"إلا أن يشاء الله"

الجزء السابع عشر

هدية تانيه💕
✒...
🗝وعدت باقي ايام الاسبوع لعند ماجي يوم الخميس كان اسبوع العرايس..
وبما ان رويدا سافرت..جت مروة بروحها وهي لابسه العربي البدله الكبيره وكانت طالعه فيها قمة في الجمال..
وجو معاها عزوزتها وحمواتها وسلفاتها..
مرت عليهم ليله حلوة دارت فيها جميله العشي من البضاعه اللي بعتها الياس مع الظهر لحوش اهل مروة..وقامت بواجب الضيافه ع اكمل وجه..
مااستمرتش مروة مقعمزة هلبه ع الكرسي في الصاله ناضت من مكانها وقعدت تدهور في حوشهم وكأن ليها السنين غايبه عنه..
في دار البنات..
مروة:الله قداش استاحشت دارنا..
دعاء بإبتسامه:كويس معاك الشيخ..
مروة ابتسمت وقالت:فوق ماتتصوري يادعاء حنين هلبه ويعامل فيا تقول بنته..
دعاء:باهي الحمد لله..
ع جية وفاق:هي تعالوا بنحطوا العشي..
مشت مروة طلعت هي الأولى ودعاء وراها..
خشوا الزوز للكوجينه...
مروة واقفه تراقب فيهم وهما يحوسوا ومرة مرة يهدرزوا عليها مرت عمها ناهد..شرقيه..خالتها وهي ترد بكل أريحيه وامها تراقب في ملامحها وطريقتها في الكلام حستها متريحه هلبه..وحتى دعاء كذلك
ومرت هديكا الليله حلوة زي ايام العرس بالزبط
دعاء..
كانت رويدا تبعتلنا يوميا ع فايبر صورها وهي فشهر العسل مرة بروحها ومرة مع راجلها واضح ان جوها كان مليح وماما لما توصلها صورة منها تجري بيها لبابا طول توريهاله وشويه ونسمع تعليقات بابا وضحكاته..
واستمرت تمر الأيام وفي كل يوم كنت نحس اكثر بالفراغ اللي خلوه مروة ورويدا وماقدرتش نتعود عليه..
وفاق قاعده معاي صح بس أغلب وقتها حابسه روحها في الدار وتقرا...
وامي اغلب وقتها يامع عمر تقري فيه يامع بوي تهدرز واني من الفراغ شادتها ياتلفزيون يافيس..
الفراغ..الكساد..خلاني ندور في صفحات صاحباتي ع الفيس ونشوف شن ينزلوا بدون مانكلمهم نبي نشوف حياتهم كيف ماشيه..
كانت ماشيه من نجاح لنجاح واستقرار تام..
كلهم تخرجوا..
وايات انخطبت وقريب عرسها..
وامال بدت تخدم..
بس اماني قاعده في الحوش مازال ماحصلتش مكان تخدم فيه وايات قالتلي خوتها مايبوهاش تخدم مافهمتش علاش!؟
وكذلك من الكساد دورت ع صفحة انوار مرت رشاد وياريتني مالقيتها ولاخشيتلها..
قلبي وجعني هلبه وحسيت صدري ضاق لابعد حد لما عرفت ان ولى عندهم زوز صغار وليد وبنيه..ولما خشيت ع حسابه هو صدري ضاق اكثر واني نشوف في نجاحاته المتواليه خدي الماجستير وبدي يخدم في مكان مهم في بريطانيا وكنت نشوف في مناشيره المتنوعه عن الدين السياسه الثقافه العامه..واللي زاد قهرني لما عرفت انه يدرس في القرآن غادي لصغار الجاليات والمسلمين الجدد..
قداش ناجح هالإنسان قداش مايشبه فارس احلامي اللي تمنيته..لا بل هو نفسه..لكن ربي ماارادش يكون من نصيبي اني..
طلعت من صفحته ودموع الخيبه والحسرة تسيل ع خدودي..
