"إلا أن يشاء الله"

الجزء الحادي عشر"القسم الثاني"

قبل بنزله امس بس التغطيه كانت ضعيفه
✒..
"شن يدير جايك نصري غادي تكلمي"
رويدا قعدت واقفه تشبحله وهي ترعش وشاده الفوطه.
ناضت دعاء وقالت وهي عاقده حواجبها:انت من قالك؟
مؤيد بحده:اللي قالي قالي..جاوبيني انتي يادعاء ياكبيره
دعاء:اممم..باهي ايه هو جي غادي تلاقيت اني وياه فالواجهه سلم عليا وخش داخل ولقي اختك قاعده داخل سلم عليها ومشي ع حاله..
مؤيد شبح لرويدا بعدين شبح لدعاء وقالت:دعاء احلفي بالله ان مافي بينه وبينها شي..
رويدا:كلمني واني نجاوبك اني..والله العظيم مافي بيني وبينه حاجه..
دعاء:اقسم بالله يامؤيد مافي بينه وبينها حاجه كان نعرف من شيطان الرجيم اللي عبالك راسك..
مؤيد بنرفزة:شن تشبحي فيا عيل قدامك بش يعبولي راسي..
دعاء:باهي انت مشيت غادي؟.
مؤيد:شن بيرفعني غادي!؟ المهم توا اني مصدقكم باهي مصدقكم ومأمن فيكم ياخواتي باهي..راهو ورب العز طيح عليكم عيني اديروا في غلط والله ماني راحمكم..
وفتح الباب وطلع..
دعاء..
مؤيد كبر خلاص وبدي يركز ع كل شي ولأول مرة نخاف من مؤيد برغم انه اصغر مني لكن خفت منه هلبه مش شويه وحتى رويدا خافت هلبه..
رويدا:زعمه من قاله كان مامشاش غادي؟
دعاء مطت شواربها للأسفل بعدم معرفه..
ع خشة مروة ومعاها وفاق..
مروة:شن في؟
رويدا:اني طالعه بنصلي..
ومشت طلعت من حداهم..
دعاء:خشوا تو نحكيلكم..
🌻🌻🌻🌻🌻
ومروا يومين..
كانت فيهم رويدا ماغير تبكي وخلاص امين معاش فتح بكل من يومها وقالت في نفسها وقتها انه خلاص بينهي كل شي معاها..
حتى امتحانها الاخير قرتله بالسيف..
ويوم الإمتحان...
مشوا الزوز يديروا امتحانهم الاخير اللي كان قبل رمضان بأيام قليله..
كانت دعاء تراجي في اختها امتى تطلع..
قعدت تمشي وتجي قدام قاعة الإمتحان..
شويه وشافت أمين جاي وواقف في اخر الممر..ووقفت عليه زميلته وقعدوا يهدرزوا..
غيرت عيونها عنهم ووقفت وقامت تليفونها وانشغلت بيه..
امين:بنسألك اميمه..رشاد قبل قالي انتي خبرتيه ان البنت مخطوبه..
اميمه شبحت لدعاء وقالت:ايه صاحبتها قالتلي..
امين:من هي؟
اميمه:والله تقريبا اسمها اماني قريتها السمستر هدا..
امين عقد حواجبه وقال:اها ايه عرفتها قريتها السمستر اللي فات..كانت كاسرتلي رقبتي..
ضحكت اميمه..
وامين يشوف لدعاء ويفكر..
ع طلعة رويدا من القاعه..تبدلت ملامح وجهه للهفه وهو يشوفلها..
دعاء:شن جاوبتي؟
رويدا بكآبه:باهي آهو..هداكا جي..
هزت دعاء راسها بإيجاب..
التفتت رويدا ايمينها طول شافاته ..
هو بدل ملامح للحده..هي رفعت حاجبها وشبحت لأختها وقالت:هيا..
ومشوا الزوز مع بعض..
اميمه ابتسمت ع جنب وقالت:طحت في اختها حتى انت.
امين شبح لأميمه ووجهه ولى احمر...وهي ضحكت..
⚘⚘⚘⚘⚘
ولأنهم كملوا امتحانهم بكري جاهم بوهم روح بيهم..
في الطريق..
محمد:بنخطم ع حوش عمكم بناخد منه حاجه..
دعاء:بابا مانبيش ننزل..
رويدا:حتى اني..
محمد:باهي مافيش مشكله..
وبعد ماقطع مسافه وصل لحوش خوه..
درس السيارة ونزل..
رن ع الانترفون..وشويه وخش داخل..
رويدا:واخيرا جت العطله..
دعاء:ايه..
⚡بعيد عليهم بمسافه بسيطه...
في الحوش اللي بينه وبين حوش عمهم حوشين..
"العشيه بيجي"
رجاء وهي تمشي وراه:باهي غير راجي شويه ..
وقف وقال بإستعجال:قولي شن عندك بسرعه.
رجاء ابتسمت وقالت:امتى تبي تاخد رقم خطيبتك وتكلمها
قلب عيونه بملل ومشي من حدا اخته بدون مايرد عليها وطلع من الحوش..
