"إلا أن يشاء الله"

الجزء السادس عشر

✒..
شهر اكتوبر 2016..
"ايوه محمد.....انقرت!؟......باهي باهي"
وصكرت وهي تقول بضحكه:انقرت الفاتحه..
وعلت اصوات الزغاريد في الحوش..
زغاريد خوات جميله..وسلفاتها..وحمواتها..وبناتها ماعدا هي..
اللي هي العروس...مروة..
اللي جوها وقعدوا يسلموا عليها ويهنوا وهي ترد عليهم بإبتسامة خجوله..
دعاء..
الشيخ إلياس اصر انه يقرا الفاتحه قبل فالأسبوع اللي يسبق اسبوع العرس..واضح انه كان يبي يكلم مروة قبل الزواج وطبعا بابا ماشافش ان في مانع يخليه يرفض طلب الشيخ وهو وافق..
🗝وجابوا الدربوكه وبدت وفاق اللي شاطرة في ادربيك ادربك وهما يغنوا ويصفقوا..
مافي حد فهاللحظه كان فرحان قد جميله..
واخيرا فرحت بدت تفرح ببناتها وتطمن عليهم بالوحده..
وبعد شوط دربوكه..
بدوا يوزعوا في العصير والشكلاطه..والنسكافيه والحلويات وهما في قمة الفرح..
رنيم "بنت رقيه خالة دعاء":ايه دعاء خبرينا مافيش مواضيع..
دعاء..
هي توا تبي تحس ان حالي من حالها اصغر منها اليوم انقرت فاتحتها لازم تحس ان في حد زيها..
دعاء بضحكه:اخر موضوع قولي عليه اخر نكته.
ضحكوا امها وخواتها...
رقيه:علاش خيره!
شرقيه بضحكه:تي هو نكته بس استغفر الله وخلاص..
ضحكت دعاء ضحكه تخفي بيها قهرة محبوسه داخلها..
⚡فلاش باك..
وحده من خواته:قبل المقابله الشرعيه في حاجه ضروري تعرفيها..
دعاء وجميله قعدوا يشبحولهم باستغراب..
وخوات العريس شبحوا لبعض..
بعدين وحده فيهم تكلمت وقالت:هو خوي راجل ماشاء الله عليه واخلاقه اللهم بارك وانشدوا عليه من تبوا..لكن راهو
"سمين"
اخته قالت الكلمه الاخيره وهي توصف فيها بالحركات..
دعاء جمدت وهي تشوفلهم..
وجميله قالت بإبتسامه مرتبكه:كيف يعني سمين زيكم توا يعني!؟
كانوا خواته مليانات شويه وهادي الصفه اللي كانوا يشتركوا فيها ومالاحظتهاش دعاء من البدايه..
دعاء..
لأنها بصراحه مش ملحوظه هلبه يعني كانوا مليانات مقبولات وكان خوهم مليان زيهم ماكانش عندي مشكله يعني هو راجل اكيد حيكون طويل ووزنه متوزع ع طوله اكيد..مافيش مشكله يعني..هكي فكرت وقتها..
اخته ردت على جميله تقول:ايه زينا..شويه..
جميله:لايعني كان هكي يعتبر عادي..
وشبحت لدعاء..
دعاء ابتسمت وقالت:ايه..
وحده من خواته قالت:ع العموم في مقابله شرعيه وتو تشوفيه وبعدها تقرري..
دعاء بإبتسامه:إن شاء الله..
..........
دعاء:حسيته عادي كان زيهم..
رويدا :خواته عيونهم ملونات..
جميله : الكبيره عيونها رصاصيات.
مروة وهي مبتسمه:حاسه خوهم بيطلع قنين هلبه..
دعاء..
ابتسمت لما سمعت كلام مروة خواته صح نقشهم قنين وبيض وعيونهم ملونات غير مليانات بس..وقعدت نتخيل في شكل خوهم ورسمت هلبه صور ليه حلوات في بالي..
بس مع ذلك كلام خواته عن مسأله الوزن وملامح الارتباك اللي كانت ع وجوههم خلتني مش مستريحه هلبه..
🗝وعدت الأيام وجي يوم المقابله الشرعيه..
كانوا كالعاده واقفات في الكوجينه..
ولما وصلوا الناس..
وقفوا فوق بعض يشوفوا من فتحة باب الكوجينه الخارجي..
شافوا مؤيد فتح الباب..
طلع برا..
خشت اخت العريس..
بعدين شويه..
خش مؤيد وكان باين عليه شاد ضحكته..
بعدها خش العريس..
دعاء..
عليك موقف عمري ماننساه موقف مش عارفه كيف نوصفه ان شاء الله ربي يسامحني وخلاص..يعني اللي خش كان عبارة عن كورة كبيرة من اللحم والشحم تدرج دحرجه استغفر الله يارب اغفرلي يارب..سمين بشكل غير مقبول بتاتا..بتاتا..كان لابس هركه ومطوله شعره ممكن بش يدرق انعدام وجود الرقبه في جسمه..لانه سمين هلبه..