وللأسف زدت تحطمت أكثر وأكثر..حسيت بسواد كبير اجتاح محل نظري وصدري زاد ضاق هلبه هلبه..
ممكن لأني حبيت رشاد بصدق وتمنيته بتوق يكون زوجي وتفكيري فأن اللي وقف بيني وبينه مستواي الإجتماعي هدا كله خلاني نفقد ثقتي بنفسي تماما..
والأنسان اللي يفقد ثقته بنفسه يعتبر ميت مع وقف التنفيذ..
ااااه..
الفتور..الفتور في علاقتي مع ربي هو اللي خلا معدل ايماني يهبط هبوط تام..
علاقتي بربي كانت علاقه وصفها ينزل الدموع من العيون..
كنت محافظة ع الصلاة اكثر من محافظتي ع روحي..
الفجر هدا كانت تنوضني ليه ساعتي البيولوجيه..لامنبه مادي ولابشري..
قيام الليل قعدت مواظبه عليها كل ليله نوضلها فازة فزان..
نقول هي نوضي الموعد مع ربي جي وقته ربي توا نازل للدنيا يادعاء راك تفوتي هاللحظه..
كنت نصلي في السنن الرواتب وفي بالي ديما الحديث القدسي..
"من اتاني مشيا اتيته هروله" يعني ربي لما نمشوله خطوه هو يجينا بعشرة خطوات واكثر!
كنت نقرا في القرآن بعد كل صلاة وضروري نقراه كل يوم ضروري..
بش نقوت روحي
ايه الروح قوتها القرآن..زي ماقوت الجسم ماكله وشراب..
القرآن ماينقراش لكسب الأجر وبس..لابل اساسا هو روح لأرواحنا..مسكن لآلامها..مضمد لجروحها..مقوي ليها زي الفيتامينات للجسم بالزبط
كذب عليكم لو انقاللكم ان الراحه النفسيه في الطلعات والسوق او ع البحر او غيره..ايه هادي حاجات ممكن تروح عن النفس..لكن ماتقدرش تقوت الروح وتقويها..
بإختصار..
كنت عايشه في جنة ع الأرض..خسرتها في لحظه لما مريت بمرحلة الفتور..
مرة سمعت شيخ قال ان المؤمن ضروري يمر بمرحلة الفتور وان ايمانه لازم يمر بالتصاعد والنزول في المستوى..
وبش يقدر يتغلب ع هالفتور لازم يستعين بالله سبحانه بش يرده من جديد للي كان عليه..
بس الشيطان مع الأسف الباين اني غلبته وخليت هالفتور ابتعاد مستمر..
يعني وليت زي اي حد يصلي بش يأدي فرض وخلاص..
قيام الليل هدا معاش بديت نصلي فيه كان للحاجه الشديده وبس..
الفجر..واااه..ياحسرتي عليها..معاش بديت نصلي فيها فوقتها الا في رمضان بس لاني نكون ساهرة وقتها..
اصلا في رمضان صلاة الظهر تاخد في مكان صلاة الفجر في النوم عنها والغفله..
اما القرآن بديت نقرا فيه الجمعه ولا ولا كانش نفسيتي تعبانه بس..
شن هدا!!؟..شتان بين امس واليوم شتان...
وللأسف العجز مخليني مش قادرة نرجع زي ماكنت بكل..
العجز قاتل الله العجز اللي كان يتعوذ منه الرسول صبح ومساء وهو يقول..
"اللهم إني أعوذ بك من العجز"...
🥀🥀🥀🥀
"دعاء..الو"..
هادي كانت رويدا تكلم في دعاء مكالمة فيديو..
دعاء بضحكه:شن جو رودي..
رويدا بضحكه:الحمد لله تمام..انتم شن جوكم وين ماما؟
دعاء: ياماما..ماااماااا..
وشويه وجت جميله وهي تقول:خيرك؟!
دعاء:رويدا..
ابتسمت جميله ووقفت حدا دعاء اشرت لرويدا بيدها وقالت:رويدا بنتي شن حالك وحال عبدالله.