🌸في نفس الوقت..
كانت ازدهار طالعه من حوش اهلها بش بتمشي للمستشفى..
شافت بنات عمها في السيارة طقت عليهم الروشن..
نزلت دعاء المرش..
ازدهار بإبتسامه:شن جو ياعروسه..
دعاء بإبتسامه:تمام شن جوك انتي..
ازدهار:ماشيه..اهو حال الخدمه..رويدا رقدت شكلها..
التفتت دعاء وشبحت رويدا وقالت:ايه تعبانه هلبه راقده ساعتين بس قبل الفجر..
ازدهار:ذكرتني بروحي ايام القرايه..تنهدت وقالت..شن جوك انتي مع خطيبك تكلمي فيه؟
دعاء..
خفت وقتها نقوللها نكلم فيه تعاود لشرقيه وشرقيه توصلها لبوي ولامؤيد..
دعاء بضحكه:لتوا لا..
ازدهار:جديات!..معناها انتي خاشه ع الجبل بقادومه..
دعاء:مخليتها ع ربي وخلاص..
ازدهار بإبتسامه:ونعم بالله..
دعاء:وانتي شن مافيش جديد؟
ازدهار:تس تس..زي مااني..وحتى اني مخليتها ع ربي وخلاص..
دعاء:ونعم بالله..
شويه شبحت ازدهار يمينها لما سمعت باب حوش جيرانهم انفتح..
وشافت جمال ماشي بيركب سيارته..
ازدهار:عطيه الهني فجماله وشخصيته ولد جيرانا هدا..
التفتت دعاء بتشوفه لقت سيارته تحركت قالت:هو نفسه اللي حكيتي عنه قبل؟
ازدهار:ايه..
وفاتت من حداهم سيارة جمال..
دعاء شبحت لإزدهار وقالت:شن جو امل؟
ازدهار:اهو حال الصغار..
دعاء:ربي يعينها..
ازدهار:آمين..هي سلام توا عطلت ع المستشفى..سلمي ع امك..
دعاء:يوصل..سلام..
ومشت ازدهار ركبت سيارتها شغلتها وتحركت..
تنهدت دعاء وقالت:هيا يابا عاد!..
لحظات وطلع محمد..ركب السياره وشغلها وتحرك طول..
⚘⚘⚘⚘⚘⚘
الساعه 6:30 عصرا..
في حوش اهل جمال..
في المربوعه..
جمال:هدا بدر الكبير..وهدا مروان..
اسامه:هدا اللي ع اسم بوه؟
جمال هز راسه بإيجاب.
ابتسم اسامه وهو يشوف لمروان اللي كان يشبحله..
طق الباب..
جمال:خشي رجاء..
اسامه خدي نفس وزفر..
وجمال شبحله..
ع جية رجاء اللي لما شافت اسامه انصدمت..
جمال:قعمزي..
قعمزت حدا خوها وهي مصدومه..
واسامه شاد ضحكته..
ناض جمال وقال:طالع نلعب اني وياهم شويه..
وخدي معاه الصغار ومشي طلع من المربوعه.
رجاء بعد شافت خوها طلع شبحت لأسامه وقالت:انت؟
هو ابتسم وقال:اسامه..اسامه الشيخ...
رجاء:اسمع من الاخير اني مانبيش نتزوج..
اسامه:واني نبي..
رفعت حواجبها..
اسامه:علاش انتي ماتبيش!؟
رجاء:ع خاطر صغاري مانبيش راجل غريب يريبهم..
اسامه:لما ناخدك مش حنقعد غريب..
رجاء:انت بارد شكلك..
اسامه بضحكه:نوعا ما..ابتسم بعدين قال..صدقيني اني نبيك بصغارك..عارف عنك كل شي..عارف ظروفك عارف بشن مريتي ماعنديش مشكله في شي بكل..
رجاء:كله كلام توا..بعدين ياأني ياصغارك..وطبعا حنختار صغاري لهدا ماتعبش روحك..
ابتسم وقال:عندك علم اني مشيت لاهل زوجك الاول الله يرحمه وكلمتهم..
توسعوا عيون رجاء بصدمه..
اسامه:مرتين مشيت وفالمرتين استقبلوني بإحترام وفي المرتين عطيت وعد ان صغار المرحوم حيكون زي صغاري..اقتنعتي اني نبيك بصغارك..
رجاء:اعزب انت؟
اسامه:شور..
رجاء:فيك إن..
اسامه:كيف يعني!؟مثلا نطلع مريض ولاعندي مشكله معينه تخافي تكتشفيها بعد الزواج!؟
رجاء:ممكن..
اسامه ابتسم وقال بثقه:مشكلتي الوحيده وتقدري تعتبريه مرض..هي اني حبيتك..
رجاء فنصت فيه..
اسامه:هادي الصراحه التامه..اني راجل شوري من راسي المجتمع هدا كله برمته مايهمني في شي..كل اللي يهمني اللي فوق بكل اللي يشوف كل شي ويعرف كل شي..يعني مادام ماندير في شي هو يكرهه ويغضبه معناها اني ماشي فالسليم وماعليا في حد..
