"إلا أن يشاء الله"

الجزء الثاني عشر

✒..
خش للحوش يجري..
ركب الدروج بسرعه..
وصل الدور التاني ومشي طول لدار امه..خشلها وقعد يدور في دواليبها وفي ادراجها..
هو يدور ودموعه ينزلوا ويمسح فيهم..
لعند ماعثر ع ملف طبي يخص امه..
خدي نفس عميق..غمض عيونه بشده بعدين فتحهم وفتح الملف...
وبدي يقرا..
وبإعتباره في الأصل كان طبيب فاللي يقرا فيه يفهم فيه كويس..
وكان كل مايقرا حاجه ويفهمها يزيد ينصدم اكثر واكثر وقلبه يتقطع اجزاء مجزئة..
كيف امه ليها الفتره هادي كلها تعاني وهو مش حاس عليها!؟
اكيد بان في وجهها في ملامحها..
بس هو انشغل بهمومه وماشافش غير حزنه هو وتعبه..
كلهم انشغلوا بأحوالهم ونسوها..وماانتبهوش لحالتها..لوهنها وتعبها..وملامح المرض اللي كانت باينه ع وجهها..
اللي ممكن انهم لاحظوها بس فسروها ع انها ملامح حزن لاأكثر..
صكر الملف..واتكى بإيديه ع الزيانه اللي قدامه من قوة الصدمه..وهو يشوف للفراغ ويفكر ودموعه ينهمروا انهمار مش قادر يصدق..
امه ليها وقت تعاني في الخبيث بروحها وباديه تاخد في العلاج بروحها وهما مش عارفين!؟
قام عيونه وشبح للمرايه..
نظرة لنفسه كانت جدا قاسيه..
كان يأنب فيها بأبشع الصفات..ويمكن ابشع صفه تطلق ع الإنسان...."عاق"...
وهو توا شايف نفسه ابن عاق..
تنهد بحرقه...بعدين مشي بسرعه طلع من الدار وهو يرشف ويمسح في دموعه بذراعه...
🌻بلغ خواته كلهم بحالة امهم..
لما اجتمع بيهم..كانوا كلهم في حال يرثى لها..وهو قعد يأنب في نفسه وفيهم ماخلا ماقاللهم وقال لنفسه من كلام كان جدا قاسي..واعر لأبعد حد..
وهما يسمعوا ويزيدوا يتألموا وعبراتهم يزيد يعلى صوتها..
وفي هالوقت..
كانت امهم راقده من التعب ومش حاسه بأي شيء..
⚘⚘⚘⚘⚘
التعب الجسدي..
التعب النفسي..
كل منهم مؤدي للأخر..
ودعاء توا تعاني في تعب نفسي لايوصف..ومشكلتها انها مش قادره تشكي لحد والأسوأ من هكي انها قاعده تظاهر بالعكس..
وتظاهرها بالراحه هدا كان اكبر غلط تغلطه في حق نفسها.
لأنها هكي توصل في رسايل للمحيطين بيها ان امورها كلها تمام ووضعها كويس ومافيش خير منها..
للأسف..
ماتقدرش ادير غير هكي..
فسخ الخطوبه في التخوف منه يشبه التخوف من الطلاق وان كان بنسبه أقل..
بس البنت لما تفسخ الخطوبه ينحط تحتها خط..
ولما تطلق ينحط تحتها ألف خط..
ماهو حني عندنا ان الغلط في المرأة في كل الحالات..
ولهالسبب كانت مجبورة تتحمل وتسكت وتكمل المهم تفتك من كلام الناس ونظرتهم المتخلفه حتى لو ع حساب نفسها وصحتها..
آه بس لو المرأة تولي اشجع واجرأ وأقوى طالما انها مش ع غلط معاش تفكر ترضي الناس والمجتمع..لأن المجتمع اساسا مجتمع مريض وتاعب محاوله ارضائهم ضرب من الحماقه..
دعاء..