رويدا:الحمد لله ماما حالنا باهي..انتي شن حالك وحال بابا والكل؟
جميله:الحمد لله بنتي كلنا في خيار الخير..
رويدا:الحمد لله..شن جو مروة ؟.
جميله:اهو يوميا تكلم فينا حالها باهي حتى هي..
رويدا:منسجمه مع الشيخ..
دعاء:ايه تقول مرتاحه معاه هلبه...
رويدا:باهي الحمد لله..
جميله:خديتي ع قبرص؟
رويدا بإبتسامه:مازال شويه بس هي حلوة هلبه وتركيا مازال احلا اني فيها توا..
جميله ودعاء:اشيييه..
ضحكت رويدا بعدين قالت:تو تبعتلكم الصور..
جميله بضحكه:باهي..
رويدا:دودي..
دعاء بإبتسامه:نعم؟.
رويدا:نبي نطلب منك طلب..
دعاء:ادللي..
رويدا:وخيتي سلمها..دودي نبي منك تمشي للكليه لمكتب الدكتورة المشرفه متاعي تعرفيها..نبيك تعطيها الفلاش اللي عطيتهولك..
دعاء:غدوة قصدك؟.
رويدا:ايه..
دعاء:خلاص تو نقول لبابا..
رويدا:راكم تنسوا ضروري هلبه..
جميله:ماتخمميش بنتي...
فجأة...
"اوووو قبرصيه"
كان هدا مؤيد اللي خش عليهم الدار وهو كيف مروح من النادي..
كلهم ضحكوا..
رويدا باسلوب شبابي:اوووو أيودي!!
مؤيد:لالا ماتجيش هكي غلط..
وقعدوا يضحكوا ع مؤيد وهو مابطلش تعليقات مضحكه..
⚘⚘⚘⚘⚘
الساعه السابعه مساءا..
في السيارة حدا البحر..
كانوا مقعمزين ياكلوا في الشاورما ويشربوا في المشروب الغازي ويهدرزوا..
مروة:الجو حلو..
إلياس:لاحظتك تحبي الشتي..
مروة بضحكه:اممم..
ابتسم الياس وقال:مروة مكسده صح؟
شبحتله وهي ساكته..
الياس بإبتسامه:عارفك مكسده وحاسه بفراغ..لهالسبب بنقترح عليك اقتراح..
مروة بأنتباه:شن هو؟
إلياس:نبي ندخلك مدرسه سلفيه..وكذلك حلقة تحفيظ..
مروة ابتسمت بحماس وقالت:ياريت..
إلياس:يعني ماعندكش مانع..
مروة:معقوله بيكون عندي مانع ع حاجه زي هادي !!؟
ابتسم وقال:الحمد لله..
مروة ابتسمت بعدين قالت:الياس..
الياس:نعم..
مروة؛نبي نسحب افادتي..
الياس:اني تو نسحبهالك مادوريش..
مروة ابتسمت وقالت:مش عارفه علاش ديما يخوفوا فينا من الزواج بالراجل الملتزم كان كلهم عسل زيك توا..
الياس ضحك قريب شرق من الضحك بعدين قال متعجب:اني عسل!؟
مروة ابتسمت بخجل .
الياس بإبتسامه:ياستي ربي يجبر بخاطرك..تنهد وكمل يقول..الملتزم حق والسلفي حق يامروة هو اللي يخلي الرسول صلى الله عليه وسلم قدوة ليه في حياته كلها..صلي ع النبي..
مروة بإبتسامه:اللهم صل وسلم وبارك عليه..
الياس:الرسول قال"خيركم..خيركم لأهله..وانا خيركم لأهلي" واني ماشي في حياتي كلها بهالحديث وربي يقدرني ونطبقه كويس..وراهو بنقولك حاجه مهمه مش كل من اطلق لحيته وقصر ازاره وشد السواك انسان صالح..بل بالعكس مرات يكونوا اشر الناس..لان الدين المظهر من كمالياته الدين اساسه حسن الخلق يامروة..