ابتسمت رجاء..
اسامه ابتسم وقال:نعطيك وقتك تزيدي تفكري مش مستعجل..رفع حواجبه ونزلهم وهو يقول..برغم اني مستعجل الحق..
نزلت عيونها وضحكت ضحكه خفيفه..
اسامه بإبتسامه:ان شاء الله خير...ايه حقه برنيه تسلم عليك..
ضحكت وهي تساوي في وشاحها بخجل وقالت:الله يسلمها..
واسامه يركز في حركاتها وهو مبتسم...
......
مكالمه هاتفيه..
رجاء:مش عارفه ارتحتله هضمته..
نجلاء بضحكه:يعني موافقه..
رجاء ابتسمت وقالت:لالامازال بنزيد نقلبها في راسي ونقول لجملو يتحرى عنه اكثر..
نجلاء:باهي ربي يقدم اللي فيه الخير..
رجاء تنهدت وقالت:يارب..
نجلاء:الا ع سيرة جملو..مازال مصكر راسه ومايبيش يكلم البنت..
رجاء:ايه..والله مصخفتني مسكينه والله لولا امي ماخطبناله مادام هو مايبيش..
نجلاء بقلق:رجاء مش عارفه علاش قلبي ناغزني..حاسه امك مدرقه حاجه..في شي صاير معاها يارجاء..
رجاء بخوف:زي شنو؟
نجلاء:والله ماني عارفه يارجاء لكن فيها شي متأكده..
وتسلل القلق لقلب رجاء ع امها وقعدت تفكر في حالتها الصحيه...
⚘⚘⚘⚘⚘
الساعه 7:00مساءا..
في الدار..
مقعمزة في تركينه وشاده تليفونها..
(والله انت اللي خديت موقف قبل لتفهم)
امين..
(ماتحملتش يا رويدا انحرقت)
رويدا..
(اسمع امين اخر مرة اديريلي هكي راهو)
امين
(تهددي انتي)
رويدا
(ايه)
امين
(هههههههه..باهي خلاص ياستي اسف اخر مرة معاش نعاودوها)
ضحكت رويدا..
في الدار التانيه..
مكالمه هاتفيه..
دعاء:قريتها الرساله اللي بعتهالك..
اسعد:اما رساله..
دعاء:بكري بعتلك رساله فيها دعاء ماقريتهاش..
اسعد بضحكه:سامحيني والله ماريتها..لاهي بالخدمه زي ماتعرفي..
دعاء:اسعد..
اسعد:عيونه..
دعاء:اسعد نبي نعرف انت شن تخدم بالزبط فالدوله..
اسعد:اني تابع الامن هكي..
دعاء:قصدك تخدم غادي ع الكومبيوتر..
اسعد:كومبيوتر!؟
دعاء بضحكه:او ممكن اللاب توب..
اسعد ضحك وقال:والله الزوز مانفهم فيهم لاكامبيوتر ولا اللاي توب هدا اللي قلتي عليه..
دعاء عقدت حواجبها وقالت:انت مش شني متخرج بالزبط..
اسعد:اني قريت للسادس بعدين خشيت معهد صناعيه..وخلاص..
دعاء انصمتت وقعدت ساكته ماقدرتش تنطق..
اسعد:آلو..دعاء..
دعاء:احمم..ايوه..معاك..
اسعد تنهد وقال:ياريتك معاي..
دعاء مطت شواربها بضيق بعدين قالت؛باهي اسعد بنصكر توا بنمشي نعاون ماما بعدين نهدرزوا..سلام..وصكرت طول..
نزلت تليفونها وهي مصدومه..وحست الدنيا ادور بيها..
في نفس الوقت..
اسعد نزل من شقته لحوش اهله..
خش ع خواته لقاتهم يتفرجوا ع التلفزيون..
قعمز جنب نعمات وقال:ترا شوفي الرسايل..
خدت منه التليفون وفتحت عليهم..
وقعدت تقرا في رسايل دعاء اللي كانوا اغلبهم ادعيه..
ضحكت نص ضحكه وقعدت تقرا فيهم وخواتها يسمعوا ويضحكوا..
عايده:شيخه خطيبتك ياسعوده.
ضحك ومسح ع شعره بعدين قال:باهي ابعتيلها حاجه نعمات..
نعمات بضحكه:باهي..
وبعتت رساله من عندها لخوها..بعدين بعتتها من خوها لدعاء..
نعمات:خود ..
خدي تليفونه وقال:بعتيلها؟
نعمات:ايه..
ناض اسعد وقال:تمام..هي اني طالع..
عايده:وراس سعوده جيبلنا عشي من برا..
اسعد:باهي.
نعمات؛وين اللي وعدتني بيه؟
اسعد ضحك حط يده في جيبه وطلع مبلغ وعطاه..
هي خداته وقالت:سلم وخيي..
هو ضحك ومشي طول..
