"إلا أن يشاء الله"

الجزء الحادي عشر "القسم الاول"

✒..
اليوم التالي..
كان يوم الجمعه..
روحوا خوات جميله كلهم من الصبح..وبدوا البنات مع امهم ينكتوا في الحوش ويضموا..
ودعاء كانت تتحرك وهي تفكر...ومازال شاغل بالها موضوع الرقم...وفي نفسها قلق ماعرفتش علاش ماحستش بيه الا توا..
بعد كملوا حوستهم..
اللي هادي دوشت..وطلعت لبست ملايتها وخدت المصحف وقعمزت تقرا في سورة الكهف..
اما امهم فخشت حطت طنجرة الغدي ع النار..دارت مبكبكه ماخاطرها ادير شي تاني بعد تعب وحوسة امس واليوم..
وحتى هي بعد كملت مشت دوشت بعدين طلعت لبست ملايتها وخدت المصحف وقعمزت تقرا في سورة الكهف...
⚘⚘⚘⚘
حط من عطره المميز..
وساوا شعره بعدين مشي طلع من الدار للدروج..
حط يده في جيب السوريه العربيه ونزل...
وصل لوطا قابلاته امه وهي قايمه في غمرها بنية آلاء..
ابتسم جمال وقرصها قرصة خفيفه من خدها وقال:شن الغدي يام؟
صابرين بإبتسامه:بازين داراته نجلا..
جمال:مليح بكل..هي اني طالع للجامع..قرب باس راسها..
بعدين مشي طول للباب وهي معاه بعيونها لين طلع من الحوش..
ومشت طول لدار المعيشه وين مابناتها مجتمعات..
وقفت في نص الدار وقالت:ماتروحوش اليوم الا وهو مقتنع..
نجلاء تنهدت بضيق وقالت:والله ياماما اني خايفه لو اصرينا عليه يقولي نبي نولي لمنال ويعرف وقتها ان منال انخطبت..
صابرين:لالا منال حولها من راسه خلاص..اني مرة كذبت عليه وقتله انخطبت قالي ربي يهنيها..
عطاء:خلاص ماما بإذن الله اليوم مش مروحين لين نقنعوه..
هزت صابرين راسها وبان ع وجهها ملامح القلق..
⚘⚘⚘⚘⚘
الساعه 2:30بعد الظهر
مقعمزين يتغدوا في الدار ويهدرزوا ع اللي صار في البيان..
جميله:جتني ياحنه فالجنان ونزلت في رويدا ماخلت ماقالت عليها..
رويدا وهي تاكل:طز..فيها..
مروة:هي كانت تبي تنكد علينا وخلاص..
جميله:ربي يرد كيدها في نحرها..
ودعاء تسمع وتاكل بس..زي وفاق..
فجأة رن تليفون دعاء..استغربت..
طلعاته من جيب التوته وشافت المتصل كان رقم غريب حطت في بالها طول انه رقم اسعد..
جميله:منو؟
دعاء:رقم غريب..
ابتسموا خواتها..
رويدا:مرات هو نوضي ردي..
توترت دعاء وناضت وهي تضحك ومشت طلعت من حداهم للدار التانيه..
والبنات يشوفوا لامهم وهما مبتسمات لقوها تاكل وتضحك..
في الدار التانيه..
فتحت دعاء الخط بدون ماتتكلم..
"ايوه السلام عليكم دعاء"
استغربت لما سمعت صوت بنت وقالت:ايه تفضلي!
"معاك اسمهان اخت طارق"
دعاء بصدمه:اها..اهلا كيف الحال..
اسمهان:سامحيني اتصلت بيك في وقت زي هدا.. ماقدرتش نعطل اكثر ..اول شي كيف حالك وحال العيله..
دعاء بإستغراب:الحمد لله..كيف حالك انتي وحال العيله..
اسمهان:الحمد لله..شن جو القرايه قريب تتخرجي ولا؟
دعاء:لا مازال بالمشروع عام ونص..
اسمهان:اها باهي بالتوفيق...دعاء بنقولك...والله مش عارفه كيف بنفتح معاك الموضوع..قصدي..يعني لو فيها كيف نبوا ناخدوا منكم موعد بش تجيكم العيله ونخطبوك لخوي طارق.
