"إلا أن يشاء الله"

الجزء الثامن

✒..
دعاء..
سنة 2011 مانحبش نذكرها مش لأنها ماكانتش حلوة بالنسبة ليا بالعكس اني من الناس المؤيده للثورة او النكبه او المؤامرة قصدي سموها زي ماتبوا تسموها كل حد ووجهة نظره..
بس اني مانحبش نذكرها لأن مابعدها حياتي انقلبت ومشت للأسوا مع الاسف..
مانبيش نخش في هلبه تفاصيل..
غير ان فهديكا السنه اني وقروبي وقفنا قيدنا وقعدنا فالحوش..مش حني بس هلبه طلبه في هلبه كليات هكي دارو..
وبالنسبه لخوتي فقعدوا يقروا طبعا لأنهم فالمدارس..وكانوا ع اعصابهم من اللي قاعد يصير كله من شهر 3 لشهر 6 ..
عالعموم بعد مرور عشرة سنين ع الثورة ماعنديش رغبه نحكي فتفاصيلها لأنها توجع القلب..
🗝والله ولااني يادعاء نبي نخش في تفاصيل ونتعمق مانبيش نجدد جروح ناس..ولانبي نخش في جدالات عقيمه مع ناس ماتتقبلش الرأي الأخر واختلاف التوجهات...
يعني مثلا لما طرحت وجهة نظري فيما سبق احداهن دعت عليا بالحرق في نار جهنم!!
مفروض مانستغربوش في الحال اللي وصلناله اليوم..
ماعلينا...
💎في هديكا السنه كان الوضع في حوش جمال مختلف تماما..
اصول زوج نجلاء من مدينه مؤيده ل17 فبراير..وبدون ماحد يعلم عنه مشي حارب...
كذلك راجل آلاء الامازيغي الأصل..مشي حارب فالجبل ماقدرش يقعد..
وبهكي آلاء قعدت في حوش اهلها هالفترة..نفسيتها تاعبه وكل يوم تبكي ع راجلها وكل يوم تخاف يقتحموا عليهم حوش اهلها وياخدوا خوها لو عرفوا ان نسيبه من المعارضه..
اما نجلاء..
بعد ماعرفت ان راجلها منصور اللي رفض يطلقها وماطل فالقضيه وخلاها معلقه قريب 7شهور في الجبهه يحارب وممكن يجيهم خبر موته في أي لحظه..المراة نست كل شي صار بينها وبينه واذكرت بس انها تحبه برغم عيوبه واخطائه الكارثيه..
مشت طول تنازلت عن قضية الطلاق...
ومش هكي بس..نجلا دارت شي صعب جدا يتصدق ولايستوعبه عقل..
🌻في حاجه ناقصه؟ كان في قولي بالله عليك ماتتحشميش..
مرت منصور التانيه:لا والله العظيم ماناقصه حاجه ياوخيتي..
نجلاء: باهي..شافت للعيل وهو يلعب وقالت..نصيحه خودي ولدك وبري اقعدي في حوش ماليك..ولو ع المصروف مادوريش بكل اني نتكفل بكل شي..
مرت منصور:ياوخيتي والله ماني عارفه شن نقولك ع قد ماكنت نكرهك قبل لاني كنت نشوف في حب منصور ليك حتى وهو معاي..ع قد ماتوا حبيتك من قلبي وكرهته اللي خدي ع مراة زيك انتي..
ابتسمت من بين دموعها وقالت:حقه هو من حقه يكثر صغار وعزوة واني مانقدرش نديرله اللي يبيه..مسحت دمعتها وقالت..هو غير يولي سالم ان شاء الله وكل شي يتصلح لاحنظلمه ولانظلمك..
ابتسمت ضرتها وهي تشوفلها..
⚘⚘⚘⚘⚘
الساعه 10:00ليلا..
ايه وشن تتوقع؟
جمال:مانقدر نتوقع شي..ومانقدر نقول غير الله يحقن الدماء ويهدي العباد ويصلح البلاد..
ولد شارعهم:اللهم آمين..هي مالا اوينا توا..
جمال :خلينا نشوفوك..سلام..
ومشي جمال ع رجليه لحوشهم وهو جايب مستلزمات لصغار خواته..
كان جدا متحفظ ع رأيه فالاحداث..كان ماشي الحيط الحيط ويقول يارب السترة..
مش لأنه جبان ولا ماعنداش وجهة نظر ولاماتهماش البلاد بالعكس..
لكن كان حاط بين عيونه العيله اللي هو مسؤول عنها واللي مالهموش غيره معيل وسند من بعد الله سبحانه وتعالي..
وصل للحوش وخش..
مشي طول لدار المعيشه لقي خواته فيها..
جمال:ايهم تعالى...
جاه وعطاه جمال الشكاره...ومشي ايهم عطاها لخالته رجاء.
اللي كانت مقعمزة مع خواتها قدام التلفزيون ويتفرجوا ع الاخبار..
قعد يتأمل فيهم بالوحده..
في دموع آلاء...وخوف نجلاء...وترقب رجاء...
بعدين غير عيونه للصغار وقعد يشوفلهم كيف يلعبوا مع بعض..
ابتسم ابتسامه خفيفه مع تنهيده..ومشي طول للدروج..
ركب فوق..
مشي لدار امه لقاها مردوده..
قدم وشاف داخل..لقي امه عاطيه بالظهر وتصلي..
تنهد..
بعدين رد الباب ومشي لداره..
وسجدت امه وبعد ماسبحت بإسم ربها الأعلى قعدت تدعي..
يالله انك تحفظ وتسلم وجدي ومنصور وتردهم لعويلتهم..
ياالله انك تحفظ جمال ولدي وماتوريني فيه سو ياربي وتكفيه شر من خلقت بما شئت وتعوضه خير ياربي..
ونزلوا دموعها..
ويالله انك تفرج ع البلاد وتهدي العباد يااارب..
💎فهالوقت..
كان جمال متكي في سريره وسرحان..مرة مرة لما يقعد بروحه تخطر عليه منال اللي مش قادر ينساها..
مرات تخونه عينه وادمع عليها وهو طول يمسح دموعه لأنه مستخسرهم فيها..اللي باعاته وقت الشده ماتستاهلش يبكي عليها..