هو مش مجتمع بس راهو..نقطة الضغط الأقوي هي الاهل بالذات الأم يعني في الأمور هادي تولي حساسه هلبه وتفكر في مصلحة بنتها بطريقه غلط..هي تشوف ان لو بنتها فسخت او اطلقت خلاص ولت عايبه والناس بتدوي عليها وفرصها حتقل وممكن تنعدم..وكذلك حيعيبوا عليها هي كيف بنتك تفسخ من غير سبب مقنع..كيف تطلق هكي طول بدون سبب قوي..ع اعتبار ان الاسباب القويه عندهم انه يكون مدمن مخدرات او قاتل مأجور او خانب يعني..
..اني كل خوفي كان من امي وع أمي في نفس وكنت نبي نتحمل ع خاطرها...
🗝في هداكا الأسبوع كان عندهم عرس بنت خالتهم اللي انخطبت من قبل اكثر من عام وحضروا بيانها..
كانوا وقتها خواتها يوتوا في ارواحهم وهما متحمسات لكن هي كانت تتصنع في الحماس...
كانت تلبس وتمكيج ودير في تسريحات حلوة لشعرها بإعتبارها العروس المنتظرة..
كانت تكذب ع روحها وخلاص..
دعاء..
بس كنت واني نشوف في بنت خالتي كيف فرحانه في عرسها قلبي ينغم..البنت فرحتها تتنطر من عيونها...كنت نسأل في نفسي وين نشوفها هكي..يعني اني حنكون فرحانه هكي!؟
ولا يوم انقرت الفاتحه..دمعوا عيوني مش لأني تأثرت وين شفت دموع فرحتها لا..اني دمعت من الألم اللي كنت نحس بيه في وسط قلبي..ويزيد صدري ينغم اكثر واكثر لما يقولوا " حتى انتي قربت يادعاء"
كنت نبتسم بالكذب قدامهم ومن داخلي نصرخ
"معاش نبي ياناس مش مرتاحه معاه مش هدا اللي نبي نكمل حياتي معاه..مانبيشي مانبيش"
🗝وجي يوم الحفله..
وطلعت بنت خالتها عروس جدا جميله وتبان سعيده وفرحانه بالذات وين خش عريسها..يبان الانسجام يبان القبول واضحه الفرحه والراحه اللي هي مش حاسة حتى ربعهم...
بعد روحوا..
قعدوا خواتها يهدرزوا ع الحفله وهي تسمع وخلاص..
رويدا:مش قنين هلبه حسيتهم مش طالعين على بعض..
مروة:اني حسيتهم منسجمين مع بعض..
دعاء:المهم مرتاحه معاه ومقتنعه بيه هدا اهم من كل شي.
وناضت مشت طلعت من حداهم..
رويدا بضيق:حاسه ان دعاء مش مرتاحه بكل ولاكأن عرسها قريب..
مروة بضيق:يعني بعد كل اللي صار تبيها ترتاح!؟ عارفه روحها كيف حتعيش..
رويدا:الله غالب هدا نصيبها ترضى بيها وخلاص..
مروة شبحت لرويدا شويه..بعدين غيرت عيونها عنها وسرحت وهي حزينه ع حال اختها..
⚘⚘⚘⚘⚘
يوم السبت..
في المطار..
"والله غير تعب في روحك ياولدي"
جمال وهو ضامها ليه وهما مقعمزين في صالة الإنتظار:ماما عمري..بالله عليك خلي عندك ايمان وثقة انك حتشفي بإذن الله..كلهم قالولي في الأردن علاج الأمراض هادي ممتاز هلبه ناس عالجوا غادي ورب العالمين شفاهم تماما..حتى انتي بإذن الواحد الاحد حتتعالجي وتشفي..
صابرين:ياماما اني نبرا لما نحضر عرسك انت ونطمن ع وخيتك رجاء..هكي بس نبرا..
باس راسها وقال:حنروحوا ان شاء الله وتحضري فرح رجاء..
صابرين قامت راسها وشبحتله وقالت:وانت؟
قعد يشبحلها شويه بعدين قرب طبع قبله طويله ع جبهتها بعدين بعد وقال:اني نبي نقعد تحت رجليك لين تشفي ان شاء الله نبي فرحتي تولي فرحتين..