ارتسمت ع وجه دعاء ابتسامه نصر بعدين قالت بضحكه:اسمهان..امس كان بياني راهو..
اسمهان بأسف ممزوج بشي من العصبيه:والله قلتها هادي ماتقعدش..انتي ماتقعديش..يللا الله غالب كله قسمه ونصيب..
دعاء وهي مبتسمه بنصر:ايه نصيبات..
اسمهان تنهدت وقالت:مالا سامحيني ع الإزعاج ومبروك عليك وربي يهنيك ويسعدك..
دعاء:تسلمي..بالسلامه..
اسمهان:بالسلامه..
وصكرت دعاء..
بعدين رفعت راسها فوق وقالت..
"انت ديما تجبر فيا ياربي ديما..الحمد لله"
دعاء..
ايه كنت نحس ان الله سبحانه ياخدلي في حقي ويجبر فيا..زي لما شافني رشاد واقفه ع طارق..وبعده اتصال اسمهان  هدا...
الكسره اللي في قلبي من يوم سمعت سبب تراجعه عن خطبتي انجبرت هداكا اليوم..
حبيبي ربي سبحانه كم مرة انكسرت خواطرنا وجبرها احلى جبر..
🗝طلعت دعاء من الدار وهي فرحانه..
وخشت للدار اللي فيها امها وخواتها..
لما شافوا الفرحه باينه في وجهها تأكدوا انها كانت تكلم في اسعد..
قعمزت وقالتلهم:كان نقوللكم من طلع متصل بيا...
هما استغربوا..
جميله:نحسابوه أسعد حني..
دعاء بضحكه:لالا..اسمهان اخت طارق هداكا اللي قال صليت استخاره وماأرتحتش..
كلهم اتفاجئوا..
رويدا:شن تبي؟!
دعاء ضحكت وقالت:تبي تاخد موعد بش يجوا اهلها ويخطبوني لحضرته..
مروه:حييي ع الجو!
وفاق بتهكم:وشن صار في استخارته!؟
ضحكوا..
جميله بضحكه:وانتي شن قلتيلها!؟
دعاء بضحكه:قتلها بياني امس..
ضحكوا..
رويدا:يمشي جدري يجدريه..
جميله:التافه واضح ان في سبب تاني
دعاء:حتى اني كنت حاسه واضح اني ماعجبتاش هلبه دور دور بعدين ولالي يحسابني قاعده نراجي فيه..لكن تعرفوا حسيت اسمهان عصبت لما عرفت اني انخطبت قالت بصوت عالي وكأنها تسمع في حد حداها..قتلهم ماتقعدش..
جميله:يللا..المهم ربك عوضك باللي خير منه..شافك وعجبتيه وبعتلك اماليه..
دعاء...
مش عارفه علاش مافرحتنيش كلمة ماما وقتها..ومش عارفه علاش شعور القلق بدي ملازمني هلبه..
قعدت نقول في قلبي..ان شاء الله خير...
⚘⚘⚘⚘
الساعه 6:00عصرا..
في الجنان مقعمزين يهدرزوا وحداهم الصغار يلعبوا..
وهو ع رجله مقعمزة بنت اخته آلاء ويقول:ايااه علينا عاد الموضوع هدا امتى تصكروه ومعاش تفتحوه بكل؟!
نجلاء:كيف معاش نفتحوه!؟تعرف قداش عمرك توا..
قلب عيونه بملل وتأفف..
عطاء:مايجيش هكي ياجمال انت خونا الوحيد يعني الولد الوحيد لأمي وهي تبي تفرح بيك..
رجاء:تخمم فيك هلبه ياجمال..
جمال بشي من الإنفعال:وعلاش تخمم فيا عايش ومرتاح ونخدم في خدمتي واموري تمام والحمد لله فشن بتخمم؟!
آلاء:تبيك تستقر ياجمال ودير عيله وصغار وتربيهم وانت صغير..
نجلاء:امي تبي تشوف صغارك ياجمال..
جمال حرك راسه يمين ويسار بالرفض وهو منزعج ويقول:فوتوه الموضوع انسوه..
ع طلعة امه بإندفاع وهي تقول:علاش قولي علاش..ع خاطرنا اني ورجاء ماتبيش تتزوج خايف تاخد وحده ماترضاش تعيش معانا.!! اني مانبيكش تقعد معاي مانبيش..تبي تاخد حوش حدانا باهي لكن معاي مانبيكش تقعد..