🥀وهي اللي حاليا قاعده مع اهلها في تونس صايره فيها حالة اللي يشوفها مايعرفهاش..كيف ضعفت وذبلت..
حالها كل يوم للتالي من لما فسخوا هي وجمال...
نادمه اشد الندم وللأسف الندم مش حينفعها لأنها عارفه جمال كويس لايمكن يولي لحد سيبه...
🌻🌻🌻🌻🌻
دعاء..
وجي شهر رمضان وكنا عايشين فيه اصعب الظروف بسبب النقص في ستة وستين حاجه..هدا غير الضي اللي يهرب بالعشره والعشرين ساعه والدنيا صيف..تشفشفنا وصارت فينا حاله..
مالا لما جي يوم 17 لعند يوم 23..كانت ايام كلها خوف فخوف..
مش حننسى اللي صار يوم 23 ...
🗝كانوا راقدين في ساعات الصباح الاولى ومازالت الاشتباكات مستمره في مناطق قريبه منهم..
ماكان في حد نايض وقتها كان محمد يتفرج ع الأخبار..
وهما كلهم كانوا مطرحين في الصاله ع خاطر المكيف متاعها..
فهالوقت..ينوض عمر خوهم الصغير من حدا امه ويمشي للدار متاع المعيشه..
خشلها وشاف الكوره متاعه فوق التلفزيون..
معاش عرف كيف يدير بش ياخدها..قعد يدف فالطاولة متاع العجل اللي عليها التلفزيون..
وهو يدف والتلفزيون يزحف..
والكورة تقرب اطيح..هو تحمس دفها بقوة..
وتجي الطاوله طايحه بالتلفزيون ودارت صوت قوي..في نفس اللحظه اللي طاح فيها صاروخ ع المنطقه اللي حداهم..
كلهم ناضوا مفجوعين في نفس اللحظه..
الصوتين لما تلاقوا مع بعض حسسوهم ان الصاروخ خش لحوشهم..
جميله وصغارها يشبحوا لبعض وهما مفجوعين..
ع طلعة محمد يجري من المربوعه قال بفجعه:هدا شني!؟.
عيطت جميله وقالت:عمر..
وناضت تجري
دعاء..
هههههه..ونضنا نجروا معاها لين وصلنا للمستراح بين الديار لقينا عمر واقف وفيده الكورة ووراه الطاوله باللي فيها طايحه.
ماما جت طول لعمر وضاماته وقاماته فوق وحني قعدنا نبوسوا فيه وهو مخلوع..هههههه..اما بابا ومؤيد قعد يشوفوا للأضرار الماديه اللي دارها عموري ..هههههه..
هو يوم ع قد ماخوفنا ضحكنا...
المهم بعدها تحررت طرابلس او طاحت اللي هو...
وعيدنا عادي...
ومازالت الحرب حتى بعد العيد مستمره في المدن المؤيده..
المهم اني اتصلت بصاحباتي وحده وحده سألت عنهم والحمد لله كلهم بعويلتهم بخير..وكذلك هدرزنا ع القرايه وماكناش عارفين امتى حنرجعوا...
⚘⚘⚘⚘⚘⚘
في حوش جمال..
كانوا كلهم ملتمين البنات برجالتهم..
ماعدا منصور اللي قاعد ماروحش من مدينته..
وجدي:لا الحمدلله ياعمتي والله عبيتها خلاص..
صابرين بإبتسامه:صحتين..
حط وجدي ايديه ع ركابه وقال:هي نوضوا آلو؟
الاء ابتسمت وقالت:باهي..
وجمال يشوفلهم بإبتسامه..
صابرين:كان قعدتوا تعشيتوا اللطف.
وجدي:لا خلاص عمتي ساد لينا اسبوع نتغدوا ونتعشوا هني..
جمال:امتى تولوا للخدمه..
وجدي:خلال الأيام الجايه ان شاء الله..
جمال: ان شاء الله..
وناض وجدي وآلاء مشت تجهز فنفسها..
سلم وجدي ع نادر وعمته صابرين وطلع هو وجمال برا..
وجدي:لالا خلاص وقت جد الجد حاربنا وتوا نولوا لما كنا عليه ..
جمال حط يده ع كتف وجدي وقال:وهدا المزبوط..
ع طلعة آلاء..
وجدي مد يده لجمال جمال صافحه..
وجدي:بارك الله فيك والله يرحم والديك تعبناك وشقيناك معانا..
جمال:تي شن تخترف ياراجل اختي هادي راهو!
وجدي ابتسم وقال:قصدي ع ماليا ياجمال خبروني راهو.
ضحك وقال:يامتخلف حني عيله وحده..لو كنت اني فمكانك راك درت زيي واحسن..
خبط وجدي بيده ع كتف جمال وقال:ربي يحفظك ويعزك..
جمال:تسلم بابونسيب..
وآلاء تشوفلهم بإبتسامه حلوة وكلها فخر بسندها"خوها"..
⚘⚘⚘⚘⚘
وبعد ماروحت آلاء لحوشها..
روحت عطاء اللي كانت جابه زيارة عاديه..
بعد ماهدت الدنيا والليل سواده زاد..
طلعت نجلاء قعمزت فالجنان بروحها..تفكر في حياتها..وتفكر في منصور..ياترى هالحرب والاحداث شن دارو فيه..
وشن غيروا..هل قاعد ع قرار تمسكه بيها..ولا تغير شي من هالناحيه؟..
وفعز تفكيرها..رن تليفونها...
استغربت وين شافت المتصل..
فتحت الخط وردت طول..
نجلاء:ايوه السلام عليكم
"وعليكم السلام نجلا شن حالك"
نجلاء:الحمد لله شن حالك انتي ياروضه "حماتها" وشن حال العيله .
روضه بنبرة باكيه:الحمدلله...
نجلاء بخوف:خيره صوتك ياروضه صايرة حاجه!؟
روضه:نجلا منصور روح..
نجلاء قلبها دق بقوة..
روضه ببكي:يده مبتوره يانجلا...وانهارت بالبكي..