صابرين:جمال..
قاطعها وضمها وهو يقول:امي خلاص بالله عليك معاش تزيدي تناقشني في الموضوع هدا..اني مانبي شي غيرك انتي امي..انتي وبس..
غمضت صابرين عيونها بألم وقعدت ساكته..
شويه سمعوا صوت نداء الرحله..
نوضها وناض معاها وقعد يمشي هو وياها بالشناطي وامه في حضنه ماخلاهاش بكل..
حتى فالطياره خلاها تتكى ع كتفه وترقد وهو ماقدرش يرقد لحظه من خوفه الشديد عليها...
🌻في الوقت اللي فيه خواته كانوا في قمة الخوف على امهم...كل وحده فيهم انست نفسها وكل اللي حواليها وبدي تفكيرها بس في امها..وباهي اللي طاحوا في رجاله ولاد اصل راعو حالتهم..
ومسكينه رجاء اللي قعدت مع عمها الصغير هي وصغارها فرحتها بزواجها راحت مجرد ماعرفت باللي صار لأمها خافت تعيش الفقد للمرة الثالته..
بعد ماعاشاته قبل مرتين في بوها وزوجها السابق..
⚘⚘⚘⚘⚘
جامعة طرابلس..قاطع ب..
كلية الدراسات الإسلاميه...
كانت مقعمزة في القاعه وتقرا في منشور لأحد الدعاة ع الفيس..
تراجي امتى يخش الاستاذ بش تاخد اول محاضرة في وحده من المواد..
وفي عز انسجامها..استاقظت لما سمعت صوت جدا مميز يقول
"سلام الله عليكم ورحمته وبركاته"
قامت عيونها وشبحت لمصدر الصوت..
توسعوا عيونها اللي لمعوا وهي تشوف للأستاذ متاع الماده اللي الباين عليها حتكون افضل المواد عندها...
الطلبه كلهم ردوا السلام اماهي قعدت تابته ع لقطه تشبحله وخلاص..
يوسف حط الشنطه ع الطاوله ومرر نظره عليهم بسرعه ماانتبهلهاش وقال؛مستحيل يكون هدا عددكم كامل لكن الباين من الاول حنبدا ناخد في الحضور والغياب..
ضم شواربه لداخل وهو يوزع في نظره عليهم ويهز في راسه..
بعدين شبح لشنطته وطلع منها ورقه وحطها قدامه وقال:تسجيل الحضور مهم جدا عندي ومن اليوم حناخده..
الطلبه قعدوا يشبحوله بريبه وخافوا منه..
ليكون مظهره عكس داخله تماما..
ومروة اولهم...
يوسف:عمران عبدالقادر وينه؟
الطالب رفع يده..
قعد يشبحله يوسف لثواني..بعدين حط قدام اسمه علامة صح"✅"..
وقعد يسمي في الاسماء ومروة تراقب فيه وفي نظراته واسلوبه حست انها كانت راسمتله صورة عكس حقيقته بالمره..
يبان متكبر شويه وتعامله حاد شويه..
وهكي..
لعند ماوصل في إسمها..
"مروة محمد احمد"
قامت يدها وقالت بثقه:حاضرة..
هو شبحلها للحظات..بعدين حط قدام اسمها علامه صح..
وكانت اخر الموجودين في القائمه..
حط البيرو ع تركينه ورجع شافلهم..
رسم ع وجهه ابتسامه وقال:تمام..بسم الله.. والحمد لله..والصلاة والسلام على الرسول..معاكم يوسف محمد الشيخ..استاذ محاضر في مادة ****..اني جاد في وقت الجد ومزوح وجوي مليح زي مايقولوا في وقت الضحك..
اني هني مانحبش نعلم باسلوب التلقين بالعكس..نحب ناقشكم وتناقشوني ويا تقنعوني يانقنعكم..يامرات مانقنعوش بعض المهم..ننهوا النقاش وحني محترمين وجهات نظر بعض وتوجهات بعض..