ابتسمت مروة وقالت:اسلوبك حلو هلبه يخش القلب..
ابتسم الياس بإحراج وقال:مش عارف شن نرد عليك..غير اني والله سعيد هلبه وين نكون جنبك..
ضحكت مروة وقالت:حتى اني..
ابتسم وقعد يتأمل في عيونها وهي تشوفله بإبتسامه بعدين قالت:الياس خاطري نطلع نتمشى شويه..
الياس:حاضر..كملي عشاك قبل..
مروة:حاضر..
⚘وتعشوا مروة والياس..بعدين نزلوا تمشوا شويه..
وبعدها كملوا دورتهم في السيارة وروحوا مع آذان العشي حطها في الحوش ومشي طول للجامع..
⚘⚘⚘⚘
خليك متشجعه عاد...
رويدا:احلف انك ماتطلقنيش.
عبدالله بضحكه:ياعبيطه مهبول قالولك عليا!؟
رويدا بضحكه؛خايفه ماهو..
عبدالله:اني معاك..
ابتسمت رويدا وهي تشوفله..
عبدالله وهو يشبح القدام  قال:استعدي هي..
رويدا شبحت القدام وسمت بالله..
عبدالله:واحد..اتنين..تلاته..
وانطلق بيها وهما الزوز يتزلجوا ع الثلج ورويدا تعيط وعبدالله شادها كويس وهو يضحك عليها..
وشويه شويه تعلمت رويدا وبدت تتزلج بروحها شويه واطيح وترجع تنوض وعبدالله يشجع فيها..
وبعدين لوحت اللي في ايديها وبدت تحذف فيه بالثلج وتقول:هادي احلا..
عبدالله قعد يتفادى في كرات التلج وهو يقول:بطلي يامهبوله بطلي....
ورويدا تحدف وتضحك..
عبدالله:انتي هكي!؟ باااهي..
وبدي يحدف فيها وهي هربت تجري وميته ضحك..
⚘⚘⚘⚘⚘⚘
دعاء.
تاني يوم رفعني بابا مع الساعه عشرة ممكن الكليه..
لما وصلت غادي ونزلت حست بضيق شديد..ومع هدا خشيت داخل.
كان كل شي في الكليه متغير..نقصد الناس اللي فيها الوجوه كلها تغيرت واجيال جديد خشت للكليه...
كنت حاسة روحي عجوز كبيرة بيناتهم كلهم صغيرين..
المهم..
مشيت للمكتب متاع الدكتورة..لقيت المعيده اميمه صديقة رشاد حسيت نظراتها ليا غريبه بس تجاهلتها..
الدكتورة:تفضلي..
دعاء:اني اخت رويدا محمد سالم..
الدكتورة:اه رويدا بالله شن حالها؟.
دعاء:الحمد لله كويسه..
الدكتورة:عاد تزوجت وسافرت افتكت من هالبلاد..
دعاء ضحكت..
الدكتورة:بعتت معاك الفلاش؟.
دعاء مداته للدكتورة وقالت:هدا هو..
خداته الدكتورة وقالت:حلو..
دعاء:معاش تبي شي تاني؟
الدكتورة:حاليا لا بس لو صار واحتجت شي حنكلم رويدا.
ابتسمت دعاء وقالت:تمام..السلام عليكم..
الدكتورة وأميمه:وعليكم السلام..
وطلعت دعاء..مشت بطريقها للخارج وهي تحاول تتصل ببوهة لين تصادفت هي وزميله قديمه ليها..
:دعاء!
دعاء ضحكت وقالت:اسماء!..
وسلموا على بعض سلام حار بعدين قالت البنت:قالوا سيبتي حق!؟
دعاء ابتسمت بأسف وقالت:ايه..
اسماء:خسارة بجد مستواك كان ممتاز..
دعاء:هدا اللي صار..
ع خطمه اميمه من حداهم تبعتها اسماء بعيونها لين تباعدت بعدين قالت:بنقولك حاجه حاصله في قلبي ليا سنين..