جمدت نجلاء..وعيونها توسعوا بصدمه وطول دموعهم طاحوا..
روضه ببكي:هو غدوة بيجيكم يانجلا..بالله عليك يانجلا ماتكسريه ولاتزيدي تقهريه ياوخيتي بالله..
ونجلاء ترمش فعيونها بسرعه والدموع يقطروا منهم..
🥀بعد ماأنهت المكالمه مع حماتها..
قعدت هلبه ع مااستوعبت اللي سمعاته..
وهي خاشه للحوش قعدت تذكر في ايامها كلها مع منصور..
تذكر في منصور الراجل الحركي الفرفوش اللي يحب نفسه ومهتم بيها هلبه..كيف بيتعايش مع هالنقص!!؟
ومرات فعلا تعايش معاه..لانه مش معروف امتى بالزبط انبترت يده..
وصلت لدارها اللي قاعده فيها هي وصغارها..كانوا راقدين بالنوم..
قعدت تشبحلهم وهي تبكي بصمت وتفكر كيف بيتقبلوا هالنقص في بوهم!؟..
ليلتها قعدت نايضه للفجر..
بعد ماآذن توضت وصلت..وطلعت من دارها ومن الحوش مرة وحده وقعمزت في الجنان وهي تراجي في جمال امتى يروح من الجامع..
وروح جمال..
ولما خش للحوش شافها مقعمزة فالجنان واستغرب..
جاها طول وقال:صباح الخير..
نجلا ودموعها فعيونها قالت:صباح النور..
جبد جمال كرسي وقعمز مقابلها وهو عاقد حواجبها سألها:خيرك نجلا مريضه تحسي في حاجه!؟
نجلاء:عندك علم ان منصور انبترت يده فالحرب؟!
انصدم جمال..
نجلاء ودموعها ينزلوا:كلمتني اخته امس فالليل وقالتلي روح وبيجينا اليوم..
جمال وزع نظره حوالين اخته وهو يفكر ومازال مصدوم..
بعدين شبحلها وخدي ايديها الزوز وشدهم وقال:ردي بالك تقولي وليتي فكلامك بعد عرفتي اللي صارله!؟
نجلاء حركت راسها يمين ويسار بالنفي وقالت:لالا..نهائيا..لكن قعدت نخمم في نفسيته كيف موليه توا..في نفسية الصغار لما يشوفوا وضعه...
جمال:مسألة وقت تتعودوا فيها وتتأقلموا ع الوضع..زاد ضم ايديها بقوة وقال..تعرفي ان المراة توا بس يبان معدنها واصلها وتربيتها..لو بنجوا للي داره منصور من غلط في حقك..لو نفكروا فيه بالعقل شويه مانلقوش فيه حاجه غلط هو لوماكانش مضطر ماكانش خدي عليك والشرع عطاه الحق فوضعكم يتزوج
وايه صح هو مليان عيوب..لكن في نفس الوقت عنده ايجابيات..وتمسكه بيك الفترة اللي فاتت كلها وتوليه واجباته كلها اتجاهك واتجاه صغاره حتى وانتي تردي في كل شي عليه لكن هو مابطلش ولاأستسلم..هدا كله يبين ان معدنه طيب يانجلا..غير يبيله شويه ربايه..
ضحكت نجلاء من بين دموعها..
ابتسم جمال وقال:وانتي ربيتيه..وهالحرب حتى هي نقولوا ان شاء الله غيراته للأحسن..
نجلا:يارب..
جمال طبطب ع ايديها بيده وقال:نوضي ارقدي توا وارتاحي بش بعدين وين يجي تكوني مصحصحه كويس و تعرفي شن تهدرزي انتي وياه..
هزت راسها بإيجاب وهي مبتسمه وناضت وقفت وهو وقف معاها..
طلقوا ايدين بعض..
وهي تمسح في دموعها لافه بتخش..
وجمال حط يد في جيبه والتانيه ورا راسه وهو يوزع فنظره ع المكان ويفكر في اللي عرفه عن منصور..
التفتت نجلاء وقعدت تشبحله..
قعدت تفكر فمدى طيبه قلب خوها وكبر نفسه وقداش يحبهم وديما يفضل فيهم على روحه..عكسها هي اللي لما صار بينها وبين منصور ماصار كانت تبي جمال يسيب منال بأي طريقه من حقدها علي عيلة راجلها وراجلها وقتها..اماهو بعد ماانتهي كل شي بينه وبين منال وعرفت ان هي اللي سيبت وحاجه زي هادي مش ساهله في حق الراجل..جمال مااهتمش الا لمصلحة اخته وصغارها وغلبها عن أي شي يخصه
وجعها قلبها هلبه عليه...
جمال وهو مبتسم بآستغراب:خيرك؟
جاته طول وضماته بقوة وقعدت تبكي وتقول:والله ماتستاهل كان كل خير ياوخيي..
هو ابتسم وضمها وقال:حتى انتم...
بعدوا عن بعض شويه وباس جمال راسها وقال..هي بري ارقدي بري..
ضحكت ومسحت دموعها وهي تقول:ربي يعطيك ع قيس نيتك يارب..
ابتسم وهز راسه وهو يشوفلها..
اما هي لفت ومشت خشت للحوش..
وهو تنهد..ومشي للكرسي وقعمز..
رفع راسه فوق وقعد يتأمل في اخر نجمات قعدوا مع بزوغ ضوء النهار..جت بين عيونه منال..
مسح عيونه بإيديه بقوة..بعدين غمضهم...
⚘⚘⚘⚘⚘⚘
ومع عصر هاليوم..
كان منصور واصل لحوش نساباته..
كان لابس سوريه سودا وسروال جينز..وع كتافه كبوط قهوي جلد ولابس نظارات..
رن جهاز الأنترفون..
"منو"
ابتسم منصور وقال:منصور يابونسيب..
لحظات وانفتح الباب..
دفه منصور وخش وصكره وراه..
ع طلعة جمال..جاه طول وخداه بالأحضان..
جمال:حمد لله ع سلامتك ياثاير..
منصور بضحكه:الله يسلمك..
بعدوا عن بعض وجمال قعد حاط يده ع ظهر منصور وقال:هي تفضل خش تفضل..