كان في طلبه يشبحوله بنظرات حاده..عارفينه كويس وعارفين افكاره وهما ضدها وناويين خلال هالفصل يكرهوه يعطي في الكلية..يبوه يسيب ويطفش ومش غير هو بس هلبه زيه..
واستمر يوسف يتكلم ومروة تسمعله بإنتباه..
ومنبهره بأسلوبه اللي طلع هو نفسه اسلوبه ع صفحته في الفيس..
وهو كان يمرر في نظره ع الشباب ويتجنب يشوف للبنات..
لهدا مروة واخده راحتها وهي تتفرج عليه..
..........
"مصح فنزوزتك ياحماره هدا غير  تقري في الدين ولابسه لبس شرعي"
مروة بضحكه:استغفر الله مش قصدي بس يعني والله ماشاء الله عليه..
رويدا بإبتسامه:باهي يعني وهو شني؟
مروة:شن هو شني؟! الراجل شيخ شن تبيه يدير يعني اصلا طول المحاضره ماشبحش جهة البنات بكل..
رويدا:لالامشروعك فاشل وخيتي..
مروة:والله اني طالباته من ربي لو ليا فيه نصيب حيعطهولي مانيش مدايرة ولا حاجه غلط..
رويدا بتهكم:باهي ياشيخه مروة..
تنهدت مروة بإبتسامه وقالت:يارب نولي شيخه حتى اني..
ابتسمت دعاء اللي كانت مكتفيه بالإستماع بس..
قطع عليهم حديثهم كلام وفاق اللي كانت تقرا وهي تقول:تعرفوا كان مانخشش طب ننجلط..
مروة شبحتلها وقالت:ماترهقيش روحك وفاق مش باهي ليك..
رويدا:بإذن الله حتخشيلها كان ماخشيتهاش انتي من يخشها مالا..
وفاق بإبتسامه:يارب..
ع خشة جميله..
وقفت حدا الباب وقالت:دعاء خطيبك ماقالك شي ع الموسم؟
دعاء بضجر:بالله ياماما فكيني ترا..بيجيبوا باهي مش جايبين لاجعلهم جابوا..
شبحولها خواتها بضيق..
وامها تنهدت ولفت طلعت من حداهم..
رويدا:خيرك دعاء؟
دعاء ناضت وهي تقول:ماخيرني شي يارويدا..
ومشت طلعت من حداهم..
شبحوا البنات لبعض شويه بعدين اللي هادي لهت بحاجه وهما مازال يفكروا في حال اختهم..
دعاء..
مر عليا الاسبوع اللي قبل العيد الكبير واني نصلي الإستخاره في كل وقت وندعي من قلبي..
ونراجي ربي يفرجها من عنده..
🗝خلال هالأسبوع تزوجت صاحبتها ريم وحضروا عرسها امال واماني اللي علقوا هلبه ع حفلتها ع كلامهم ماكانتش حلوة هلبه وريم انظلمت بمكياجها وتسريحتها..
كلامهم ممكن يكون كلام حد حاسد او ممكن يكون صح وريم ماحالفهاش الحظ في حفلة زواجها وهكي كانت تفكر دعاء وهي تسمع فيهم..
ومن جهة تانيه كانت تشوف لحال آيات اللي تغير لبست الملاية الشرعيه وخشت الجامع بش تحفظ القرآن وولت انسانه تانيه..زادت سماحه في الاخلاق اكثر من قبل وقاعده محافظه ع علاقتها بيهم وتنصح فيهم غالبا..
لهدا حبت دعاء تستشيرها..
🌸آيات:مادامه هكي يادعاء خليه..واي شي حيصير بعد تسيبيه حياخد وقته ويعدي صدقيني المهم انتي تنجي بنفسك يادعاء..
دعاء بقلق:هكي رايك..
آيات:ايه..ماتغلطيش غلطة تسنيم اللي تزوجت ولد خالها بش مايفوتش عليها القطار زي مايقولوا واهي تعاني..راجل شبه عاطل عن الخدمه وهي اللي تصرف عليه..