🗝طول دعاء وخرت وهي مصدومه لابعد حد..
وخواتها احرف منها..
وفاق:هدا شنو ياربي استغفر الله!
رويدا:من جدهم جايين يخطبوله هدا !!
مروة بإستياء:لاحول ولاقوة الا بالله..مش عارفه شن نقول..
دعاء..
واني سرحت نفكر ونقول لروحي قصدي علاش اني هكي يصير معاي مافهمتش الحاجه الباهيه مايصيرش منها من قبل ماتوصل..وماتوصل فيا كان الحاجه...استغفر الله..
دعاء بعد صمت طال لفترة قالت:ان شاء الله عند ربي خير يارب..
ومشت طلعت من حداهم..
هما شبحوا لبعض بعدين لحقوها..
وين وصلوا الدار لقوها تلبس في العبايه..
رويدا:قصدك بتوافقي!؟
حطت دعاء الوشاح ع راسها وقالت:طبعا لا..
رويدا زفرت وقالت:خلعتيني..
وفاق:عرفت علاش خشوا فاضيين في المرتين عارفين مش صاير منه...
ضحكوا البنات وضحكت معاهم دعاء غصب عنها..
⚘وجي الوقت اللي تطلعله فيه دعاء..
طلعتله وخشت قعمزت ع اعصابها.
تقول مقعمزة ع مسامير..ومرة مرة تشوف لمؤيد اللي كان يحاول يغلب ضحكته بكل قوة..
دعاء..
كان يكلم فيا يسأل واني يدوب يرد..مش طايقه نقعمز نبي نطلع مافيش داعي اصلا لهالمهزله من اصلها..هو الراجل حسيت اني عجبته ع الآخر..ويقولي اللي تبيه اني فيه ولو في حاجه ماعجبتنيش نحاولوا نتفاهموا عليها بعدين..
الحق يارب اسلوبه راقي جدا..لكن عيبه صعب جدا..بل مستحيل التغاضي عنه..
ماطولتش هلبه طول طلعت من حداهم..
🗝مشت للدار طول وخواتها لحقوها..
مروة:مافيشي امل بكل!؟
دعاء:نهاااائي استغفر الله مقعمز ع الوطا بسبب وزنه مش قادر يربع رجليه مقعمز ركبه ونص..
ضحكوا البنات ومروة تقول:استغفر الله العظيم..
دعاء..
ربي ان شاء الله ماآخذنيش وقتها يعني مش قصدي نعيب ع خلقه..بس هدا عيب لايمكن التغاضي عنه بكل..
.........
"دعاء يادعاء"
شويه وخشت دعاء للصاله..
لقت امها واخت الشاب واقفات قدامها..
اخته:مش حنسألك على شي توا فكري كويس..ولو وافقتي اتصلي ولو مافيش نصيب ماتتصلوش حني نفهموا برواحنا..
جميله هزت راسها وهي مبتسمه بمجامله وقالت:ان شاء الله..
دعاء بنفس الإبتسامه:ان شاء الله..
⚡الوقت الحاضر..
دعاء:ولااتصلنا ولادورنا وهدا اللي صار..
ضحكوا..
وحده من خالاتها:غير علاش يمشوا حياش الناس ويخطبوا وهما عارفين عيب ولدهم صعب وحده ترضى بيه..
شرقيه:في ناس يرضوا عادي ويعطوا المهم يفتكوا..
رقيه:ايه صح..
حطت شرقيه فنجان النسكافيه وقالت:تعرفي شن عرفت المده اللي فاتت يادعاء؟
كلهم ركزوا ع شرقيه.
دعاء:شني؟!
شرقيه:اسعد..
ارتسمت ع وجه دعاء ملامح الضيق لما سمعت اسمه..
جميله:خيره!؟
شرقيه وهي توزع في نظرها بين دعاء وجميله:طلع متزوج بنت سلف حماتي..
جميله وبناتها اندهشوا..
شرقيه:خداها من عام هكي..ومسكينه عايشه عيشه سودا نودا..
دعاء فتحت عيونها ع وسعهم..
شرقيه:تزوج خوه قبله خوه السكير وبعد 4شهور طلقها وين ينشدوهم الناس ع السبب يقولوا شلافطيه ماتعرفش تلبس ديما شادتها عبايات وجلاليب..اما بنت سلف حماتي مسكينه عايشه معاهم زي الخدامه بالزبط حكومة خواته هي اللي ماشيه حتى في لبسها متحكمين..يركبوا لشقتها يقعدوا امتى يبوا وياخدوا شن مايبوا وهي ماتقدر تقول حرف..
ولما فكرت تعترض مرة مسكينه خلوه يرفعها لحوش اماليها..
فهالعام حرج تلاته مرات وفي مرة حملت واجهضت من النكد مسكينه وتوا تفكر تطلق..