وهي قعدت تعد في الفلوس...
⚘⚘⚘⚘⚘
الساعه 11:00ليلا..
كانت ازدهار فاتحه اللاب توب ومكسده ع الفيس..
لقت منشور منزلاته هديل تتكلم فيه عن التعب في الخدمه..
خشت علقت ازدهار..
(ومالقينا من يحس بينا)
ردت في التعليق هديل..
(نلقوه عند ربي بالذات في بلاد زي هادي)
ازدهار
(ايه مرمده ومرض بس)
خش عليهم واحد اسمه
Ahmed A Dau
(اني حاس بيكم..ياملايكة الرحمه)
هديل..
(حني دكتورات يااستاذ)
احمد..
(دكتورات!!؟ وهادي جمع مؤنث سالم ولاتكسير)
هديل..
(ياناس هدا خوي قولوا ماشاء الله راكم تضروه بالعين ع خفة دمه)
وازدهار تضحك..
احمد
(والله وجهك ماوجهك قبل بنعبت نجيبك تقري هني لكن ماصارش بنجيب صاحبتك واقعدي انتي فالعفن اللي غادي)
عضت ازدهار ع شاربها وهي تضحك ووجهها ولى احمر..
هديل..
(كان مشت زوزو كإني اني مشيت)
احمد
(باهي وينها اختفت حضرت الشياطين ذهبت الملايكه)
وازدهار تضحك وخلاص..
خشت وحده اسمها بالإنجليزي احمد..
(كيف صار وعلقت وعبرت الليبين)
احمد
(حرام عليك ياكنقه كل يوم نديرلك فلايكات حتى ع مشاركات الجلسات العربيه)
هديل
(ههههههههه)
ام احمد
(تعال خاص)
هديل..
(حي عليك حي)
وقفوا هدرزة فالردود..وازدهار تعاود تقرا فيهم تضحك..
بعدين قالت:مانحسابش خوها هدا دمه خفيف هكي عمري ماريته معلقلها..
شويه وخشت وحده من خواته ردت وقالت
(حماده علق حمار من بيموت اليوم!!؟).
مارد عليها حد..
وازدهار تضحك..
⚘⚘⚘⚘⚘
ومرت الأيام..
وخش شهر رمضان..
وايامه كانت حلوة كعادتها..
وفيهم..
🌸كانت ازدهار متمسكه بالعبادات اكثر والدعاء والذكر..وهالمره طلعت حتى الصدقات..كانت كل ماتقرب من ربي اكثر تحس براحه عجيبه ماتبيش تفارقها..
وكان حوشهم كله حاله متغير..لان امها حتى هي بدت تقرا معاها في سورة البقرة كل فجر وبدت تحس بشي تغير فيها..
ومش بس هي اللي لاحظت حتى شرقيه لاحظت عليها كل ماتجيب معاها سيرة حوش محمد تصكر ليلى السيره وتقول "نخلوهم في حالهم خيرلنا"
لهدا قلبت شرقيه الموجه ع امل وقعدت هي وياها يوميا قرمه في عباد الله..
🌸اما رجاء..
فجاب اسامه امه وزوز من خواته المتزوجات بش يخطبوها..
كان واضح ع خواته انهم مش قابلات الموضوع لكن امه فرحانه بطير برجاء..
واتفقوا بعد عيد الأضحى يكون العرس...
وبهكي تكون صابرين تريحت ع صغارها كلهم...ومستعده للموت تماما..
🌸بس جمال كان تعيس بمعنى الكلمه تعاسه مكبوته عايشها مع نفسه..بالذات وان خاطب بنت ناس مايبيهاش بكل ومش عارف كيف بيدير معاها..
🌸هي نفسها التعاسه المكبوته اللي عايشتها دعاء مش قادره تفضفض ولاتحكي لحد عن شي..
دعاء..
اني كنت مقهورة بمعنى الكلمه..الراجل اللي طحت فيه ياناس مايعرفش لايقرا ولايكتب..طحت في راجل مايعرفش يحكي في شي..
لما نكلمه ع وضع البلاد يقول اني مادخلي بحد القلب اللي تقلب..
لما نكلمه في الدين..مايعرف فيه شي..حتى مرة سألته عن اسماء الخلفاء الراشدين معرفش شن يجاوب وقعد يلبز ويعجن..
نكلمه ع الامور الحياتيه مايفهم في شي غير في بيع وشري السيارات والفلوس منين يجوا وكيف يجوا..ولايقرم في عباد الله..
ايه والله يقرم قرمه راجل ويقرم خير من النساوين..
وكان جي بيدوي صح يدوي في امور مقرفه اني نقطعها طول...
يعني بإختصار..اني ارتبطت بإنسان فااااااااضي تماما...ماعنده شي وحاسه حتى الشخصيه ماعنده..
اخر شي قررته وقتها اني نرجع نصلي الإستخاره لما سمعت شيخ قال..صلاة الآستخاره مفروض تستمر ليوم الزواج..
فوضت الأمر لله تماما...