تنهدت دعاء بضيق..وقعدت ساكته وتفكر في كلام صاحبتها..
اليوم كله..
لعند ماليل الليل وخداها النوم ورقدت..
❄تلم في حاجاتها بش بتمشي للكليه وزي ماتعودت كل صبح تفتح الدرج متاعها اطلع منه الدبله بس تلبسها...
قبل لتفتحه سمعت صوت يقوللها..
"هادي معاش بتلبسيها"
وقعد يتكرر هالصوت وهي خافت منه..وفتحت الدرج وخدت باكوا فتحاته بش اطلعها..
انصدمت لما لقاته تل مصدي ملفوف ع هيئة خاتم..
⚡فتحت عيونها..
شبحت لروشن الدار لقت ضي النهار طالع...
غيرت عيونها للدرج..
ناضت من مكانها ومشتله طول فتحاته.
طلعت باكو الدبله فتحاته ولقت الدبله قاعده في مكانها..
تنهدت بخوف وهي تفكر في الحلم اللي شافاته..
"خيرك دعاء؟"
شبحت دعاء لمروة وقالت:هيا نوضي ونوضيهم..
وردت الباكو لمكانه وصكرت الدرج وناضت طلعت من الدار ومروة بعيونها معاها...
🌻🌻🌻🌻🌻
يتمشى هو وياها في ساعات الصباح المبكره..
شد يدها بحنان وقوة ويتمنى يقعد عمره كله شادها ومايطلقهاش بكل..
صابرين:جمال..
جمال:روحه..
صابرين بإبتسامه:حبيبي روح بيا خلاص حالي ولى باهي والدوا نقدر ناخده حتى غادي.
جمال:علاش تبي تروحي مش عارف!؟ ماعندك علاش مروحه..
صابرين:لا عندي..وخيتك رجاء نبي موالها يتم وحتى انت تم موالك معاها..
جمال:خلينا في رجاء توا..
صابرين وقفت وقالت:علاش تحب تعبني ياوليدي قول؟
حط يده ع خدها وقال:توا اني نحب نتعبك ياغلاي؟! الله يسامحك..
خدت يده وحضنتها بإيديها وقالت:ولدي اني نطمن عليك نبي نفرح بيك راك ولدي الوحيد نبي نشوف صغارك..
جمال قام يدها وباسها وقال:يام توا مانبي شي يلهيني عنك اني من غير زواج مااستاقظش بمرضك يابال لو كنت متزوج..لالا امي الموضوع هدا اني معاش نبيه توا لين يولي حالك باهي..
صابرين بضيق:حالي باهي..
ابتسم وضمها ليه بعدين قال:باهي خل نطمنوا ع رجاء وصغارها وبعدين ساهل..
صابرين تنهدت وقعدت اطبطب ع ظهره وهي ساكته..
⚘⚘⚘⚘⚘⚘
"مانقدرش نخليها ياعمي"
العم:امك نص دواها زواجك انتي يارجاء راهو تخمم فيك هلبه..لو تزوجتي وفرحتي قلبها حتريحي نفسيتها وهدا يساعد في علاجها..
رجاء قعدت ساكته وهي تفكر في كلام عمها..
العم:توكلي ع الله يابنتي وشوفي نصيبك..
شبحتله رجاء بعدين ابتسمت بألم..
🌻🌻🌻🌻
وروح جمال بأمه بش يحضروا عيد الأضحى في ليبيا وفي نفس الوقت يتموا موضوع زواج رجاء..
وجي العيد..
وعدوا منه تلاته ايام..
في اليوم الرابع جو اهل اسامه وحدد موعد الزواج في اواخر شهر 12..
وصابرين فرحت هلبه اللي واخيرا حتتريح ع رجاء..
ورجاء وخواتها وخوهم مش قادرين يرتاحوا ولايطمنوا ع حال امهم وهما عارفين وضع مرضها..
🥀في مكان تاني...
اهل اسعد ماعبروش اهل دعاء بشي لاموسم ولاغيره..