منصور :يزيد فضلك..
ومشوا الزوز خشوا للحوش..
تلقوه ولاده وين خشوا وهما يقولوا..
"بابا.."
حول منصور نظاراته وهو يقول:اووووه..نمور..
ضحك جمال..
وضم منصور صغاره الزوز بيد وحده.
جمال خفت ضحكته وهو يشوفله...ع جية صابرين اللي كانت مبتسمه وهي تشوفلهم..
صابرين مدت يدها وقالت:الحمد لله ع سلامتك ولدي..
منصور وقف ع حيله ومدلها يده اليمين وقال:الله يسلمك عمتي..
وهي سلمت عادي ومابتش تحسسه بأي شي..
جمال:هي تفضل خش..تفضل..
منصور:تمام..ومشي هو وصغاره وجمال وامه للصالون..
قعمزوا هدرزوا شويه..
بعدين..طق الباب وخشت نجلاء..
هو قعد يشبحلها بنظرات شوق واضحه..
وهي كانت تسرقله فالنظر..
قالت:السلام عليكم..
ومشت قعمزت حدا جمال..
منصور وهو يشوفلها :وعليكم السلام..
جمال:ايهم امجد مش قلتوا بتوروني شن درتوا في شوط الكورة متاع البلاستيشن..
ايهم؛ايه صح..تعال هي..وشبح لبوه وقال..حتى انت تعال بوي..
صابرين ناضت وهي تقول:تو يجيكم بابا هي بروا مع خالكم..
جاهم جمال وخداهم هما الزوز ومشي طلع بيهم وامه وراه..
وخلي المكان لمنصور ونجلاء..
هي كانت تشبح ليده المبتوره..وهو ركز عليها وقال بضحكه:هادي نيتك..شكلك دعيتي عليا من وسط خاطرك..
شبحتله ونزلت دمعتها...
تنهد وقال:اني والله ماقصدت نماطل فالطلاق الا لأني نبيك من قلبي ومانقدرش نخليك مش لاني نبي نكسرلك راسك ولانخليك معلقه وربي شاهد..ويشهد حتى على ان قلبي عمره ماراد مراة غيرك واني الله ماتزوجت الا ع خاطر الصغار وانتي تعرفيني من اول ماخديتك قتلك اني راجل نحب الصغار ونبي ندير هلبه نبي عزوة..نحبك من قلبي..لكن ماقدرتش نتنازل ع الحاجه اللي نتمناها..
تنهد وقال..يعلم الله باللي صار فيا لما خلتيني..وبقداش مرة ريت فيها الموت فالحرب هادي..وقداش ماراجعت نفسي وهلبه حاجات في حياتي عاودت حساباتي فيهم..
نجلا..
قعدت تشبحله وقلبها بيطلع من مكانه..
نزل عيونه وقال:نجلا..اني جيت اليوم بش نعطيك حريتك..
فتحت عيونها ع وسعهم بصدمه...
شبحلها شويه بعدين بلع ريقه ووقف وقال..نجلا..
"صكر فمك"..
شبحلها بصدمه..
نجلا ببكي:ماقالولكش اني تنازلت ع القضيه؟
عقد حواجبه بإستغراب..
نجلاء:معاش نبي نطلق اني خلاص..
منصور:لالالا ماتصخفيش عليا نجلا ارجوك..
نجلاء:نصخف علي عينك..والله ماتستاهل نصخف عليك..لكن الله غالب..نزلت عيونها وقالت..قلبي مش فيدي
هو ابتسم ورفع حاجبه اليسار وقال:خيره قلبك؟!
نجلاء ضحكت بعصبيه من بين دموعها وقالت:يبي الجبد.
منصور:ههههههههه..قصدك انتي ياجكتوره طلعتي تحبيني حق..
نجلا:ريت بالله طياح السعد..
منصور:هههههههههه..
وهي قعدت تضحك معاه..
وبرا..
امها وخوها واختها رجاء يسمعوا في ضحكاتهم وهما مبتسمين..
وصابرين بالذات قلبها ارتاح ع الآخر..
⚘وبعد ماتعشوا...
روح منصور بمرته وصغاره وهما متفاهمين ع كل شي..
وهدا وين ارتاح بال جمال..لكن امه مازال بالها مشغول عليه...
🌻🌻🌻🌻🌻
وجي شهر اكتوبر وتم..
وقالوا...ليبيا تحررت..
وبدت عاد الناس تعيش الطهقه..
الشباب بدوا يديروا في نشاطات عامه ثقيفيه وغيرها..
النساوين جمعيات ومؤسسات مجتمع مدني وبازارات وندوات وماإلى ذلك..
ومن بين هالجمعيات..
جمعيه دارتها مراة محاميه وهالمحاميه تكون خالة انوار
وانوار كانت معاها فيها هي ومجموعه من النساء والبنات..
ودارو مجموعه من النشاطات من بينها مجله تخص جمعيتهم هي تخدم فيها معدة تقارير وحوارات..
ومن جهة اخرى..
كذلك كان رشاد خاش مع صديقه أمين وقروب شباب تانيين فتجمع معين يقوم بنشاطات تابعه للكليه وحتى هما دارو مجله..لكن رشاد مالاش علاقه بيها..
وفي يوم..
دارت جمعية خالة انوار بزار في الجامعه قبل لتبدا القرايه..
كانوا حاضرين مجموعه من الحركات الشبابيه واتحاد الطلبه وكذلك الصحافه والتلفزيون..
كانت انوار وقتها ادير في حوار صحفي مع استاذه فالجامعه مشاركه فيه..
ورشاد اللي كان حاضر وقتها ولاهي حتى هو صدفه شافها وتفكرها..
وقعد واقف يتفرج عليها وهي ادير فالحوار..
عجباته..وابتسم..بعدين مشي ع حاله...
⚘⚘⚘⚘⚘
دعاء..
بعد عيد الأضحى ولينا للقراية...
هداكا الوقت ولت اختي مروة اللي كانت تقرا تانيه ثانوي..
ووفاق اللي تقرا تالته اعدادي
وخوي مؤيد اللي خش أول ثانوي...