🌸في الوقت اللي فيه رويده عايشه احلا ايامها مع امين..
ومروة قاعده تقرب من حلمها..العام الجاي حتخش كليتها اللي تمنتها خلاص...وحتوصل واخيرا في الشيخ
جوزيف ع قولت رويدا...
⚘⚘⚘⚘⚘
24\رمضان..
في الليل..
مقعمزين يشربوا في القهوة ويهدرزوا..
جميله:ماقالكش امتى بيجيبوا الموسم؟
دعاء:ماجابش سيرته بكل..
جميله:شرقيه امس لما مشيت غادي قعدت تقولي وتي روحك بيجوك جماعة دعاء بالموسم..
رويدا:واااك من هالمخلوقه..
جميله:انتي شوفيه يادعاء عادي بنتي اسأليه مافيها شي..
دعاء تنهدت وقالت:إن شاء الله..
⚘⚘⚘⚘⚘
مقعمزة في الجنان..
حداه فنجان قهوة اللاب توب مفتوح..
وهي تتفرج ع فيديو للداعيه مصطفى حسني..
بعد تم دارتله مشاركه..
شويه شافت رساله جتها...
فتحتها طول..
(السلام عليكم دكتورة ازدهار)
شافت منو من المرسل انصدمت..
(السلام لله يادكتورة والله يعطي عليه ربي فحسنات)
ازدهار معاش عرفت شن دير..
مشت طول لهديل كلمتها ع الخاص..
(هدوله)
هديل
(هلا زوزو)
ازدهار
(هديل خوك توا خشلي خاص كلمني)
هديل
(هههههههههه..حي ع العبط عمرك ماكنتي عبيطه هكي زوزو)
ضحكت ازدهار وقالت
(من الصدمه)
هديل..
(ياستي انتي توا وليتي حبيبة ماما وبابا والحوش كله ع يدك انتي انفكت عقدة الكندي).
ازدهار وهي مصدومه
(مافهمتش!؟)
هديل..
(بري ياهبله بري كلميه تو هو يفهمك)
ازدهار قعدت لحظات تتفرج ع المحادثه..
بعدين مشت لمحادثتها مع احمد..
لقاته باعت 4مرات يادكتورة بالعربي والانجليزي ..
هي ضحكت وبعتت..
(اسفه انشغلت شويه)
احمد..
(تفضي تقريهم لكن في الرد تنشغلي).
ضحكت..
احمد
(ع العموم اني نبي نكلمك في موضوع جاد جدا يادكتوره عطيني 4ساعات من وقتك)
ازدهار ضحكت وقالت..
(شن رايك نعطيك وقتي كله)
احمد
(لالا تو بعدين تعطيني وقتك كله مش مستعجل هلبه)
ازدهار:هههههههه..يهبل...
(باهي تفضل)
احمد
(يزيد فضلك..معاك احمد عبدالرحمن ضو مواليد 82  راجل جاد واقدس الحياة الزوجيه..اعزب لم يسبق لي الزواج..)
ازدهار تضحك وخلاص..
احمد
(ياستي من الاخير الواحد لما يجي اوان نصيبه مايقدرش يرده..)
ازدهار
(شن تبي تقول مافهمتش)
احمد
(لا والله فاهمه ونص لكن مش مشكله تو نفهمك..نبي نخطبك يادكتورة لو ماعندكش مانع)
ازدهار قعدت تضحك وقلبها يدق بسرعه..
ع طلعة امل شافتها تضحك..
قعمزت جنبها وجبدت اللاب ليها وبدت تقرا..
قرت المحادثه وشبحت لاختها وقالت:هو نفسه خو هديل؟!
هزت ازدهار راسها وهي مبتسمه..
ناضت امل وضمتها وقالت:واخيرا ياربي..
وازدهار ضمتها وهي تضحك..
🌸شويه وخشوا داخل وحكوا لأمهم كل شي بالتفصيل..
وامهم طارت من الفرحه...
⚘⚘⚘⚘
"الموسم اللي يرفعوا فيه الأعياد "
اسعد:الحق مانعرفاش لكن تو نقوللهم..انتي بالزبط شن تبي؟.
دعاء:اني مانقولش شن نبي اهلك يجيبوا اللي يبوه..
اسعد:باهي..تونعطيهم الفلوس وهما يطلعوا وياخدوا..
دعاء:المهم اليوم اللي بتجوا فيه قولي عليه..
اسعد:باهي باهي..دعاء حبي..
دعاء..
عارفاته في شن يبي يتكلم..سايرته شويه بعدين نهيت المكالمه..كبدي درهت وكرهت روحي..كيف بنعيش معاه هدا كيف مش عارفه...كنت في كابوس اني كابوس بمعنى الكلمه..
⚘⚘⚘⚘
وعدت الأيام..
وجي يوم 26...
وجو ام اسعد ومعاها عايده..
جايبين كيسه ذهبيه كبيره..
وبوكس احذيه..
دعاء لأنها استقبلتهم مالحقت تشوف شي من اللي جابوه..
لكن خواتها شافوا..