هو يشوف لأمه بصدمه...والبنات يشبحولها بحزن..
صابرين بحزم ودموعها فعيونها:تبي رضاي ياجمال شوف حالك وتزوج..وكان ماتبيشي خليك مصكر راسك..
ولفت ومشت خشت داخل وهي حاطه يدها ع بطنها وحاسه بألم..
اما هو بكل هدوء عطي لأخته بنتها وناض وانسحب من حداهم ومشي طلع من الحوش..
وخواته معاهم بعيونهم وهما يشبحوله بضيق..
نجلاء :لاحول ولاقوة الا بالله...
⚘⚘⚘⚘⚘⚘
مقعمزة في الجنان وفيدها تليفونها لاهيه بيه..
(نبيك تشدي كويس نبي تجيبي معدل قوي)
رويدا بإبتسامه
(إن شاء الله..والله نقرا نقرا لين قريب عيوني ينعموا)
امين
(هههههه..بعيد السو )
ضحكت رويدا..
امين
(ربي اميحفظ)
رويدا
(ربي اكيحفظ)
امين
(هههههه..خلاص لقطيها)
رويدا
(مالا شنو وانت زيد علمني مانبيش نولي زي الأطرش في الزفه بعدين)
امين
(هههههه..ان شاء الله ان شاء الله..)
رويدا ابتسمت وبعتت..
(بنسكر توا نبي نقرا)
امين
(تمام لكن بعدين كلميني مش تنسي وترقدي)
رويدا
(باهي😂)
وناضت ومشت بتخش داخل..
لاحظت خوها مؤيد واقف بعيد شويه ينظف فسيارة بوه ويشبحلها..
هي خافت لكن دارت روحها عاديه قدامه وخشت طول..
⚘⚘⚘⚘⚘
الساعه 11:00 ليلا..
خش للحوش..
كان هادي تماما مافيشي صوت..وشبه مظلم
مشي طول ركب الدروج...
وصل فوق...مشي بخطوات خفيفه لدار امه..كان الباب مردود..
فتحه شويه لقاها راقده..قعد يشوفلها بنظرات حزن بعدين رد الباب ومشي لداره..
فتحها وخش وصكر الباب...
حط مفاتيحه وتليفونه ونظاراته ع الطاوله حداه..
بعدين مشي قعمز ع السرير..وسرح بتفكيره...
امه خياراته وهو مجبور يختار..ولامجال للإختيار اصلا..هدا رضى امه..مايجي شي جنبه.
لكن معقوله بياخد قرار مصيري زي هدا يخصه هو بس بش يرضي حد تاني!؟ هدا عمر كيف بيعيشه مع انسانه خداها بش يرضي امه لااكثر..اكيد حيظلمها معاه..
انطرح ع السرير..وهو مازال يفكر ويفكر...
لين خداه النوم ورقد..
🌻🌻🌻🌻
وعدا يوم وجي اليوم اللي بعده..
والبنات مشوا للكليه..
اول ماشافت دعاء صاحباتها باركولها بعدين ورتهم فيديوات صوروهم خواتها من التلبيسه..
دعاء..
كانت واضحه صدمة البنات لما شافوا لون القفطان لكن ماتكلموش بكل قعدوا يقولوا طالعه تهبلي وخلاص..لكن اماني وقتها لاحظت في عيونها نظرة تشبه نظرة الشماته بس فيسع حولت هالفكره من راسي هادي صاحبتي من سنين..غلط نفكر فيها هالتفكير المريض..
ريم شدت يد دعاء وقالت:محلاها دبلتك..
امال:ايه حلوة وناعمه..
ايات:حتى اني عجبتني..
اماني قالت لريم:لكن دبلتك انتي تبان ارزن..
شبحوا لأماني..
قدمت اماني لريم وخدت يد ريم وقالت:دبلتك من محل ذهب معروف شايفه موديلهم..
ريم سحبت يدها وقالت:مش عارفه..لكن الحق وبدون مجامله حسيت دبلة دعاء احلى من دبلتي..
اماني:اها ممكن في الشكل متاع دعاء احلى..
دعاء...
ماتكلمتش ولاقدرت نقول شي قعدت نبلع في ريقي ونشد فروحي وخلاص..لأني حسيت ان اماني قاصده ضايقني..