دعاء بإستغراب:شن هي؟!..
اسماء تنهدت وقالت:نذكر من وقت طويل كنت فوق نقرا وصاحبتك اماني كانت غادي..وحتى اميمه المهم جت لاماني نشدتها عنك قالتلها اماني عاطيين فيها كلمه..
دعاء بصدمه:امتى!!؟.
اسماء:قبل لتنخطبي تقريبا..
دعاء قعدت تشوف لاسماء بصدمه..
اسماء:بعدين اني طلعت وطلعت بعدي طول اميمه طريقنا كانت وحده لين وصلنا لوطا وقتها تصادفنا بيكم راكبين..المهم شفت اميمه واقفه ع رشاد كان تذكريه وخشت في وذني لما قالتله مخطوبه..
دعاء..
ليكم انكم تتخيلوا الحالة اللي كنت فيها لما سمعت اللي قالاته اسماء..قريب متت بمعنى الكلمه كنت حنموت فعلا..
اسماء:مافهمتش الا اللي انتي فهمتيه..ممكن بعدها بفترة خطب رشاد انوار..واني قعدت نقول لروحي خسارة دعاء صاحبتها عفست فيها...
دعاء...
روحت يومها واني جثة مع بابا في السياره وعقلي طاير بالمرة مش قادرة نستوعب ولانصدق اللي داراته اماني فيا معقوله توصل بيها لهني معقوله!!؟ علاش يااماني شن درتلك شن ريتي مني!!؟ لكن ماعندي مانقول غير..
"حسبي الله ونعم الوكيل"
🌻🌻🌻🌻🌻
ومرت الايام..
وكانت الحياة مستمره..
بس دعاء كانت حالتها النفسيه تاعبه هلبه..غالبا ماتختلي بنفسها وفي خلوتها هادي لازم تذرف الدموع بش تروح عن روحها شويه..
لعند ما في يوم جاهم خبر طلعها من هالحاله..
⚘خشت جميله وهي تضحك ع البنات الدار وهما يتفرجوا ع التلفزيون..
جميله:يابنات..
شبحولها الزوز..
جميله بضحكه:مروة حامل..
شهقوا الزوز بفرح..
دعاء:الله!!
وفاق:بنولوا خالات!!
جميله بضحكه:وبنولي جده تخيلوا..
ضحكوا الزوز ع امهم..
وزي مافرح هالخبر جميله والبنات فرح حتى محمد لما حكتله جميله فرحته كانت بضحكه طويله..
دعاء...
لما سمعت ضحكة بابا حسيته وكأنه يبي يقول لروحه كبرت يامحمد خلاص..بصراحه الخبر هدا دخل ع قلوبنا فرحه اول مرة نحسوا بيها فرحة فريده من نوعها..
⚘⚘⚘⚘
"خيرك ماتاكليش رويدا"
قال عبدالله هالكلام وهو مقعمز مع رويدا ع طاوله في أحد المطاعم بقبرص..
رويدا تنهدت وقالت:مروة اختي حامل..
عبدالله ابتسم وقال:وعلاش انتي زعلانه؟
رويدا:لأني مجبورة مانفكرش في الموضوع هدا لبعد 6شهور..
عبدالله:معليشي حبيبتي بعد تناقشي مشروعك وترتاحي كله يجي..
رويدا ابتسمت وقالت:إن شاء الله..
عبدالله بإبتسامه:إن شاء الله..تعشي..
رويدا بإبتسامه:باهي..
وقعدوا يتعشوا ويهدرزوا ويحاول عبدالله يغير جو رويدا ببصارته ومواضيعه الفكاهيه..
⚘⚘⚘⚘
دعاء..
طبعا حياة خواتي ماكانتش ورديه تماما حياتهم عاديه زي كل الناس..حلو..ومالح...هههههههه..
يعني مروة بعد حملت كرهت حوشها وشبح وجه الشيخ الياس..
.........
مروة ببكي:ياماما بالله عليك فهميه مش بيدي والله مابيدي..
جميله بضيق:باهي ياماما باهي..