ودعاء فهالعيد فاتتهم مابتش تتصل وتعيد..
وامها كانت مضايقه منها هلبه وخايفه ع الآخر..
لعند ماجي رابع يوم العيد..واللي خافت منه صار..
جي اسعد ومعاه ولد عمه لحوش اهل دعاء..
كان محمد يحاسبه جاي يعيد بس كان في غرض تاني..
أسعد:اني ياعمي ماندورش في معاملتها ليا ولااي شي يصير بينها وبين خواتي ان شاء الله تتعارك هي وياهم بالبوني لكن لعند امي وستوب..امي خط احمر مفروض اطلعها برا هالدوشه هادي كلها..امي والله تعزها وتحبها وحزت في نفسها كيف مااتصلتش وعيدت عليها..
وهو يتكلم ومحمد يسمع ومش طايقه...حسه مايمشيش براسه وان النساوين يحركوا فيه..
محمد يراقب في كل شي وعارف كل شي بس ماباش يدخل لين دعاء تسمحله لان هالقرار يخصها بروحها..
...........
في الكوجينه..
جميله بعصبيه:بنتك بتخرب ع روحها..
محمد:ريت هالعمار اللي بتخربه..
جميله:قصدك عاجبك اللي دير فيه!؟
محمد:اني بنمشي نسألها..
ومشي طلع وجميله لحقاته..
🥀في نفس الوقت..
في دار البنات..
رويدا بعصبيه:ياغبيه انتي هكي بتشمتي الحقراء فيك وفي ماما واولهم شرقيه هدا اليوم اللي تراجي فيه..
دعاء بإنفعال:مادخلي بحد اني مادخلي بحد اني مانيش مستريحه معاه ياناس افهموا معاش نبيه خلاص..
ع خشة محمد ومعاه جميله..
محمد:من الاخير هدا اخر كلام عندك؟
دعاء شبحت لبوها..
وامها وخواتها يشوفولها ويراجو في ردها..
دعاء بحزم:ايه يابابا معاش نبي..
شبحولها جميله ورويدا بغضب..
اما مروة ووفاق قعدوا يشبحولها بحزن..
محمد:تمام خلاص..
ومشي طلع..
جميله:خايبه حمارة ياشماتتهم فيك..
ومشت طلعت..
رويدا:تي والله حتندمي اشد الندم..
ومشت طلعت..
ووفاق ومروة طلعوا وراها..
اما دعاء انهدت قعمزت ع الفراش وحطت ايديها ع وجهها وقعدت تبكي بالعبره وهي تقول..
"حسوا بيا..حرام عليكم"..
⚘وفي هديكا الليله انتشر الخبر في العيله طول..
لان محمد حكي لشرقيه وشرقيه نشرتها فالدنيا كلها وكانت في قمة السعاده..
لدرجة ان مؤيد لما خش عليها جايب معاه حاجات تبيهم لقاها تغني وطاربه..زبط خيرها..
.........
"خزي ع اختك الحماره الراجل والله باهي وطيب لكن هي طيحت سعد روحها"
مؤيد بغضب:تحسابه ساهل تنخطب وتسيب قبل العرس بشهر تحسابه ساهل.
جميله:ياما بيطلع من دوة توا..
رويدا:الغبيه ضيعت روحها..
دعاء..
كلهم خدوا مني موقف..امي..رويدا..مؤيد...بس اني كان مقويني موقف بابا وقتها..
لهدا تاني يوم طول مع الظهر اتصلت بأسعد..مش حننسى نبرة صوته لما رد عليا..كان نبرة مرتعشه..
"آلو"
دعاء:اممم..جاي تشكي وتبكي لبابا مني تحساب روحك بتكسب حاجه باللي درته..تعال توا ارفع حاجاتك اللي بيني وبينك تم خلاص..
اسعد بإنفعال:ياسلام..نجي ونص..
وصكر في وجهها..
هي طول ناضت وخدت حاجاتهم وطلعتها برا وخشت داخل..
لما فاتت من حدا امها قالت جميله:طايحة سعد من يوم يومك والله لما تندمي..
