..ينعدل حالها وتتصلح نفسيتها وترجع تحب الحياة وتعيشها من اول جديد..
اما رويدا..كانت تتمنى تصير معجزة تردهم هي وامين لبعض..
بس مروة فيسع ماماتت امنيتها..
لما شافت منشور ليوسف كاتب فيه انه قرر يسيب ليبيا هو وعيلته ويستقر في السعوديه نهائيا...
لأنها مالقاش نفسه في بلاده اللي نكراته ورافضه تعترف بحقه وتعطيهوله..
قداش بكت ليلتها مروة بألم..
وخواتها قعدوا يهدوا فيها وقلوبهم مفطورة عليها..
دعاء..
ماأصعب هديكا السنه...اللي تمت بمفاجأة مدويه للجميع..
شرقيه عمتي...انخطبت وتحدد عرسها في اخر شهر 12 من هالسنه..
والصدمه فان اللي بياخدها هو نفسه اللي خطبها زمان وسيبها ع خاطر مرته...
طلق مرته وولالها...وهي طول واقفت بدون تردد وبوي وعمامي عطوها كذلك بدون تردد..ههههههه...
ع العموم عرسها كان قنين..وحفلتها حلوة هلبه..خسارة فاتت  ازدهار غابت عنها لانها ماقدرتش تسافر بسبب حملها..
المهم..
ان شرقيه تزوجت وشافت حياتها واخيرا وعتقتنا....
و ماكنتش وقتها نعرف ان  اول الغيث زواج شرقيه....

....يتبع..