اماني:لكن طالع عليك اللون الأسود مبيضك هلبه..
دعاء:اممم..كلهم قالوهالي..
ايات:تفصيلته بينت جسمك قداش حلو..
دعاء بإبتسامه:تسلميلي..
ابتسمت آيات..
اماني:اممم..هيا نمشوا ناكلوا حاجه قبل المحاضرة بعدين نمشوا نسحبوا فلوس المنحه..
ناضوا..
دعاء:خل نمشي ناخد بطاقة اختي رويدا..
ومشت بسرعه وين ماواقفه رويدا..
لقتها واقفه ع اخت امين..
دعاء:مرحبا..
جيداء بإبتسامه:اهلا شن جو.
دعاء:تمام..شبحت لأختها وقالت..ترا تعالي رودي شويه..
ومشت دعاء ورويدا لحقتها..
رويدا:خيرك..
دعاء:عطيني بطاقتك بنسحبلك فلوس المنحه..
رويدا طلعت تزدانها من الشنطه..وطلعت البطاقه عطتها لأختها...
خدتها دعاء وقالت:سلام..ومشت..
رويدا:سلام..ولفت وولت لصاحبتها..
دعاء..
فلوس المنحه ساعدونا هلبه في المصاريف وجنبونا هلبه احراجات بالذات رويدا اللي كانت ماتتحملش تبان اقل من غيرها عكسي اني..الحمدلله..
⚘⚘⚘⚘
وبعد انتهي الدوام روحوا البنات معاهم لان محاضراتهم يومها اتم متأخر والباص مايقعدش لوقت متأخر..
في الطريق..
وقف بوهم يسلم ع واحد..
دعاء..
ايه حقه بابا خدي سيارة جديده عاليه وافتكينا من هديكا ههههه..المهم يومها ماشفناش بابا في من يكلم لأن السياره اللي يكلم في صاحبها كانت صغيره..لكن عاد رويدا مايفوتها شي..شافت من الروشن..وعرفت من كان..
رويدا بضحكه:خطيبك..
دعاء وهي متفاجئه:الله!
رويدا بضحكه:والله..
محمد:هي السلام عليكم..
ومشي..
عمر اللي كان مقعمز في الكرسي القدامي حدا بوه:من هو هدا بوي!؟.
محمد بضحكه:هدا السي اسعد خطيب اختك دعاء..
ودعاء قريب تبخرت من الخجل..ورويدا تضحك عليها...
دعاء..
قداش كان خاطري نشوفه وقتها..وخاطري نكلمه نبي نكلمه..ضروري جدا نكلمه ونعرفه..
🌻🌻🌻
واستمرت دعاء اسبوع وهي تفكر فموضوع التواصل بينها وبين خطيبها وكل يوم تقول اهو اليوم يتصل..ولكن للأسف ماصارش اللي تبيه واسعد ماأتصلش بكل..
⚘⚘
اما عند اهل جمال..
"ع خاطرك انتي يام لازم تعرفي الحاجه هادي"
قال كلامه هدا وهو راقد ع رجل امه..
صابرين وهي تمسح ع شعره ودموعها فعيونها:مادام بدير هكي ع خاطر رضاي ربي تو يرزقك ببنية حلال ترضي قلبك..
تنهد وقعد ساكت..
بعدين ناض قعمز وشد ايديها وقال:امي..في واحد جاني كلمني ع رجاء..
صابرين بإستغراب: كلمك ع رجاء!؟
جمال:ايه..يبي يخطبها..
تفاجئت صابرين..
جمال:اني بنحكيلك عنه واني تكلمي معاها في الموضوع واعرفيلي رايها بش نرد ع الراجل..
.........
لالالاا مانخليش صغاري اني والله مانخليهم..
صابرين:الراجل يبيك بصغارك.
رجاء:ايه في الاول كلهم هكي بعدين يتغيروا ياماما مستحيل نخلي صغاري..
صابرين:باهي انتي قعمزي مع الراجل واسمعي منه بعدين احكمي.
رجاء بضيق:ماما اني مانبيش نتزوج..
صابرين بإنفعال:كيف يعني كيف..لامتى بتقعدي هكي..خوك اهو بيشوف حاله وبيتزوج وبيلهى بحياته..واني راهو مش دايمتلك افهمي تبي تقعدي بروحك انتي وياهم!؟
رجاء وهي متفاجئه في انفعال امها:ماما خيرك ربي يطول في عمرك معاش تقولي هكي..