شبحت دعاء لأمها ورويدا لقت وجوههم في لون تاني..
بعدين قالت:سبحانك ياربي معناها الحلم اللي حلمته كان رؤيه..
اغلبهم باصوات متقطعه قالوا:حلم شنو؟!..
وحكتلهم دعاء الحلم وهما يسمعوا ويسبحوا في الله واللي هادي تقول افتكيتي يادعاء..ربي نجاك..
وجميله كانت تحمد في ربي في نفسها وتذكر في اللي داراته لدعاء لما فسخت واضايقت من روحها هلبه..
دعاء..
هدا من تكرار صلاة الإستخاره صليتها لعند اخر لحظه وصار اللي صار وربي فكني من هالنكبه السودا..اااه..ماكنتش نعرف ان اللي جاي مازال اسوأ..
⚘⚘⚘⚘⚘⚘
أصوات زغاريد تعالت في الحوش..
هو سمعها طلع  من دار النوم يجري ومشي للصاله..
لقي مرته مقعمزة قدام اللاب توب وتزغرد..
سألها بتعجب:شن في!؟
هي ردت تقول..
"جمال خدي الماجستير"
خش وهو يقول بإبتسامه فرح:ماشاء الله ماشاء الله..قعمز جنب مرته وشبح للاب وشاف نسيبه وقال:مبروك ياغالي عقبال الدكتوراة..
جمال بإبتسامه:اللهم آمين..شن حالك يامنصور..
منصور بإبتسامه:الحمد لله الامور ميه ميه وكل شي تمام.
جمال:كويس الحمد لله..
نجلاء:جملو روح بالله عليك..
ابتسم جمال بضيق وقال:مازال شويه..
نجلاء:لامتى ياجمال!؟
منصور :خلي خوك ع راحته..
نجلاء تنهدت بضيق..
جمال:اهم الشباب اتصلوا بنطلع..نكلمك وقت تاني..سلام..
وصكر..
منصور بإستياء:بكل يانجلا انتي.
نجلاء دموعها نزلوا وقالت:استاحشته هلبه يامنصور حتى الصغار ديما ينشدوا امتى يروح خالو جمال..
منصور بضيق:فاهم عليك يانجلا لكن حتى انتم راعو حالة خوكم واضح لتوا مأثر فيه وفاة عمتي الله يرحمها مازال يبي زيادة وقت..
ونجلاء حطت ايديها ع وجهها وقعدت تبكي بالعبره..
ومنصور قعد يطبطب عليها وهو متأثر..
 ⚘⚘⚘⚘⚘
الساعه 8:30مساءا..
مقعمزين في دار المعيشه يشربوا في الشاهي اللي دير في عالته عيشة عمة البنات وسط اجواء فرح حلوة وهدرزة وضحك..
وجميله في الكوجينه اطيب في العشي مع وحده من خواتها..
شويه رن تليفونها مشت ردت عليه..
ولحظات..وكانت خاشه لدار المعيشه..
جميله بإبتسامه:مريوة..
كلهم سكتوا وشبحوا لجميله مع مروة..
جميله:راجلك جاي بعدين شويه..
مروة تفاجئت..
واللي فالدار بدوا يناشبوا فيها وهي تضحك بخجل..
شويه وناضت للدار التانيه توتي فروحها..
لقت فيها رويدا تكلم في عبدالله..
رويدا:مش مستعجل بس شكله يبي يكلم خطيبته قبل العرس..
عبدالله:تعرفي رويدا عنده حق..مكالمتنا اني وياك توا غلط..
رويدا:حتى اني كنت نفكر هكي..
عبدالله؛باهي مادام هكي شن رايك اني وياك معاش نكلموا بعض ليوم الفاتحه..
رويدا شبحت لمروة اللي تساوي في شعرها ع المرايه وقالت:ايه تمام..
عبدالله بضحكه:هانت مازال عشرة ايام..
ورويدا ضحكت بعدين قالت:باهي بنصكر توا عبدو ونتكلموا تاني ان شاء الله يوم الإثنين.
عبدالله تنهد وقال:وربي يصبرني..
ضحكت رويدا وهو ضحك..
وشويه وانهت المكالمه وهي تشوف لمروة كيف تحط في مكياج خفيف قالت؛شن في؟!
مروة بإبتسامه:إلياس جاي..
رويدا بدهشة:الله!!
مروة:هههههه..
رويدا:نحسبوه يبي يهدرز ع التليفون بس!!مايطلع منه الشيخ..
ومروة تضحك..
ع خشة وفاق وهي مبتسمه:الشيخ وصل..
مروة ارتبكت وتوترت وهي تقول:حيي حقه!!
ورويدا ووفاق يضحكوا عليها..
⚘في المربوعه
كان موجود الشيخ إلياس مع مؤيد..
لابس زبون لونه زيتوني وطالع انيق..
جاب معاه شكلاطه راقيه..وصفرة بكلاوة..
وجاب معاه حاجات تانيه خلاهم عنده..