رويدا:تو هدا موسم يجيبوه الناس!؟
مروة:معقوله هكي شن هالعار هدا..شوفي شن جايبين تاني!
رويدا:مصح خلايقهم..تعرفي مروة شكلهم ناس مايفهموا لافي قدو ولاقدر..
مروة:عليك حظ حظك يادعاء..
ودعاء مقعمزة في الصاله تسمع في داره كبد عايده وكلامها اللي يكسر الرقبه..سافرنا مشينا جينا كلينا شربنا وفشخره فارغه..
كانت تتقصد تحكي ع الصرف والفلوس وجميله لاحظتها..
المهم لما جو مروحين..
اسعد سلم ع جميله..وع دعاء اللي كان بياكلها بعيونه ماتحمشش حتى قدام امها يشبحلها وهو يملي في عيونه..
بعد روحوا...
.......
جميله بعصبيه:لاهكي هلبه شافونا سكتنا ع حركة القفطان زادو تمادوا..تو هدا موسم يجيبوه!! مصح وجوههم..
ودعاء تشوف للي جايبينه وهي مربعه ايديها ودموعها في عيونها...وفهمت قصد عايده من كلامها طول جيتهم ع الصرف والفلوس...
هديكا الليله اتصل بيها اسعد اكتر من مرة مابتش ترد عليه
واليوم اللي بعده كذلك واللي بعده..
لعند مابعتلها رساله
(خيرك ماترديش)
دعاء..
كنت متأكده ان مش هو اللي كاتبها لانه مره بعتلي رساله كاتبها هو بيقولي فيها انه مش فاضي لما اتصلت بيه وماردش..
وكانت الاملاء ضايعه تماما فهمتها بالسيف..
المهم..
ماما وقتها خافت مني نفسخ الخطبه قعدت تهدي فيا وتقولي معليشي بالك مش زابطين بالك مايعرفوش..
المهم عندها اني مانفسخش..
وانجبرت ع خاطرها نرد عليه..
دعاء:ايوه..
اسعد؛خيرك يادعاء ماترديش شن في شن صاير معاك..
دعاء:ماصاير معاي شي..
اسعد:مالا خيرك ماترديش..
دعاء:طايرتلي يااسعد مضايقه بنموت..
اسعد بخوف:خيرك علاش!!؟
دعاء..
وحكيت اللي في قلبي كله من البيان لعند الموسم ع اهله طبعا هو ماقلت عليه شي..شويه قالي صكري وتو نعاودلك..
وماهي الا دقايق..واتصلت بيا اخته نعمات..
نعمات:خيرك يادعاء شن مزعلك..
دعاء:يانعمات قصدي معقوله ماتعرفوش شن يجيبوا في المواسم..
نعمات:لاحبيبتي نعرفوا ونعرفوا هلبه لكن مش حاجه مهمه الموسم..لأنه ينقاله محسبانيه يعني اني لو مكانك نفرح ونطير من فرحتي اللي عزوزتي وخطيبي جوني في رمضان وحسبوني بحاجه..مانحسابش تفكيرك مادي هكي..
دعاء:لااني تفكيري مش مادي اني هني نتكلم عن الأصول يانعمات الاصول والقدو..
نعمات:وحني نعرفوهم الاصول والقدو..وع العموم سامحينا وان شاء الله في عرسك نجيبولك كسوة ماتحلميش بيها حتى الحلم..تمام..تصبحي ع خير..
وصكرت..
دعاء بغضب:امشي سحيقه..شن درت فروحي اني بس شن درت...
شويه واتصل اسعد..
ردت عليه..
دعاء:ايوه..
اسعد:كلماتك نعمات؟
دعاء:ايه كلمتني..
اسعد:خلاص حبيبتي امسحيها في وجهي اني عطيتهم 500 وشكلهم ماسدوش..
دعاء..
500 هداكا الوقت ادير حاجه باهيه..واللي جابوه هما مايسكرش 200..فهمت وقتها انهم واخدات نص الفلوس وفهمت رساله عايده اللي وصلتهالي يومها يعني خوهم ومايملك تحت امرهم هما..
واني وقتها عرفت شكلي حياتي معاهم كيف حيكون بعدين..
اسعد:في الجديد حبيبتي اني نعطيك وانتي تاخدي بروحك المهم ماينقصك شي حبي..دعاء..
دعاء...
واني هني قريب فصلت عليه فصله سودا...
دعاء:اسعد اسعد..بابا ينادي فيا...سلام..
وصكرت..
وقعمزت ع المندار بهده وبدت تبكي ع حظها المايل بصمت...
⚘⚘⚘⚘
وجي العيد..
وفي تاني ايامه تلاقوا العيله في حوش جد دعاء..
بعد العصر...
في الصاله..
امل:ماعندكش صورة لخطيبك دعاء..
دعاء:لالا..
ازدهار:قاعده لتوا ماتكلميش فيه؟
شرقيه شبحتلها..
دعاء:لالا..
ازدهار:وااك مش عارفه كيف الحق صعبه تخش حياتك ماحد انتي مش عارفتيه..