صابرين دموعها طاحوا وهي تقول بحده:لابنقول ونقول الموت ماحد يعرفله وقت ولافي حد يقدر يرده.. وبنبرة ألم كملت تقول..واني نبي قلبي يتريح عليك..بالله عليك يابنتي فكري فالموضوع...
رجاء مسحت دموع امها بعدين ضمتها وقالت بخوف:حاضر ماما حاضر حبيبتي حاضر تو نفكر في الموضوع حاضر...
🌻وفكرت رجاء في الموضوع بعدين طلبت من جمال انها تقعمز مع الراجل وتتكلم معاه..
وجمال كلمه وقاله انه حيجيهم للحوش بعد يروح من سفرية شغل عنده..
اما جمال خطبوله امه وخواته بنت اخت صديقة لصابرين تعرفها وتعرف تربيتها كويس..
جمال ماكانش يبي كان يساير فيهم مسايره وخلاص...
ولابي ياخد رقم البنت ولايتواصل معاها بأي شكل..
واللي زاده على مابيه زواج منال..
ايه منال تزوجت وسافرت برا مع راجلها اللي ينتمي لأكبر العائلات في طرابلس ويخدم في السلك الدبلوماسي وكان عريس" لئطه" بالنسبه لأمها وحتى ليها هي..
والشي اللي دارهولها في العرس والعز والدلع اللي شافاته معاه نسوها جمال ومايجي منه.
ع عكسه هو اللي قاعد حبها جرح معلم في قلبه ماباش يبرا...
⚘⚘⚘⚘
الساعه 7:15مساءا..
كانت رويدا في الدار لاهيه برسم مخطط..وحداها مروة تقرا..
وفي الدار التانيه..
وفاق تتفرج ع التلفزيون وحداها امها وعمر..
ومؤيد مقعمز يقرا في داره...
ومحمد في حوش اهله يهدرز على امه..
فهالوقت كانت دعاء مقعمزة في الصاله ادور في الفيس ع صفحة لأسعد مش لاقيه ع قد مادورت..
فجأة..
رن تليفونها وكان رقم نعمات اخت اسعد.
ابتسمت بإستغراب..وفتحت الخط وردت..
دعاء:السلام عليكم..
نعمات:وعليكم السلام..هلا دعاء شن جو شن الاخبار..
دعاء:تمام الحمد لله..شن جوك انتي وشن حال العيله..
نعمات:والله تمام ماشي الحال..عاد رمضان قريب اكيد توتوا ليه ليه..
دعاء ضحكت وقالت:يعني زي العاده..
نعمات:حني اليوم طلعنا البساطات وغسلناهم وقلبنا الحوش قلب حاسة ظهري بينقسم..
دعاء:يعطيكم الصحه..
نعمات:سلمك حبيبتي..دعاء..اسعد يسلم عليك..
دعاء قلبها دق بتوتر وقالت بخجل:الله يسلمه ويسلم من جاب سلامه..
نعمات بضحكه:حبيبتي دعاء..خطيبك قداش ليه يجري فجرتنا اني والبنات نبي نكلمها نبي رقمها واني قلت مش حنعطيه لين نشاورك..
دعاء فرحت من قلبها بس مابينتش وهي تقول:هو بصراحه نفضل ان حني نتكلموا فترة الخطوبه اقل شي نتعرفوا ع بعض اكثر.
نعمات:حتى اني هدا رأيي..معناها نعطيه رقمك..
دعاء ابتسمت وقالت:ايه..
نعمات:حلو..خلاص تو نعطيهوله بعد يروح من الجامع..
دعاء:تمام..
نعمات:هي مانعطلش عليك سلمي ع العويله..
دعاء:حتى انتي سلمي ع عمتي والبنات..
نعمات:يوصل حبيبتي..تصبحي على خير..
دعاء:قدامك كل خير..
وصكرت وناضت وهي تضحك بفرح ومشت طول للدار اللي فيها امها .
خشت وقعمزت وهي تقول:توا اتصلت بيا نعمات..
جميله:نقصي ياوفاق..
نقصت وفاق التلفزيون وانتبهت مع اختها..
جميله:خيرها؟!