بس رويدا بعد مانجحت بتقدير ممتاز فالشهادة التانويه مالحقتش تسجل للجامعه هالفصل بسبب تأخر نتيجة طلبه الدور الثاني وقعدت هالفصل فالحوش..
🗝اول ماخشت دعاء للكليه تلاقت هي وصاحباتها وبدي السلام الحار..عاد ليهم قريب عام ماروش بعض..
اول حاجه داروها..قعدوا يدهوروا في كليتهم لأنهم استاحشوها ع قولتهم..بعدين قعمزوا في مكانهم المفضل وبدوا يهدرزوا..
دعاء:هي بتسجل هني بس خسارة راح عليها هالفصل..
سكينه:خسارة قبل نبوا نتعرفوا عليها هالرويدا..
دعاء بضحكه:السمستر الجاي ان شاء الله..
ريم:حتى اني اختي بتقرا الفصل الجاي لكن مش هني فالعلوم..
امال:جيران يعني..
ريم بضحكه:ايه..
اماني:الاجيال الجديده بدت تخش الكليه وحني قاعدات هكي..
آيات بضحكه:تو بيلهفوا اللي هناك وحني بنقعدوا هكي..
سكينه:ع اساس في ماينلهف هو..
اماني بضحكه:لافي..شن رايكم في أمين المعيد..
امال:صاحب رشاد؟!
اماني:ايه..
سكينه:مانطيقاش بكل رافع خشمه..
امال:زيه زي صاحبه..
سكينه:لالا هدا بزايد ولا كيف يمشي وكيف يشبح..
اماني:يطلع عليه..فيه شبه كبير من امير اللي في فريحه..
دعاء بضحكه:صح يشبهله..وانتي ياحنه خيره هدا وين خطر عليك!؟
اماني:ليه مده خاطر عليا غير هو مايشجعش الصراحه من غروره..لكن توا حطيته فراسي..
سكينه شدت ذقنها وقالت:هدا وجهي كان عبرك..
ضحكوا البنات..
اماني برفعة حاجب:وخيرني ياحنه شن ناقصني..
سكينه بضحكه:ماناقصك شي هو اللي ناقصه غير اسكتي بس..
والبنات يضحكوا..
اماني:تو نوريك ياام شبير..
سكينه؛قصيرونه كيوت خير من طويله هابيله..
والبنات يضحكوا وخلاص..
ع جية انوار وصاحباتها..
انوار:السلام عليكم..
كلهم وهما يشبحولها قالوا:وعليكم السلام..
انوار:هدا عدد جديد من مجلتنا يابنات اول مرة نوزعوه فالكليه..تفضلوا..
وبدت توزع هي وصاحباتها ع البنات كلهم..
بعدين قالت:ان شاء الله تستفيدوا
ومشت هي وصاحباتها..
وهي ماشيه فاتوا من حداهم رشاد ومعاه بنيه يهدرزوا..
شبحوا لبعض حيوا بعض بإبتسامه وكل حد مشي حاله..
ودعاء شافت رشاد مع البنت يهدرزوا ومنسجمين قلبها وجعها رجعت شافت للمجله وهي تقلب فيها ودموعها فعيونها...
⚘⚘⚘⚘⚘
ياماما اهدي بالله عليك..
صابرين بقلق:مادام طلع من الحبس تو تشوفي شن يدير في خوك تو تشوفي..
رجاء سكتت وهي خايفه زي امها..
عمها الصغير طلع من الحبس واكيده اول حاجه حيديرها هي الإنتقام من جمال.
وعاد البلاد في حالة فوضى لاشرطه ولاغيره مافي حد يقدر يديرله شي..
🌻كذلك جمال سمع بيه طلع وفي نفسه كان خايف لكن فوض امره لله..
كان موجود وقتها في محل السجاد..
يراقب في حركة البيع..
شويه انفتح باب المحل..
وخش راجل..
ملتحي..مقصر ازاره...وسبحته فيده ويدور ع شخص بعينه..
لين شافه ومشاله..
وصل فيه ووقف في جنبه وقال:السلام عليكم..
التفت جمال وهو يقول:وعليكم السلا....
سكت وهو مصدوم لما شاف الشخص اللي قدامه..
ضحك وقال:كيف حالك ياولد خوي.
وجمال واقف يشوفله من فوق لتحت بصدمه ومش مصدق..
وعمه يشبحله كيف متعجب ويضحك..
..........
في سيارة جمال...
يوم اللي شدوني كنت حالف غير نطلع نحرقك باللي عندك..
ولكن سبحانك ياربي..طحت فراجل محبوس فالسجن ظلم كان راجل صالح بمعنى الكلمه..كان سبب فصلاح هلبه ناس فالحبس واني منهم..
تو مش يقولوا التفاحه الخاربه تخرب التفاح الباهي اللي معاها..مع هالراجل صار العكس..
جمال وهو متفاجئ:قدر في عامين يغيركم لهالدرجه!؟
عمه:ماهو انت لو عاشرته وعرفته شفت صبره ع الظلم..وقداش كانت علاقته بربي قويه قداش كان بنادم طيب تقول من الملايكه ياجمال تي حتى الحجر يأثر فيه..
تنهد جمال وقال:ربي يطيحنا فالناس الباهيه..شبحله وقال..واني نقول لروحي وتي روحك لعمك ياجمال اول بيطلع بيجيك طول ينتقم منك..
تنهد عمه وقعد ساكت وهو يشوف القدام..
وجمال يشبحله بعدين قال..عمي..
شبحله..
جمال:مازال ماتبيش تجي تخدم معاي!؟
عمه ابتسم وقال:خليني الفتره هادي نبي نقلبها فراسي شويه وبعدين نشوف شن نقدر ندير..
جمال ابتسم وقال:ع راحتك..المهم باب ولد خوك مفتوح ليك في كل وقت...
⚘نية جمال الطيبه وافعاله الباهيه سبب كبير فإن ربي يكفيه شر كل من اراد بيه شر..بل وخلا الشر ينقلب لخير لعله مستقبلا يلقاه وينفعه...احفظ الله يحفظك..احفظ الله تجده اتجاهك⚘
⚘⚘⚘⚘⚘⚘
معقوله!!؟
جمال:والله زي مانحكيلكم..