عيشه:خيرلها من اللبز الزايد..
ازدهار:اني معاه وبقوة هاللبز ياعمتي..
عيشه:ماك زوفريه..
ضحكوا البنات..
ليلى:شن ياجميله بديتوا توتوا للعرس..
جميله:اهو كل مرة ناخدوا حويجه..
ليلى:باهي ربي يكمل ع خير..
ودعاء شاده دموعها بالسيف وهي تدعي في خاطرها وتقول..
"يارب ماتكمل حاجه يارب"
برا..
في الجنان..
"اقسم بربي لو تعرضتلي مرة تانيه نحكي لعمامي"
ابراهيم:بنخطبك من بوك..
رويدا ابتسمت بتهكم ومشت وخلاته وهو واقف يشبحلها بغضب..
بعدين مشي حتى هو..ونسرين واقفه تشبحله من روشن المخزن..
نسرين:الله اعلم من بيعطي خالي خوي ولاابراهيم؟!
⚘⚘⚘⚘
وعدت ايام العيد..
وبدت مروة ادير في امتحاناتها...
تعبت في هديكا الأيام هلبه بالذات مع حرارة الجو والضي اللي مايقعدش..
اما رويدا ودعاء قاعدات يراجو في النتيجه..
ووفاق متريحه من هالمواويل نتيجتها طلعت ونجحت بتفوق ومؤيد زيها..
وفي يوم..
جميله:هههههه..هادم كلهم جو لرويدا ماشاء الله..
محمد:ماضحكت كان ع ولاد اختي وخوي..
جميله:رديتهم ولا؟
محمد:قلتها قبل الأقارب مش حنقربهم بكل..
جميله:حتى هدا اللي عنده محل في ***** صكر موضوعه بنتي بتولي مهندسه نعطيها لواحد عنده شهاده ثانويه!!
محمد:والله حتى اني مانبيش نفتحلها هالمواضيع لين توصل لاخر سنه في القرايه ساد دعاء اللي تشتت.
جميله بضيق:مسكينه بنتي هادي حظها بالهون..
محمد تنهد بضيق وقعد ساكت شويه بعدين قال:ايه حقه ماقتلكش..بنت خوي المهدي عطوها..
جميله:ازدهار؟
محمد:وهو في غيرها..طاحت طيحه بسم الله ماشاء الله..عيله متسميه والشاب ماشاء الله عليه سمعته سابقاته..
بوه قاضي قضاة..وامه دكتورة جراحه والعيله كلها تشرف..
جميله:العز يدور في بعضه مش اقل من نصيب اختها .
محمد:ماتقوليش هكي كله مقسوم من الله وكل حد ياخد نصيبه..
تنهدت جميله وقالت:الحمد لله ع كل حال..
ودارو فضانية ازدهار كانت كبيره هلبه عيي محمد وهو يحكي عنها مش اقل من فضانية اختها..
واهل العريس ماخلوا ماجابوا فيها...
شرقيه:ياحنه واخد ماجستير في ادارة الاعمال في كندا ويحاضر غادي في الجامعه وتوا يحضر في الدكتوره وعنده مركز مرموق في شركه عالميه..
جميله:ماشاء الله..
دعاء..
كنت نسمع ونقول لنفسي باهي علاش ناس زي هادي مانطيحوش فيهم..ناس راقيه متعلمه محترمه..علاش..
نذكر في روحي ليلتها بكيت ع حظي لين راسي وجعني ورجعت وماحد حس بيا ولانبي حد يحس بيا..
🗝وفي طول هديكا الفتره كانت دعاء ماتكلمش في اسعد بكل..وهو كان حاط في باله انها مازال زعلانه من لقطة الموسم..لهدا خلاها ع راحتها لين تنسى وتولي بروحها..
⚘⚘⚘⚘⚘
وطلعت نتيجتهم..
وهالمرة مش ع النت يشوفوها بل في الكليه..
لهالسبب مشوا الزوز للكليه..
وشافوا النتيجه..
رويدا صفتهم كلهم..
لكن دعاء صفت زوز بس ع الحافه وخلت تلاته وكانت لامباليه تماما ولاهامها..
رويدا:الحمد لله ياربي صفيتهم بمعدل..
دعاء ساكته وخلاص..
شويه وشافوا انوار جايه فيدها كيسه بيضا متوسطه..
لما فاتت من حداهم شافت دعاء اللي فيها كانت كروت دعوة افراح..
قلبها وجعها ع الآخر..
ولما وصلوا في الواجهه..
شافوا رشاد جاي كان داير شيانه لحيه وشعره كثيف..
دعاء..
هي زادت زيناته مش شيناته..المهم فهمت وقتها ان عرسه هو وانوار قرب خلاص مادامه روح لليبيا..
دعاء:عرسهم توا شكله..
رويدا:اممم..قالي أمين اول الشهر الجاي..
دعاء ابتسمت بحسرة وقالت:بعد اسبوع معناها...
رويدا قعدت ساكته وقلبها واجعها ع اختها هلبه...