.......
جميله:معليشي ولدي فترة وتعدي اعذرها..
إلياس تنهد وقال:والله ماعندي مشكله غير تخليني لما نجي نشوفها بس نطمن عليها بس..
جميله بإبتسامه:ان شاء الله ولدي..
دعاء..
وقعدت عندنا مروة قريب شهر كامل وبعدين هداها ربي وروحت لحوشها.
اما رويدا..
راجلها ولى للعمل واصبح اغلب وقته برا الحوش في الخدمه..
.......
مكالمه فيديو..
جميله:ماك عارفه يارويدا يابنتي هادي طبيعة حياة راجلك..
رويدا بضيق:لكن اني مليت..
دعاء:ماحلك يارويدا! وبعدين انتي مش قلتي انه مسكنك في عمارة فيها عرب خلاص تعرفي عليهم وديري صداقات واشغلي روحك..
جميله:ايه صح..
رويدا تنهدت وقالت:تو نجرب..
دعاء..
وفعلا تصاحبت هي والعرب غادي ودارت علاقات وبدت حتى تطلع معاهم بروحها وتدهور وعبدالله عاطيها الحريه في كل شي من ثقته بيها واختي كانت قد ثقته..
واستمرت حياتهم هكي مرة راضيات مرة مضايقات مرة يمدحوا في رجالتهم مرة ينزلوا فيهم..وماما تنصح فيهم كل النصايح اللي تخليهم يكونوا مرنات في حياتهم ويتحملوا ويعرفوا يتصرفوا..
🌻🌻🌻🌻
بعد ستة اشهر..
الساعه 11:00صباحا..
طلعت دعاء من الحمام بعد ماكانت تكد فيه..
اول ماصكرت الباب شبحت القدام وشهقت بصوت عالي..
شافت رويدا واقفه مع جميله والزوز يشبحولها..
مشتلها تجري وهي تقول:ياقرده يارويدا..
وتلاقوا مع بعض وحضنوا بعض بقوة..
دعاء:حمد لله ع سلامتكم..
رويدا بضحكه:الله يسلمك يارب.
دعاء:حيوانه علاش ماقلتيش..
جميله بضحكه:مفاجأة ياحنه..
دعاء:واحلى مفاجأة...
⚘واتصلوا بمروة وخبروها ومروة بعد ساعه كانت عندهم..
خشت للحوش رفعت خمارها ومشت بسرعه خاشة داخل..
وصلت في الدار جو عيونها ع رويدا مقعمزة شهقت وقالت:رويدا..
ورويدا ناضتلها وهي تضحك..
وحضنوا بعض بقوة بعدين بعدت رويدا وحطت يدها ع بطن مروة وقالت:ياروووحي..
ومروة تضحك بخجل..
وقعمزوا تقعميزة ايام زمان..
وع هدرزة عن احوال بعض..وضحك وبصاره..شويه وخشوا عليهم مؤيد ووفاق مروحين من الجامعه..
مؤيد:اوووو قبرصيه..
وناضتله رويدا وهي تقول:أيووودي..
ضمها وضربها ع ظهرها وهي تضحك..
بعدها سلمت عليها وفاق بالاحضان ..
وانضموا لهدرزتهم..
دعاء..
ولحق عموري حتى هو وماطلقش رويدا بكل من فرحته بيها..
المهم..
دارت ماما رز بالبصله مبدع..واني درت طاجين جبن يجنن واهو حاجه سريعا ترحيبا بيهم..
تغدوا نساباتنا عندنا..وحني التمينا ع الصفره من اول وجديد زي زمان..
جميله:ايه عرس اختها الأسبوع هدا..
رويدا:ولت وصار منها..
جميله:ياحنه خدمت في مدرسة خاصه ومنها جاها النصيب اكيد بيجيها هكي..كان بتقعد حابسه روحها في الحوش من بيدورها..
دعاء"لقحي ياجميله لقحي"
مروة:حتى رنيم بنت خالتك بعد ماخدمت حصلت عريس
رويدا:ماقتوليش!!