رجاء:يهدي من يشاء..
صابرين:استغفر الله..اني كنت نقول من المستحيلات الراجل هدا ينصلح حاله ويهديه ربي..
جمال:انه على كل شيء قدير ويهدي من يشاء امتى مايشاء..
وهو اللي قال سبحانه للناس وهو يدل فيهم ع طريق الهدايه..وماتشاؤون إلا ان يشاء الله رب العالمين..
صابرين:فعلا..كله بمشيئة الله وتقديره..
رجاء:ونعم بالله..ايه بنقولك جمال بإذن الله من غدوة بنبدا خدمه في معمل تحاليل في منطقتنا..
جمال:مليح بكل..ربي يفتح عليك جوجو..
ضحكت وقالت:آمين..
وامها تشوفلها بإبتسامه..
⚘⚘⚘⚘⚘
وتمر الأيام تتبعها الأيام..
وتخش سنة 2012...
كانت الحياة ماشيه حلوة..
ع منصور ونجلا اللي عرفت تتعامل صح مع راجلها مع كل ظروف حتى زواجه التاني اللي خلاته يعدل فيه بينه وبين ضرتها...ومنصور كل ماله يزيد يحبها اكثر واكثر ولو انه ماقدرش يتخلا عن عاده البصبصه لكن يحاول يتخلص منها شويه شويه ع خاطر نجلا..احتراما ليها
ورجاء حملت واخيرا بعد ماعالجت ع بعض المشاكل البسيطه اللي كانت تعاني منها.
ووجدي راجلها خش في خدمه مع خوها جمال شاركهم فيها منصور .
مشروع داره جمال ع خاطر عمه..بس عمه الى الآن قاعد فالسعوديه ماروح بعد مامشي للحج..
ورجاء انطلقت في حياتها ومرتاحه في خدمتها ومتهنيه ع صغارها مع امها اللي كانت حاطتهم في عيونها..
اما عطاء فحياتها لازالت مستقره زي قبل ماجد عليهم شي هي وراجلها وصغارها...
🌻🌻🌻🌻
من جهة تانيه..
كانت دعاء فالفصل هدا نفسيتها مش ولابد البنت ولى شغلها الشاغل رشاد اللي كل ماله يزيد ينجح اكثر واكثر ونجمه يلمع فالكليه..
نجح فالدارسات العليا بتقدير ممتاز وبيطلعوه بعثه ع حساب الدوله لبريطانيا..
بس مش حيمشولها قبل ليعطوهم دورات لغه في نفس الكليه تستمر لمدة تلاته شهور..
🌻رشاد:عمك الدكتور قال ماتسافرش قبل للتزوج..
امين:عنده الحق خايف عليك من بنات الفرنجه..
ضحك رشاد وقال:ع العموم اني قداش ليا نفكر فالموضوع..
امين بمفاجأة:قصدك في وحده فراسك؟
رشاد:اممم....
امين:هني فالكليه شكلها..
كيف جاي بيرد رشاد فاتت البنت المقصوده
رشاد ناض من مكانه ومشالها..
رشاد:عفوا..لوسمحتي..
وقفت انوار هي وصاحباتها..
شبحولها بعدين شبحوله..
انوار بإبتسامه:تفضل؟
رشاد:ممكن ناخد من وقتك شويه..
سجى:باهي انوار حني فالكافتيريا..
ومشوا صاحباتها..
قدملها رشاد وقال:كيف الحال؟.
انوار:الحمد لله...
رشاد ضيق عيونه بإبتسامه وقال:شن يقربولكم عيله******
انوار:خوال بوي..
رشاد بضحكه:ويقربوا لأمي هكي تقولي ولاد عمها من بعيد..شفتك طالعه من حوشهم مرة واني رافع امي غادي فمرواحة الحاجه تبرة من الحج..
انوار وهي متفاجئه:الله!؟
رشاد بضحكه:والله..وطلعنا صغار مدينه وحده..انتي منين بالزبط؟.
انوار وهي مبتسمه:اني من ********..
رشاد:هههههههه...والله حتى اني منهم باهي..
انوار بضحكه:سبحان الله..
ابتسم رشاد وقال:عندك صفحه ع الفيس؟
انوار رفعت حواجبها وقالت:ايه..
رشاد:اني عندي صفحه اسمي بالإنجليزي رشاد محمود ****
انوار:اها..اني اسم صفحتي عطر الندى..
رشاد ابتسم وقال:اوكي...
انوار:باهي فرصه سعيده..وعن اذنك..
رشاد:اني اسعد..تفضلي..
لفت انوار ومشت وهي مبتسمه ومتحشمه وقلبها يدق بقوة..
ورشاد قعد يمشي للخلف وهو يشبحلها لين وقف حدا امين..
امين بإبتسامه:لا هالمرة نحس فيك اخترت صح..
رشاد شبحله وقال:حتى اني هكي نقول...
ضحك امين..
⚘وضافوا بعض انوار ورشاد ع الفيس..
وبدوا يهدرزوا ع بعض ويتعارفوا اكثر واكثر وانسجموا مع بعض..
ومن الهدرزه ع الفيس بدت اللقاءات تكتر في الكليه..
وبدوا حديث الساعه انوار ورشاد..
ودعاء مسكينه قلبها قاعد ينحرق..
دعاء..
للأسف حبيته بدون مانحس حبيته هلبه وكل ماله يزيد يكبر في قلبي مش عارفه كيف..ممكن لأنه كان اميز شباب الكليه وهلبه بنات حلموا يرتبطوا بيه..
اني وقتها قلت لنفسي ان صرف النظر عني بسبب وضعي المادي..وانوار بنت تاجر ذهب معروف هلبه وناس من الطبقه الراقيه زي مايقولوا قلت في نفسي اكيد اختار وحده تناسبه..اني ماناسباش ولابأي شكل..
زادت تحطمت ثقتي بنفسي..وحسيت ان عمري ماحنقدر نرتبط بشاب زي رشاد..علم وثقافه ووضع مادي مرتاح وشاب ناجح وبارز...
مانحكيلكمش قداش حسيت بالقهره والحسرة قداش كنت محروقه..