دعاء:تبي تستأذن مني بش تعطي رقمي لخوها..
جميله بضحكه:باهي كويس اهو تكلميه وتتعرفي عليه لكن ردي بالك يادعاء راهو مازال خطيب بس يابنتي..
دعاء هزت راسها بإيجاب وقالت:فاهمه عليك ماما..
دعاء..
وقعدت نراجي وقتها امتى يتصل..وبعد صلاة العشي اتصل بيا رقم غريب..عرفته رقمه مابيتش نرد بش مايقولش ترد ع ارقام غريبه..وبعد بالك عشرة دقايق هكي جتني رساله منه
ردي يادعاء اني اسعد..
شعور غريب حسيته وقته توتر ع خوف ع شي مش مفهوم..
🗝كانت الدار فاضيه وقتها..
عاود اتصل بيها مرة تانيه..فتحت الخط لكن ماردتش..
دعاء..
ماتكلمش حتى هو سمعت انفاسه كانت زي اللي داهش او يرجف مافهمتش..قعد شويه ساكت بعدين تكلم..
"آلو"
دعاء ابتسمت وقالت:ايوه..
اسعد بضحكه:دعاء شن جو..
دعاء :تمام الحمد لله..
خدي نفس وزفر بعدين ضحك وقال:مش عارف خيرني اقسم بالله..مش قادر ندوي..
هي ضحكت بصمت وقعدت ساكته..
اسعد:الو..دعاء..معاي..
دعاء:ايه..معاك..
اسعد ابتسم بعدين قال:شن حالك وحال القرايه..
دعاء:الحمد لله ماشيه..انت شن حالك وشن حال عمتي وعمي والعيله..
اسعد:الحمد لله..وانتم شن حالكم عمي وعمتي والعيله كلها..
دعاء بضحكه:الحمد لله...
"دعاااء"
دعاء انخلعت وقالت:اسعد خوي ينادي فيا لازم نصكر..
اسعد بلهفه:باهي بعدين ضروري نهدرزوا..
دعاء: ان شاء الله..سلام..
وصكرت وناضت طلعت لخوها مؤيد..
⚘⚘⚘⚘⚘
في دار الصاله مقعمزين يهدرزوا..
ليلى:وشن عرفت عنهم؟
المهدي"أخ محمد":العيله ماتنفعش ولدهم الكبير متاع سكير وعفن من مده دار حادث سياره وهو سكران..وعيله منفتحه هلبه..
ليلى:واضح اصلا..
المهدي:لكن هو يشكروا فيه وفاخلاقه وفعلا حتى من صلاته فالجامع..بس الحق العيله مش عارف كيف بنت خوي بتعيش فوسطهم..بنهدرز ع محمد بخصوصهم..
ليلى:لالا لاتهدرز ولادخلك بيهم اكيد عارف وراضي معقوله مايعرفش يامهدي مستحيل..
المهدي قعد يفكر فكلامها..
ليلى:مادخلناش حني يامهدي كل حد يتحمل مسؤوليته بروحه..
المهدي تنهد وقعد ساكت..
وليلى رجعت شافت للتلفزيون...
حداهم بمسافه بسيطه...
كانت دار ابراهيم...اللي كان مقعمز ع السرير ويشوف لخاتم هدتهوله قبل رويدا يتامل فيه وهو مبتسم ودموعه فعيونه..
ابراهيم:آااه يارويدة..كان تعرفي شن درتي فيا بس..رفع حاجبه وقال..لكن والله ماني مخليك لالنصري ولالغيره..
وناض حط الخاتم في جيبه..
ومشي طلع من داره...
وفوق داره بالزبط..
كانت دار اخته ازدهار..
اللي كانت مقعمزة ع الصلايه وهي لابسه ملاية الصلاة وتستغفر بخاتم الإستغفار اللي فيدها وهي مغمضه عيونها..
⚘⚘⚘⚘⚘
الساعه 12:00ليلا..
الحوش كله راقد...وهي الوحيده اللي نايضه..
تتكلم بالتليفون بروحها في الدار التانيه...
دعاء:امتى؟
اسعد:من مده طويله قريب عام لتوا..
دعاء:الله!