طنشت امها ومشت خشت الدار..
طلعت رويدا طول مجرد ماخشت دعاء..
دعاء..
مافهمتش شن هي الجريمه اللي درتها بش خدوا مني هالموقف المشكله حتى بعد حكيت وقلت كل شي ماعطونيش عذر وقالولي هدا نصيبك مفروض رضيتي بيه..
اااخ وخلاص..
🗝وجي اسعد درس قدام الحوش..
نزل طق الباب..
طلعله مؤيد بالحاجات..
اسعد ودموعه في عيونه:تو غدوة تندموا انكم فرطتوا في راجل ينشرى بالذهب..
وحط الحاجات في الكوفني وركب سيارته ومشي..
وخلا مؤيد ينحرق بنار الغضب..
خش داخل طول...
ومشي وين مافي اخته وقال:كان الحكومه فيدي العبيتر هدا ماخليته يصير..
جميله قعدت اطلع فيه وهي تقول:خليها خليها تو تولي لهاليوم وتذكره وهي تبكي وتقول ياريتني..
مؤيد:خززيي..
ومشي وجميله وراه..
ودعاء تبكي بقهره ع موقفهم اللي خدوه منها وكأنها دارت كبيره من الكبائر..
دعاء..
جت في نفس اليوم خالتي رقيه هي وبنتها بش تقصقص وتفرح ان بنات جميله ماخدوش قبل بنتها اللي قعدت..
وشرقيه كذلك جت تجري..
هي كانت مؤيده ليا بقوة...
وخالتي لما حكيتلها ع اسبابي جت معاي يعني مانعرفش كان ع خاطري ولابلعاني في ماما..
ممكن ماما يومها كرهتني بمعنى الكلمه..
🗝بعد روحوا خالتها وشرقيه صارت بينها وبين امها مشكله كبيره..
حزها محمد اللي قال:خلاص البنت قررت واختارت نصيبها مش فيه ياجميله بعدين حتى هما راهم مش لينا بكل واني ماقبلتش الا لما لقيتها هي تبي..وتوا هي معاش تبي يعني خلاص..
جميله بعصبيه:وانت اقعد ع كيفها ودير ماتبي لين اضحك عليك الناس!
دعاء بصدمه:ماما!؟
جميله؛لا امك ولانعرفك من اليوم وبرا غادي لاعاد تكلميني ولاتجي من ركني..
ومشت من حداهم وخشت لدار النوم..
اما محمد مشي طلع من الحوش..
وخلوا دعاء بروحها مصدومه ومش مستوعبه هي شن دارت بش تكون ردة فعل امها قويه لهالحد!؟
دعاء..
ممكن امي وقتها فكرت في الامور بنظرة تانيه بعدين فهمتها..وكذلك انقهرت من شماتة الأقربين فيها وفيا..
وزي ماأني ماكنتش فاهمه امي..امي ماقدرتش تفهمني وقتها...
⚘⚘⚘⚘⚘
شهر ديسمبر 2013..
"يامبروك ع الحبيب سجلناها في الكتيب"
المقطع هدا كان بأصوات اهل احمد خطيب ازدهار اللي ولى في هاليوم راجلها بعد انقرت الفاتحه..
انقرت فاتحه ازدهار قبل العرس بش يتملها احمد اجرائتها برا..
وكانت قراية فاتحه وبيان في مرة وحده..
وكان كبير...طلعت فيه ازدهار جميله جدا..
بس اللي صار وقتها...ان ليلى عزمت الكل ماعدا عيلة محمد وسلافها التانيين بحجة انها تبي ادير عائلي بس برغم انها عزمت حتى صاحباتها ع البيان..
واللي انفهم من هالحركه وقتها ان ليلى خايفه من عين جميله وبناتها بالذات بعد اللي صار في موضوع دعاء..
قداش انقهرت جميله وقتها وزادت قست قلبها ع دعاء وقعدت مقاطعتها ومعاها رويدا ومؤيد..
🌸🌸🌸
في نفس الوقت..
دارو عرس رجاء..