⚘⚘⚘⚘⚘
ومر هالأسبوع..
وجي الاسبوع اللي بعده ودار رشاد عرسه هو وانوار وكان عرس كبير هلبه...
وامين كان يخبر في رويدا عن تفاصيل العرس اللي يخص الراجل طبعا..
دعاء...
واني خشيت ع حساب رويدا ودورت ع ايميل امين وخشت عليه ولقيته داير تاق لرشاد وخشيت ع حساب رشاد وشافت الصور والاجواء...
شفته وهو لابس البدله ليله الزفه..
ودموعي نزلوا بروحهم..
يااااه..السنه هديكا كانت من اسوأ السنوات اللي مرت عليا في حياتي..
🗝مابعدك يادعاء دخلتي روحك في حالة كآبة قويه وانتي ادوري في شي اللي يقهرك دواره..اللهم اعلم كم بنيه عاشت حالة دعاء هادي..
⚘⚘⚘⚘⚘⚘
وترجع تمر الأيام..
وتنجح مروة بتقدير ممتاز..وتختار تخش كليتها اللي تتمناه من لما كانت في الأعدادي..
وسجلها فيها بوها..
وطلعت مع خواتها..
شرت عبايات وواسعات وشاربات كبار وكلهم نازكات وحلوات..
ورويدا خدت كم لبسه للكليه..
اما دعاء..تبتت..
⚘⚘⚘⚘
بعد روحوا..
كانت دعاء مش طايقه روحها من النو..
كيف جت بتبدل..
رن تليفونها وكان اسعد..
ردت عليه وهي متنرفزة:ايوه..
اسعد:خيرك تردي هكي..
دعاء:كيف مروحه من السوق ونو والجو خي ومش طايقه روحي...
اسعد:اممم..من الأخير انتي معاش تبي مكالمات التليفون؟
دعاء"اني معاش نبيك انت في مرة وحده":ايه هكي يكون احسن..
اسعد:خلاص تمام..اوينا..
دعاء صكرت طول ولوحت تليفونها عالمندار وبدت تبدل وهي في قمة العصبيه..
⚘⚘⚘⚘⚘
بعد 15يوما...
الساعه 10:00صباحا..
نزل من داره بش يفطر ..
لقي طاولة الفطور واتيه لكن مافي حد عليها..
جمال:منجيه..يامنجيه..
شويه جاته الخدامه بسرعه..
جمال:وين رجاء وامي؟
منجيه:رجاء طلعت مع الصغار قالت بتسجلهم روضه حضانه حاجه كيف هكا..
اما مدام صابرين فطرت الصبح بكري بعدين ركبت لدارها..
هز جمال راسه ومشي للدروج وركب بسرعه..
وصل فوق..
مشي طول لدار امه...لقاها مردوده كالعاده..
فتحها..وخش..
انصدم..
لما شاف امه طايحه ع الصلايه والدم نازل من فمها..
جاها يجري..
ضمها ورفعها وقعد يعيط ويقول:امي..يام...ماما..ماما حبيبتي كلميني ردي بالله عليك ماماااا..
بعدين مسح دموعه طول وقال:والله ماتسوى حاجه حياة انتي مش فيها ..
قامها في غمره وطلع بيها بسرعه وهو يقول ويعاود
"ياارب"
🌻🌻🌻🌻🌻🌻
تمشي في الكليه لأول مرة..
كانت لابسه عبايه سودا واسعه واخر اكمامها ضيق..وشاربه كبيره لونها موف غامق..كان طالعه حلوه هلبه..
كانت تمشي وهي شاده شنطتها وتسكتشف في الكليه..
ماكانش مبناها مبهر للعين بس عالم جديد عليها..
وهي ماشيه مش منتبهه..
انخبطت في حد هو نفسه ماكانش منتبه..
كان يمشي للخلف..لين خيطها وعفس ع رجلها وهي ماشافتاش لانها ماكانتش تشبح قدامها..
مروة بوجع:اااي..
هو التفت طول وقال:اسف جدا يااختي سامحيني..
هي قامت عيونها جو فعيونه..
جمدت في مكانها مش مستوعبه هي في من تشوف توا قدامها..
اما هو للحظه نسي نفسه بسبب عيونها اللي شكلهم ولونهم توهوه..
لكن فيسع مااستاقظ نزل عيونه وقال :اسف جدا..
ومشي من حداها وهو عاقد حواجبه وابتسامته بتغلبه وهو يقول:ياربي لاتؤاخذني استغفر الله واتوب اليه..
اما هي كملت طريقها تمشي وهي مبتسمه بصدمه وتقول في نفسها..
"هو ياربي هو يوسف والله يوسف..ع الطبيعه احلى مليون مرة..وقداش يجنن عليه العربي.."
بعدين استاقظت وقالت:احمم..هدا غير جايه تقري فالدراسات الإسلاميه يامروة..استغفر الله العظيم..استغفر الله..
ورمشت عيونها بسرعه ومشت بطريقها للقاعات....

....يتبع...