جميله:اول امس بس فضانيتها واني معاش حصلتك بش نحكيلك..
رويدا:باهي ربي يهنيهم ويتمم ع خير..
دعاء..
اخت ناهد عرسها الاسبوع هدا..ورنيم الله اعلم امتى ماقالولنا شي..
المهم مشوا امي ومروة ورويدا لعرس اخت ناهد يوم الكسوى
مروة طلعت بالشرقاوي تهبل وهي حامل ..اما رويدا لبست البدله الصغيره وطلعت فيها خيال..
اني قعدت في الحوش مع وفاق يومها..
اما يوم الحفله مشينا كلنا..
جتها حفلة حلوة هلبه...بس لاحظت ان ناهد كانت فرحانه اكثر منها..
وطبعا لازم يحسسوني بالنقص لاني قاعده يعني لما نضت رقصت..اللي هادي قعدت تقولي "عقبالك"..
اوفففف..وخلاص..
⚘⚘⚘⚘⚘
وجي يوم مناقشة رويدا لمشروعها..
حضروا امها وخواتها ماعدا مروة..وريمه اخت عبدالله..
بعدين لحقوا عبدالله ومؤيد..
ورويدا وهي تناقش كانت واثقه من نفسها وثابته وعجبت الأساتذة اللي كانوا يناقشوا فيها ومشروعها كذلك كان مميز..
واخيرا..نجحت رويدا في مشروعها بتقدير جيد جدا..
واول مانزلت قابلتها جميله وحضنوا بعض..
جميله دمعت بفخر..ورويدا بفرح...وعبدالله يشوفلها وهو مبتسم فرح بيها..
دعاء...
واني فرحتلها وغرت منها في نفس الوقت..وانبت نفسي هلبه لأني ضيعت هالفرحه وحرمت منها نفسي واهلي معايا..
🗝بعد يومين مباشرة سافرت رويدا لقبرص..
بسبب خدمة راجلها مع الاسف مش حتقدر تحضر حتى جياب مروة وهدا اكثر شي خلاها تروح وهي مضايقه..
🌻🌻🌻🌻
وبعد تلاته شهور..
جابت مروة بنيه زي العسل دخلت ع العيله فرحه لاتوصف اول حفيده ليهم..
وقداش هالحفيده ماادلعت بالهدايا اللي جتها من كل حدب وصوب..
ومش بس هي..حتى امها..
يوم السبوع..
في دار النوم..
مروة خشت ورا الياس وهي تقول:خير الياس..
الياس بإبتسامه:نبي نقولك انك طالعه زي الشمس بقفطانك هدا..
ضحكت مروة بخجل..
الياس بضحكه:الشمس خير من القمر ع فكرة راهو..
ضحكت مروة وقالت:باهي ياشيخ كان هدا ماعندك خل نطلع الناس تراجي فيا..
الياس ابتسم ومشي فتح الدولاب وطلع منه علبه مجوهرات..
فتحها ووراهالها..
كان فيها طاكم فضة حلو بالمرة..
مروة بدهشة:تي غير علاش ياإلياس بس..
الياس:اياااه عاد مروة شن قتلك قبل اني!؟
مروة بضحكه:باهي شكرا ياشيخي العسل..
الياس:هههههههههه..
⚘ولبست مروة الطقم وطلعت بيه زي ماطلب منها الياس وكل من شافه عليها مدحلها جماله عليها وذوق راجلها..
وجميله حبت حركة الشيخ الياس هلبه وحست انها حركة كبيرة منه بالذات قدام اهلها...
⚘⚘⚘⚘
قبرص..
في الطريق..
رويدا بضحكه:الحمد لله ياربي الحمد لله..
عبدالله بضحكه:قوليلي اختك شن سمت بنتها ترا؟
رويدا بضحكه:سمتها مارية..
عبدالله:وحني بنسموا بنتنا نبأ..
رويدا:ومن قالك بنت..
عبدالله:ان شاء الله تجيني بنت زيك..