بالذات وين نشوفه صدفه مع انوار قلبي يتمزق تمزيق..
🌻كان حيخبطني وقتها بس ربي مارادش وخداهم كلهم في يوم واحد..رشفت وقالت..تخيل حوش بابه تسكر في لحظه وحده..
رشاد ماتحملش دموعها بكل مسحهم باطراف اصابعه وقال؛الله يرحمهم ويغفرلهم..كله مقدر من ربي انوار..هو رايد شي تاني..
انوار شبحت ايمينها وقالت:الله يرحمهم..ونعم بالله..
رشاد تنهد وهو يشبحلها بعدين قال:انوار..
شبحتله..
رشاد:لو خطبتك توافقي؟..
توسعوا عيون انوار بدهشه وقعدت تشبحله وخلاص..
وهو يشبحلها بلهفه ويراجي فردها...
..............
داخل..
مقعمزات سكينه واماني وريم وامال مع بعض يقروا وحداهم ايه وسجى وزوز بنات قروب انوار..
شويه وجتهم انوار وقعمزت حداهم وهي مصدومه..
شبحولها صاحباتها واستغربوا..
سجى:خيرك انوار؟
انوار بصدمه:حي يابنات كان نقوللكم شن صار معاي!
شبحولها قروب دعاء..
قروبها مع بعض قالوا:شن صار!!؟
انوار:رشاد يابنات..خطبني..
شهقوا صاحباتها بمفاجأة...
وسكينه انصدمت..بينما اماني وجهها تغير..
وبدوا صاحبات انوار يناشبوا فيها..
وهي تضحك وتمروح على روحها وتقوللهم:مش مصدقه!! ياربي..
وهما يضحكوا عليها..
رجعت سكينه شافت للاب توب وقالت:ماتقولوش لدعاء..
اماني قعدت ساكته..
اما امال اللي كانت ماتعرف شي استغربت فالبدايه لكن بعد شوية تفكير عرفت اللي فيها..
⚘⚘⚘⚘⚘⚘
في حوش اهل منصور..
كانت عيلتهم ملتمه يوتوا لعرس روضه اصغر وحده فالعيله..
فهالوقت..كانت نجلاء موصيه منصور ع حاجه يجيبهالها ولان منصور مش فاضي بعتها مع جمال..
🌻نجلاء:والله حلو ياروضه هلبه..
روضه:هكي تقولي؟!
نجلاء بإبتسامه:ايه اسمعي كلامي ومش حتندمي..
ومنال اللي كانت مشغوله توتي مع البنات في تغليفة البتات تشبح مرة مرة لنجلاء...لعند مارن تليفونها..
ردت نجلاء وقالت:ايوه جمال....برا انت؟..
ومشت طلعت...ومنال طلقت اللي فيدها ولحقتها...
طلعت نجلاء برا وفتحت الباب لقت جمال واقف برا فيده كيسه..
جمال:شن جو..
نجلا:تمام..
جمال:خودي بسرعه مستعجل..
خدت نجلاء وقالت:سلمك جياب..
ع طلعة منال لما شافاته قلبها فر وقالت؛كيف حالك جمال..
التفتت نجلاء وشبحتلها بصدمه..
هو عقد حواجبه وقال:سلام نجلاء..
ولف ومشي لسيارته..
ونجلاء صكرت الباب..ومشت خشت داخل.
وخلت منال واقفه في مكانها ودموعها تنزل..
بعدين مسحتهم بقوة ولفت خشت داخل..
🌻🌻🌻🌻🌻
الساعه 6:00مساءا..
في حوش محمد..
في دار المعيشه..
مروة بضحكه؛تحركات غريبه!..
جميله؛ايه..في حاجه في حوش جدكم صايره حتى بوكم مدرقها..
رويدا:عندي احساس شور شرقيه..
دعاء اللي كانت معاهم ومش معاهم قالت وهي تشوف للتلفزيون؛قصدك انخطبت مثلا!!؟
رويدا:اكيد..
ابتسمت دعاء بتهكم..
ومروة تشبحلها ليها فتره ملاحظه ان اختها مش مزبوطه..
جميله؛سيوره يطلع ..
رويدا:ايه..قداش بيقعد مدرق يعني..
🌻وفعلا..
عالسكت..
كانت تلبيسة شرقيه..اللي حضروها خواتها وليلى ومرت علاء بس..
ودرقوها ع عيلة محمد ونبهت محمد مايقولش لانها تبي تردهالهم..
المهم....
تقدملها راجل متزوج ملتزم..شافاته عجبها..وواقفت طول...
واليوم جابولها خواته التلبيسه...وشرقيه وهما يلبسوا فيها فالتعليقه والدبله قريب اطير من الفرحه...
⚘⚘⚘⚘⚘
وبعد كم يوم كذلك..
كانت فضانيه انوار ورشاد..
اتفقوا فيها على ان الفاتحه تنقرا قبل ليسافر رشاد بش يتم اجراءات مرته معاه برا..
رشاد كان مرتاح ع الآخر...
وانوار كانت مرتاحه زيه وفرحانه....
🌻🌻🌻🌻🌻
في كلية الطب..
انسيه زي مااني نسيت رشاد وتزوجت سيد سيده يامنوله .
منال ببكي:مافيش زي جمال يافدوى ولافيه خير منه والله مافي يافدوى..
فدوى:لافيه يامنال وسيورك تلقيه صدقيني..غير انتي انسي جمال انسيه خلاص..
ومنال تبكي بصمت وهي ساكته..
كيف تبيها تنساه وهي بعد ماخلاها زادت حباته اكثر واكثر.!؟..
وياريته هو اللي سيب بش تكرهه...
⚘⚘⚘⚘⚘
وعدت الأيام..
وتم الفصل...
وللأسف دعاء فهالفصل مستواها دراسي نزل هلبه..
معاش دورت القرايه بسبب حالة الكآبه اللي دخلت نفسها فيها..
برغم ان هديكا الفتره تبحبحت معاهم الحكايه من المنح اللي نزلت من الدوله..
طلعهم بوهم للسوق وخدوا دبش وهلبه حاجات ناقصتهم..
واكثر من بحبح فهالمنحه رويدا اللي كانت حتخش الفصل الجاي للكليه..