اسعد بضحكه:والله..من لما ريتك خلاص قلت هي هادي ومن وقتها ماقدرتش نطلعك من عقلي بكل طول الوقت نفكر فيك..وتاني يوم جيت وسالت عنك وعن عيلتك والناس يشكروا فيكم..وروحت طول وفتحت الموضوع مع العيله ..
لكن في نفس اليوم صار حادث خوي وتلخبطت الدنيا..
دعاء:معليشي كل تأخيره وفيها خيره..
اسعد بإبتسامه:اكيد..المهم وليتي ليا فالنهايه..
ابتسمت دعاء بخجل..
اسعد:قداش حلوة انتي يادعاء حلوة هلبه..
دعاء...
وهني عاد بدي يتغزل بيا وقرب يتعدا الخطوط الحمر..وقفته عند حده وغيرت الموضوع..هدرزنا شويه تانيه..بعدين صكرت..اضايقت شويه من كلامه حسيته مش ولابد..يعني لو عطيته الضي الأخضر الله اعلم شن مازال قال..
مش عارفه علاش الرجاله كلهم هكي تفكيرهم..ويمكن مايكونوش كلهم..بس اني اللي طحت فالفئة هادي...
وليلتها قعدت نفكر لقرب الفجر وخداني النوم...
🗝وآذن الفجر..
وناض محمد يصلي فيه وبعدها نوض جميله...وهي مشت تنوض في رويدا ومروة اللي قالولها نوضينا بش نقروا..
عكس دعاء اللي جت عند اخرها وبدت تهمل فالقرايه اهمال تام...
فهالوقت..
كانت ازدهار مقعمزه في مصلاها وفاتحه المصحف وتقرا في سورة البقرة اللي ليها مداومه ع قرايتها قريب تلاته اسابيع..
وبرا امها...
تبخر في الحوش بحبة البركه وهي فاتحه ع سورة البقره ومعليه الصوت..والخدامه تفتح في رواشنه كلهم..
لوطا..
المهدي وهو طالع:عليك راحه ولت فالحوش والله مانتمنى نطلع منه..
وركب السيارة وشغل السياره وطلع من الحوش...
🌻🌻🌻
بعد يومين..
في كليه الهندسه..
كانوا البنات يديروا في الأمتحانات النهائيه..
حطت دعاء اللي يجي في بالها فورقة الامتحان وطلعت..
اما رويدا فقعدت فالقاعه تحل لأخر دقيقه..
سلمت ورقتها وطلعت لقت امين قدامها..
امين بإبتسامه:جاوبتي..
رويدا بإبتسامه:ايه الحمد لله..
ومشت..
وامين واقف يشوفلها..بعدين مشي وراها..
رويدا قامت تليفونها واتصلت بأختها:ايوه دعاء وينك؟....باهي باهي جايه...وصكرت..
وكملت طريقها..
وقفت فجأة..لما جي قدامها نصري..
نصري:شن جو رويدا..ومد يده..
رويدا يدوب صافحاته وقالت:شن دير هني..
نصري:جايك انتي نبي نكلمك..
رويدا:واني مانبيش..
نصري:رويدا اقسم بالله مانبي نضيع وقت اني نبي نخطبك من خالي...
رويدا كانت خايفه أمين يشوفهم..
فاتت طول من حدا نصري ومشت بسرعه...
ونصري واقف في مكانه يشوفلها بأسف..
خبط بقبضة يده الحيط ومشي..
بدون مايعرف ان ابراهيم كان واقف بعيد عليهم شويه وشاف الموقف اللي صار...
ابراهيم بتوعد:باهي يانصري..باهي..
ومشي حتى هو..
برا...
رويدا لقت اختها في الواجهه..خدتها من يدها وقالت:حي عليا يادعاء حي..
دعاء بخوف:خيرك؟..
رويدا وهي ترعش:الدراه نصري جي وقف عليا..
دعاء:شن يبي المصيبه هدا؟
رويدا:يهتري..حي عليا كان مايكون امين شافنا يادعاء امين واعر هلبه يادعاء..
دعاء:لالا ان شاء الله ماشافكمش..
رويدا تنهدت بخوف وقالت:يارب..اففف..يرزيني فيهم هالبهايم هادم..ودموعها نزلت وقعدت تمسح فيهم..
دعاء شدت يدها وقالت:لالا ان شاء الله ماشاف شي ياربي..
رويدا بنبرة باكيه:يارب يادعاء يارب..