هدرز شويه هو ومؤيد..لين طق الباب..
مؤيد استاذن وناض..
وإلياس يمسح ع لحيته وهو متوتر بعض الشي..
ع خشة مروة وهي تقول:السلام عليكم..
لما شافها ارتسمت ع وجهه ابتسامه حلوة بالمرة رد عليها وهو يقول:وعليكم السلام..
مشت مروة قعمزت جنبه بس بمسافه بعيده..
هو ضحك وناض خدي الحاجات اللي جايبهم وقعمز جنبها بس مش بالزبط كانت تفضل بيناتهم مخده.
الياس:مبارك ..
مروة ابتسمت خجلا وقالت:الله يبارك فيك..مبارك عليك حتى انت..
الياس بإبتسامه:الله يباركلي فيك..ويباركلنا في بعض ويهب لنا ذرية مباركه ان شاء الله...
مروة بصوت يدوب طالع:ان شاء الله..
الياس:أسأل الله انه يقدرني ونسعدك وتعيشي معاي مرتاحه وراضيه...
مروة:حتى اني..
ضحك ع نبرة صوتها الخجوله بعدين مدلها وردة وقال:حاجه من قيمتك..
ابتسمت مروة وخدتها منه وقالت:شكرا..
بعدين مدلها علبه شكلاطة "ميرسي" وقال:تحبوا الحاجات هادي انتم..
ضحكت مروة وخدتها وهي تقول:شكرا..
بعدين ابتسم وطلع علبه صغيره متاع ساعه ومدهالها وقال:لما شفتها تخيلتك لابستيها..
هي شبحتله وقالت:علاش هدا كله الياس مش لازم والله..
الياس :خودي مروة..
خدتها مروة وهي تشوفله..
الياس ابتسم وقال:ردي بالك مروة تانيه نجيبلك شي وتقولي مش لازم..قولي شكرا او كليمه حلوة..
ضحكت مروة بخجل..والياس يتامل فيها وهو مش مصدق كيف ربي اكرمه بزوجه جميله وصغيرة في السن وتبان عاقله زي مروة..
قعدت في نفسه يحمد في ربي مرات ومرات..
دعاء..
وطولت قعدة مروة والشيخ ..وحني حسيناها بايخه تطويلتهم هادي ومريوة انسجمت شكلها ههههه...ماعرفناش شن نديروا لكن وحده من خالاتي خطرت عليها فكره مش عاديه..
:اهو آذن..خل نحطه هني..
حطت خالتهم الهاتف ع الطاوله حدا المربوعه وتطبيق الآذان اشتغل على آذان صلاة العشاء..
واللي حواليها يضحكوا بصمت..
وبعد لحظات طلعت مروة وهي حامله ومحمله وابتسامه مشرقة ع وجهها الجميل..
رنيم:اشيه اشيه..
رويدا:والله ماهوين هالشيخ..
ضحكت مروة وقعدت توريلهم فالهدايا..وتحكيلهم شن هدرزوا وهما يسمعوا واللي تعلق واللي تناشب في مروة واللي يدعيلها بالهني..
وهي كانت فرحانه ومرتاحه ع الآخر..
دعاء..
كان من احلا الايام اللي مرت علينا ..ليلتها روحوا كلهم..
وقعدنا نعاودوا لماما في كل شي صار..قداش كانت فرحانه واني فرحانه زي واكثر واخيرا فرحت بدت تفرح بينا..
🌻🌻🌻🌻
ويمر هالأسبوع..
كانت فيه رويدا منقطعه عن عبدالله الا بالرسايل كيف حالك..حالي باهي وخلاص هدا مابيناتهم..
عكس مروة والشيخ اللي فاجئها بخفة دمه وروحه الحلوة فاجئها هلبه وخلاها تعجب بيه وترتاحله اكثر واكثر..
وبعدت ماعدت هالأيام..
جي اسبوع العرس..
ويتلقوا فيه اجمل الأخبار..
اللي لما عرفوها..استقبلوا بيها محمد وهو مروح من عمله طول..
رويدا بفرح:بابا صفيت موادي كلهم كملت خلاص ومعدلي عالي يابابا..
مروة:بابا خلاص كملت مذكرة مشروعي قبلوها وخديت تقدير ممتاز عليه يابابا..
غمض محمد عيونه بشده وقال من وسط قلبه..
"الحمد لله"
دعاء..
قريب بكيت وقتها..بس قهرا ع نفسي اللي ماكنتش سبب في فرحة بابا هادي..بابا اللي تعب بش وصل مروة ورويدا لهاللحظه حس ان نجاحهم نجاحه وان تعبه ماراحش ع فاضي..ماعدا معاي اني..غرت هلبه من خواتي وقتها والله ماغرت منهم في حياتي الا هداكا الوقت..
⚘⚘⚘⚘⚘
وبدي العرس..
نصبوا الخيمه في الجنان نهار الاحد..
ويوم الاحد روح عبدالله..