كان يوم واحد فالصاله لبست فيه فيلو لسبب واحد لأن راجلها اول مرة يتزوج ع خاطره لبست الفيلو..
وطلعت آيه من الجمال..
خواتها فرحولها وحرصوا يظهروا كل مظاهر الفرح والبهجه ع خاطر امهم بالدرجه الأولى...
⚘⚘⚘⚘⚘⚘
الساعه الواحده ليلا.
في دار صابرين..
صابرين:هي توا فكر في روحك جمال..
جمال وهو واخدها في حضنه ابتسم وقال:حاضر اللي تبيه نديره..
صابرين؛مش اللي اني نبيه..اللي انت تبيه جمال انت اللي بتتزوج ياولدي مش اني..
تنهد وقال:اللي تبيه انتي اني نبيه..
صابرين ابتسمت وقالت:اني نبيك تعيش مرتاح مع بنت حلال تفرح قلبك وتهنيك وتجيب منها صغار يكونوا زيك انت يبروك انت وامهم كيف مابريتنا اني وبوك الله يرحمه...
جمال نزلت من عينه دمعه وهو مبتسم وقال:ان شاء الله يام إن شاء الله...
غمضت صابرين عيونها وهي تقول:يارب ياولدي..يارب...يارب..
وبدي النوم يسيطر عليها لين رقدت...
هو رقدها بهدوء ع مخدتها..
ونزل من ع السرير ورقد ع الفراش اللي مفرشه جنبها..
⚘⚘⚘⚘⚘
تاني يوم..
كانت دعاء واقفه برا تراجي في مروة ورويدا..
ع جية شرقيه اللي بيوصلها محمد للمدرسة ع طريقه..
شرقيه:صباح الخير شن جو..
دعاء:صباح النور..شن جوك انتي..
شرقيه:مدقدقه تعبنا امبارح في بيان ازدهار..
دعاء:جي قنين؟
شرقيه:قنين!..تي قولي اسطوري..
طلعت تليفونها وقالت:تعالي شوفي..
وقربت دعاء وقعدت تتفرج ع الصور..
ع جية البنات صبحوا عليها وقعدوا يتفرجوا معاهم..
دعاء..
كان شي لايوصف قمة فالفخامه نذكر بيان امل كان اسطوري حتى هو ع قولة شقشق..لكن بيان ازدهار فاته غادي في كل شي..
شرقيه:تعرفوا قداش عطوهم فيها..16الف دينار..
البنات انصدموا..
شرقيه:والكسوة بيجبوها هما..
دعاء:شكلهم ناس مرتاحه هلبه..
شرقيه:من يوم يومهم..بالله هدا اللي يقول عطيت بنتي..
رويدا شبحتلها من فوق لتحت..
اما دعاء ومروة قعدوا سرحانات يفكروا في كلام عمتهم..
ع طلعة محمد..
لبس كندرته وهو يقول:هي بروا اركبوا..
شرقيه:هيا هي...ومشوا مع بعض ركبوا السيارة..
⚘⚘⚘⚘⚘
خش للدار بعد ماكان برا الحوش في الجامع يصلي..
لقاها بملاية الصلاة راقده ع السرير..
ابتسم وجاها:ماما..حبيبتي..امي..
مافيش رد..
طبس عليها بيبوس راسها بش ينوضها..
لما مس جبهتها لقاها مصقعة هلبه...
قلبه قريب وقف قال:ماما امي..قعمز حداها بهده وقلبه يدق بسرعة رهيبه..امي بالله عليك لا..امي..امي..ماما..
وبالنبرة باكيه قعد يردد ويقول..
"ماما..ماما"..
وجاها ضمها ورفعها في حضنه وطلع بيها يجري وهو يقول
"ماما"..
وللأسف..
وصل للعياده متأخر جدا..
الأمانه استلمها صاحبها من وقت..
وماتت صابرين وخلت جمال وحيد فهالدنيا..تعيس..حزين...مكسور...

...يتبع...
سامحوني ع التاخير كنت تعبانه اليوم..