🌻وروحوا البنات في الباص..
وطول الطريق ورويدا تدعي فربي في خاطرها مايكونش أمين شافهم..
و بعد روحت للحوش بعتت خوها عمر جابلها رصيد..
وطول فتحت الفيس لقت رساله جايتها من أمين..
(نبي توضيح للي شفته مش قلتي ماعرفتي حد قبل من هو هدا يارويدا قولي )
وردت عليه رويدا وهي تكتب وترعش ودموعها ينزلوا وتقول:عطيك مايرفعك يانصري..عطيك مايرفعك..
وبعد كملت بعتت الرساله..ووقتها كان أمين مصكر..
وهي مشت خدت تركينه رقدت فيها وحطت المخده ع راسها...
وقعدت راقده للعشيه..نوضتها مروة تصلي العصر..
اول حاجه دارتها فتحت الفيس لقت امين قاعد مصكر..
ناضت وهي مضايقه ع الآخر خشت للحمام..
مروة:سحيقتهم ولاد هالعيله السودا..
دعاء:مايجي منهم كان الهم..
شويه وطلعت رويدا من الحمام وخشت عليهم الدار وخدت فوطا من ع الشماعه وبدت تمسح فوجهها..
ع خشة مؤيد..دف رويدا داخل وقال لمروة :اطلعي انتي..
رويدا قعدت تشبحله وهي مفنصه..
دعاء بإستغراب:خيرك..
مؤيد بنفاذ صبر:اطلعي يامروة..
ناضت مروة وهي خايفه ومشت طلعت من الدار..
ومؤيد صكر الباب..والتفت ع خواته وهو يمرر فنظراته الغاضبه عليهم..
وهما خايفات ومش فاهمات شي..
⚘⚘⚘⚘⚘⚘
في احدى المستشفيات العامه في العاصمه..
مقعمزات في مكان الزوز مع بعض يتغدوا وجبات سريعه ويهدرزوا..
ازدهار:ماتصدقيش قداش تغيرت حياتي ونفسيتي ياهديل محلاها العيشه وانتي قريبه من ربي والله حتى موضوع الزواج اللي كان مكدرني معاش بديت نفكر فيه بكل بكل..
هديل:ماشاء الله..سعدودك ياازدهار..
ازدهار بضحكه:تقدري اديري زيي حتى انتي ..
ابتسمت هديل..
فجاة رن تليفون هديل كانت مكالمة فيديو ضحكت وقالت:خوي اللي في كندا..
ابتسمت ازدهار..
فتحت هديل وقالت؛ياهلا بالكندي..
"هههههه..شن جو دوله"
هديل:بيك حلو مودي..
"شن ديري..اكيده تاكلي حشيشتك خشره"
ضحكت ازدهار بصمت..
هديل وهي تغز ع سنونها:حشمتني ياقرد.
"هههههه..باهي شن تاكلي"..
هديل وهي توجه فالكاميرا ع باكوا البيتزا اللي بينها وبين ازدهار:اها شوف..شفت..
"لالا ماريتهاش كلها نبي نشوفها كلها"
هديل بضحكه:اها..وبالغلط رفعت الكاميرا جت ازدهار وهي تاكل..
"هديل معاك حد انتي"..
هديل وجهت الكاميرا ليها:ايه صاحبتي..
ازدهار جت بتنوض..
هديل:لالا خليك زوزو غير هو شكله يحسابني بروحي..احمد صكر توا بعدين نهدرزوا..
احمد ابتسم وهو يمسح ع لحيته بعدين قال:اوكي..باي..
وصكر..
نزلت هديل تليفونها:هدا خوي الكبير..
ازدهار:ايه زبطته اللي ليه اربعه سنين في كندا..
هديل:ايه ماروحش فيهم بكل حضر الماجستير وتوا يحضر في الدكتوراة ويخدم غادي في وحده من شركات*******..
ازدهار:ماشاء الله..شن تخصصه...
هديل:اقتصاد..ادارة أعمال..
ازدهار:اممم..حلو...
هديل:المعفن قطع عليا غداي لين صقعت البيتزا..
ازدهار بضحكه:بالعكس قاعده سخونه..كولي كولي..
ضحكت هديل وبدت تاكل هي وازدهار ويهدرزوا...

....يتبع في القسم الثاني ان شاء الله....