وانقرت فاتحه رويدا وعبدالله يوم الإثنين حتى الشيخ إلياس حضرها وتعارفوا هو وعديله وكل واحد فيهم اعجب بالتاني وارتاحله طول..
اما في حوش محمد..
فكانت الدنيا مقلوبه..
دربوكه..غني زغاريط وهياجه..
وجميله كانت ترقص مع مروة ووريدا في نص الخيمه والكل يغني..
حني وادينا وادي لوز..حتى عرايسنا بالزوز...
دعاء..
يوم الحمام..اللي هو ع اساس يعني يوم الحمام بس طبعا مامشوش خواتي للحمام لانه شرعا محرم..لكن مشوا للمزينه اللي حاجزين عندها..
اهتمت ببشرتهم..وظوافرهم وايديهم وبس..
وبعدين بدت تلبس فيهم البودري..
اني وقتها كنت نصور ونزل ع الفيس فسوابيت البودري وماإلى ذلك وجوي مش عادي عكس مالناس تنظرلي بنظرة شفقه وحسرة لان خواتي خدوا قبلي..مؤمنه تمام الإيمان انه كله نصيب وان ربي هكي يبي ولااعتراض ع ارادته..وفرحتى لخواتي لاتوصف..تقول بناتي مش خواتي..
المزينه بعد مالبستهم البودري قالت لدعاء:هي زغرطي..
وزغردت دعاء وعيونها معبيات دموع فرح..
وخواتها يشبحولها وهما مبتسمات ودموعهم فعيونهم..
بعدين جتهم وقعدت تحضن فيهم بالوحده وتهني وهما يحضنوا فيها بقوة ودموعهم تنزل..
لحظات اثرت حتى في صاحبة المزين والعاملات اللي معاها..
⚘⚘⚘⚘
واتصلوا بمؤيد..
جاهم بسيارة واخدها من واحد صاحبه
وروح بيهم ووراه ولاد خالاته وولاد عماته ..
حتى نصري وابراهيم اللي كانوا مقهورين ع الآخر..
دارو اغلب شوارع طرابلس وهما يكلكسوا..
والردي  البودري يطير ع السيارة اللي فيها العرايس..
وقبل يوصلوا للحوش..
سبقوهم ابراهيم ونصري اللي قلبوا الدنيا بالألعاب الناريه ويعلم الله بالنار اللي والعه في صدورهم وهما يشوفوا في رويدا نازله من السيارة ولابسه البودري..
خشوا العرايس الزوز..
وبدت الدربوكه والغني والزغاريد..
وجميله وشرقيه يبخروا في الوشق وهما يغنوا..
وصلوا البنات في جميله..
خدت منها ناهد البخاره..وقعدت تحضن في بناتها بالوحده وتبارك وهما يحضنوا فيها ودموع الفرح فعيونهم..
جميله وهي تغني..
زوز عرايس ياسعدودي..والحنة حنة عبودي..
وقعدوا يغنوا فيها..
واختها رقصت العرايس وامهم...
وقعدوا يغنوا..
وقولوا ياالله عليهم..ياماشاء الله عليهم..
دعاء..
وفي الليل درنا سهريه حلوة حلوة ماننسهاش هديكا الليله..
واليوم اللي بعده كانت الكسوة..وعاد جونا زوز كساوي..
وطبعا كانت الاجواء مش عاديه..اول كسوة جتنا كسوة مروة ودرنالها السبر واهل الشيخ الياس قلبوا الدنيا..
بعدهم مباشرة جت كسوة رويدا..وعاد بدت المقارنات والحاجه هدا ضايقتني وقلت للكل..
"كلهم خير وبركه...وياريت ماتقولوش الكلام هدا قدامهم"
وحتى وحده من عماتي وخالاتي ايدوا كلامي واللي عندها كلمه بلعتها..وطبعا قصدي ع خالتي رقيه وعمتي شرقيه ومرت عمي المهدي ليلى اللي مش عاجبها شي..
المهم..ريمه واهلها قلبوا الدنيا بشتاوة وحني فتحنا معاهم جمعه..
عمتي خيريه القايد متاعها وخالة ريمه القايد متاعهم..
ومانحزت الا بالسيف..هههههههههه..
وماما مسكينه تجري ع غداهم كلهم رجاله ونساوين يدوب حضرت شويه وبعدين قعدت تجري...
والليله نفسها حنوا العراس..ياااه عليك ليله من احلا الليالي شتاوات واغاني وبوطويل وضحك وبصارة وجو مش عادي..
⚘⚘⚘⚘⚘
يوم الحفله..
مشت دعاء مع خواتها للمزين..
قعدت مقعمزة فتره تتفرج عليهم كيف استلموهم المزينات وبدوا فيهم..
وقعدت هكي...لين لبسوهم الفيلوات قبل يبدوا في التسريحات..
دعاء:تهبلوا من توا الله يبارك..
رويدا بضحكه:متوتره هلبه..