رويدا:ههههههه..
وعبدالله يضحك بعدين ولع المسجل وعلى الصوت وقعدوا يغنوا هو ورويدا مع الاغنيه وهما في قمة الفرح بخبر حمل رويدا..
وهالخبر وصل لليبيا..
ويالا فرحة جميله وبناتها بيه عيلتهم بدت تكبر وتزيد والأحفاد اجمل اضافه في أي عيله...
دعاء..
شهر نوفمبر..كان عرس بنت خالتي رقيه رنيم..
وقعدت نخمم فيه من قبل مايبدا عارفه روحي ياما بنسمع وبنشوف من تلقيح وكلام يحرق الدم..
وجي العرس ومشيت وكنت نشوف في رنيم كيف رافعه خشمها تقول خدت جائزة نوبل..
كانت تتعامل مع الكل عادي ماعدانا اني ووفاق..حتى اختها المتزوجه تستكرد فينا ماعرفتش علاش..
مروة اختي ماحضرتش لانهم دايرين منظومه في ايام العرس كلهم..والله وقتها تمنيت لو كنت مكانها وماحضرت لهالخنقه..
المهم..يوم الحفله..
كنت نسمع من اغلب اللي نعرفهم بنبرة شفقه..
"عقبالك يادعاء" "ان شاء الله تلحقيها" "ان شاء الله العام الجاي نفرحوا بدعاء ياجميله" وياناري عليك ياجميله ياأمي مجبورة تسمع الكلام المسم زيي وتبتسمي غصب عنك وتجاملي..وداخلك يعلم بيه ربي..
🥀معاش تخليها تتشرط ياجميله خشت 28 عام راهو..
جميله:فرقة حالها بنتي وين تتشرط هي رضت بالهم والهم مارضاش بيها..
رقيه:مش معقوله كلهم ماينفعوش ياجميله..غير انتم مخلينها براحتها في الجديد شدوا عليها خير مايفوت عليها القطار..
جميله تنهدت بضيق وقالت:ان شاء الله..
دعاء..
مش بس خالتي رقيه اللي قالت هالكلام حتى وان كان قصدها تغيظ امي وتحرق دمها..في ناس تانيه قالوا لامي نفس الكلام..عاد اني عندهم في وضع الخطر قربت نخش التلاتين خلاص وبنات العيله كلهم تزوجوا واني بس اللي قعدت واكيد بتبدا تطلع عليا الدوة..
اللي يقول مسحورة..
واللي يقول عندها التابعه..
واللي يقول هادي اشبح شن عندها..
وياما يقولوا..ياما..هدا مجتمعنا هادوا حني هادي المرأة الليبيه ياساده....
🗝وهالشي خلا جميله تزيد تقلق ع بنتها وتفكر فيها هلبه..
وقريب كل يوم تهدرز لرويدا ومروة عن مخاوفها اللي تخص دعاء..
وهالشي خلاهم يحملوا همها معاها..
ومروة بالذات حملت هم اختها اكثر منهم كلهم..
إلياس:هي عندها مواصفات معينه تبيها؟.
مروة وهي ترقد في بنتها:راجل يخاف ربي بس..
الياس:اممم..باهي في واحد معاي في العمل قداش ليه يدور ويقولي شوفلي من الناس اللي تعرفهم..مافكرتش في خواتك قبل هكي بس مادام دعاء اختك فيها كل المواصفات اللي تبيها تو نهدرز عليه قبل ونرد عليك..
مروة:باهي من هو شن سماه؟..
الياس:شن دخلك بيه انتي!؟
مروة بضحكه:نبي نعرف بش نقول عليه لماما..
الياس ضحك بعقدة حواجب بعدين قال:اسمه رضوان..لكن هاه ماتقولي لامك عنه شي لين نهدرز عليه ونشوفه ان شاء الله..
مروة ابتسمت بقلق وقالت:ان شاء الله..
دعاء..
وآاااه ياراجل اختي ياريت لاسعيت ولاتكلمت ولاشفت...

....يتبع....