🌻🌻🌻🌻
وعدت ايام العطله...
وولوا للقرايه...
اما رويدا فكان هدا اوللها يوم فالجامعه وكانت قمه فالحماس..
لبست وتأنقت وكانت طالعة حلوة بالمرة...
لما وصل محمد بيهم للكليه..
كانت رويدا قريب تنزل من السيارة وهي تمشي...
درس محمد..وقال:شوفوا باص الجامعه باهي ضروري جدا تشوفوه معاش نقدر نجيكم زي قبل..
دعاء:حاضر بابا...
طلع فلوس من تزدانه وعطاهم عشره عشره هما الزوز..
خدوهم ونزلوا..
رويدا وهي مبتسمه بحماس:حلوة الكليه من برا..
دعاء ابتسمت وقالت:حتى من داخل..
وخشوا هما الزوز..
ورويدا تدهور فيها بعيونها..
لعند ماوصلوا داخل وين مافي البنات..
دعاء:صبايااا..
كلهم باصوات متقطعه:دوودي..
بعدين شبحوا لرويدا اللي كانت تضحك..
سكينه؛رويدا..رويدا ولا؟
دعاء بضحكه:ايه..
سكينه:رويدا...
وبدوا يسلموا عليها ويعرفوا فيها عليهم وفاتوا دعاء..
دعاء:هييي..واني!؟
امال:لالا انتي خلاص طاحت موضتك..
ريم:مالا باهي اللي اختي ماتقراش هني..
ضحكوا البنات بعدين سلموا ع دعاء..
وقعمزوا مع بعض..
شويه فاتت من حداهم انوار كانت هيئة لبسها متغيره محتشمه اكثر ويبان في وجهها شي متغير..
شافوها البنات وشبحوا لدعاء..
ودعاء غيرت عيونها عنها وقالت:امتى يبدا التنزيل..
🌻🌻🌻
وشويه وناضوا البنات وقعدوا يدهوروا برويدا فالكليه بعدين مشوا خدوت فطور...وين جو موليين..
شبحوا مجموعه من الشباب يطلقوا في الألعاب الناريه..
مافهموش علاش..
لعند ماقدموا اكثر وشافوا الشباب جايين لرشاد ويسلموا عليه وهو يضحك..
دعاء دموعها عبوا عيونها..
رويدا:من هو هدا؟
اماني:رشاد معيد فالكليه..
شبحت رويدا طول لدعاء..
دعاء؛هي تعالوا نخشوا داخل..
ومشوا خشوا وكلهم يشوفوا لدعاء..
لعند ماوصلوا داخل..
لقوا البنات واقفات ع انوار يسلموا عليها..
شبه عرفوا شن في..
واماني زادت تأكدت لما سألت وحده خاطمه:خيرها انوار؟
البنت:انقرت امس فاتحتها هي واستاذ رشاد..
اماني:اها..
ومشت البنت..
والبنات قعدوا يشبحوا لدعاء ومن بينهم اختها..
دعاء شدت دموعها بالسيف وقالت:وين نمشوا ناكلوا؟
سكينه بلعت ريقها وقالت:خل نمشوا غادي..
دعاء:هيا..
ومشت..وكلهم لحقوها...
🥀شدت دموعها بقوة..
وافرجت عنهم بعد ماروحت للحوش..
تحت البطانيه تبكي بقهرة والم...حست كأنه في شي كان ليها واتاخد منها.
دعاء..
امنيتي وحلمي..واول حب حبيته فحياتي..
احبطت بقوة...وكرهت نفسي وظروفي...حالة من الحزن والسوداويه عشت فيها وقتها خلتني نفقد الرغبه فالحياة بصدق..
🌻🌻🌻🌻
وعدت ايام صعبه ع دعاء وهي يوميا تشوف فيهم مع بعض يجيب فيها ويروح بيها وعلاقتهم ببعض كانت حلوة بالمرة وكل مرة تتخيل روحها مكان انوار في موقف تشوفه ليهم..
اما رويدا..
فخشت طول جو الكليه وانسجمت معاه ومن البدايه ركزت بس في قرايتها..
🌻طالعه من القاعه وهي تتكلم بالتليفون..
رويدا؛هاه دعاء وينك..ايه..باهي جاياتك..
نزلت التليفون وقعدت لاهيه بس ..
بعدين حولاته لما طاح قدامها بيرو..
طبست قاماته وعطاته لصاحبه بإبتسامه؛تفضل..
هو خداه..
وهي مشت وعيونه عليها...
عاجباته من اول مرة شافها فيها فالكليه لكن هي ماكانتش منتبهتله نهائيا..
"آمين..بسرعه وقت ع محاضرتك"
استاقظ امين وقال بإبتسامه:نسيتها بكل..
ضحك ومشي للقاعه اللي بيعطي فيها..
وزميله مشت للقاعه اللي بتعطي فيها حتى هي...
🌻🌻🌻🌻
فهالوقت..
وصلت رويدا لباص الجامعه..
ركبوا هي واختها..
وتحرك الباص طول...
بعد نص ساعه وصلهم لفم الزنقه..
حدا محل مواد غذائيه..
كان في واحد واقف قدام المحل..
:بالله عطيني 20 طرف بريوش..
صاحب المحل:تمام..
وكيف جاي الراجل بيلتفت وهو يتكلم بالتليفون.
جو عيونه فعيون دعاء وهي نازله من الباص..
اللي جاه جاه الراجل..
تلقائيا قعد يمشي وراها...لين خشت الزنقه..
قعد يشبحلها هي واختها لين خشوا للحوش...
نزل تليفونه ومشي طول للمحل..
لقي صاحب المحل يراجي برا..
عطاه كيس البريوش وقال:تفضل..
عطاه الراجل حقهم وقال:تعرفهم بنات من اللي نزلوا توا من الباص..
صاحب المحل؛لاوالله ..
الراجل هز راسه وقال بإبتسامه:شكرا..
ولبس نظاراته ومشي لسيارته وهو يقول:تو نعرف بروحي...

...يتبع...
اليومين الجايات بإذن الله بناخد راحه مش حنزل لاني تعبانه شويه