دعاء بإبتسامه:طبيعي..هي افتحي فمك..
وبدت تغدي في اختها..وتوكل فيها في الرز بالخلطه اللي بعتاته جميله مع مؤيد..
ع طلعة مروة وهي لابسه الفيلو..
دعاء:ياعمري تهبلي ماشاء الله..
رويدا:عطيك الهني فرخه مروة في جمالك..
قعمزت مروة بمساعده العامله وهي تقول:والله حتى انتي تجنني..هيا دعاء وكليني جعانه..
رويدا:مش متوترة!؟.
مروة بضحكه:الحق لا..
ضحكوا البنات..
دعاء بضحكه:هي افتحي فمك..
وبدت توكل مرة في هادي ومرة هادي..
لين جتها المزينه وقالت:خلاص وقت..
دعاء:لحظه..
وعطت كل وحده فيهم مسكته حاره...ومشت حتى توتي في روحها..
وبعد ساعه ومعاها..
جهزوا العرايس...
دعاء وهي ضامه ايديها لرقبتها قالت وعيونها يلمعوا بالدموع:الله يبارك عليكم ربي يحميكم يارب.
اقروا ع ارواحكم اقروا..
وهما يشوفولها بإبتسامة حب بدوا يقروا..
وهي مشت جابتلهم شيشة مية الرقيه وشربت كل وحده فيهم..
مروة:مازال؟
دعاء وهي ادس في الشيشه :انتي بيجيك عمي علاء ومعاه ناهد..ورويدا خالي عماد ومرته ملاك..
فجاة رن تليفون دعاء..
شافت المتصل قالت للعامله:بالله لبسي مروة كابها..شبحت لمروة وقالت..عمي علاء..
ومشت دعاء ترد..
وبدوا يلبسوا في مروة كابها..
شويه وخشت ناهد..
وطلعت هي ودعاء مروة بعدين ولت دعاء لرويدا..
ولحظات وجي خالهم عماد..
ولبسوا رويدا كابها...
وخشت مرته وطلعوا رويدا..وطلعت دعاء البضاعه كلها..
وركبت معاهم..وتوكلوا للصاله...
⚘⚘⚘⚘⚘
دعاء..
لما وصلنا لمحت بابا قدام الصاله..كان يأشر للسيارات تخش..
قعدت نشبحله هلبه..تأملت فيه ونقول لنفسي زعما بابا توا مرتاح ولاقلق..فرحان اللي فرح بخواتي ولا خايف عليهم ويفكر في حياتهم الجايه كيف حتكون مع ازواجهم..
ممكن قعدت نفكر هكي لاني لاحظت ملامح تانيه غير ملامح الفرح ع وجه بابا..
ممكن لأن الأب مش بالساهل يسلم في بنته لراجل تاني يتولى امرها..عكس الام اللي هكي ترتاح عليها..
🗝خشوا العرايس بعد ماساعدوهم فالنزول العم والخال ونساوينهم..
ودخلوهم لدار العروسه..
كانوا موجودين هما بس مع دعاء..ع خشة وفاق.
وفاق وهي مبتسمه بإعجاب:تهبلوا طالعات ملكات ملكات ماشاء الله.
ابتسموا الزوز وهما يشوفولها..
بعدين قالت رويدا:انتي العسل يابنتي شنو هدا..
ضحكت وفاق وقالت:حق!
مروة بإبتسامه:والله ماشاء الله هدا وين حسيتك كبرتي حق..
وفاق بإمتعاض:اننننن..
ضحكوا عليها بعدين قالت دعاء:مؤيد جي؟
وفاق:ايه..
مروة:بالله زيد نبهي عليهم قوليلهم بنخشوا ع زفة حسين الجسمي..
وفاق:ان شاء الله..
دعاء..
هبلنا فيها الزفه لما سمعناها في عرس شرقيه وقت خشتها دخلها ابراهيم وقتها كانت مؤثرة هلبه الحق...
المهم..
خشت علينا ناهد وقالت..
"استعدي رويدا"..
🗝وناضت رويدا ودعاء ووفاق  يساعدوا فيها...
ع جية مؤيد..
وقف في الباب وقال:دعاء..
دعاء:خش مؤيد خش..
ناهد كانت بحجابها..
خش مؤيد وشاف خواته ابتسم وقال:بسم الله ماشاء الله..الله يبارك..
ضحكوا خواته..
رويدا بضحكه:حتى انت طالع طرف..
ضحك مؤيد بإحراج وقال:هي تعالي..
وطلعت وفاق تجري بش تكلم المراة اللي شاده المنظومه..
ورويدا تعنقت بذراعها ذراع مؤيد..
وفتحت دعاء الباب ع مصرعيه مع ناهد..
ناهد:هيا..ومؤيد امشي بالشويه بالشويه..
ضحك وقال:حاضر..
في القاعه..
انطفت الإضاءة كلها وقالت المسؤوله ع المنظومه
"العروسه بتخش"..
وولعت زفة حسين الجسمي..
الكل توجهت انظارهم للمدخل اللي عليه إضاءة السبوت لايت..
وخشوا مؤيد ورويدا..
ووراهم دعاء وناهد..
كلهم انبهروا في رويدا...وهي من تحسر عليها...
أمل:ماشاء الله ع مؤيد كيف راح..
ليلى:ايه طويل وعريض وقنان هلبه..
كانت فهاللحظه عيون بنت وحده من خالاته اتبع فيه وهي متفاجئة بيه كيف راح..
دعاء..
مؤيد خوي ماعنداش في جو البنات بكل ولاعنده خلطه بنساوين وبنات العيله هلبه منهم مايعرفوش شكله من سنين وهالشي خلا هلبه يتفاجئوا بيه وين شافوه فالصاله...وحتى هو خوي طرف ههههه..
المهم درت بعيوني في المعازيم شفت امل قلت واخيرا تواضعت ست الحسن وجت..وفقدت ازدهار مناسبات العيله كلهم فاتوها..وتفاجئت لما شفت اخت ناهد من عمري حتى هي كانت نشوف لرويدا ودموعها فعيونها زي حالاتي عطل نصيبها..
بعدين شفت رنيم نظراتها لرويدا هي وامها يالطيف مش قادرين يدرقوا..
🗝ووصل مؤيد بأخته للكوشه..
وقعدت رويدا واقفه..
ومؤيد مشي ووراه دعاء بش يطلعوا مروة..
هالمرة لقوا عندها شرقيه..
مؤيد:دورك انتي..مش عارف كيف بنعيش من غيرك من يحددلي ويديرلي ماناكل ويخيطلي ويغسلي شخاشيري من بعدك..
كلهم ضحكوا بس مروة تضحك ودموعها شادتهم بالسيف..
تعنقت بذراعها ذراع خوها..
وطلعوا..
ووراهم دعاء وشرقيه..
وكذلك خشت مروة ع نفس الزفه..
كانت مروة طالعه جميله جدا بزياده..
في ناس هلبه من الحضور تحسروا اللي فلتت من ايديهم بنيه زيها..
ووصلها مؤيد ووقفها جنب اختها..
دعاء:اوقف في نصهم مؤيد خل نصوركم..
ووقف مؤيد وهو يقول:حاضر..
وخدتلهم دعاء صورة..
بعدين مشي طلع بسرعه...
دعاء..
ماما وين من هذا كله..كانت في مطبخ الصاله حاصله..
طلعت بعدين وشافتهم ع الكوشه..دموعها غلبوها شفتها وهي تمسح فيهم..
🗝مشت جميله لبناتها ..
جميله:ماشاء الله ماشاء الله..شربتكم اختكم مية الرقيه؟
الزوز هزوا روسهم بإيجاب..
جميله:تغديتوا ولا؟.
الزوز ضحكوا وهزوا روسهم بإيجاب..
جميله ابتسمت وقالت:كويس
بعدين نزلت تسلم ع الناس اللي جو متأخر..
⚘⚘⚘
وبدت اجواء الحفله...وكانت من حلوة بالمرة..
واحلى شي لما رقصوا العرايس مع بعض وعمتهم عيشه تخمس عليهم وخلاص..
وبعد هالوصله..
وبعد التصوير..وبعد العشي..
حان وقت الرحيل..
واول من جي عبدالله اللي حلف ماهو خاش ع قد مادارت فيه اخته ريمه..
دعاء..
طلعنا حني وبنات العيله بش نشوفوه من ورا باب مرش مانابنوش منه حني..
كلنا عجبنا عبدالله ع الآخر..وركزت ع رنيم كانت تحرق وهي تشوفله..نصيبات يارنيم وكل حد ياخد اللي ربي قاسمهوله..
🗝لحظات..
وطلعوا خوات عبدالله رويدا بعد لبسوها كابها ورويدا طلب منهم يقولوا لخواتها مايطلعوش قدامها ماتبيش تبكي..
دعاء..
وطلعت رويدا لصاحب النصيب اللي قريب طبها وطار بيها..
ولحقوهم..
عمتي عيشه وحده من نساوين عمامي وخالة من خالاتي..
وشويه..وجي الشيخ الياس..
وطلعوا مروة حتى هي ومشت مع صاحب نصيبها..
ومشوا معاهم خالتي رقيه وعمتي شرقيه وناهد ومرت خال بابا بيرفعها ولدها اسمه "محي الدين"
ووفاق كانت تبي تمشي بس مالحقتش الا ع سيارة محي..
مرت خال محمد:وفاق..تعالي..
وفاق شبحتلها ومشت جيهتها..
مرت خال محمد:اركبي معانا..
وفاق بربكه:مانبيش نسبب احراج مش لازم نمشي..
مرت خال محمد:لااحراج لاشي هي اركبي..
ع جية عمتها خيريه:بنمشي معاكم هي اركبي وفو هي..
ركبت خيريه وجت ورا مرت خالها..
وانجبرت وفاق تركب ورا محي..
ركبت وصكرت الباب..
خيريه:شن حالك يامحي..
محي الدين بإبتسامه؛والله الحمد لله..شن اخبارك انتي..
خيريه:الحمد لله..
شبح محي للمرايه وتحرك..
جو عيونه فعيون وفاق هي فيسع غيرتهم..
اما هو تلخبط هلبه وشبح القدام وقعد يسوق ومرة مرة يشبحلها وهي تشبح للروشن بس..
⚘⚘⚘⚘
دعاء..
بعد روحوا خواتي مع رجالتهم..غمرتي حزن لايوصف بس مابكيتش..لعند ماسمعت خالتي تنادي فيا مشيت جري لقت ماما مغمى عليها في القاعه..
فيقناها وحني مرعوبين..
فاقت لكن دموعها ماوقفوش..
يقولوا طلعة البنت من حوش اهلها واعره..والله واعره وهلبه..
ااااه..هديكا الليله روحوا الاقارب اللي لحقوا العرايس وهما يحكوا ع الزفات كيف كانت..ع استقبال اهل العرسان لخواتي الحمد لله كل شي مشي ع احسن مايكون وامي ارتاحت هلبه وين سمعت شن قالوا...
وعدت هديكا الليله اللي رقدنا فيها بعد صلاة الفجر وحني نهدرزوا ع الحفله..
واليوم اللب بعده بدينا بالجهاد..نضموا في الحويسه..
واليوم اللي بعده..الصبح روحوا اقاربنا كلهم ماقعد حد...
وبدينا نحسوا بالفقد واكثر من حس بيهم خوي عمر اللي بكي هلبه وهو يذكر فيهم ويقول..
"علاش خليتوهم يمشوا علاش خليتوا رويدا تمشي"
هههه..متعلق بيها هلبه..
والعشيه..
فاجئتنا رويدا بجيتها..
في الصاله..
معناها خلاص بتمشوا غادي.
رويدا ابتسمت بأسف وقالت:ايه..طيارتنا بعد ساعه..
دعاء:توصلوا بالسلامه يارب..
رويدا:آمين..
عمر:اقعدي معانا رويدا..
رويدا بحزن:مانقدرش عموري..
عمر ناض ومشي بسرعه من حداهم..
قعدت ادمع رويدا ودعاء وجميله يشوفولها بحزن..
شويه..
ومشت رويدا للمربوعه وين مافي راجلها مع بوها ومؤيد..
وخشت جميله سلمت عليه بعدين نادوا على دعاء
لبست ملاية الصلاة وهي محرجه ومشت للمربوعه..
سلمت ع راجل اختها بالكلام وهو سلم عليها وهدرزوا شويه..
عبدالله:هيا رويدا..وناض..
وناض معاه رويدا..مشت لبوها..
ضمها محمد وهو يقول:ردي بالك ع روحك وع راجلك بنتي عارفك قدها..
رويده بنبرة مخنوقه:ان شاء الله بابا..وبعدت شويه باست ايديه وراسه..
بعدين مشت ضمت مؤيد..وهو اللي باس راسها..
بعدين سلمت ع دعاء بالأحضان والزوز دموعهم تنزل..
وبعدها امها اللي ضمتها بقوة وقعدوا يبكوا وفكهم عبدالله فك عن بعض وهو يبصر معاهم لين خلاهم يضحكوا..
بعدين سلم ع الجميع وطلع هو ومرته..
طلعت وفاق سلمت ع اختها لما عبدالله طلع برا الحوش بكل..
وبعد هالوداع طلعت رويدا مع مؤيد من الحوش وركبت سيارة راجلها وتسقدوا...
دعاء..
ليلتها قعدت سهرانه بروحي في الصاله..
حست بالفراغ الكبير اللي خلوه رويدا ومروة..واعره هلبه طلعة الزوز في مرة...هدرزت اني وآيات ع الفايبر واني نبكي..بعدين قعدت مع روحي نفكر..
اهوا خواتك يادعاء كملوا قرايتهم واستقروا..وممكن غدوة تلحقهم وفاق حتى هي..وانتي قاعده في مكانك يادعاء حياتك واقفه حظك عاثر..نصيبك واقف..
لعند امتى يادعاء لعند امتى هالحال!؟
وماكانش في اجابه ع هالسؤال غير البكي نبكي وبس ع مستقبلي اللي ضيعته وسعدي الطايح وعقلي الرايح..
بكيت وبكيت وبكيت واني عاجزة حتى اني نفكر نغير شي للأسف كنت عاجزة تماما من داخلي محبطه ومتحطمه تماما مش قادرة نلم شتات نفسي ولاقادرة نرجع نوقف ع رجلي من جديد وهدا اكثر شي كان قاهرني..
بس يعني لعند امتى..لعند امتى يادعاء بس....؟؟!
وبرضو مالقيتش عندي اجابه ع هالسؤال....

......يتبع......